ZEPHANIAH 1
1
Hemphu Kangsai Arni
1Amon asopo Josiah, Judah arecho ahut Hezekiah asopo Amariah, la asopo Gedaliah, la asopo Kushi, la asopo Jephaniah along Hemphu ase vang-lo.#2 Rec 22.1—23.30; 2 Phur 34.1—35.27
2Ne pirthe athak pen kadokave amar an pavirkoipo;
pusi Hemphu pulo.
3Ne monit lapen pi pavedetpo;
Ne tomon avo-heihei lapen talo alang a-okta pavedetpo.
Ne kehingno paremdetpo;#Ne kehingno paremdetpo; Ibri atum aphan ke la isi kekhang-i ason
Ne pirthe athak pen monit pavir-etpo pusi Hemphu pulo.
4Ne Judah abethursi neri chirungpo,
lapen Jerusalem asor abeta thurpo;
lapen bangso adim pen Baal aphan karcho akurusar atum lapen akumlin-heihei pavir-etpo.
5Hem asarnung athak pen sining achiklopi, arni,
chiklolongso-heihei aphan kardomkhrup atum;
kardom lapen Hemphu amen pen seme ketang atum lapen Molek amen pen seme ketang atumta virkoipo.
6 Hemphu aphi phi kedun pen keche-o atum lapen Hemphu aphan kerire atum mate Alangli se karjuje atum an aphanta pavirpo.
7 Hemphu Arnam angno doklipnon!
Pima Hemphu arni tebok-het-lo;
Hemphu se karkli athok pathiktang-lo,
lapen Alangli alohi pangthirtang-lo.
8Lapen Hemphu se karkli athok arni kam kechepahemphu lapen recho asomar aphan Ne aduk piji,
lapen bang adet ape kechingchoi aphan ta lo.
9Halabangso arni hongthu athak kechon abangphutin aphan Ne aduk pipo.
Halatum ahemphu ahem#Halatum ahemphu ahem; mate latum arnam kardom adim kehingno ajakong akam lapen chobei pen paplengset atum aphan ta lo.
10 Hemphu pulo, halabangso arni lang-ok anghap pen kehang ase arjulongpo,
adun ahem pen keru arki thedung vangpo.
11Chiru-charnapnon, O rongsopi aber kedo atum:
pima kadokave kejor-kelang atum vir-et-lo,
rup kelin atumta virtang-lo.
12Halabangso ahut Ne melur-heihei pen Jerusalem aphan ripo,
lapen halatum ahor alingtai apo kecheparthat aning kedok atum lapen aning arlo Hemphu ke keme kehingnota klemkle pu kepu atum an aphan Ne aduk piji.
13Halatum amar-atar thi-etpo,
lapen hem do-an donodakpo.
Halatum ahem chekim seta chedo longledetpo;
Halatum drakha aberi e-po seta drakha alang jun longledetpo.
14 Hemphu thedung arni tebok-het-lo,
tebok-het lapen paprapbomlo;
Hemphu arni ase ke hodak#Arjutha! La kehingnopik arni vangbomlo Nokbe hodak ase aningkethi pen chirulo.
15Halaso arni ke aningkethi arni,
sungpik lapen ningdukpik arni,
kephangno lapen kevir arni kangting lapen ningkethethe arni,
Inghun lapen klolin arni.
16Apaisong kedo arongsopi-heihei lapen hem kangtui abe kethurjisi pong-ut arki lapen ron kechedan arki kedo arni plangpo.
17Ne monit aphan kesung vanpo,
anke halatum amek kave asonsi kengkam chejorpo,
athe halatum Hemphu abe thursi pap klemlo;
halatum avi longle aduk asonsi dung-etpo,
lapen halatum a-ok hi ason, Hemphu aningkethi arni plangpo.
18Halatum arup tame aser tame halatum aphan pajok un-elo,
Alangli kelang un-e aningkethi ame pen pirthe adang an pacho-etpo.
Pajutdetpo, la men-men amat pajutdetpo la pirthe athak kedo-an atum aphan klempo.
Currently Selected:
ZEPHANIAH 1: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
