LUK 3

Jon Baptist Kepachethang Alam

(Mat 3.1-12; Mar 1.1-8; Jon 1.19-28)

1Ansi Tiberias Recho kepangri ningkan krepho kechok ahut Pontias Pilatsi Judia a-Govornor lo, lapen Herod ke Galili adet Agovornorlo lapen akorte, Philip ke Iturea lapen Trachonitis, la detni Agovornorlo, lapen Lisanias ke Abilene Agovornorlo. 2Lapen Annas lapen Kaiaphas, la banghini atum ke kurusar aketheneilo. Halabangso ahut kejejangtang ajosi Arnam alam Jekariah asopo Jon along vang-lo. 3Lapen alangli Jordan akung arei alongri adang an damsi pap kediya kelongji aphan ning kecherui abaptisom alam pachethangdamlo. 4Lake Isaiah montri alam aloh along ketok asonthot-lo, atheke hadak tok-lo:

“Komane abang kejejangtang ajo hangkong-lo:

‘Hemphu atovar sikpinon;

atovarso an pakengpinon.#Isa 40.3-5

5Arlok an papleng-et nangji,

lapen anglongtin lapen anglongsotinta paklamchen nangji.

Kekdang adim pakengset nangji lapen likbuk likvor adim an paklamchen nangji.#Isa 40.3-5

6Lapen kadokave amonit atum Arnam kopusonsi pajokthek,

lake thek-longhurji.’ ”#Isa 40.3-5

7Lasi Jon arideng pen baptisom ke-enji aphan kevangbom armu atum aphan alangli pukong-lo, “Pherui akhei! Kevangji dokdok Arnam aning kethi pen kekatji aphan matsi nangtum aphan pareloma?#Mat 12.34; 23.33 8Tangte ning kecherui a-ot hei hei paklangnon. Nangtum hijan angbong ‘Ephusar ke Abraham lo’ lale kepuji pangchengri. Pima ne nangtum aphan nangpulang, labangso a-arlong hei hei pen Arnam ke Abraham aphan aso-asu paplang-un.#Jon 8.33 9Thengpi hei hei kepiji atengri alongsi acho bi tekang-lo. Tangte Athe keme kepathethe athengpi an aphan ke pipetpo lapen me phrindutpo.”#Mat 7.19

10Lapen armu atum alangliphan arjubomsi pulo, “Tangte netum pisi klem nangjima?” 11Alangli thaksi halatum aphan pulo, “Choi pakni kedo abang kavedet abang aphan epak papinang, lapen an-han kedo abang lapu thakthak-le paklem nang.” 12Lapen penang midu kerung atumta baptisom ke-enjisi vang-lo, lapen alangliphan arjulo, “Thanbang netum kopisi keklem nangjima?”#Luk 7.29

13Lapen alangli halatum aphan pulo, “Detpangri ahukum ateng pen apar ake-ong ke bor-i bor-a pen rungri.” 14Lapen penang an chedanbang atum alangliphan arjusi pulo, “Netum pisi klem nangjima?”

Lapen alangli halatum aphan pulo, “Kepaphere pen tangka cho-enri lapen kechobei alam bok-ri lapen nangtum kechongdat anam kelong an penle ning chepangsam-ira donon.”

15Lapen rat atum kanghong phrongbom ahut lapen kadokave atum aning arlo Jon alam, atheke alangli Khristo ma; 16la kechemathahur ahut Jon kadokave aphan thaksi pulo, “Ne nangtum aphan lang pen baptisom pibomlang, bonta nepar ajakong kethemu abang vangjilang. Alangli keng-op ari kephriji anta ne-ot ave. Alangli nangtum aphan Karjong Kangthir pen baptisom nangpiji. 17Alangli jimtim kepangthei-etji aphan lapen asok keroiji aphan alangli aso hongthrok akongvek otdongsi do; bonta Alangli aphe-e ke kemep un-epin ame along phrindutji.”

18Lasi akaprek kaprek penang alam pen aning parungsi alangli rat aphan birta keme pachethang-lo. 19Bonta Herod govornor ke akorte apiso Herodias aphan ke-en pen apot lapen Herod kehingno akam hei hei keklem apot Jon alangliphan ingchek-lo.#Mat 14.3-4; Mar 6.17-18 20Lapen Herod Jon aphan phatek bengsi kehingno muchot akam klem-lo.#Mat 14.3-4; Mar 6.17-18

Jisu Baptisom Ke-en

(Mat 3.13-17; Mar 1.9-11)

21Lapen kadokave arat atum bap-tisom endet aphi, Jisuta baptisom enlo. Alangli kardom ahut sining ingpudang-lo, 22lapen Karjong Kangthir, vothung ason nanghirsi alangli phuthak inghulo lapen sining pen “Nang helo ne kechinghon asopo, nangphan ne ning dok-olo” pu ase vang-lo.#Kech 2.2; Lun 2.7; Isa 42.1; Mat 3.17; Mar 1.11; Luk 9.35

Jisu Aphusar Atum

(Mat 1.1-17)

23Lapen kam keklem kepangcheng ahut Jisu arta ningkan thomkep anbak dolo. Apo ke Joseph pusi monit atum mathalo. Joseph apo ke Heli helo. 24Heli apo ke Matthat, Matthat apo ke Levi, Levi apo ke Melki, Melki apo ke Jannai, Jannai apo ke Joseph. 25Joseph apo ke Mattathias, Mattathias apo ke Amos, Amos apo ke Nahum, Nahum apo ke Esli, Esli apo ke Naggai, 26Naggai apo ke Maath, Maath apo ke Mattathias, Mattathias apo ke Seme-in, Seme-in apo ke Josek, Josek apo ke Joda. 27Joda apo ke Joanan, Joanan apo ke Rhesa, Rhesa apo ke Jerubbabel, Jerubbabel apo ke Shealtiel, Shealtiel apo ke Neri. 28Neri apo ke Melki, Melki apo ke Addi, Addi apo ke Kosem, Kosem apo ke Elmadam, Elmadam apo ke Er. 29Er apo ke Joshua, Joshua apo ke Eliezer, Eliezer apo ke Zorim, Zorim apo ke Matthat, Matthat apo ke Levi. 30Levi apo ke Simon, Simon apo ke Judas, Judas apo ke Joseph, Joseph apo ke Jonam, Jonam apo ke Eliakim. 31Eliakim apo ke Melea, Melea apo ke Menna, Menna apo ke Mattatha, Mattatha apo ke Nathan, Nathan apo ke David. 32David apo ke Jesse, Jesse apo Obed, Obed apo ke Boaz, Boaz apo ke Sala, Sala apo ke Nahshon. 33Nahshon apo ke Amminadab, Amminadab apo ke Admin, Admin apo ke Arni, Arni apo ke Hezron, Hezron apo ke Perez, Perez apo ke Juddah, Juddah apo ke Jakob, 34Jakob apo ke Isaak, Isaak apo ke Abraham, Abraham apo ke Terah, Terah apo ke Nahor. 35Nahor apo ke Serug, Serug apo ke Reu, Reu apo ke Peleg, Peleg apo ke Eber, Eber apo ke Shelah. 36Shelah apo ke Kainan, Kainan apo ke Arphaxad, Arphaxad apo ke Shem, Shem apo ke Noah, Noah apo ke Lamek. 37Lamek apo ke Methuselah, Methuselah apo ke Enok, Enok apo ke Jared, Jared apo ke Mahalaleal, Mahalaleal apo ke Kainan. 38Kainan apo ke Enos, Enos apo ke Seth, Seth apo ke Adam, Adam apo ke Arnam.

Currently Selected:

LUK 3: KARBIBSI

Highlight

Copy