ꠁꠘ꠆ꠎꠤꠟ ৩: ꠟꠥꠇ 17
17
ꠘꠣꠘꠣꠘ ꠛꠦꠙꠣꠞꠦ ꠘꠍꠤꠅꠔ
1ꠢꠎꠞꠔ ꠁꠍꠣꠄ ꠔꠣꠘ ꠡꠣꠉꠞꠤꠖ ꠅꠇꠟꠞꠦ ꠇꠁꠟꠣ, “ꠉꠥꠘꠣꠞ ꠙꠕꠦ ꠘꠦꠅꠀꠞ ꠟꠣꠉꠤ ꠃꠍꠇꠣꠘꠤ ꠀꠁꠛꠃ ꠀꠁꠛ। ꠅꠁꠟꠦ ꠟꠣꠘ꠆ꠘꠔ ꠢꠃ ꠎꠘꠞ ꠃꠙꠞꠦ, ꠎꠦꠉꠤꠄ ꠉꠥꠘꠣ ꠇꠞꠣꠞ ꠟꠣꠉꠤ ꠃꠍꠇꠣꠘꠤ ꠖꠦꠄ। 2ꠅꠃ ꠛꠦꠛꠥꠎ ꠅꠇꠟꠞ ꠄꠇꠎꠘꠞꠦꠅ ꠎꠦꠉꠤꠄ ꠉꠥꠘꠣꠞ ꠙꠕꠦ ꠐꠣꠘꠤꠀ ꠘꠦꠄ, ꠅꠉꠥꠞ ꠟꠣꠉꠤ ꠀꠞꠅ ꠜꠣꠟꠣ ꠅꠁꠟ ꠅꠘꠦ, ꠅꠉꠥꠞ ꠉꠟꠣꠔ ꠙꠣꠔ꠆ꠔꠞ ꠛꠣꠘ꠆ꠖꠤꠀ ꠖꠞꠤꠀꠔ ꠚꠣꠟꠣꠁ ꠖꠦꠅꠀ। 3ꠔꠥꠝꠞꠣꠅ ꠎꠣꠞꠎꠤꠞ ꠛꠦꠙꠣꠞꠦ ꠢꠥꠡꠤꠀꠞ ꠞꠁꠅ। ꠔꠥꠝꠣꠞ ꠇꠥꠘꠥ ꠜꠣꠁꠄ ꠔꠥꠝꠣꠞ ꠉꠦꠍꠦ ꠖꠥꠡ ꠇꠞꠟꠦ ꠔꠣꠞꠦ ꠛꠥꠎꠣꠁꠅ। ꠢꠦ ꠖꠤꠟ ꠛꠖꠟꠣꠁꠀ ꠝꠣꠚ ꠌꠣꠁꠟꠦ ꠔꠣꠞꠦ ꠝꠣꠚꠤ ꠖꠤꠅ। 4ꠢꠦ ꠖꠤꠘꠞ ꠝꠣꠎꠦ ꠡꠣꠔꠛꠣꠞ ꠖꠥꠡ ꠇꠞꠤꠀ, ꠡꠣꠔꠛꠣꠞ ꠀꠁꠀ ꠔꠥꠝꠣꠞ ꠉꠦꠍꠦ ꠝꠣꠚ ꠌꠣꠁꠟꠦ, ꠔꠣꠞꠦ ꠝꠣꠚ ꠇꠞꠤ ꠖꠤꠅ।”
5ꠍꠣꠢꠣꠛꠤ ꠅꠇꠟꠦ ꠢꠎꠞꠔ ꠁꠍꠣꠞ ꠉꠦꠍꠦ ꠀꠛꠖꠣꠞ ꠇꠞꠟꠣ, “ꠢꠥꠎꠥꠞ, ꠀꠝꠞꠣꠞ ꠁꠝꠣꠘꠤ ꠛꠟ ꠛꠣꠠꠣꠁ ꠖꠦꠃꠇ꠆ꠇꠣ।” 6ꠔꠣꠁꠘ ꠇꠁꠟꠣ, “ꠔꠥꠝꠞꠣꠞ ꠖꠤꠟꠅ ꠎꠥꠖꠤ ꠄꠉꠥ ꠒꠦꠋꠉꠣꠞ ꠛꠤꠌꠤꠞ ꠙꠞꠤꠝꠣꠘ ꠁꠝꠣꠘ ꠕꠣꠇꠦ, ꠀꠞ ꠔꠥꠝꠞꠣ ꠅꠃ ꠢꠦꠅꠞꠣ ꠉꠣꠍꠞꠦ ꠇꠅ, ꠎꠠ ꠡꠥꠖ꠆ꠖꠣ ꠢꠥꠞꠤꠀ ꠉꠤꠀ ꠖꠞꠤꠀꠔ ꠉꠣꠠꠤꠎꠣꠅ, ꠔꠦ ꠢꠦ ꠔꠥꠝꠞꠣꠞ ꠇꠕꠣ ꠢꠥꠘꠛ।
7“ꠔꠥꠝꠞꠣꠞ ꠝꠣꠎꠦ ꠁꠟꠣ ꠇꠥꠘꠥ ꠉꠤꠞꠡ꠆ꠔ ꠀꠍꠦ ꠘꠤ, ꠎꠣꠞ ꠇꠣꠝꠟꠣꠄ ꠀꠟ ꠛꠣꠁꠀ ꠛꠣ ꠉꠞꠥ ꠞꠣꠈꠤꠀ ꠛꠘ꠆ꠖꠅ ꠕꠣꠇꠤ ꠛꠣꠠꠤꠔ ꠀꠁꠔꠦꠃ, ꠢꠦ ꠔꠣꠞ ꠇꠣꠝꠟꠣꠞꠦ ꠇꠄ, ꠔꠥꠝꠤ ꠎꠟꠖꠤ ꠀꠁꠀ ꠈꠣꠘꠣ ꠈꠣꠅ? 8ꠘꠣ, ꠇꠦꠃ ꠁꠟꠣ ꠇꠄ ꠘꠣ। ꠛꠞꠋ ꠅꠃꠟꠣ ꠇꠄ, ꠅꠛꠣ, ꠔꠥꠁ ꠀꠝꠣꠞ ꠈꠣꠘꠣ ꠎꠥꠁꠔ ꠇꠞ। ꠀꠝꠤ ꠎꠔ ꠡꠝꠄ ꠈꠣꠘꠣ ꠈꠣꠁ, ꠔꠥꠁ ꠅꠘꠅ ꠃꠛꠣꠁꠀ ꠜꠣꠟꠣꠝꠘ꠆ꠔꠦ ꠀꠝꠣꠞꠦ ꠛꠣꠔꠣꠡ ꠖꠦ। ꠛꠣꠖꠦ ꠔꠥꠁ ꠈꠣꠁꠍ। 9ꠀꠞ ꠢꠃ ꠉꠥꠟꠣꠝꠦ ꠔꠣꠘ ꠢꠥꠇꠥꠝ ꠝꠣꠘꠍꠦ ꠇꠞꠤ ꠔꠣꠁꠘ ꠔꠣꠞꠦ ꠇꠥꠘꠥ ꠗꠁꠘ꠆ꠘꠛꠣꠖ ꠖꠦꠁꠘ ꠘꠤ? ꠘꠤꠌꠄ ꠘꠣ। 10ꠅꠃ ꠟꠣꠈꠣꠘ ꠔꠥꠝꠞꠣꠅ ꠢꠇꠟ ꠢꠥꠇꠥꠝ-ꠀꠢꠇꠣꠝ ꠀꠖꠣꠄ ꠇꠞꠟꠦꠅ ꠇꠁꠅ, ꠝꠣꠟꠤꠇ, ꠀꠝꠞꠣ ꠔ ꠔꠥꠝꠣꠞ ꠘꠣ-ꠟꠣꠄꠇ ꠉꠥꠟꠣꠝ। ꠀꠝꠞꠣ ꠎꠦꠔꠣ ꠇꠣꠝ ꠇꠞꠣ ꠎꠞꠥꠞ ꠀꠍꠤꠟ, ꠈꠣꠟꠤ ꠅꠔꠣꠃ ꠇꠥꠘꠥ ꠞꠇꠝꠦ ꠀꠖꠣꠄ ꠇꠞꠍꠤ।”
ꠖꠡꠎꠘ ꠙꠌꠣ-ꠇꠥꠡ꠆ꠑ ꠛꠦꠝꠣꠞꠤꠞꠦ ꠡꠤꠚꠣ ꠇꠞꠣ
11ꠢꠎꠞꠔ ꠁꠍꠣ ꠎꠦꠞꠥꠎꠣꠟꠦꠝ ꠐꠣꠃꠘꠅ ꠎꠣꠅꠀꠞ ꠛꠣꠟꠣ ꠡꠝꠞꠤꠀ ꠀꠞ ꠉꠣꠟꠤꠟ ꠎꠤꠟꠣꠞ ꠝꠣꠎꠦꠖꠤ ꠀꠐꠤꠀ ꠎꠣꠁꠞꠣ। 12ꠅꠃ ꠡꠝꠄ ꠄꠇ ꠉꠣꠃꠔ ꠢꠣꠝꠣꠘꠤꠞ ꠙꠕꠞ ꠝꠥꠈꠅ ꠖꠡꠎꠘ ꠙꠌꠣ-ꠇꠥꠡ꠆ꠑ ꠛꠦꠝꠣꠞꠤꠄ ꠔꠣꠘꠞꠦ ꠖꠦꠈꠣꠔ ꠀꠁꠟꠣ। ꠔꠣꠞꠣ ꠖꠥꠞꠁ ꠃꠛꠣꠁꠀ ꠎꠥꠞꠦ ꠎꠥꠞꠦ ꠇꠁꠟꠣ, 13“ꠅ ꠢꠥꠎꠥꠞ ꠁꠍꠣ, ꠀꠝꠞꠣꠞꠦ ꠞꠢꠝ ꠇꠞꠃꠇ꠆ꠇꠣ।” 14ꠔꠣꠞꠣꠞꠦ ꠖꠦꠈꠤꠀ ꠔꠣꠁꠘ ꠇꠁꠟꠣ, “ꠎꠣꠅ, ꠁꠝꠣꠝ ꠍꠣꠛ ꠅꠇꠟꠞꠦ ꠉꠤꠀ ꠔꠥꠝꠞꠣꠞ ꠢꠣꠟꠔ ꠖꠦꠈꠣꠅ।”
ꠙꠕꠦꠖꠤ ꠎꠣꠁꠔꠦ ꠎꠣꠁꠔꠦ ꠔꠣꠞꠣ ꠢꠇꠟꠞ ꠛꠦꠝꠣꠞ ꠇꠝꠤꠉꠦꠟ। 15ꠔꠣꠞꠣꠞ ꠝꠣꠎꠦ ꠄꠇꠎꠘꠦ ꠎꠦꠛꠟꠣ ꠖꠦꠈꠟ, ꠢꠦ ꠜꠣꠟꠣ ꠅꠁꠉꠦꠍꠦ, ꠖꠦꠈꠤꠀꠃ ꠎꠥꠞꠦ ꠎꠥꠞꠦ ꠀꠟ꠆ꠟꠣꠞ ꠔꠣꠞꠤꠚ ꠇꠞꠤ ꠇꠞꠤ ꠢꠦ ꠚꠤꠞꠤꠀ ꠀꠁꠟ। 16ꠀꠁꠀ ꠁꠍꠣꠞ ꠙꠣꠅꠔ ꠙꠠꠤꠀ ꠔꠣꠘꠞꠦ ꠡꠥꠇꠞꠤꠀ ꠎꠣꠘꠣꠁꠟ। ꠢꠦ ꠅꠁꠟ ꠡꠝꠞꠤꠀ ꠎꠣꠔꠤꠞ ꠝꠣꠘꠥꠡ।
17ꠔꠦꠃ ꠁꠍꠣꠄ ꠇꠁꠟꠣ, “ꠖꠡꠅ ꠎꠘꠞꠦꠃ ꠇꠥꠘꠥ ꠜꠣꠟꠣ ꠇꠞꠣ ꠅꠁꠍꠦ ꠘꠣ ꠘꠤ? ꠔꠦ ꠛꠣꠇꠤ ꠘꠄꠎꠘ ꠇꠥꠀꠁ? 18ꠀꠟ꠆ꠟꠣꠞ ꠔꠣꠞꠤꠚ ꠇꠞꠣꠞ ꠟꠣꠉꠤ ꠅꠃ ꠛꠤꠖꠦꠡꠤ ꠛꠦꠐꠣ ꠍꠣꠠꠣ ꠀꠞ ꠇꠦꠃ ꠚꠤꠞꠤꠀ ꠀꠁꠟ ꠘꠣ ꠘꠤ?” 19ꠛꠣꠖꠦ ꠁꠍꠣꠄ ꠔꠣꠞꠦ ꠇꠁꠟꠣ, “ꠜꠣꠁ, ꠔꠥꠝꠣꠞ ꠁꠝꠣꠘꠞ ꠛꠟꠦꠃ ꠔꠥꠝꠤ ꠜꠣꠟꠣ ꠅꠁꠍ। ꠅꠈꠘ ꠍꠢꠤ-ꠍꠣꠟꠣꠝꠔꠦ ꠎꠣꠅ।”
ꠇꠤꠀꠝꠔꠞ ꠀꠟꠣꠝꠔ
20ꠚꠞꠤꠡꠤ ꠝꠎꠛꠞ ꠇꠄꠎꠘ ꠀꠁꠀ ꠢꠎꠞꠔ ꠁꠍꠣꠞꠦ ꠎꠤꠇꠣꠁꠟꠣ, ꠀꠟ꠆ꠟꠣꠄ ꠇꠥꠘ ꠡꠝꠄ ꠔꠣꠘ ꠛꠣꠖꠡꠣꠁ ꠌꠣꠟꠥ ꠇꠞꠛꠣ। ꠔꠣꠁꠘ ꠇꠁꠟꠣ, “ꠀꠟ꠆ꠟꠣꠞ ꠛꠣꠖꠡꠣꠁ ꠔ ꠇꠦꠃꠞꠞꠦ ꠎꠣꠘꠣꠁ-ꠢꠥꠘꠣꠁ ꠀꠄ ꠘꠣ। 21ꠇꠦꠃ ꠇꠅꠀꠞ ꠡꠣꠁꠖ꠆ꠖ ꠘꠣꠁ, ꠀꠟ꠆ꠟꠣꠞ ꠛꠣꠖꠡꠣꠁ ꠅꠘꠅ ꠛꠣ ꠢꠘꠅ ꠖꠦꠈꠍꠤ। ꠢꠥꠘꠃꠇ꠆ꠇꠣ, ꠀꠟ꠆ꠟꠣꠞ ꠛꠣꠖꠡꠣꠁ ꠔ ꠅꠈꠘꠃ ꠀꠙꠘꠣꠞꠣꠞ ꠝꠣꠎꠦ ꠌꠣꠟꠥ ꠀꠍꠦ।”
22ꠛꠣꠖꠦ ꠔꠣꠘ ꠡꠣꠉꠞꠤꠖ ꠅꠇꠟꠞꠦ ꠇꠁꠟꠣ, “ꠅꠝꠘ ꠄꠇ ꠡꠝꠄ ꠀꠁꠛ, ꠎꠦꠛꠟꠣ ꠔꠥꠝꠞꠣ ꠀꠝꠤ ꠛꠤꠘ-ꠀꠖꠝꠞ ꠄꠇꠈꠣꠘ ꠖꠤꠘ ꠖꠦꠈꠔꠣꠄ ꠌꠣꠁꠛꠣꠄ, ꠅꠁꠟꠦ ꠙꠣꠞꠔꠣꠄ ꠘꠣꠄ। 23ꠝꠣꠘꠡꠦ ꠔꠥꠝꠞꠣꠞꠦ ꠇꠁꠛꠣ, ꠅꠘꠅ ꠖꠦꠈꠅ, ꠢꠘꠅ ꠖꠦꠈꠅ। ꠅꠁꠟꠦ ꠔꠥꠝꠞꠣ ꠔꠣꠞꠣꠞ ꠇꠕꠣꠄ ꠖꠃꠠꠤꠅ ꠘꠣ, ꠇꠥꠘꠥꠈꠣꠘꠅ ꠎꠣꠁꠅ ꠘꠣ। 24ꠢꠥꠘꠅ, ꠝꠦꠊꠞ ꠎꠤꠟꠇꠤꠞ ꠟꠉꠦ ꠀꠍꠝꠣꠘꠞ ꠄꠇ ꠝꠣꠕꠣ ꠕꠣꠇꠤ ꠀꠞꠇ ꠝꠣꠕꠣ ꠎꠦꠛꠟꠣ ꠚꠞ ꠅꠄ, ꠅꠃ ꠡꠝꠄ ꠔ ꠢꠇꠟꠦ ꠖꠦꠈꠦ। ꠔꠦ ꠀꠝꠤ ꠛꠤꠘ-ꠀꠖꠝ ꠎꠦꠛꠟꠣ ꠀꠁꠝꠥ ꠢꠃ ꠡꠝꠄꠅ ꠅꠟꠣ ꠢꠇꠟꠦ ꠖꠦꠈꠛ। 25ꠅꠁꠟꠦꠅ ꠙꠄꠟꠣ ꠁ ꠎꠝꠣꠘꠣꠞ ꠝꠣꠘꠡꠞ ꠀꠔꠅ ꠀꠝꠤ ꠛꠃꠔ ꠇꠡ꠆ꠐ ꠙꠣꠁꠔꠣꠝ ꠅꠁꠛ, ꠔꠣꠞꠣ ꠀꠝꠣꠞꠦ ꠖꠥꠞ ꠖꠥꠞ ꠇꠞꠛꠣ।
26“ꠎꠦꠟꠣ ꠘꠥꠢ ꠘꠛꠤꠞ ꠀꠝꠟꠅ ꠅꠁꠍꠤꠟ, ꠀꠝꠤ ꠛꠤꠘ-ꠀꠖꠝꠞ ꠎꠝꠣꠘꠣꠔꠅ ꠅꠟꠣ ꠅꠁꠛ। 27ꠘꠥꠢ ꠘꠛꠤ ꠎꠣꠎꠅ ꠃꠑꠣꠞ ꠀꠉ ꠙꠞ꠆ꠎꠘ꠆ꠔ ꠝꠣꠘꠡꠦ ꠈꠣꠘꠣ-ꠙꠤꠘꠣ, ꠛꠤꠀ-ꠡꠣꠖꠤ ꠀꠞ ꠊꠞ-ꠡꠋꠡꠣꠞ ꠇꠞꠔꠣ, ꠘꠥꠢ ꠘꠛꠤꠞ ꠛꠁꠘ꠆ꠘꠣ ꠀꠁꠀ ꠁꠔꠣꠞꠦ ꠘꠤꠙꠣꠔ ꠇꠞꠟ। 28ꠅꠃꠟꠣ ꠟꠥꠔ ꠘꠛꠤꠞ ꠀꠝꠟꠅ-ꠅ ꠝꠣꠘꠡꠦ ꠈꠣꠘꠣ-ꠙꠤꠘꠣ, ꠈꠞꠤꠖ-ꠛꠤꠇꠤ, ꠈꠦꠔ-ꠉꠤꠞꠡ꠆ꠔꠤ ꠀꠞ ꠛꠣꠠꠤ-ꠊꠞ ꠛꠣꠘꠣꠘꠤꠔ ꠛꠦꠡ꠆ꠔ ꠀꠍꠟꠣ। 29ꠅꠁꠟꠦ ꠟꠥꠔ ꠘꠛꠤ ꠎꠦꠖꠤꠘ ꠍꠣꠖꠥꠝ ꠐꠣꠃꠘ ꠍꠣꠠꠤꠀ ꠛꠤꠖꠣꠄ ꠅꠁꠉꠦꠟꠣ, ꠢꠃ ꠖꠤꠘꠃ ꠀꠍꠝꠣꠘ ꠕꠣꠇꠤ ꠀꠉꠥꠁꠘ ꠀꠞ ꠉꠘ꠆ꠖꠇꠞ ꠉꠎꠛ ꠟꠣꠝꠤꠀ ꠁꠔꠣ ꠢꠇ꠆ꠇꠟꠐꠤꠞꠦ ꠘꠤꠙꠣꠔ ꠇꠞꠟ। 30ꠑꠤꠇ ꠅꠃꠟꠣ, ꠀꠝꠤ ꠛꠤꠘ-ꠀꠖꠝ ꠎꠦꠖꠤꠘ ꠎꠣꠁꠞꠣ ꠅꠁꠝꠥ, ꠢꠃ ꠖꠤꠘꠅ ꠅꠟꠣ ꠀꠈꠔꠣ ꠀꠁꠛ।
31“ꠢꠤꠖꠤꠘ ꠇꠦꠃ ꠎꠥꠖꠤ ꠊꠞꠞ ꠌꠣꠟꠞ ꠃꠙꠞꠦ ꠕꠣꠇꠦ, ꠔꠦ ꠔꠣꠞ ꠊꠞꠞ ꠝꠣꠟ-ꠍꠣꠝꠣꠘꠣ ꠘꠤꠛꠣꠞ ꠟꠣꠉꠤ, ꠟꠣꠝꠣꠔ ꠟꠣꠝꠤꠀ ꠊꠞꠞ ꠜꠤꠔꠞꠦ ꠘꠣ ꠢꠣꠝꠣꠃꠇ। ꠅꠃ ꠟꠣꠈꠣꠘ ꠇꠦꠃ ꠎꠥꠖꠤ ꠛꠘ꠆ꠖꠅ ꠕꠣꠇꠦ, ꠢꠦ-ꠅ ꠀꠞ ꠛꠣꠠꠤꠔ ꠘꠣ ꠀꠃꠇ। 32ꠟꠥꠔ ꠘꠛꠤꠞ ꠛꠤꠛꠤꠞ ꠊꠐꠘꠣ ꠁꠀꠖ ꠇꠞꠅ। 33ꠝꠘꠅ ꠞꠣꠈꠤꠅ, ꠎꠦ ꠎꠘꠦ ꠎꠣꠘ ꠛꠣꠌꠣꠁꠔ ꠌꠣꠄ, ꠢꠦ ꠘꠤꠎꠞ ꠎꠤꠘ꠆ꠖꠦꠉꠤ ꠈꠥꠀꠁꠛ, ꠅꠁꠟꠦ ꠎꠦ ꠎꠘꠦ ꠎꠣꠘ ꠡꠙꠤꠀ ꠖꠦꠄ, ꠢꠦ ꠎꠤꠘ꠆ꠖꠦꠉꠤ ꠙꠣꠁꠛ। 34ꠢꠤ ꠞꠣꠁꠔ ꠄꠇꠁ ꠛꠤꠍꠘꠣꠔ ꠖꠥꠁꠎꠘ ꠢꠥꠔꠤꠟꠦꠅ, ꠄꠇꠎꠘꠞꠦ ꠘꠦꠅꠀ ꠅꠁꠛ, ꠖꠥꠍꠞꠣ ꠎꠘ ꠛꠣꠖ ꠙꠠꠤꠎꠤꠛ। 35-36ꠖꠥꠁ ꠛꠦꠐꠤꠄ ꠄꠇꠟꠉꠦ ꠛꠣꠞꠣ-ꠜꠣꠘꠣꠔ ꠕꠣꠇꠟꠦꠅ, ꠄꠞꠣꠞ ꠄꠇꠎꠘꠞꠦ ꠘꠦꠅꠀ ꠅꠁꠛ, ꠀꠞꠇ ꠎꠘ ꠛꠣꠖ ꠙꠠꠤꠎꠤꠛ।”
37ꠍꠣꠢꠣꠛꠤ ꠅꠇꠟꠦ ꠇꠁꠟꠣ, “ꠢꠥꠎꠥꠞ, ꠁꠔꠣ ꠇꠥꠀꠁ ꠅꠁꠛ?” ꠔꠣꠁꠘ ꠎꠥꠀꠙ ꠖꠤꠟꠣ, “ꠝꠞꠣ ꠟꠣꠡ ꠎꠦꠈꠣꠘꠅ, ꠢꠇꠥꠘꠅ ꠢꠘꠅ ꠖꠟꠣ ꠅꠄ।”
বর্তমানে নির্বাচিত:
ꠁꠘ꠆ꠎꠤꠟ ৩: ꠟꠥꠇ 17: sylN
হাইলাইট
শেয়ার
কপি
Want to have your highlights saved across all your devices? Sign up or sign in
© Ahle Kitab Society. All rights reserved.