Zɛnɛse 11
11
Beebɛ pɛrɛ kɛ́tɛi
1Sîi-woo tɔnɔ nɔ́ ƃé kɛ̀ ŋ̀éniɛi su, ǹyaŋ ŋ̀éniɛi su-ƃelai kélee da kâa zii-woo tɔnɔi ŋí ƃò. 2Tãi ǹûai dí lì la vóloi kulâi-perei, dí kwaa ma kàa Babelɔŋ lɔii su dí sée naa. 3Nya ƃe dí mò díkîe-ni dîa dîyɛɛi, “Ka pá kú pɔ̂rɔ kane kú géreŋ kpɔ́ a ǹɛ́lɛɛ.” Bɔ̂rɔ kane-ŋai dí kɛ̀ a pɛ́rɛ tɔɔ sɛŋ. Dí sɛŋ da kùla ǹɔii mu gɛɛ yɛ̂ɛ kotâa bɔ̂rɔ kane-ŋai see mɛni ma díkîe-ni mɛi. 4Dí mò díkîe-ni dîa dîyɛɛi, “Kwaa kú taa tɔ́ kúkpîŋ mɛni mà, kú pɛ́rɛ kɛ́tɛ tɔ́ɔ dôŋ é seri ŋ̀ele-kɔlɔŋ ma, kúlaa é kɛ́ ma a gɛɛ kúfe kɛ̀ nɔ́ a kútaa-taa ǹɔii su gwaa kélee.”
5Nya ƃe Yâwɛɛ è pà a gɛɛ é daai káa da bɛ́rɛi nyii-ŋai núu-kpune è dɔ̀ɔi. 6Yâwɛɛ è mò ǹyɛɛ, “Gáa, díkaa a núu tɔnɔ, ǹyaŋ díla sîi-woo kɛ́ ƃô tɔnɔ. M̀ɛnii da pâi gɛ̂i gɔ́ɔ pîlanii nɔ́ ká ŋí. M̀ɛnii kélee da gbɛ̀tɛ a gɛɛ dí gɛ́i, bɔri a pâi kɛ̂i dîɛ. 7Tɔɔ kú lí naa kú dísîi-wooi sumo a gɛɛ dífe díkîe-ni lá-woo mɛni ŋɔ́nɔ.” 8Nya ƃe Yâwɛɛ è dítâa-taa kpɔ́ ǹɔii gwaa kélee. Dítaa tɔɔ mɛnii é nâa kpèra. 9Mɛni ma dí daai láa sèe a Beebɛ, kpɛ́ni fêi, nàa ƃé Yâwɛɛ è ǹɔii kélee ŋɔsîi-wooi sûmo naa é ǹûai táa-taa ǹɔii gwaa kélee.
Sɛ̂ŋ suu pîlaŋ-pere
(Kɔlɔnikɔ Maa-ŋuŋ 1:24-27)
10Sɛ̂ŋ suu pîlaŋ-pere ká ŋí. Tãi è kɛ̀ la a kóraŋ ŋuŋ tɔnɔi (100), è Apasa maa sɔlɔ ƃô kóraŋ feerɛ tɛ̀ɛ ǹya-fɛɛi pôlu ma. 11Apasa maa sɔlɔ ƃóɔɔ pôlu ma, Sɛ̂ŋ è kɛ̀ ɣele ma a kóraŋ ŋuŋ lɔ́ɔlu (500). È lônii-sinaa da nɛyâa maa sɔlɔ ƃô máŋ.
12Tãi Apasa ǹyaŋ è kɛ̀ la ɣele ma a kóraŋ buu saaƃa káo lɔ́ɔlui, è Sila maa sɔlɔ ƃô. 13Apasa è kɛ̀ ɣele ma a kóraŋ ŋuŋ náaŋ káo saaƃa (403), Sila maa sɔlɔ ƃóɔɔ pôlu ma. È lônii-sinaa da nɛyâa maa sɔlɔ ƃô ŋɔ́nɔ.
14Sila kɛ́ɛ ɣele ma a kóraŋ buu saaƃai, è Ibɛ maa sɔlɔ ƃô. 15Sila ǹyaa máŋ è kɛ̀ ɣele ma a kóraŋ ŋuŋ náaŋ káo saaƃa (403) Ibɛ maa sɔlɔ ƃóɔɔ pôlu ma. È lônii-sinaa da nɛyâa maa sɔlɔ ƃô.
16Tãi Ibɛ è kɛ̀ la a kóraŋ buu saaƃa káo náaŋ, è Pelɛ maa sɔlɔ ƃô. 17Pelɛ maa sɔlɔ ƃóɔɔ pôlu ma, Ibɛ è kɛ̀ ɣele ma ŋɔ́nɔ a kóraŋ ŋuŋ náaŋ pôlu buu saaƃa (430), é lônii-sinaa da nɛyâa maa sɔlɔ ƃó.
18Pelɛ ǹyaa máŋ è kɛ̀ ɣele ma a kóraŋ buu saaƃa é lɛ́ɛ pâi Leu maa sɔlɔ ƃôi. 19Pelɛ è kɛ̀ ɣele ma a kóraŋ ŋuŋ feerɛ káo lɔ́ɔlu mɛi náaŋ (209) Leu maa sɔlɔ ƃóɔɔ pôlu ma. È lônii-sinaa da nɛyâa maa sɔlɔ ƃô ǹyaa máŋ.
20Leu kɛ́ɛ ɣele ma a kóraŋ buu saaƃa káo feerɛ, è Siru maa sɔlɔ ƃô. 21Leu è kɛ̀ ɣele ma a kóraŋ ŋuŋ feerɛ káo lɔ́ɔlu mɛi feerɛ (207) Siru maa sɔlɔ ƃóɔɔ pôlu ma. È lônii-sinaa da nɛyâa maa sɔlɔ ƃô.
22Siru è kɛ̀ a kóraŋ buu saaƃa é lɛ́ɛ pâi Neɔ maa sɔlɔ ƃôi. 23È kóraŋ ŋuŋ feerɛ (200) kɛ̀ Neɔ maa sɔlɔ ƃóɔɔ pôlu ma. È lônii-sinaa da nɛyâa maa sɔlɔ ƃô máŋ.
24Neɔ ǹyaa máŋ è kɛ̀ a kóraŋ buu feerɛ káo lɔ́ɔlu mɛi náaŋ é lɛ́ɛ pâi Tɛra maa sɔlɔ ƃôi. 25È kóraŋ ŋuŋ tɔnɔ pôlu buu káo lɔ́ɔlu mɛi náaŋ (119) kɛ̀ ɣele ma Tɛra maa sɔlɔ ƃóɔɔ pôlu ma. Ǹyaa máŋ è lônii-sinaa da nɛyâa maa sɔlɔ ƃô.
26Tɛra è kɛ̀ a kóraŋ buu lɔ́ɔlu mɛi feerɛ é Eberaŋ maa sɔlɔ ƃó da Neɔ é pɛ́lɛ Araŋ ma.
Tɛra suu pîlaŋ-pere
27Tɛra suu pîlaŋ-pere ká ŋí. È Eberaŋ maa sɔlɔ ƃô da Neɔ é pɛ́lɛ Araŋ ma. Araŋ ǹyaŋ ƃé La maa sɔlɔ ƃô. 28Araŋ è sàa ǹâŋ Tɛra túɛ Ɔ̂ɔ, Babelɔŋ lɔii su ƃɛ́i dí màa sɔlɔ ƃô naai. 29Nya ƃe Eberaŋ da Neɔ dí nɛnî kùla. Eberaŋ ŋɔnɛnîi láa ƃé kɛ̀ a Serai, Neɔ ŋɔnɛnîi láa kɛ́ ƃô a Maka. Maka è kɛ̀ a Araŋ ǹóŋ-nɛni. Araŋ è kɛ̀ a Ika ǹâŋ. 30Serai è kɛ̀ a gbómaa.
31Tɛra è ǹóŋ Eberaŋ sìɣe da Araŋ ǹóŋ La nyii kɛ̀ a ǹóŋ ŋɔlóŋ, é Serai siɣe nyii kɛ̀ a ǹóŋ Eberaŋ ŋɔnɛnîi, da dîa-ni dí kúla Babelɔŋ-ŋai dítaai su da kɛ̂ ma Ɔ̂ɔi, dí lí Keena lɔii su. Kɛ́lɛ tãi dí sèri la Araŋ taa-leei sui, dí sèe naa. 32Tɛra è kóraŋ ŋuŋ feerɛ káo lɔ́ɔlu (205) kɛ̀ ɣele ma. È sàa Araŋ taa-leei su.
বর্তমানে নির্বাচিত:
Zɛnɛse 11: KWB
হাইলাইট
শেয়ার
কপি
Want to have your highlights saved across all your devices? Sign up or sign in
