ꠁꠘ꠆ꠎꠤꠟ ৩: ꠟꠥꠇ 18
18
ꠘꠤꠞꠣꠡ ꠅꠁꠅ ꠘꠣ, ꠢꠣꠝꠦꠡꠣ ꠝꠥꠘꠣꠎꠣꠔ ꠇꠞꠅ
1ꠝꠥꠘꠣꠎꠣꠔꠞ ꠛꠦꠙꠣꠞꠦ ꠡꠣꠉꠞꠤꠖ ꠅꠇꠟ ꠘꠤꠞꠣꠡ ꠘꠣ ꠅꠁꠀ ꠢꠣꠝꠦꠡꠣ ꠎꠣꠔꠦ ꠝꠥꠘꠣꠎꠣꠔ ꠇꠞꠂꠘ, ꠅꠈꠣꠘ ꠛꠥꠎꠣꠘꠤꠞ ꠟꠣꠉꠤ ꠁꠍꠣꠄ ꠄꠇ ꠇꠤꠌ꠆ꠍꠣ ꠢꠥꠘꠣꠁꠟꠣ। 2ꠇꠁꠟꠣ, “ꠇꠥꠘꠥ ꠄꠇ ꠐꠣꠃꠘꠅ ꠄꠇꠎꠘ ꠢꠣꠇꠤꠝ ꠀꠍꠟꠣ। ꠄꠁꠘ ꠀꠟ꠆ꠟꠣꠞꠦꠅ ꠒꠞꠣꠁꠔꠣ ꠘꠣ, ꠇꠥꠘꠥ ꠝꠣꠘꠡꠞꠦꠅ ꠔꠅꠀꠇ꠆ꠇꠣ ꠇꠞꠔꠣ ꠘꠣ। 3ꠢꠃ ꠐꠣꠃꠘꠅ ꠄꠇ ꠠꠣꠠꠤ ꠛꠦꠐꠤ ꠀꠍꠤꠟ। ꠅꠃ ꠛꠦꠐꠤꠄ ꠀꠁꠀ ꠢꠣꠝꠦꠡꠣ ꠔꠣꠘꠞꠦ ꠇꠁꠔ, ꠢꠣꠇꠤꠝ ꠍꠣꠛ, ꠀꠝꠣꠞꠦ ꠖꠥꠡꠝꠘꠞ ꠀꠔ ꠕꠣꠇꠤ ꠛꠣꠌꠣꠃꠇ꠆ꠇꠣ, ꠖꠄꠀ ꠇꠞꠤ ꠅꠃ ꠘꠤꠀꠎ꠆ꠎ ꠛꠤꠌꠣꠞꠈꠣꠘ ꠇꠞꠃꠇ꠆ꠇꠣ। 4ꠁ ꠢꠣꠇꠤꠝꠦ ꠇꠄꠖꠤꠘ ꠇꠥꠘ꠆ꠔꠣ ꠇꠁꠟꠣ ꠘꠣ। ꠛꠣꠖꠦ ꠝꠘꠦ ꠝꠘꠦ ꠇꠁꠟꠣ, ꠀꠝꠤ ꠔ ꠀꠟ꠆ꠟꠣꠞꠦ ꠒꠞꠣꠁ ꠘꠣ, ꠝꠣꠘꠡꠞꠦꠅ ꠔꠅꠀꠇ꠆ꠇꠣ ꠇꠞꠤ ꠘꠣ, 5ꠅꠁꠟꠦ ꠁ ꠠꠣꠠꠤꠄ ꠀꠁꠀ ꠔ ꠢꠣꠝꠦꠡꠣ ꠍꠣꠔꠣꠄ, ꠅꠈꠘ ꠅꠉꠥꠞ ꠘꠤꠀꠎ꠆ꠎ ꠛꠤꠌꠣꠞꠈꠣꠘ ꠇꠞꠤꠟꠣꠁ। ꠘꠣꠁꠟꠦ ꠔꠣꠁ ꠀꠁꠀ ꠛꠣꠞ ꠛꠣꠞ ꠍꠣꠔꠣꠁꠛ।”
6ꠛꠣꠖꠦ ꠢꠥꠎꠥꠞꠦ ꠇꠁꠟꠣ, “ꠖꠦꠈꠟꠣꠄ ꠘꠤ, ꠅꠃ ꠘꠣꠚꠞꠝꠣꠘ ꠢꠣꠇꠤꠝꠦ ꠇꠤꠔꠣ ꠇꠞꠍꠦ? 7ꠔꠦ ꠎꠦꠞꠣ ꠢꠣꠝꠦꠡꠣ ꠖꠤꠘꠦ-ꠞꠣꠁꠔꠦ ꠀꠟ꠆ꠟꠣꠞ ꠉꠦꠍꠦ ꠇꠣꠘ꠆ꠖꠦ, ꠀꠟ꠆ꠟꠣꠄ ꠇꠤꠔꠣ ꠔꠣꠘ ꠁ ꠝꠣꠄꠀꠞ ꠛꠘ꠆ꠖꠣ ꠅꠇꠟꠞ ꠢꠇ ꠚꠞꠤꠀꠖ ꠢꠥꠘꠔꠣ ꠘꠣꠄ ꠘꠤ? ꠔꠣꠁꠘ ꠢꠥꠘꠔꠦ ꠇꠥꠘꠥ ꠀꠞ ꠖꠦꠞꠤ ꠇꠞꠛꠣ ꠘꠤ? 8ꠀꠝꠤ ꠇꠁꠞꠣꠝ, ꠔꠣꠁꠘ ꠎꠟꠖꠤ ꠇꠞꠤꠃ ꠄꠞꠣꠞ ꠢꠇ ꠚꠞꠤꠀꠖ ꠢꠥꠘꠛꠣ। ꠅꠁꠟꠦ ꠀꠝꠤ ꠛꠤꠘ-ꠀꠖꠝ ꠖꠥꠍꠞꠣꠛꠣꠞ ꠎꠦꠛꠟꠣ ꠁ ꠖꠥꠘꠤꠀꠔ ꠀꠁꠝꠥ, ꠢꠃ ꠡꠝꠄ ꠖꠥꠘꠤꠀꠔ ꠇꠥꠘꠥ ꠁꠝꠣꠘ ꠙꠣꠁꠝꠥ ꠘꠤ?”
ꠚꠞꠤꠡꠤ ꠀꠞ ꠈꠣꠎꠘꠣ ꠔꠥꠟꠞꠣꠞ ꠖꠥꠀ
9ꠎꠦꠔꠣ ꠝꠣꠘꠡꠦ ꠘꠤꠎꠞꠦ ꠈꠥꠛ ꠙꠞꠦꠎꠉꠣꠞ, ꠀꠞ ꠛꠣꠖ-ꠛꠣꠇꠤ ꠢꠇꠟ ꠝꠣꠘꠡꠞꠦ ꠢꠥꠞꠥ ꠝꠘꠅ ꠇꠞꠔ, ꠢꠎꠞꠔ ꠁꠍꠣꠄ ꠔꠣꠞꠣꠞꠦ ꠅꠃ ꠇꠤꠌ꠆ꠍꠣ ꠢꠥꠘꠣꠁꠟꠣ। 10ꠇꠁꠟꠣ, “ꠖꠥꠁꠎꠘ ꠝꠣꠘꠥꠡ ꠖꠥꠀ ꠇꠞꠣꠞ ꠟꠣꠉꠤ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠉꠦꠟ। ꠄꠞꠣꠞ ꠄꠇꠎꠘ ꠚꠞꠤꠡꠤ ꠖꠟꠞ ꠀꠞ ꠖꠥꠍꠞꠣ ꠎꠘ ꠊꠥꠡꠈꠥꠞ ꠈꠣꠎꠘꠣ ꠔꠥꠟꠞꠣ। 11ꠚꠞꠤꠡꠤ ꠛꠦꠐꠣꠄ ꠀꠟꠉꠣ ꠃꠛꠣꠁꠀ ꠅꠃꠟꠣ ꠖꠥꠀ ꠇꠞꠟ, ꠅ ꠀꠟ꠆ꠟꠣ, ꠀꠝꠤ ꠔꠥꠝꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠞꠣꠝ, ꠀꠝꠤ ꠔ ꠡꠝꠣꠎꠞ ꠝꠣꠘꠡꠞ ꠟꠣꠈꠣꠘ ꠘꠣꠚꠞꠝꠣꠘ, ꠎꠣꠟꠤꠝ, ꠀꠞ ꠎꠤꠘꠣꠇꠥꠞ ꠘꠣꠄ, ꠛꠣ ꠅꠃ ꠊꠥꠡꠈꠥꠞ ꠈꠣꠎꠘꠣ ꠔꠥꠟꠞꠣꠞ ꠟꠣꠈꠣꠘꠅ ꠘꠣꠄ। 12ꠀꠝꠤ ꠢꠣꠙ꠆ꠔꠣꠔ ꠖꠥꠁꠖꠤꠘ ꠞꠥꠎꠣ ꠞꠣꠈꠤ, ꠀꠞ ꠀꠝꠣꠞ ꠢꠇ꠆ꠇꠟ ꠞꠥꠎꠤꠞ ꠖꠡ ꠛꠣꠐꠞ ꠄꠇ ꠛꠣꠐ ꠔꠥꠝꠣꠞ ꠘꠣꠝꠦ ꠎꠇꠣꠔ ꠖꠦꠁ। 13ꠅꠁꠟꠦ ꠅꠃ ꠈꠣꠎꠘꠣ ꠔꠥꠟꠞꠣ ꠛꠦꠐꠣꠄ ꠖꠥꠞꠁ ꠃꠛꠣꠁ ꠞꠁꠟ, ꠀꠟ꠆ꠟꠣꠞ ꠀꠞꠡꠞ ꠛꠣꠄ ꠌꠃꠈ ꠔꠥꠟꠣꠞ ꠡꠣꠅꠡꠅ ꠔꠣꠞ ꠅꠁꠟ ꠘꠣ। ꠢꠦ ꠛꠥꠇꠥꠔ ꠝꠣꠞꠤ ꠝꠣꠞꠤ ꠇꠣꠘ꠆ꠖꠤ ꠇꠣꠘ꠆ꠖꠤ ꠇꠁꠟ, ꠅ ꠀꠟ꠆ꠟꠣ, ꠀꠝꠤ ꠛꠠ ꠉꠥꠘꠣꠉꠣꠞ, ꠀꠝꠣꠞꠦ ꠞꠢꠝ ꠇꠞꠅ।
14“ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠅꠃ ꠈꠣꠎꠘꠣ ꠔꠥꠟꠞꠣ ꠛꠦꠐꠣꠃ ꠙꠞꠦꠎꠉꠣꠞ ꠛꠘꠤꠀ ꠔꠣꠞ ꠊꠞꠅ ꠉꠦꠟ, ꠢꠤ ꠚꠞꠤꠡꠤ ꠘꠣꠄ। ꠀꠍꠟꠦ ꠎꠦ ꠘꠤꠎꠞꠦ ꠛꠠ ꠝꠘꠅ ꠇꠞꠦ, ꠔꠣꠞꠦ ꠢꠥꠞꠥ ꠇꠞꠣ ꠅꠁꠛ। ꠀꠞ ꠎꠦ ꠘꠤꠎꠞꠦ ꠢꠥꠞꠥ ꠝꠘꠅ ꠇꠞꠦ, ꠔꠣꠞꠦ ꠛꠠ ꠇꠞꠣ ꠅꠁꠛ।”
ꠢꠥꠞꠥꠔ꠆ꠔꠣꠁꠘ꠆ꠔꠞ ꠟꠣꠈꠣꠘ ꠛꠘꠤꠎꠣꠅ
15ꠝꠣꠘꠡꠦ ꠔꠣꠞꠣꠞ ꠢꠥꠞꠥ ꠢꠥꠞꠥꠔ꠆ꠔꠣꠁꠘꠞꠦ ꠟꠁꠀ ꠁꠍꠣꠞ ꠉꠦꠍꠦ ꠀꠁꠟ, ꠔꠣꠁꠘ ꠎꠣꠘꠥ ꠢꠥꠞꠥꠔ꠆ꠔꠣꠁꠘꠞꠦ ꠀꠔꠣꠁ ꠖꠤꠀ ꠖꠥꠀ ꠇꠞꠂꠘ। ꠁꠔꠣ ꠖꠦꠈꠤꠀ ꠍꠣꠢꠣꠛꠤ ꠅꠇꠟꠦ ꠝꠣꠘꠡꠞ ꠃꠙꠞꠦ ꠛꠤꠞꠇ꠆ꠔ ꠅꠁꠀ ꠘꠣ ꠇꠞꠟꠣ। 16ꠅꠁꠟꠦ ꠁꠍꠣꠄ ꠢꠥꠞꠥꠔ꠆ꠔꠣꠁꠘꠞꠦ ꠔꠣꠘ ꠇꠣꠘ꠆ꠖꠣꠔ ꠘꠤꠟꠣ, ꠘꠤꠀ ꠇꠁꠟꠣ, “ꠢꠥꠞꠥꠔ꠆ꠔꠣꠁꠘꠞꠦ ꠀꠝꠣꠞ ꠇꠣꠘ꠆ꠖꠣꠔ ꠀꠁꠛꠣꠞ ꠖꠦꠅ, ꠔꠣꠞꠣꠞꠦ ꠛꠣꠗꠣ ꠖꠤꠅ ꠘꠣ। ꠀꠟ꠆ꠟꠣꠞ ꠛꠣꠖꠡꠣꠁ ꠔ ꠅꠃ ꠘꠝꠥꠘꠣꠞ ꠝꠣꠘꠡꠞ ꠟꠣꠉꠤꠃ। 17ꠀꠝꠤ ꠢꠇ ꠇꠕꠣ ꠇꠁꠀꠞ, ꠢꠥꠞꠥ ꠢꠥꠞꠥꠔ꠆ꠔꠣ ꠛꠘꠤꠀ ꠀꠟ꠆ꠟꠣꠞ ꠡꠣꠡꠘ ꠘꠣ ꠝꠣꠘꠟꠦ, ꠇꠥꠘꠥ ꠎꠘꠃ ꠀꠟ꠆ꠟꠣꠞ ꠛꠣꠖꠡꠣꠁꠔ ꠢꠣꠝꠣꠁꠔ ꠙꠣꠞꠔ ꠘꠣꠄ।”
ꠢꠎꠞꠔ ꠁꠍꠣꠞ ꠉꠦꠍꠦ ꠄꠇ ꠗꠘꠤ
18ꠢꠎꠞꠔ ꠁꠍꠣꠞ ꠉꠦꠍꠦ ꠙꠣꠁꠘ꠆ꠌꠣꠁꠔꠞ ꠄꠇ ꠝꠥꠞꠛ꠆ꠛꠤ ꠀꠁꠟꠣ, ꠀꠁꠀ ꠇꠁꠟꠣ, “ꠅ ꠢꠇ ꠃꠡ꠆ꠔꠣꠖ, ꠀꠝꠣꠞꠦ ꠛꠣꠔꠣꠁ ꠖꠦꠃꠇ꠆ꠇꠣ, ꠇꠤꠔꠣ ꠇꠞꠟꠦ ꠀꠝꠤ ꠀꠈꠦꠞ ꠙꠣꠁꠝꠥ?” 19ꠁꠍꠣꠄ ꠇꠁꠟꠣ, “ꠀꠝꠣꠞꠦ ꠇꠦꠘꠦ ꠢꠇ ꠇꠁꠞꠣ? ꠈꠣꠟꠤ ꠄꠇ ꠀꠟ꠆ꠟꠣ ꠛꠣꠖꠦ ꠀꠞ ꠇꠦꠃ ꠢꠇ ꠘꠣꠄ। 20ꠀꠙꠘꠦ ꠔ ꠡꠞꠤꠅꠔꠞ ꠢꠥꠇꠥꠝ-ꠀꠢꠇꠣꠝ ꠎꠣꠘꠂꠘ,
ꠎꠤꠘꠣ ꠇꠞꠤꠅ ꠘꠣ।
ꠈꠥꠘ ꠇꠞꠤꠅ ꠘꠣ।
ꠌꠥꠞꠤ ꠇꠞꠤꠅ ꠘꠣ।
ꠝꠤꠍꠣ ꠇꠥꠘꠥ ꠡꠣꠇ꠆ꠇꠤ ꠖꠤꠅ ꠘꠣ।
ꠔꠥꠝꠣꠞ ꠝꠣ-ꠛꠣꠚꠞꠦ ꠁꠎ꠆ꠎꠔ ꠇꠞꠤꠅ।”
21ꠢꠤ ꠝꠥꠞꠛ꠆ꠛꠤꠄ ꠇꠁꠟꠣ, “ꠢꠥꠎꠥꠞ, ꠁ ꠢꠇ꠆ꠇꠟꠔꠣ ꠔ ꠢꠥꠞꠥꠝꠣꠘ ꠕꠘꠦꠃ ꠀꠖꠣꠄ ꠇꠞꠞꠣꠝ।”
22ꠁꠈꠣꠘ ꠢꠥꠘꠤꠀ ꠁꠍꠣꠄ ꠇꠁꠟꠣ, “ꠅꠈꠘ ꠈꠣꠟꠤ ꠄꠇꠈꠣꠘ ꠇꠣꠝ ꠛꠣꠇꠤ ꠀꠍꠦ, ꠀꠙꠘꠣꠞ ꠢꠇꠟ ꠗꠘ-ꠍꠣꠝꠣꠘꠣ ꠛꠦꠌꠤꠀ ꠉꠞꠤꠛ ꠅꠇꠟꠞꠦ ꠟꠤꠟ꠆ꠟꠣ ꠖꠤꠟꠣꠃꠇ꠆ꠇꠣ। ꠔꠦꠃ ꠀꠙꠘꠦ ꠛꠦꠢꠦꠡ꠆ꠔꠅ ꠗꠘ ꠙꠣꠁꠛꠣ। ꠛꠣꠖꠦ ꠀꠁꠀ ꠀꠝꠣꠞ ꠃꠝ꠆ꠝꠔ ꠅꠃꠇ꠆ꠇꠣ।” 23ꠁꠈꠣꠘ ꠢꠥꠘꠤꠀ ꠢꠤ ꠝꠥꠞꠛ꠆ꠛꠤ ꠈꠥꠛ ꠛꠦꠎꠣꠞ ꠅꠁꠉꠦꠟꠣ, ꠔꠣꠁꠘ ꠀꠍꠟꠦ ꠛꠃꠔ ꠛꠠ ꠗꠘꠤ ꠀꠍꠟꠣ। 24ꠔꠣꠁꠘ ꠛꠦꠎꠣꠞ ꠅꠁꠉꠦꠍꠂꠘ ꠖꠦꠈꠤꠀ ꠁꠍꠣꠄ ꠇꠁꠟꠣ, “ꠗꠘꠤ ꠝꠣꠘꠥꠡ ꠀꠟ꠆ꠟꠣꠞ ꠛꠣꠖꠡꠣꠁꠔ ꠢꠣꠝꠣꠘꠤ ꠛꠠ ꠝꠡꠇꠤꠟ। 25ꠗꠘꠤ ꠝꠣꠘꠥꠡ ꠀꠟ꠆ꠟꠣꠞ ꠛꠣꠖꠡꠣꠁꠔ ꠢꠣꠝꠣꠘꠤꠞ ꠌꠣꠁꠔꠦ, ꠍꠥꠁꠞ ꠘꠣʼ ꠛꠣꠄꠖꠤ ꠃꠐ ꠢꠣꠝꠣꠘꠤ ꠀꠞꠅ ꠡꠥꠎꠣ।”
26ꠁꠈꠣꠘ ꠎꠣꠞꠣ ꠢꠥꠘꠟꠣ, ꠔꠣꠞꠣ ꠀꠞꠎ ꠇꠞꠟꠣ, “ꠔꠦ ꠀꠞ ꠇꠦꠉꠤꠄ ꠞꠦꠢꠣꠁ ꠙꠣꠁꠛ?” 27ꠔꠣꠁꠘ ꠇꠁꠟꠣ, “ꠝꠣꠘꠡꠞ ꠉꠦꠍꠦ ꠎꠦꠔꠣ ꠅꠡꠝ꠆ꠛꠛ, ꠀꠟ꠆ꠟꠣꠞ ꠉꠦꠍꠦ ꠔ ꠁꠔꠣ ꠡꠝ꠆ꠛꠛ।”
28ꠅꠃ ꠡꠝꠄ ꠙꠤꠔꠞꠦ ꠇꠁꠟꠣ, “ꠢꠥꠎꠥꠞ, ꠀꠝꠞꠣ ꠔ ꠢꠇꠟꠔꠣ ꠚꠣꠟꠣꠁ ꠕꠁꠀ ꠀꠙꠘꠣꠞ ꠃꠝ꠆ꠝꠔ ꠅꠁꠍꠤ।” 29ꠔꠦꠃ ꠁꠍꠣꠄ ꠍꠣꠢꠣꠛꠤ ꠅꠇꠟꠞꠦ ꠇꠁꠟꠣ, “ꠀꠝꠤ ꠔꠥꠝꠞꠣꠞꠦ ꠢꠣꠍꠣ ꠇꠕꠣ ꠇꠁꠞꠣꠝ, ꠀꠟ꠆ꠟꠣꠞ ꠛꠣꠖꠡꠣꠁꠞ ꠟꠣꠉꠤ ꠎꠦꠞꠣ ꠘꠤꠎꠞ ꠛꠣꠠꠤ-ꠊꠞ, ꠝꠣ-ꠛꠣꠚ, ꠛꠃ, ꠙꠥꠀ-ꠙꠥꠠꠤ, ꠜꠣꠁ-ꠛꠤꠞꠣꠖꠞ ꠚꠣꠟꠣꠁꠀ ꠀꠁꠍꠦ, 30ꠔꠣꠞꠣ ꠅꠃ ꠖꠥꠘꠤꠀꠔꠃ ꠄꠞ ꠛꠃꠔ ꠛꠦꠡꠤ ꠙꠣꠁꠛꠣ, ꠀꠞ ꠛꠣꠖꠞ ꠎꠤꠘ꠆ꠖꠦꠉꠤꠔ ꠀꠈꠦꠞꠅ ꠙꠣꠁꠛꠣ।”
ꠢꠎꠞꠔ ꠁꠍꠣꠞ ꠝꠃꠔꠞ ꠔꠤꠘ ꠘꠝ꠆ꠛꠞ ꠀꠉꠣꠝ ꠈꠛꠞ
31ꠛꠣꠖꠦ ꠁꠍꠣꠄ ꠔꠣꠘ ꠛꠣꠞꠅꠎꠘ ꠍꠣꠢꠣꠛꠤꠞꠦ ꠗꠣꠞꠅ ꠛꠅꠀꠁꠟꠣ। ꠛꠅꠀꠁꠀ ꠇꠁꠟꠣ, “ꠢꠥꠘꠅ, ꠀꠝꠞꠣ ꠅꠈꠘ ꠎꠦꠞꠥꠎꠣꠟꠦꠝꠅ ꠎꠣꠁꠞꠣꠝ, ꠔꠦ ꠀꠝꠤ ꠛꠤꠘ-ꠀꠖꠝꠞ ꠛꠦꠙꠣꠞꠦ ꠘꠛꠤ ꠅꠇꠟꠦ ꠎꠔꠔꠣ ꠟꠦꠈꠤꠀ ꠉꠦꠍꠂꠘ, ꠁꠔꠣ ꠅꠈꠘ ꠙꠥꠞꠣ ꠅꠁꠛ। 32ꠀꠝꠣꠞꠦ ꠛꠤꠗꠞ꠆ꠝꠤ ꠎꠣꠔꠤꠞ ꠀꠔꠅ ꠡꠙꠤ ꠖꠦꠅꠀ ꠅꠁꠛ। ꠝꠣꠘꠡꠦ ꠟꠁꠀ ꠓꠋ-ꠔꠣꠝꠣꠡꠣ ꠇꠞꠛꠣ, ꠛꠦꠁꠎ꠆ꠎꠔ ꠇꠞꠛꠣ, ꠀꠞ ꠕꠥꠕꠥ ꠇꠞꠤ ꠝꠥꠈꠅ ꠍꠦꠚ ꠖꠤꠛꠣ। 33ꠀꠝꠣꠞꠦ ꠌꠣꠛꠥꠇ ꠝꠣꠞꠛꠣ ꠛꠣꠖꠦ ꠎꠣꠘꠦ ꠝꠣꠞꠛꠣ। ꠝꠃꠔꠞ ꠔꠤꠘ ꠖꠤꠘꠞ ꠖꠤꠘ ꠀꠝꠤ ꠢꠤꠞꠛꠣꠞ ꠎꠤꠘ꠆ꠖꠣ ꠅꠁꠀ ꠃꠑꠝꠥ।” 34ꠅꠁꠟꠦ ꠔꠣꠘ ꠍꠣꠢꠣꠛꠤ ꠅꠇꠟꠦ ꠅꠃ ꠝꠣꠔꠞ ꠇꠥꠘꠥ ꠜꠦꠖ ꠛꠥꠎꠟꠣ ꠘꠣ। ꠔꠣꠁꠘ ꠇꠤꠔꠣ ꠇꠁꠞꠣ ꠔꠣꠞꠣ ꠡꠝꠎꠤꠔꠣ ꠙꠣꠞꠟꠣ ꠘꠣ, ꠇꠣꠞꠘ ꠔꠣꠞꠣꠞ ꠉꠦꠍꠦ ꠉꠥꠙꠘ ꠞꠣꠈꠣ ꠅꠁꠍꠤꠟ।
ꠀꠘ꠆ꠖꠣ ꠢꠇꠤꠞꠞꠦ ꠜꠣꠟꠣ ꠇꠞꠣ
35ꠁꠍꠣ ꠎꠦꠛꠟꠣ ꠎꠤꠞꠤꠢꠅ ꠐꠣꠃꠘꠞ ꠇꠣꠘ꠆ꠖꠣꠔ ꠀꠁꠟꠣ, ꠅꠃ ꠡꠝꠄ ꠄꠇ ꠀꠘ꠆ꠖꠣ ꠛꠦꠐꠣꠄ ꠙꠕꠞ ꠇꠣꠘ꠆ꠖꠣꠔ ꠛꠁꠀ ꠜꠤꠇ ꠇꠞꠣꠔ ꠀꠍꠤꠟ। 36ꠀꠈꠔꠣꠃ ꠛꠃꠔ ꠝꠣꠘꠡꠞ ꠙꠣꠅꠞ ꠔꠣꠟꠤ ꠢꠥꠘꠤꠀ ꠛꠦꠐꠣꠄ ꠎꠤꠇꠣꠁꠟ, “ꠇꠤꠔꠣ ꠛꠣ, ꠇꠤꠔꠣ ꠅꠞ?” 37ꠝꠣꠘꠡꠦ ꠇꠁꠟꠣ, “ꠘꠣꠍꠣꠞꠔꠞ ꠁꠍꠣꠄ ꠅꠃ ꠙꠕꠦꠖꠤ ꠔꠡꠞꠤꠚ ꠘꠤꠞꠣ।” 38ꠅꠃ ꠢꠦ ꠌꠤꠟ꠆ꠟꠣꠁꠀ ꠃꠑꠟ, “ꠅ ꠖꠣꠃꠖꠞ ꠀꠅꠟꠣꠖ ꠁꠍꠣ, ꠀꠝꠣꠞꠦ ꠖꠄꠀ ꠇꠞꠃꠇ꠆ꠇꠣ।” 39ꠌꠤꠟ꠆ꠟꠣꠘꠤ ꠢꠥꠘꠤꠀ ꠜꠤꠠꠞ ꠍꠣꠝꠘꠞ ꠇꠣꠔꠣꠞꠞ ꠝꠣꠘꠡꠦ ꠔꠣꠞꠦ ꠗꠝꠇ ꠖꠤꠟꠣ, “ꠌꠥꠙ ꠇꠞꠅ, ꠘꠤꠞꠣꠁ ꠞꠅ।” ꠅꠁꠟꠦ ꠢꠦ ꠀꠞꠅ ꠎꠥꠞꠦ ꠌꠤꠟ꠆ꠟꠣꠁꠀ ꠇꠁꠟ, “ꠅ ꠖꠣꠃꠖꠞ ꠀꠅꠟꠣꠖ, ꠀꠝꠣꠞꠦ ꠞꠢꠝ ꠇꠞꠃꠇ꠆ꠇꠣ।”
40ꠔꠦꠃ ꠁꠍꠣ ꠃꠛꠣꠁ ꠉꠦꠟꠣ। ꠃꠛꠣꠁꠀ ꠀꠘ꠆ꠖꠣ ꠛꠦꠐꠣꠞꠦ ꠔꠣꠘ ꠇꠣꠘ꠆ꠖꠣꠔ ꠀꠘꠣꠁꠟꠣ। ꠛꠦꠐꠣ ꠗꠣꠞꠅ ꠀꠁꠀ ꠢꠣꠞꠟꠦ ꠔꠣꠁꠘ ꠎꠤꠇꠣꠁꠟꠣ, 41“ꠇꠤꠔꠣ ꠛꠣ, ꠔꠥꠝꠣꠞꠦ ꠇꠤꠔꠣ ꠇꠞꠔꠣꠝ?” ꠛꠦꠐꠣꠄ ꠇꠁꠟ, “ꠢꠥꠎꠥꠞ, ꠀꠝꠤ ꠈꠣꠟꠤ ꠌꠃꠈꠦ ꠖꠦꠈꠔꠣꠝ ꠌꠣꠁ।”
42ꠁꠍꠣꠄ ꠔꠣꠞꠦ ꠇꠁꠟꠣ, “ꠀꠁꠌ꠆ꠍꠣ ꠔꠦ ꠖꠦꠈꠅ। ꠔꠥꠝꠣꠞ ꠁꠝꠣꠘꠞ ꠛꠟꠦꠃ ꠔꠥꠝꠤ ꠜꠣꠟꠣ ꠅꠁꠟꠣꠄ।”
43ꠟꠉꠦ ꠟꠉꠦꠃ ꠛꠦꠐꠣꠞ ꠌꠃꠈ ꠈꠥꠟꠤꠉꠦꠟ, ꠖꠦꠈꠣꠞ ꠡꠇ꠆ꠔꠤ ꠙꠣꠁꠟ। ꠛꠦꠐꠣꠄ ꠀꠟ꠆ꠟꠣꠞ ꠡꠥꠇꠞꠤꠀ ꠀꠖꠣꠄ ꠇꠞꠤ ꠇꠞꠤ ꠔꠣꠘ ꠈꠞꠦ ꠅꠁꠀ ꠞꠅꠀꠘꠣ ꠖꠤꠟꠣꠁꠟ। ꠁꠔꠣ ꠖꠦꠈꠤꠀ ꠢꠇꠟ ꠝꠣꠘꠡꠦ ꠀꠟ꠆ꠟꠣꠞ ꠔꠣꠞꠤꠚ ꠇꠞꠟꠣ।
বর্তমানে নির্বাচিত:
ꠁꠘ꠆ꠎꠤꠟ ৩: ꠟꠥꠇ 18: sylN
হাইলাইট
শেয়ার
কপি
Want to have your highlights saved across all your devices? Sign up or sign in
© Ahle Kitab Society. All rights reserved.
