Genesis 7
7
Natunaw nga matuud i banwa
[Mga 2319 B.C.]
1Iyan naꞌman na, inaat nat AMPUꞌANG DIYUS si Noe, “Manled kamu nang muꞌsa nga sang anakan asat sakayan ngayan, sabap kat muꞌsang taw asat sinirungat langit, ikaw lamang i mataldeng kat panleteg ku. 2Kada kalasi it ramu-ramu nga mapakay nga ipagsamba mi sinit aken, misiꞌ kat tagpipitung batu, babay, lalaki naga.#7:2 Magꞌaat i kat Hinebreo nga ampang, pitung batu, babay, lalaki, ega pitung kaꞌasawaan. Aypaꞌ may tulung kaꞌasawaan. Siguru, pagꞌargan it ikapitung ramu-ramu, isamba duꞌun it Ampuꞌang Diyus. Temed iyan beken nga mga kalasi, tagasang kaꞌasawaan lamang i pisiꞌen mu. 3Pati mga manu-manuk, tagpipitung batu i pisiꞌen mu, babay, lalaki. Ikargaꞌ mi na isaꞌun muꞌsa ngaytu, may maꞌped naga nga yanagay panggaring-garingan it dumakel naga i situt banwa. 4Atkaytuy buwaten mu sabap, kapitu mana kayti, paꞌuranen ku na, baw maꞌlay yan nga uranan ka epat nga pulung aldaw baw delem. Atkaytu nay kaꞌlay ka puuꞌun ku i muꞌsang maginawa situt sinirungat langit nga giyuna ku.”
5Ta, muꞌsa ngayting inaat it AMPUꞌANG DIYUS, siyunud nga muꞌsa ni Noe.
6Magꞌidad na si Noe it enem nga gatus nga taꞌun pagꞌabut it iting luyud kat sinirungat langit. 7Ta, egay beken, nanled na na Noe, puꞌsa sira magꞌaꞌanak, pati mga asawa nira, isaꞌun maribri naga kat magꞌaꞌabut ngayti nga luyud nga tumunaw it banwa. 8Kat muꞌsang ramu-ramu baw manu-manuk, iyan nga mapakay nga ipagsamba baw ega, 9nagsigꞌabut na sirang muꞌsa duꞌut sakayan ngayti ka siminled na, kumpur inaat it Ampuꞌang Diyus it ki Noe. Kada kalasi, nagꞌasawa i miyabut. 10Desang matuud nga nakapitu, miyabut nay luyud nga ikiyaꞌampung na it muꞌsang banwa.
11Miyabut i itiꞌen ngayti, iyan magꞌidad na si Noe it enem nga gatus nga taꞌun, nga kat ikadwang bulan it iting taꞌun, baw kat ikasang puluꞌ may pitung aldaw it bulan ngayti. Miyukaꞌ nay ega teꞌe-teꞌeng nga mga pagtumbudat danum baw atnat ipaglamaꞌ nga danum i seleg it uran. 12Miyuran it seledat epat nga pulung aldaw baw epat nga pulung delem.
13Kat iti nagang aldaw, nga miyabut nay luyud, nagpasakay na si Noe baw mga anak ya ngayting si Sem, si Cam baw si Jafet, pati mga asawa nira. 14Duꞌun na gasiꞌ it sakayan i kada kalasit ramu-ramu. Dedekeyeꞌ baw dadakulaꞌ, magpanaw, magkambang baw mamagkalayug, magkagnek baw ega, duꞌun nang muꞌsa. 15Tagduwa-duwa kat muꞌsang maginawa i miyabut baw nagpasakay. 16Muꞌsa ngayti, may babay, may lalaki, ka yay ipiyagꞌaat it Ampuꞌang Diyus it ki Noe. Iyan duꞌun na sirang muꞌsa it seled it subuk baul ngayti, isiniradu nat AMPUꞌANG DIYUS i talaꞌep.
17Seledat epat nga pulung aldaw, talagang dimnakulaꞌ na nga dimnakulaꞌ i luyud, pagꞌaꞌampungun nay muꞌsang banwa. Limintaw na i pagsasakayan na Noe. 18Talagang miyararem nay danum, aypaꞌ buwat it pagsasakayan nira ngayti, maglutaw-lutaw na lamang. 19Dimnakulang matuud i danum, diyanuman nang muꞌsa i banwa. Kamatuudan, nalipen i maski abwatay nga bukid kat palelkep it banwa. 20Limang tindeg i kaꞌararem it danum kat siyagpawan it mga bukid. 21Egay beken, natay i muꞌsang maginawa kat sinirungat langit. Egay naꞌped, ramu-ramu, manu-manuk, pati taw. 22Nalmes sira nga muꞌsa. 23Talagang piyuuꞌ it Ampuꞌang Diyus i muꞌsang may ginawa kat sinirungat langit. Yamanay naꞌped, si Noe baw mga kaꞌibaan ya ngayti duꞌut sakayan. 24Kimnaꞌlay talaga i danum kat sagpaw it lugtaꞌ, inabut it sang gatus baw limang puluꞌ nga aldaw.
বর্তমানে নির্বাচিত:
Genesis 7: TBWONT
হাইলাইট
শেয়ার
কপি
Want to have your highlights saved across all your devices? Sign up or sign in
© 1992, Wycliffe Bible Translators, Inc. All rights reserved.
