Fingec fingec 7
7
Wageu enggec
1 #
Heb 11:7; 2Pe 2:5 Anu Kebungo Noa yofi dema edeec, “Ni gemba ngicngacareng yofinenggac kecdae yeneac botucfu geac negemba ngereede. Imocac ge arengfocgagoc ngeni wageu endacbisia. 2Amma ge yang kongaha sasawa yenearunac seweng seweng, ngiwa nga ngagera meyunuma yangtehec yohockang yohockangsac meyunudacbesena. 3Amma sawaac neng yeni bangectoa bangec witiau kecgecdeac yenearunac ifingoc seweng seweng, ngiwa nga ngagera meyunudacna gegoc wageu endacbisia. 4Imoc yofiac, ni uameme seweng wisickeu deba kiatoa bangecfu heifemanu hadzing tofocnac 40 wisickeude. Ifi fingeru wiac kekehagoc sasawa meficyunuai imoc bangecfunac meicyunudacbade.” 5Anu Kebungo yoac sasawa Noa edeec imoc ye modacma andarec.
6Anu yofi fingerec, Noa ye kifaya 600 ammanu doku tunggbaungtoa bangec sokoma haec. 7#Fing 6:18; 7:13; Mat 24:38-39; Ruk 17:27; 1Pe 3:20Amma Noa yengena nga enemmedacfora nga erangifora yeni yegoc doku tunggbaunggac woramigecdeac wageu endacgec. 8Anu yang kongaha nga yangtehec amma neng nga wiac sasawa kekecnginagoc bangecgoc wegenac kengha amma kecandae imoc yenearunac 9yeni yohockang yohockang ngiwa nga ngagera, ifi yearu hama wageu endacgec. Anutungo Noa yoac edeec, ifi fingerec.
Doku tunggbaungtoa haec
10Anu uameme seweng wisickeu bangecfu doku tunggbaungtoa fingerec. 11#Fing 7:6; 8:2; 2Pe 3:6Noa ye kifaya 600 anec imocac afo yohockanggac uameme 17, imohai keme kemeau yombong dokukiwa feec yeni sasawango emuhacnac tohoma yadima kucgoc eremagec sawau dokuac kpaeya feec imoc anggegec. 12Anggegec kia kpema wenac 40 nga tofocnac 40 feec.
13Anu kia mi heimanu Noa nga enema amma medacfora Sem, Ham nga Yafet nga erangifora yeni bic wageu endacgec. 14Amma amayang nga kateyang sasawa siricngina arenga arenga nga wiac sasawa kekecnginagoc bangecgoc wegenac kengha amma kecandae siricngina arenga arenga nga neng sasawa siricngina arenga arenga imoc nga wiac sasawa kpegangnginagoc, 15yeni yohockang yohockang wageu emma Noaaru hagec. Amma wiac sasawa sebifusinginagoc nga kekecac asugoc kecgec yeni wageu endacgec. 16Anu wiac sebifusinginagoc sasawa ngiwa nga ngagera yeni Anutungo Noa yoac edeec imocac siricfu endacgec. Endacgec Kebungo wage naguya heiyemmeec.
17Nga uameme 40ac manau doku yadima bangec sokodacma imocngo wage bangecfunac ionggeu wi doku witiau emma kenec. 18Doku imoc yadima kuneng yombong anu wage ye imocac witiau tarec. 19Anu doku ye bangec witiaunac yadima monggoc yombong emma tiki kuneng herea sawa bageau nanggec imoc sasawa semeyunudarec. 20Anu doku tiki feracyunuma enec imocac kpeteha imoc seweng mitaacsoc anec. 21#Fing 6:7; 7:4; Mat 24:38-39; 2Pe 3:6Ifi anu wiac sebifusinginagoc sasawa bangecfu kengha amma kecgec nga neng, amayang, kateyang amma bangecfu wiacbisic bisic gurugoc gurugoc kenghaangandae nga ngicngac sasawa homedacgec. 22Wiac sasawa samacnginau kekecac asu feec nga bangec kerengau kecandae yeni sasawa homedacgec. 23#Ruk 17:26-27; 1Pe 3:20; 2Pe 2:5Anutungo ifi anu bangecfu wiac kekehagoc sasawa, ngicngac, yang nga wiac kekecnginagoc bangecgoc wegenac kengha amma kecandae amma sawaac neng imoc yeni bangecfunac meicyunuu kpac andacgec. Anu Noa nga yegoc wage manau kecgec yenengsac komoc kpegec.
24Anu dokutoa imoc bangec witiau yadima femanungoc uameme 150 wisickeec.
বর্তমানে নির্বাচিত:
Fingec fingec 7: Ded
হাইলাইট
শেয়ার
কপি
Want to have your highlights saved across all your devices? Sign up or sign in
© (Active), Wycliffe Bible Translators, Inc. All rights reserved.