ZEKARIAH 9
9
Tebok-Terei Adet Heihei Aphan Kangsai
1 #
Isa 23.1-18; Eze 26.1—28.26 Hemphu abirta Hadrak adet abe thursi vang-lo,
lapen Damaskas aputhak la sa-lo.
Athe Arnam arongsopi an Alanglilo,
lapen Israel akhei ta.#Isa 17.1-3; Jer 49.23-27; Amo 1.3-5
2Lapen ahoi adung adet Hamath arongsopita,
Tair lapen Sidon latum kethek-kere doseta.
3Tair ke arpongkethe chebuitang-lo,
lapen ser-rup tovar along aduk ason paplang-lo.
4Bonta chininon, la kedo-an Hemphu si thipon-etpo lapen akhi talo varchuipo,
lapen me laphan pachopo.
5 #
Isa 14.29-31; Jer 47.1-7; Eze 25.15-17; Jol 3.4-8; Amo 1.6-8; Zeph 2.4-7 Ashkelon ta thek-longpo lapen pherepo;
Lapen Gaza aphanta adukpi po;
Ekron jokta, athe ningthenak-lo.
Lapen Gaza arecho virdetpo;
Ashkelon asor apakta avedetpo.
6Isi kechingvui arat atum Ashdod dopo;
lapen Philistia kechepindak pajutdetpo.
7Ne laso angho pen avi enpo,
lapen aso adak pen la kehijim amar enpo;
Lata etum a-Arnam aphan ahim plangpo;
la Judah akur isi plangpo,
lapen Ekron Jebusi#Jebusi: Jerusalem along kedocheng atumlo, aphi David recho arat cheplang nang-lo abang ason plangpo.
8Ansi Ne Nehem Nemukam chekimchen po kehon abang ason,
lapen baduta hatput longledetpo;
Kechenek abang puthot la angbong dam longledetpo,
pima non ne Nemethang amek pen thek-long-lo.
Kevangji Arecho
9Jasemet ning arongnon, O Zaion arongsopi!
Asepathera hangnon, O Jerusalem arongsopi,
Langtha, nang recho nanglong vang-lo,
kehai aning karong, lapen Alangli haitang-lo,
Chepabihek lapen gadha athak ardonlo,
gadha aloso athak ardonlo.#Mat 21.15; Jon 12.15
10Neli Ephraim pen ron alosei ahemkonglong lapen ron athai pavedetpo lapen alangli det-heihei aphan ningkangsam alam toipo.
Alangli talo pen talo an lapen langroi pen ha pirthe kejut anta recho chopo.#Lun 72.8
Arnam Amethang Amonit Atum Aphan Kepangrumthu
11Nangphan ke, nangpen Ne Kechejok Aloh avi pen apot Ne nangtum angbong pen kepontang ban atum aphan lang kave ahilik pen lo-etpo.#Keba 24.8
12Paisong anat chiruithunon, O ningkethe keneptang atum;
Pini nangtum aphan phanni nangkepithujisi pachethang-lo.
13Pima Judah aphan Ne thai asonsi pangkang-lo;
Ephraim aphan ning parungji,
O Zaion nangsomar aphuthak, O Grik,
lapen ron kechedan-i anokjir ason paplangpo.
14Ansi Hemphu halatum aphan cheklangpo,
lapen Alangli thai aso sining kebirlak ason dampo;
Hemphu Arnamsi pong-ut arki padopo,
lapen nitur alongri amongve ason nangbarpo.
15Muluk a-Hemphu si halatum aphan raipo,
lapen halatum phamri ke-ot atum aphan chopo lapen donglam-lampo;
lapen halatum latum avi drakha alang ason junpo,
lapen harlung#Angdengso 15, Ibri atum la chinipameme ason plengsetpo,
lapen se-karkli adovan ano ason thak thakpo.
16Halabangso arni halatum a-Arnam Hemphu si halatum aphan pajokpo pima halatum Alangli rat ahurlo;
lapen recho aphuthak bor ason thak thakpo halatum Alangli longle athak turbongpo.
17Kalang, la ko-an akeme lapen ko-an aning kedok!
Sok-sang risomar atum lapen drakha alang kemi okarjang atum pa-ongpo.
Currently Selected:
ZEKARIAH 9: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
