JON 21
21
Sangho Bang Throksi Aphan Jisu Kecheklang
1Labangso aphi Jisu amethang asangho atum aphan Taiberias atalo akung cheklangthulo. Alangli kecheklangdam lason helo: 2Simon Pitor, Thomas (Kecherop pu abang), Nathaniel (Galili adet, Kana arong asor), Jebedi asopo atum lapen anut kaprek asangho banghini atum elong-petsi chingrumlo. 3Simon Pitor hala anut kaprek atum aphan pulo, “Ne ok ridampo.”
Halatum alangliphan pulo, “Netumta nangdunpo.” Lasi halatum telong ehum chethapsi damlo. Bonta halabangso aningve jopangthang ok rilo setta thangta longledet-lo.#Luk 5.5 4Adapprang arni kevang ahut Jisu lang akungsi arjaptherlo. Bonta lake Jisulo puke asangho atum chininedet-lo. 5Ansi Jisu halatum aphan pulo, “Kopine pina a-ok long-loma, komarli atum?”
Halatum thakdunsi pulo, “Thangta longle.”
6Alangli halatum aphan pulo, “Telong ar-e anat-le lan var non, anke nangtum longpo.” Lasi halatum lan varlo, lapen ok ke-ong ong lan vung un-edet-lo.#Luk 5.6
7Jisu kechinghon asangho abang Pitor aphan pulo, “Lake Hemphulo!” Lake Hemphulo pu karjulong pen mamat Simon Pitorke ape keding abang chepersi (pima alangli ape chephlok-et-lo) lang along chitichuilo. 8Hala akaprek asangho atum ke telong pen lang a-ok keplengset alan chethurponsi talo akung vang-lo. Pima halatum talo akung pen helo parpelo, barlon ingkoira pho anbaksi dolo. 9Halatum talo akung nanglesi hokvai ame kethor, ok kephi lapen penang an ahim thek-long-lo. 10Ansi Jisu halatum aphan pulo, “Nangtum kelongdam a-ok asapso vantha.”
11Simon Pitor telong chethapdamsi ok kethe pen keplengset alan kora anat vung-lo. Labangso alan keparlo kadokave jon pharo isira phokep ra kethom an dolo. Bonta lapu-an a-ok ke-ongta alan ke rak-redet-lo. 12Jisu halatum aphan pulo, “Vang-ra anso nangchotha.” Sangho atum baduta alangliphan, “Nangli komatma?” puke arju haihedet-lo. Pima lake Hemphulo pu halatum chinilo. 13Jisu vangsi him enlo, lapen la halatum aphan pilo. Lasonthak thaksi alangli halatum aphan lang a-okta pilo. 14Lake Jisu kethitang atum angbong pen thurdet aphi asangho atum aphan kecheklang batai kethom aphong-lo.
Jisu Pitor Pen Kechingki
15An chodet aphi Jisu Simon Pitor aphan pulo, “Jon asopo Simon, nephan la akaprek atum nekanghon apar nang ne inghonmuma?”
Simon Pitor thakdunsi pulo, “Ahok-lo Hemphu, ne nangphan nang inghonlo, lake nang chinilo.”
Jisu alangliphan pulo, “Ne biresak atum aphan vinon.” 16Jisu alangliphan puthulo, “Jon asopo Simon, nang nephan ne inghonma?”
Simon Pitor thakdunsi pulo, “Ahok-lo Hemphu, ne nangphan nang inghonlo, lake nang chinilo.”
Jisu alangliphan pulo, “Ne biresak atum aphan vinon.” 17Ansi Jisu batai kethom aphong pulo, “Jon asopo, Simon, nang nephan ne inghonma?”
Jisu alangliphan, “Nang nephan ne inghonma?” pu batai kethom karju apot Pitor aning aduk dolo. Lasi alangli Jisu aphan pulo, “Hemphu, nangke kadokave chinipet-lo. Ne nangphan nang inghonlo, lake nang chinilo.”
Jisu alangliphan pulo, “Ne biresak atum aphan lananon. 18Ne nangphan ahokpetsi nangpulang, nang riso akoke nang nang methang avam chingtinsi nang ning kehang aling damlo. Bonta mo sarlote nang nangri chirungsi anut kaprek abang nangingtinji, lapen nang kedamji nangning kehanghe adimsi nangponji.” 19Pitor kopuson pen thisi Arnam anong pathejima, la kepudamjisi Jisu labangso alam pulo. Ansi Jisu alangliphan pulo, “Ne phi phi nangdun non.”
Jisu Lapen Akaprek Asangho Atum
20Pitor anung anat chetevarsi Jisu kechinghon, sangho kaprek abang aphan thek-long-lo. Labangso asangho ke hala an kecho ahut Jisu aphan pet-lapsi, “Komat abangsi nangphan hotur arideng hodaipoma, Hemphu?” pu karju abang-lo. 21Pitor labangso abang aphan thek-longsi pulo, “Alangliphan pi plangjima Hemphu?”
22Jisu thakdunsi pulo, “Alangli kedobomji aputhak Ne ning hang lote, nang nangkemathadun nangji kopima? Ne phi phi le nangdun non!”
23Lasi labangso asangho ke thi-thedetji pusi Jisu aphan kekroi akorte atum angbong alam chethang-lo. Bonta Jisu ke labangso abang thithedetji pule kepudam kali. Alangli ke, “Ne vangvetik-ke alangli kedobomjisi ne ning hang-lote nang nangkemathadun nangji kopima?” pusi kepu.
24Lahei hei alam kethan lapen ketok abang labangso asangho helo, lapen alangli kepu alam ke ahokpet alam pu ilitum chini.
Kepajut
25Jisu keklem akam akaprekta do-olang. La kadokavele ketok-etji pulote ketoktang aloh pirtheta jangjedetji tahai pusi neli mathalo.
Currently Selected:
JON 21: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
