ꠁꠘ꠆ꠎꠤꠟ ৩: ꠟꠥꠇ 19

ꠗꠘꠤ ꠎꠣꠇꠤꠞꠞ ꠔꠃꠛꠣ

1ꠢꠎꠞꠔ ꠁꠍꠣ ꠎꠤꠞꠤꠢꠅ ꠐꠣꠃꠘꠞ ꠝꠣꠎꠦꠖꠤ ꠀꠐꠤꠀ ꠎꠣꠁꠞꠣ, 2ꠢꠘꠅ ꠎꠣꠇꠤꠞ ꠘꠣꠝꠞ ꠛꠠ ꠄꠇ ꠗꠘꠤ ꠝꠣꠘꠥꠡ ꠀꠍꠟꠣ। ꠄꠁꠘ ꠅꠁꠟꠣ ꠈꠣꠎꠘꠣ ꠔꠥꠟꠞꠣ ꠅꠇꠟꠞ ꠙꠞꠗꠣꠘ। 3ꠁꠍꠣꠞꠦ ꠖꠦꠈꠣꠞ ꠟꠣꠉꠤ ꠔꠣꠘ ꠈꠥꠛ ꠈꠣꠁꠡ ꠀꠍꠤꠟ, ꠅꠁꠟꠦ ꠔꠣꠁꠘ ꠛꠣꠐ꠆ꠐꠤ ꠝꠣꠘꠥꠡ, ꠄꠞꠖꠣꠄ ꠅꠔ ꠜꠤꠠꠞ ꠝꠣꠎꠦ ꠖꠦꠈꠣꠞ ꠃꠙꠣꠄ ꠅꠁꠟ ꠘꠣ। 4ꠅꠃ ꠖꠃꠠꠤꠀ ꠀꠉꠦꠖꠤ ꠉꠦꠟꠣ, ꠉꠤꠀ ꠁꠍꠣ ꠎꠦ ꠙꠕꠦꠖꠤ ꠀꠁꠞꠣ ꠅꠃ ꠙꠕꠞ ꠇꠣꠘ꠆ꠖꠣꠞ ꠄꠇ ꠒꠥꠝꠥꠞ ꠉꠣꠍꠅ ꠃꠑꠟꠣ। 5ꠁꠍꠣ ꠎꠦꠛꠟꠣ ꠢꠃ ꠒꠥꠝꠥꠞ ꠉꠣꠍꠞ ꠔꠟꠦ ꠀꠁꠟꠣ, ꠔꠣꠁꠘ ꠃꠙꠞꠦꠖꠤ ꠌꠣꠁꠀ ꠎꠣꠇꠤꠞꠞꠦ ꠒꠣꠇ ꠖꠤꠟꠣ, “ꠎꠣꠇꠤꠞ, ꠎꠟꠖꠤ ꠟꠣꠝꠤꠀ ꠀꠅ। ꠀꠝꠤ ꠀꠁꠎ ꠔꠥꠝꠣꠞ ꠛꠣꠠꠤꠔ ꠞꠁꠔꠦ ꠅꠁꠛ।” 6ꠎꠣꠇꠤꠞ ꠟꠉꠦ ꠟꠉꠦꠃ ꠟꠣꠝꠤꠀ ꠀꠁꠟꠣ। ꠔꠣꠁꠘ ꠈꠥꠡꠤ ꠅꠁꠀ ꠁꠍꠣꠞꠦ ꠔꠣꠎꠤꠝ ꠇꠞꠤꠀ ꠔꠣꠘ ꠛꠣꠠꠤꠔ ꠘꠤꠟꠣ। 7ꠁꠔꠣ ꠖꠦꠈꠤꠀ ꠢꠇꠟꠦ ꠇꠣꠘꠣ-ꠇꠣꠘꠤ ꠇꠞꠤ ꠇꠁꠟꠣ, “ꠔꠣꠁꠘ ꠇꠦꠘꠦ ꠄꠇ ꠘꠣꠚꠞꠝꠣꠘ ꠛꠦꠐꠣꠞ ꠛꠣꠠꠤꠔ ꠞꠣꠁꠔ ꠇꠣꠐꠣꠘꠤꠔ ꠉꠦꠟꠣ?”

8ꠎꠣꠇꠤꠞꠦ ꠢꠇꠟꠞ ꠍꠣꠝꠘꠦ ꠃꠛꠣꠁꠀ ꠇꠁꠟꠣ, “ꠢꠥꠎꠥꠞ ꠖꠦꠈꠃꠇ꠆ꠇꠣ, ꠀꠝꠤ ꠅꠈꠘꠃ ꠀꠝꠣꠞ ꠗꠘ-ꠍꠣꠝꠣꠘꠣꠞ ꠅꠞ꠆ꠗꠦꠇ ꠉꠞꠤꠛꠞꠦ ꠟꠤꠟ꠆ꠟꠣ ꠖꠤꠟꠣꠁꠞꠣꠝ। ꠀꠞ ꠎꠦꠞꠣꠞ ꠢꠇ ꠐꠉꠤꠀ ꠀꠘꠍꠤ, ꠔꠣꠞꠣꠞꠦ ꠌꠣꠁꠞ ꠅꠔꠈꠣꠘ ꠚꠤꠞꠔ ꠖꠤꠟꠣꠁꠝꠥ।” 9ꠔꠦꠃ ꠁꠍꠣꠄ ꠇꠁꠟꠣ, “ꠀꠁꠎ ꠕꠣꠇꠤ ꠁ ꠛꠣꠠꠤꠔ ꠘꠣꠎꠣꠔ ꠀꠁꠍꠦ। ꠄꠁꠘꠅ ꠔ ꠁꠛ꠆ꠞꠣꠢꠤꠝꠞ ꠈꠣꠘ꠆ꠖꠣꠘꠞ ꠄꠇꠎꠘ। 10ꠅꠃ ꠟꠣꠈꠣꠘ ꠛꠦ-ꠙꠕꠤ ꠅꠇꠟꠞꠦ ꠔꠥꠇꠣꠁꠀ ꠛꠣꠞ ꠇꠞꠤꠀ, ꠔꠣꠞꠣꠞꠦ ꠛꠣꠌꠣꠘꠤꠞ ꠟꠣꠉꠤꠃ ꠔ ꠀꠝꠤ ꠛꠤꠘ-ꠀꠖꠝ ꠁ ꠖꠥꠘꠤꠀꠔ ꠀꠁꠍꠤ।”

ꠞꠣꠎꠣ ꠀꠞ ꠖꠡ ꠉꠥꠟꠣꠝꠞ ꠇꠤꠌ꠆ꠍꠣ

11ꠢꠎꠞꠔ ꠁꠍꠣꠄ ꠔꠣꠞꠣꠞ ꠟꠉꠦ ꠅꠔꠣ ꠝꠣꠔꠤꠞꠣ, ꠅꠃ ꠡꠝꠄ ꠔꠣꠁꠘ ꠎꠦꠞꠥꠎꠣꠟꠦꠝ ꠕꠣꠇꠤ ꠕꠥꠠꠣ ꠖꠥꠞꠁ ꠞꠁꠍꠂꠘ। ꠔꠣꠞꠣ ꠝꠘꠅ ꠇꠞꠟꠣ, ꠎꠦꠞꠥꠎꠣꠟꠦꠝ ꠙꠃꠍꠤꠀꠃ ꠔꠣꠁꠘ ꠀꠟ꠆ꠟꠣꠞ ꠛꠣꠖꠡꠣꠁ ꠎꠣꠁꠞ ꠇꠞꠤꠟꠤꠛꠣ। ꠄꠞꠟꠣꠉꠤ ꠁꠍꠣꠄ ꠔꠣꠞꠣꠞꠦ ꠅꠃ ꠇꠤꠌ꠆ꠍꠣ ꠢꠥꠘꠣꠁꠟꠣ, 12“ꠘꠛꠣꠛ ꠙꠞꠤꠛꠣꠞꠞ ꠄꠇꠎꠘ ꠛꠦꠐꠣ ꠝꠣꠘꠥꠡ ꠛꠃꠔ ꠖꠥꠞꠁ ꠄꠇ ꠖꠦꠡꠅ ꠍꠚꠞꠅ ꠉꠦꠟꠣ। ꠔꠣꠘ ꠈꠤꠀꠟ ꠀꠍꠤꠟ ꠢꠘꠅ ꠉꠤꠀ ꠞꠣꠎꠣ ꠅꠁꠀ ꠚꠤꠞꠔ ꠀꠁꠛꠣ। 13ꠎꠣꠁꠛꠣꠞ ꠀꠉꠦ ꠔꠣꠘ ꠖꠡꠎꠘ ꠉꠥꠟꠣꠝꠞꠦ ꠀꠘꠤꠀ ꠙꠞꠔꠦꠇ ꠎꠘꠞꠦ ꠄꠇꠐꠣ ꠇꠞꠤ ꠡꠥꠘꠣꠞ ꠝꠢꠞ ꠖꠤꠀ ꠇꠁꠟꠣ, ‘ꠀꠝꠤ ꠀꠁꠛꠣꠞ ꠀꠉ ꠙꠞ꠆ꠎꠘ꠆ꠔ ꠅꠉꠥꠁꠘꠖꠤ ꠔꠥꠝꠞꠣ ꠇꠣꠄ-ꠇꠣꠞꠛꠣꠞ ꠇꠞꠅ।’

14“ꠅꠁꠟꠦ ꠔꠣꠘ ꠙ꠆ꠞꠎꠣ ꠅꠇꠟꠦ ꠔꠣꠘꠞꠦ ꠙꠍꠘ꠆ꠖ ꠇꠞꠔꠣ ꠘꠣ। ꠄꠞꠟꠣꠉꠤ ꠔꠣꠞꠣ ꠔꠣꠘ ꠈꠞꠦ ꠅꠁꠀ ꠉꠥꠁꠀ ꠙꠣꠑꠣꠁꠀ ꠢꠃ ꠛꠣꠖꠡꠣꠞꠦ ꠎꠣꠘꠣꠁꠟꠣ, ‘ꠀꠝꠞꠣ ꠌꠣꠁ ꠘꠣ, ꠄꠁꠘ ꠀꠝꠞꠣꠞ ꠞꠣꠎꠣ ꠅꠃꠇ꠆ꠇꠣ।’ 15ꠅꠁꠟꠦꠅ ꠔꠣꠁꠘ ꠞꠣꠎꠣ ꠛꠘꠤꠀ ꠚꠤꠞꠔ ꠀꠁꠟꠣ। ꠀꠁꠀ ꠢꠃ ꠎꠦ ꠖꠡꠎꠘ ꠉꠥꠟꠣꠝꠞꠦ ꠔꠣꠁꠘ ꠝꠢꠞ ꠖꠤꠍꠟꠣ, ꠔꠣꠞꠣꠞꠦ ꠀꠘꠣꠁꠀ ꠎꠤꠇꠣꠁꠟꠣ, ꠇꠣꠄ-ꠇꠣꠞꠛꠣꠞ ꠇꠞꠤꠀ ꠔꠣꠞꠣ ꠇꠦ ꠇꠔ ꠟꠣꠜ ꠇꠞꠍꠂꠘ। 16ꠙꠄꠟꠣ ꠎꠘꠦ ꠀꠁꠀ ꠇꠁꠟ, ‘ꠢꠥꠎꠥꠞ, ꠀꠙꠘꠣꠞ ꠄꠇ ꠝꠢꠞꠖꠤ ꠀꠝꠤ ꠖꠡ ꠝꠢꠞ ꠞꠥꠎꠤ ꠇꠞꠍꠤ।’ 17ꠞꠣꠎꠣꠄ ꠔꠣꠞꠦ ꠇꠁꠟꠣ, ‘ꠜꠣꠟꠣ ꠇꠞꠍ! ꠔꠥꠝꠤ ꠔ ꠜꠣꠟꠣ ꠉꠥꠟꠣꠝ, ꠔꠥꠝꠤ ꠈꠥꠛ ꠡꠣꠝꠣꠁꠘ꠆ꠘ ꠛꠦꠙꠣꠞꠦꠅ ꠢꠇ ꠀꠍ। ꠔꠦ ꠔꠥꠝꠤ ꠅꠃ ꠖꠡ ꠙꠞꠉꠘꠣꠞ ꠃꠙꠞꠦ ꠎꠝꠤꠖꠣꠞꠤ ꠇꠞꠅ।’ 18ꠖꠥꠍꠞꠣ ꠎꠘꠦ ꠇꠁꠟ, ‘ꠢꠥꠎꠥꠞ, ꠀꠙꠘꠣꠞ ꠝꠢꠞꠖꠤ ꠀꠝꠤ ꠙꠣꠌ ꠝꠢꠞ ꠞꠥꠎꠤ ꠇꠞꠍꠤ। 19ꠔꠣꠁꠘ ꠇꠁꠟꠣ, ‘ꠔꠥꠝꠤꠅ ꠙꠣꠌ ꠙꠞꠉꠘꠣꠞ ꠃꠙꠞꠦ ꠎꠝꠤꠖꠣꠞꠤ ꠇꠞꠅ।’ 20ꠛꠣꠖꠦ ꠀꠞꠇ ꠎꠘꠦ ꠇꠁꠟ, ‘ꠢꠥꠎꠥꠞ, ꠅꠃ ꠘꠦꠃꠇ꠆ꠇꠣ, ꠀꠙꠘꠣꠞ ꠢꠤ ꠝꠢꠞ। ꠀꠝꠤ ꠀꠙꠘꠣꠞꠦ ꠒꠞꠣꠁꠀ ꠀꠙꠘꠣꠞ ꠝꠢꠞ ꠞꠥꠝꠣꠟꠅ ꠛꠣꠘ꠆ꠖꠤꠀ ꠕꠁ ꠖꠤꠍꠤ। 21ꠀꠙꠘꠦ ꠔ ꠇꠠꠣ ꠝꠤꠎꠣꠎꠞ ꠝꠣꠘꠥꠡ। ꠎꠝꠣ ꠘꠣ ꠇꠞꠤꠀꠅ ꠀꠖꠣꠄ ꠇꠞꠂꠘ, ꠈꠦꠔ ꠘꠣ ꠇꠞꠤꠀꠅ ꠚꠡꠟ ꠇꠣꠐꠂꠘ।’

22“ꠔꠦꠃ ꠞꠣꠎꠣꠄ ꠇꠁꠟꠣ, ‘ꠅ ꠈꠛꠤꠍ ꠉꠥꠟꠣꠝ! ꠔꠞ ꠝꠥꠈꠞ ꠇꠕꠣꠄ ꠀꠝꠤ ꠔꠞ ꠛꠤꠌꠣꠞ ꠇꠞꠝꠥ। ꠔꠥꠁ ꠔ ꠎꠣꠘꠍꠃ ꠀꠝꠤ ꠇꠠꠣ ꠝꠤꠎꠣꠎꠞ ꠝꠣꠘꠥꠡ, ꠎꠝꠣ ꠘꠣ ꠇꠞꠤꠀꠅ ꠀꠖꠣꠄ ꠇꠞꠤ, ꠈꠦꠔ ꠘꠣ ꠇꠞꠤꠀꠅ ꠚꠡꠟ ꠇꠣꠐꠤ! 23ꠔꠦ ꠀꠝꠣꠞ ꠝꠢꠞ ꠔꠥꠁ ꠛꠦꠙꠣꠞꠤꠞ ꠉꠦꠍꠦ ꠕꠁꠟꠦ ꠘꠣ ꠇꠦꠘꠦ? ꠔꠦ ꠔ ꠀꠝꠤ ꠀꠁꠀ ꠝꠥꠟ ꠝꠢꠞꠞ ꠟꠉꠦ ꠇꠤꠍꠥ ꠟꠣꠜꠅ ꠙꠣꠁꠟꠣꠝ ꠅꠘꠦ।’ 24ꠞꠣꠎꠣꠄ ꠔꠣꠘ ꠃꠎꠤꠞ-ꠘꠣꠎꠤꠞꠞꠦ ꠇꠁꠟꠣ, ‘ꠅꠉꠥꠞ ꠉꠦꠍ ꠕꠣꠇꠤ ꠅꠃ ꠝꠢꠞ ꠚꠤꠞꠔ ꠀꠘꠅ, ꠀꠞ ꠎꠣꠞ ꠖꠡ ꠝꠢꠞ ꠀꠍꠦ ꠔꠣꠞꠦ ꠖꠦꠅ।’ 25ꠔꠦꠃ ꠢꠇꠟꠦ ꠇꠁꠟꠣ, ‘ꠢꠥꠎꠥꠞ, ꠔꠣꠞ ꠔ ꠄꠝꠘꠦꠃ ꠖꠡ ꠝꠢꠞ ꠀꠍꠦ।’ 26ꠞꠣꠎꠣꠄ ꠇꠁꠟꠣ, ‘ꠀꠝꠤ ꠔꠥꠝꠞꠣꠞꠦ ꠇꠁꠞꠣꠝ, ꠎꠣꠞ ꠀꠍꠦ ꠔꠣꠞꠦ ꠀꠞꠅ ꠖꠦꠅꠀ ꠅꠁꠛ। ꠎꠣꠞ ꠘꠣꠁ, ꠔꠣꠞ ꠎꠦꠔꠣ ꠀꠍꠦ ꠅꠔꠣꠅ ꠇꠣꠠꠤꠀ ꠘꠦꠅꠀ ꠅꠁꠛ। 27ꠀꠞ ꠀꠝꠣꠞ ꠎꠦꠔꠣ ꠖꠥꠡꠝꠘꠦ ꠌꠣꠁꠍꠂꠘ ꠘꠣ ꠀꠝꠤ ꠞꠣꠎꠣ ꠅꠁꠔꠣꠝ, ꠅꠔꠣꠞꠦ ꠅꠘꠅ ꠗꠞꠤꠀ ꠀꠘꠤꠀ ꠀꠝꠣꠞ ꠍꠣꠝꠘꠦ ꠝꠣꠞꠤꠟꠣꠅ।’ ”

ꠎꠦꠞꠥꠎꠣꠟꠦꠝ ꠐꠣꠃꠘꠅ ꠢꠎꠞꠔ ꠁꠍꠣ (১৯:২৮-২১:৩৮)

ꠢꠎꠞꠔ ꠁꠍꠣ ꠎꠦꠞꠥꠎꠣꠟꠦꠝꠅ ꠢꠣꠝꠣꠁꠟꠣ

28ꠅꠈꠣꠘ ꠇꠁꠀ ꠢꠣꠞꠤ ꠁꠍꠣꠄ ꠔꠣꠞꠣꠞ ꠀꠉꠦ ꠅꠁꠀ ꠎꠦꠞꠥꠎꠣꠟꠦꠝꠞ ꠛꠣꠄ ꠔꠡꠞꠤꠚ ꠘꠤꠟꠣ। 29ꠔꠣꠁꠘ ꠎꠄꠔꠥꠘ ꠙꠣꠠꠞ ꠇꠣꠘ꠆ꠖꠣꠔ ꠛꠣꠄꠔ-ꠚꠣꠁꠎ꠆ꠎꠣ ꠀꠞ ꠛꠣꠄꠔ-ꠀꠘꠤꠀ ꠉꠣꠃꠞ ꠉꠣꠟꠣꠔ ꠀꠁꠀ ꠢꠣꠞꠟꠦ, ꠔꠣꠘ ꠖꠥꠁꠎꠘ ꠍꠣꠢꠣꠛꠤꠞꠦ ꠅꠈꠣꠘ ꠇꠁꠀ ꠙꠣꠑꠣꠁꠟꠣ, “ꠔꠥꠝꠞꠣ ꠅꠃ ꠍꠣꠝꠘꠞ ꠉꠣꠃꠔ ꠎꠣꠅ। 30ꠉꠣꠃꠔ ꠢꠣꠝꠣꠁꠀꠃ ꠖꠦꠈꠛꠣꠄ, ꠄꠉꠥ ꠉꠣꠗꠣꠞ ꠛꠣꠁꠌ꠆ꠌꠣ ꠛꠣꠘ꠆ꠖꠣ ꠀꠍꠦ। ꠅꠉꠥꠞ ꠃꠙꠞꠦ ꠇꠦꠃ ꠇꠥꠘꠥꠖꠤꠘ ꠌꠠꠍꠦ ꠘꠣ। ꠔꠥꠝꠞꠣ ꠅꠉꠥꠞ ꠛꠣꠘ ꠈꠥꠟꠤꠀ ꠅꠘꠅ ꠟꠁꠀ ꠀꠁꠅ। 31ꠇꠦꠃ ꠎꠥꠖꠤ ꠎꠤꠇꠣꠄ, ‘ꠁꠉꠥꠞ ꠛꠣꠘ ꠈꠥꠟ ꠇꠦꠘꠦ ꠛꠣ? ꠔꠦ ꠇꠁꠅ, ꠢꠥꠎꠥꠞꠞ ꠉꠞꠎ ꠀꠍꠦ।’ ”

32ꠎꠦ ꠍꠣꠢꠣꠛꠤ ꠅꠇꠟꠞꠦ ꠙꠣꠑꠣꠁꠍꠟꠣ, ꠔꠣꠞꠣ ꠉꠤꠀ ꠔꠣꠘ ꠇꠕꠣꠝꠔ ꠢꠇꠟꠔꠣ ꠙꠣꠁꠟꠣ। 33ꠔꠣꠞꠣ ꠎꠦꠛꠟꠣ ꠉꠣꠗꠣꠞ ꠛꠣꠁꠌ꠆ꠌꠣꠞ ꠛꠣꠘ ꠈꠥꠟꠞꠣ, ꠅꠃ ꠡꠝꠄ ꠝꠣꠟꠤꠇꠦ ꠎꠤꠇꠣꠁꠟꠣ, “ꠅꠛꠣ, ꠖꠠꠤ ꠈꠥꠟꠞꠣꠄ ꠇꠦꠘꠦ?” 34ꠔꠣꠞꠣ ꠇꠁꠟꠣ, “ꠢꠥꠎꠥꠞꠞ ꠉꠞꠎ ꠀꠍꠦ ꠇꠞꠤ ꠈꠥꠟꠞꠣꠝ।” 35ꠛꠣꠖꠦ ꠉꠣꠗꠣꠞ ꠛꠣꠁꠌ꠆ꠌꠣ ꠟꠁꠀ ꠁꠍꠣꠞ ꠇꠣꠘ꠆ꠖꠣꠔ ꠀꠁꠀ, ꠄꠞꠣꠞ ꠉꠔꠞꠞ ꠌꠣꠖ꠆ꠖꠞꠖꠤ ꠉꠣꠗꠣꠞ ꠙꠤꠑꠤꠔ ꠉꠖꠤ ꠛꠣꠘꠣꠁꠀ ꠁꠍꠣꠞꠦ ꠛꠅꠀꠁꠟꠣ। 36ꠔꠣꠁꠘ ꠎꠦꠛꠟꠣ ꠉꠣꠗꠣ ꠌꠠꠤꠀ ꠙꠕꠦꠖꠤ ꠞꠅꠀꠘꠣ ꠖꠤꠟꠣ, ꠙꠕꠞ ꠝꠣꠎꠦ ꠝꠣꠘꠡꠦ ꠔꠣꠞꠣꠞ ꠎꠣꠞꠎꠤꠞ ꠌꠣꠖ꠆ꠖꠞ ꠛꠤꠍꠣꠁ ꠖꠤꠟꠣ।

37ꠁꠍꠣ ꠎꠦꠞꠥꠎꠣꠟꠦꠝꠞ ꠇꠣꠘ꠆ꠖꠣꠔ ꠎꠄꠔꠥꠘ ꠙꠣꠠ ꠕꠘꠦ ꠟꠣꠝꠣꠞ ꠙꠕꠅ ꠀꠁꠀ ꠀꠎꠤꠟꠣ, ꠅꠃ ꠡꠝꠄ ꠔꠣꠘ ꠃꠝ꠆ꠝꠔ ꠅꠇꠟꠅ ꠟꠉꠦ ꠀꠍꠟꠣ, ꠄꠞꠣ ꠔꠣꠘ ꠎꠦꠔꠣ ꠇꠦꠞꠣꠝꠔꠤ ꠇꠣꠝ ꠖꠦꠈꠍꠤꠟꠣ, ꠅꠔꠣꠞ ꠟꠣꠉꠤ ꠔꠣꠞꠣ ꠈꠥꠡꠤꠄ ꠎꠥꠞꠦ ꠎꠥꠞꠦ ꠌꠤꠟ꠆ꠟꠣꠁꠀ ꠀꠟ꠆ꠟꠣꠞ ꠔꠣꠞꠤꠚ ꠇꠞꠤꠀ ꠇꠁꠟꠣ,

38“ꠝꠥꠛꠣꠞꠇ ꠢꠃ ꠛꠣꠖꠡꠣ, ꠎꠦꠁꠘ ꠝꠣꠛꠥꠖꠞ ꠘꠣꠝꠦ ꠔꠡꠞꠤꠚ ꠀꠘꠞꠣ।

ꠛꠦꠢꠦꠡ꠆ꠔꠅ ꠡꠣꠘ꠆ꠔꠤ, ꠀꠟ꠆ꠟꠣꠞ ꠀꠞꠡꠅ ꠉꠃꠞꠛ!”

39ꠜꠤꠠꠞ ꠝꠣꠎꠦ ꠚꠞꠤꠡꠤ ꠖꠟꠞ ꠇꠄꠎꠘꠦ ꠁꠍꠣꠞꠦ ꠇꠁꠟꠣ, “ꠢꠥꠎꠥꠞ, ꠀꠙꠘꠣꠞ ꠃꠝ꠆ꠝꠔ ꠅꠇꠟꠞꠦ ꠗꠝꠇ ꠖꠦꠃꠇ꠆ꠇꠣ।” 40ꠁꠍꠣꠄ ꠇꠁꠟꠣ, “ꠀꠝꠤ ꠀꠙꠘꠣꠞꠣꠞꠦ ꠇꠁꠞꠣꠝ, ꠄꠞꠣꠞ ꠝꠥꠈ ꠛꠘ꠆ꠖ ꠇꠞꠤꠟ꠆ꠟꠦꠅ, ꠙꠣꠔ꠆ꠔꠞ ꠅꠇꠟꠦ ꠌꠤꠟ꠆ꠟꠣꠁꠀ ꠃꠑꠛ।”

41ꠔꠣꠁꠘ ꠎꠦꠛꠟꠣ ꠎꠦꠞꠥꠎꠣꠟꠦꠝꠞ ꠇꠣꠘ꠆ꠖꠣꠔ ꠀꠁꠟꠣ, ꠅꠃ ꠡꠝꠄ ꠎꠦꠞꠥꠎꠣꠟꠦꠝ ꠐꠣꠃꠘ ꠖꠦꠈꠤꠀ ꠇꠣꠘ꠆ꠖꠤ ꠖꠤꠟꠣ। 42ꠔꠣꠁꠘ ꠇꠁꠟꠣ, “ꠢꠣꠄꠞꠦ ꠢꠣꠄ! ꠀꠁꠎ ꠎꠥꠖꠤ ꠔꠥꠝꠤ ꠛꠥꠎꠔꠣꠄ, ꠡꠣꠘ꠆ꠔꠤ ꠇꠤꠟꠣ ꠇꠣꠁꠝ ꠅꠄ! ꠅꠁꠟꠦ ꠅꠈꠘ ꠁꠔꠣ ꠔꠥꠝꠣꠞ ꠌꠈꠥꠞ ꠀꠅꠠꠦ ꠞꠁꠍꠦ। 43ꠔꠥꠝꠣꠞ ꠃꠙꠞꠦ ꠁꠟꠣ ꠡꠝꠄ ꠀꠎꠤꠞ ꠅꠁꠛ, ꠎꠦꠛꠟꠣ ꠖꠥꠡꠝꠘ ꠅꠇꠟꠦ ꠖꠦꠅꠀꠟꠞ ꠌꠣꠁꠞꠅ ꠉꠣꠟꠣꠛꠣꠄ ꠝꠣꠐꠤꠞ ꠐꠦꠇꠤ ꠛꠣꠘ꠆ꠖꠤꠛ। ꠔꠥꠝꠣꠞꠦ ꠛꠦꠞꠤꠟꠤꠛ, ꠀꠞ ꠢꠇ꠆ꠇꠟꠛꠣꠄ ꠀꠐꠇ ꠇꠞꠛ। 44ꠔꠣꠞꠣ ꠔꠥꠝꠣꠞꠦ ꠀꠞ ꠔꠥꠝꠣꠞ ꠙꠦꠐꠞ ꠀꠅꠟꠣꠖ ꠅꠇꠟꠞꠦ ꠝꠣꠐꠤꠞ ꠟꠉꠦ ꠝꠤꠡꠣꠁꠛ। ꠔꠥꠝꠣꠞ ꠄꠇ ꠙꠣꠔ꠆ꠔꠞꠞ ꠃꠙꠞꠦ ꠀꠞꠇ ꠙꠣꠔ꠆ꠔꠞ ꠞꠁꠔ ꠘꠣꠄ। ꠇꠣꠞꠘ ꠀꠟ꠆ꠟꠣꠄ ꠔꠥꠝꠣꠞꠦ ꠛꠣꠌꠣꠁꠔꠣ ꠇꠞꠤ ꠎꠦ ꠡꠥꠎꠥꠉ ꠖꠤꠍꠂꠘ, ꠔꠥꠝꠤ ꠁ ꠡꠝꠄ-ꠡꠥꠎꠥꠉꠞꠦ ꠌꠤꠘꠟꠣꠄ ꠘꠣ।”

ꠎꠦꠞꠥꠎꠣꠟꠦꠝꠞ ꠇꠣꠛꠣ ꠡꠞꠤꠚꠅ ꠢꠎꠞꠔ ꠁꠍꠣ

45ꠛꠣꠖꠦ ꠔꠣꠁꠘ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠢꠣꠝꠣꠁꠟꠣ। ꠢꠣꠝꠣꠁꠀ ꠢꠘꠅ ꠎꠦꠔꠣꠄ ꠛꠦꠛꠡꠣ ꠇꠞꠣꠔ ꠀꠍꠟꠣ, ꠅꠔꠣ ꠢꠇ꠆ꠇꠟꠐꠤꠞꠦ ꠈꠦꠖꠣꠁ ꠖꠤꠟꠣ। 46ꠔꠣꠁꠘ ꠇꠁꠟꠣ, “ꠙꠣꠇ ꠇꠣꠟꠣꠝꠅ ꠟꠦꠈꠣ ꠀꠍꠦ, ꠀꠝꠣꠞ ꠊꠞ ꠅꠁꠛ ꠝꠥꠘꠣꠎꠣꠔꠞ ꠊꠞ, ꠅꠁꠟꠦ ꠔꠥꠝꠞꠣ ꠁꠈꠣꠘꠞꠦ ꠒꠣꠇꠣꠁꠔꠞ ꠀꠒ꠆ꠒꠣꠈꠣꠘꠣ ꠛꠣꠘꠣꠁꠟꠤꠍ।”

47ꠢꠎꠞꠔ ꠁꠍꠣ ꠙꠞꠔꠦꠇ ꠖꠤꠘ ꠛꠣꠄꠔꠥꠟ-ꠝꠥꠇꠣꠖ꠆ꠖꠍꠅ ꠉꠤꠀ ꠘꠍꠤꠅꠔ ꠇꠞꠔꠣ। ꠅꠃ ꠡꠝꠄ ꠛꠠ ꠁꠝꠣꠝ, ꠝꠃꠟꠣꠘꠣ ꠀꠞ ꠡꠝꠣꠎꠞ ꠝꠥꠞꠛ꠆ꠛꠤ ꠅꠇꠟꠦ ꠔꠣꠘꠞꠦ ꠝꠣꠞꠤꠟꠤꠔꠣ ꠌꠣꠁꠟꠣ। 48ꠅꠁꠟꠦ ꠇꠤꠟꠣ ꠔꠣꠘꠞꠦ ꠝꠣꠞꠣ ꠎꠣꠄ, ꠄꠞ ꠇꠥꠘꠥ ꠚꠘ꠆ꠖꠤ ꠔꠣꠞꠣ ꠙꠣꠁꠟ ꠘꠣ। ꠇꠣꠞꠘ ꠢꠇꠟ ꠝꠣꠘꠡꠦ ꠀꠡꠤꠇ ꠅꠁꠀ ꠖꠤꠟꠦ-ꠎꠣꠘꠦ ꠔꠣꠘ ꠛꠄꠀꠘ ꠢꠥꠘꠔꠣ।

বর্তমানে নির্বাচিত:

ꠁꠘ꠆ꠎꠤꠟ ৩: ꠟꠥꠇ 19: sylN

হাইলাইট

কপি