ZEKARIAH 8
8
Jerusalem Aphrang Ason Paplangji Pu Hemphu Kechak
1Lapen muluk a-Hemphu ase nelilong vangsi pulo, 2Muluk a-Hemphu lasonsi pulo: Ne Zaion aphan jasemet akelang un-e pensi lang un-elo, lapen Ne laphan ningthipik pen lang un-elo. 3Lasonsi Hemphu pulo: Ne Zaion anat chevoithupo lapen Jerusalem angbong dopo, lapen Jerusalem aphan kekroithirklong arongsopi lapen muluk a-Hemphu#Jakong kethe Hemphu Anglong: Zaion Anglong Anglong, inglong kangthir pusi hangpo. 4Lasonsi muluk a-Hemphu pulo: Sarpi lapen sarbura atum puthot Jerusalem atovar-heihei along ingnipo, latum kesar apot bangphutin achin chiripo. 5Lapen tovar-heihei along pinsomar lapen arlosomar kejuisi plengsetpo. 6Lasonsi muluk a-Hemphu pulo: Jongsi halabangso arni ahin arat atum amek angden manghumemelo tangte Ne mek angden la manghumeme jima, pusi muluk a-Hemphu pulo? 7Lasonsi muluk a-Hemphu pulo: “Chininon, Ne rat atum aphan Nihang adet lapen Nijang adet penta pajokpo; 8lapen halatum Jerusalem angbong kepadoji aphan vanji; lapen kroithirklong lapen athikpet pen halatum Nerat plangpo lapen Ne halatum a-Arnam plangpo.”
9Lasonsi muluk a-Hemphu pulo: “Muluk a-Hemphu ahemthur kekim arni pen non ahut anta nangtum lahei alam montri atum angho pen arjulongbom, lasi kardomhemthepi kekim thekji aphan nangtum nangri-heihei chepangtang non. 10Pima halabangso arni aphrang kechongdat amonit anam ave lapen kehelat atum hotur pen kejokji thangta ave, athe Ne lahin lahin abe pathurlo. 11Bonta non Ne la ahin arat aphan aphrang arni ahut asonthot klemklelo, pusi muluk a-Hemphu pulo. 12Pima hadak ningkangsam pen chili rikpo; drakha arikang athe pathepo, lapen longle pen kepathe nangji ason chanpo, lapen sining pen ar-e nangklopo, lapen Ne bangso ahin arat atum la do-an pachepahemphu longpo. 13Lapen O Judah akhei lapen Israel akhei, aphrangke det-heihei atum hijim ahirjuno kechepi asonthotsi nangtum plang-lo, seta Ne nangpajokpo, lapen nangtum isi ahirjume plangpo. Phereri, bonta nangtum ari-heihei chepangtang non.”
14Pima lasonsi muluk a-Hemphu pulo: “Nangtum aphusar atum Nening kepathi ahut Ne halatum aphan kehingno klempo pu Nening chesik-lo, lapen Nening chiruiredet-lo, muluk a-Hemphu pulo, 15lasonthotsi Ne puthot bangso ahut Jerusalem aphan lapen Judah akhei aphan akeme keklemjisi nening chesik-lo; phereri. 16La-heihei helo nangtum keklem nangji ason: Lahin lahin ahok alam chepunon, nangtum anghap-heihei along akangsai ahokpet lapen ningkangsam aphanle klemnon, lahin lahin aphan ning arlo kehingno abidi mathari lapen chobei aseme ningdok-ri, athe lahei hei Ne kehijim amarlo pusi Hemphu pulo.”#Eph 4.25 17Baduta tebok abang aphan aning arlo kehingno abidi pinchongri lapen kechobei aseme kedeng aphan ning dok-ri pima la kedo-an Ne kehijim amarlo pusi Hemphu montrilo.
18Lapen muluk a-Hemphu alam nelilong vangsi pulo, 19lasonsi muluk a-Hemphu pulo: Phli achiklo an-kehum lapen pho achiklo an kehum, lapen throksi achiklo an-kehum lapen kep achiklo an-kehum la Judah akhei aphan ning arong lapen kechehok ahut lapen ningkedok akecho-kejun ahut plangpo. La apotsi nangtum ahok lapen ningkangsam aphan ningdok nangji.
20Muluk a-Hemphu lasonsi pulo: Tebonseta rat lapen ongdung arongsopi asor vangvekjilang. 21Lapen elong arongsopi asor along kaprek arongsopi asor along damsi pupo, “Ili non amat Hemphu akangjinso kelongjile choningridam lonang lapen muluk a-Hemphu aphan ridamlonang; Ne kedamlo. 22Ongdung#Ongdung; mate kethedung arat lapen ingtangrak akhei-heihei muluk a-Hemphu kerijisi Jerusalem vangpo, lapen Hemphu akangjinso kelongjisi choningripo.” 23Muluk a-Hemphu lasonsi pulo: “Halabangso arni adet adet alam keningje atum angbong bangkep amonit atum Judah abang keche-um ape-ari ot-hetsi pupo, ‘Nelitum nanglilong dunpo, pima Arnam nanglilong do pu nelitum arjulong-lo.’ ”
Currently Selected:
ZEKARIAH 8: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
