ZEPHANIAH 3
3
Jerusalem Apap Lapen Kejok
1Abe kethurkhrap lapen kangthirthe abang,
kechenek-ot arongsopi!
2La bang alam arjujelo,
la bang kepakeng dengdelo.
Ne Hemphu aphan chikikelo,
la a-Arnam adung patebokbelo.
3La angbong kam keklempi atum
kangrong ateke atumlo;
la kangsai atum ke arnikangsam amahar atumlo latum adap an aphan thangta bibelo,
4La amontri atum adeng kechinine atumlo,
akekroi kave amonit atumlo.
La akurusar atum kangthir ason, seta ingthirthelo,
halatum aron jakong pen ingdilo.
5 Hemphu la angbong chok-lim,
Alangli kechokche klemkle,
Adapprangta Alangli ahokpet paklang-lo.
Arni keklang aphongtinta Alangli chinipamelo;
Bonta ahok-he atum ketherak chinine.
6“Ne det-heihei pavedet-lo;
halatum apaisong rutang-lo;
Ne halatum atovar-heihei baduta dam abang pavedet-an phangnolo;
latum arongsopi-heihei rongman paplang-lo,
inutnatta ave, edonbakta kedo abang ave.”
7Ne pulo, “Chenamsi la nephan pherepo,
labangpi kepakeng alam deng-lo;
latum ne kethan ason an tengnenedetpo#Latum tengnenedetpo; latum kedo adim pen chorpetpedetpo bangpi Nehukum kepi ason an langkrangkre detpo bonta kehingno akam latum keklem pa-ongmuchotjisi aninghang-lo.”
8Asap inghongtha, pusi Hemphu pulo, “Ne det atum lapen methang arat atum aphan haki kepiji arni aphan inghongtha, lahei pen ajok halatum aphuthak Nening kethi plengsetpo. Nening kethi pen la pirthe adang an me pen pavirdetpo.”
9Anke Ne det kedo an arat atum aphan larpo, lapen latum Nephansi ardomchotpo, lapen akaprek arnam-heihei atum aphan kalilo. Latum kedo-an Nephan kroipo. 10Kehelo Sudan kedo kepratsei Nerat aso atum Nephan dan-heihei vanpo. 11Halaso ahut, nang Nerat aso atum Nebe kethur apot therakjok phlotpo. Kechepindak lapen kecheparoka abangphutin aphan Ne terek phlotpo, la pen ajok nangtum Ne inglong kangthir#Inglong kangthir: Zaion anglong along nebe thurkrapkrelo. 12Ne hadak asotdut lapen chepabihek arat aphansi padochotpo, latum ke Nelong kerap kelongji aphansi vangpo. 13Israel arat kerenglang atum lahin-lahin kehingno akam klemkledetpo, chobeibedetpo lapen pachoreire-detpo. Latum chingthurji lapen jokvanji, badu aphanta phereredetpo.#Kepa 14.5
Ning-arong Alunjir
14Asekethe pen lunnon, O Zaion asopi;
hangnon O Israel!
Chehok-ra lapen nang kedo-an pen nangning arong chepinon O Jerusalem asopi!
15 Hemphu nang pen kangsaiji pachehelo-tang-lo;
Alangli nang hotur-heihei arphlung-lo.
Israel arecho, Hemphu nang angbong dolo,
nang puthot kehingno phere nangnelo.
16Halabangso arni Jerusalem aphan lason pupo,
“Phere nangne, O Zaion;
Nang ri jakong pavebom nangne.
17 Hemphu, nang Arnam nang angbongsi do,
inut kechedan abang, la nangpahai longji;
Alangli kanghon pen nangliphan chethe pamithupo,#Nangphan chethe kemi nangpilo; Ibri atum lason achethe aphan ke thangta chinine
Asekethe alun pen Alangli nangphuthak ning cheparongpo.
18Kecho-kejun arni ason.”
“Ne nang pen kesung pakakpo lasi nang laso pen ajok kepinrem chechak nangnelo.”#Angdengso 18, Ibri atum la chinipameme
19Chinitha, halabangso ahut Ne nangtum aphan kechenek atum an aphan keklem nangji akam klemvekpo.
Lapen kengkok atum aphan pajokpo lapen karphlungtang atum aphan pangrumpo,
lapen Ne halatum aketherak kechoro anat paprekji lapen pirthe adang an anong thepo.
20Halabangso ahut hem Ne nangvanthupo,
Halabangso arni Ne nangpangrumpet ahut;
ahok, Ne nangtum anong pathepo lapen kechoro paplangpo Ne nangtum akopai-heihei pirthe arat atum angbong kechevangthu ahut nangtum amek angden pachingthurthuji,
pusi Hemphu pulo.
Currently Selected:
ZEPHANIAH 3: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
