LUK 2

Jisu Pirthe Kehache

(Mat 1.18-25)

1Halabangso ahut Agastas Recho Roman adet adang monit aphai ke-enji ahukum pilo. 2Siria adet Kuirinias govornor kecho ahut kechengsi aphai-en la helo#Piol=Monit aphai ke-en. 3Lapen amen kepatokjisi kadokave atum amethang methang arong chedamrep-lo.

4Lapen Josephta amen kechetok-damjisi Galili adet Najareth arong pen Judia adet Bethlehem pu David amahang kethek arongsopi arlu damlo. Pima alangli ke David ahem asangho lapen akheilo. 5Alangli keraitang abangpi, Meri aphanta cheponlo. Halabangso ahut alangli areng-angsesedet-lo. 6Lapen halatum hadak kedobom ahut labangpi aso pirthe kehache apor chok-lo. 7Ansi asopo akleng abang pirthe hachelo, lapen oso pe pen telomsi longhong arlo pe-i-lo. Pima halatum aphan alohi ahem adim jangjedet-lo.

Biresak Kevi Atum Lapen Pherangke Atum

8Lapen halabangso alongri Biresak kevi atum dolo. Halatum ajo mamat arit angbong apai pai biresak ahur honlo. 9Lapen Hemphu apherangke inut halatum adung arjaptherlo, lapen Hemphu adak atur halatum bithe bitha turdang-lo. Halatum phere-olo, 10bonta pherangke halatum aphan pulo, “Phereri, pima mathanon, neli nanglitum aphan ning arong abirta keme vanlo. Lake kadokave arat atum aphanlo, 11pima pini David arongsopi along nanglitum aphan Kepajok a-Bang pirthe hachetang-lo. Hemphu Khristo alangli helo. 12Lapen nanglitum aphan angthek lahelo, hala oso thi-i aphan pe pen ketelom lapen la longhong arlo ke-i nanglitum thek dam longpo.”

13Lapen tong sekotsi pherangke along sining armu ake-ongpi atum dosi Arnam aphan ro si pulo,

14“Kangtuinei adim Arnam adak atur lapen Kangtuinei asining athak Arnam adak atur lapen pirthe athak alangli ning kedok amonit atum angbong ning kangsam padonang!”

15Lapen pherangke atum halatum adung pen sining athak damdetsi kevi atum chepuhurlo, “Hemphu ekethan, la keplangtang alam Bethlehem arongsopi along non mamat-le langdam lonang.”

16Halatum damserak-lo lapen risi Meri lapen Joseph lapen longhong arlo ke-i a-oso thi-ita long-lo. 17Lapen langdamsi halatum aphan kethan ateng, labangso a-oso alamjir halatum aphan than phlirlo. 18Lapen karjulong atum an, kevi atum halatum aphan kethan alam pen apot manghu phrong-lo. 19Meri labangso alam an aning arlo chebi pamesi mathading bomlo. 20Lapen aphrang pen halatum aphan kepu tekang asonthotsi kevi atum karjulongtang lapen kethek-longtang alam an pen apot Arnam aphan kero lapen anong kepathe pen chevoilo.

Jisu Amen Ke-ir

21Lapen alangliphan reng-rot kepiji aphan arta ni nerkep choksi alangli men Jisu irlo. Apei aso pathethe ako pen pherangke alangliphan labangso amen irlo.#Levi 12.3; Luk 1.31

Jisu Aphan Kardomhemthepi Arlo Kepon

22Lapen Moses aron ateng pen halatum aphan kepangthirji a-arni choksi, Arnam aphan kepanongjisi halatum alangliphan Jerusalem ponlo.#Levi 12.6-8 23Lake Hemphu aron along ketok asonthot-lo, atheke hadak tok-lo, “Pinso a-oso akleng an aphan ke Hemphu aphan kepanongtang abang-lo pusi pudetji.”#Keba 13.2,12 24Lapen Hemphu aron kepu asonsi vothung echor, kalite thungpharlo aso jonni se karkli-iji aphan halatum vanlo.

Simeon Akardom

25Lapen chini iktha halabangso ahut Simeon pu inut amonit dolo. Labangso abang ke dhoromi lapen Arnam aphan kangduk abang-lo. Alangli Israel akejok kethek-longji aphan inghongding-lo lapen Karjong Kangthir alangli phuthak dolo. 26Lapen alangli Hemphu Khristo aphan thek-longletik ke thithedetji pusi Karjong Kangthir alangliphan paklang-lo. 27Karjong japonsi Simeon Kardomhemthepi arlo damlo. Aron kepathik ateng keklemjisi apo a-oso aphan kevan ahut 28alangli oso aphan arbaksi Arnam aphan rosi pulo,

29“Hemphu, Jakong Kethe Parpik a-Bang,

nang lam asonsi,

nang non nangban aphan aning kangsam pen padam long-lo.

30Pima nemek-hini pen nang akejok thek-longtang-lo,

31nangli labangso akejok kadokave

amonit angno bitang-lo:

32Lake kethe-ang, atheke, Jihudi kalidet atum aphan kepaklang alamlo,

lapen lake nang rat, Israel atum adak aturlo.”#Isa 42.6; 49.6; 52.10

33Lapen api apo atum alangli lamjir keningje alam pen apot manghuphrong-lo. 34Lapen Simeon halatum aphan ahirjume pisi apei Meri aphan pulo, “Chini iktha, Israel angbong penang atum kevirji lapen penang atum kethurji aphansi lapen lam kechedan-i angthek aphansi labangso a-oso aphan battang-lo. 35Lapen lapusonsi penang atum aning kematha kepatujoi alam klangdakji, lapen nokjir pen ketok asonsi nangli ning keduk lutchokji.”

36Lapen Anna pu inut amontripi dolo. Alangli ke Asher akhei, Phanuel asopilo. Alangli sarpi-olo, pima apenan pen ningkan throksi an dorap-lo, 37lapen alangli arta ningkan throknerkep ra phli anta pahemebomlo. Alangli ajo anerlota an kehum lapen kechoningri pen Arnam aphan ingduksi Kardom a-Hem thepi pen nangbarbedet-lo. 38Lapen alangli halabangso ahut mamat nangcheklangsi Arnam aphan chorolo, lapen Jerusalem kejokji aphan kanghong atum an aphan alangli halabangso a-oso alamjir pulo.

Nazareth Kechevoithu

39Lapen Hemphu aron asonthotsi kadokave klemdet aphi Jisu lapen Meri aphan ha Galili adet amethang arong Najareth chevoithulo.#Mat 2.23 40Lapen oso thelo, lapen ingtangrak-lo, lapen gian pen pleng muchot muchotbomlo lapen Arnam akangjinso alangli long dolo.

Oso Jisu Kardomhem Along Kedam

41Lapen api apo atum aningkantinta Kejok Achojun a-Meipi ahut Jerusalem dunbom.#Keba 12.1-27; Keth 16.1-8 42Lapen Jisu arta ningkan krehini choksi halatum kai atengsi chojun amei along kedunji aphan Jerusalem arlu damlo. 43Lapen kenangji arni an hadak dokoksi hem kechevoi ahut la oso Jerusalemsi dobomlo. Jisu api apo atum laso alam chininedet-lo. 44Bonta alangli armu angbongsi do pu mathasi halatum arnisi atovar damlo lapen halatum chepho chero lapen jirpi jirpo atum angbong ri pamelo. 45Lapen long thekthedetsi halatum alangliphan ri ponbomsi Jerusalem chevoithu phak-lo. 46Lapen nithom arni halatum alangliphan long-lo. Alangli Kardomhemthepi arlosi Jihudi athanbang, atheke kethan atum angbong ingnidunlo, lapen halatum kethan alam arjudunlo lapen halatum aphanta lam arjubomlo. 47Lapen alangli kethan alam karjulong atum an alangli bidi lapen kethak alam pen apot abidi jutdet-lo. 48Lapen alangliphan thek-longsi api-apo atum manghuhak-lo, lapen apei alangliphan pulo, “Nangli kopi apotsi lapusonle nelitum aphan klemloma, po? Mathanon, nangli po lapen neli ke matha dukpiksi nangliphan rilo.”

49Lapen alangli halatum aphan pulo, “Nangtum kopi athesi nephan riloma? Neke nepo ahemsi do nangji pu nangtum chininedetma?” 50Bonta alangli halatum aphan kepu alamthe halatum chininedet-lo. 51Lasi Jisu halatum along hirdunsi ha Najareth chedunlo lapen hadak api-apo alam kroipet-lo. Asarpi la kadokave alam aning arlo chebilo. 52Lapen Jisu agian lapen arta ta plengbomlo lapen Arnam lapen monit atum alangliphan aning dokmuchot muchotbomlo.#1 Sam 2.26; Sar 3.4

Currently Selected:

LUK 2: KARBIBSI

Highlight

Copy