Fingec fingec 6
6
Faka mangana homac meficgegec
1 #
Yop 1:6; 2:1 Anu ngicngac yeni sahema bangec sokodacmagec naroangfocngina fingecgec. 2#Myeg 89:7Fingecgec Anutuac medacfora#6:2 Anutuac medacfora imoc merac imoc mong mi negendimbe. Imoc areng goa angero isoc dedae nga Kebungosac imocac fora negende. yeneng naroang siricngina gombunga yenembokoma hengisingyunuma imoc meyunugec enengfocngina anggec. 3Ifi anggec Kebungo yofi deec, “Ngicngac yeni sebifusingina bangectehecngo memea imocac amma neac asu yenearu fefeseri mi febeso. Yeni bangecfu kekecnginaac kifanaso 120sac ambeso.” 4#Bki 13:33Anu yofi fingerec Anutuac medacfora yeni bangecngic yeneac naroangfocngina yenigoc fegec yenearunac nambaracfocngina fingecgec. Anu nefilingic#6:4 Nefilingic imoc ngicareng mong kuneng yombong nga kucnginagoc. yeni bangecfu naso imohai nga ngadeau ifingoc kecgec. Ngic imoc yeni warac kecgec nga yeni kucnginagoc nga kpac kunengnginagoc kecgec.
5 #
Fing 8:21; Myeg 14:3; 51:7; Mat 15:19; 24:37; Ruk 17:26; Rom 3:23; 8:7; Efs 2:3; 1Pe 3:20 Kebungo bangecfu ngicngac yenenu yeni faka mangana homac meficgegec. Amma ubaherenginau negen negeng manganasac feu imocacsoc faka mangana nasosoc amma kecgec. 6Anu ye imoc hemma ngicngac meficyunuma bangecfu faiyunuec uaya imoc ubeango wama ubaebictoa meec. 7Mema yofi deec, “Bangecngicngac meficyunuai yeni bangec witiaunac meicyunubesare. Ni meficyunuai imoc ubanango wayunuduaeac ngicngac nga yang amma wiac kekecnginagoc bangecgoc wegenac kengha amma kecandae nga sawaac neng sasawa meicyunudacbade.” 8Nga Kebungo ine Noaac negenu ngereec.
Noaac siduc tosea 6:9–9:29
9 #
Fing 5:24; Dser 18:13; Heb 11:7; 2Pe 2:5 Yomoc Noaac siduc. Ye dindingac nga kopocsiha kpac ngicngac botucnginau kefec amma ye Anutugoc wegenac kefoc. 10#Fing 5:32Anu yeac medacfora harebec fingecgec yeneac kpacngina Sem nga Ham amma Yafet.
11Anu bangectoa bangec imoc Anutuac kicfu manganeyombonggeu imoc mengec mengereacsoc mi anec. Nga ewekpekpengo bangec sokodarec. 12Anu wiac sasawa sebifusinginagoc yeni bangecfu fakangina mangana angkecgec mengec mengereac sing mong mi fingerec. Ifi anu Anutungo bangec hemma negenec imoc mengec mengereasoc kpac.
Wage meudeac edeec
13Anu Anutungo Noa yofi dema edeec, “Wiac sasawa sebifusinginagoc yeni faka mangana angkecdaeac ewekpekpengo bangectoa bangec sokoma fede. Imocac yeni kpac andacgecdeac desiyunubesandua. Imocac ni bangectoa bangec nga yeni momoc kpetotieyunubade. 14Ge ine gofer icngo#6:14 Gofer ic imoc bangec imocac wage memeac ic gombunga nga ic ifia dedua bangecfu fede me kpac, imoc mi negendimbe. wagetoa#6:14 wagetoa Hebiraio yoacfu yoac imoc naso yohockangsac fede, yomoc nga Mose nonggeango kekeha onggonggeudeac sakac mong mema dokuu faiec imoc yerisac yoacngira socfungoc. Yeri siricngira yofi socfungoc, ngicngac onggongyunuecdeac memea nga dahai kenecde imoc Anutuac kucfusac feec. mong buya dabac dabac mema manabisic bisic homac hendzicma mana nga ngadea bangecac sopeango#6:14 Bangecac sopea imoc icsopea isoc nga imoc ine oil isoc ereu bangec manaunac meficgeandae. hosodacbesena. 15Ge wage yofi mebesena. Hereaya imocac mitaya 135, nobocnac noboc kende imocac mitaya 22 nga herea made imocac mitaya 13 ambeso. 16Nga bubuyau imoc 50 sentimita emuhacnac erema warocfu embeso nga naguya ine nonggeaubigeng faibesena. Wage imocac manau peunga andenga andenga emu amma botuhau nga wi faibesena.
17Negennec, ni wiac sasawa sawa bageau sebifusinginagoc nga kekec asunginagoc kecdae imoc yeni kpetotieyunubadeac bangecfu doku tunggbaungtoa deba ihai fingeru bangecfu wiac sasawa homedacbesandae. 18#Fing 9:9-16; 17:7; 1Pe 3:21Anu gegoc ine dzadzahacna meseribade. Ge wageu emma kecbesena, ge nga enengmedacerangifocga yeni gegoc momoc wageu emma kecbisia.
19 #
Fing 7:2-3, 14-15 Amma wiac sasawa sebifusinginagoc imoc yeni sasawa kpac andacbauac yenearunac yohockang yohockang siricngina arenga arenga ngiwa nga ngagera ifi meyununa gegoc momoc wageu emma kecbisia. 20Amma neng siricngina arenga arenga nga yang siricngina arenga arenga amma wiac sasawa kekecnginagoc bangecgoc wegenac kengha amma kecandae siricngina arenga arenga yeni sasawa kecgecdeac yohockang yohockang gearu habesandae. 21Anu wiac nenea sasawa fede imoc kpedzucnedacma wageu faina enu imocngo geangga nga yeneac yakangina ambeso.” 22#Fing 7:5; Heb 11:7Anu Noa ye Anutungo edeec yoac imoc sasawa modacdarec.
বর্তমানে নির্বাচিত:
Fingec fingec 6: Ded
হাইলাইট
শেয়ার
কপি
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.