JON 20

Jisu Kethi Pen Kethur

(Mat 28.1-8; Mar 16.1-8; Luk 24.1-12)

1Sabbath Arni pen puthot arni adap the-ang prinprele apor ahut Megdala a-Meri halabangso atipit along damlo. Ansi halabangso atipit amangho pen arlong keterektang alangli thek-long-lo. 2Alangli katponsi Simon Pitor lapen Jisu kechinghon anut kaprek asangho along damlo. Alangli halatum aphan pulo, “Halatum alangliphan tipit pen pontang-lo, lapen alangliphan konattong kebidamlone, nelitum chinine!”

3Ansi Pitor lapen anut kaprek asangho abang tipit along damlo. 4Halatum banghinita katponsi damlo, bonta anut kaprek asangho abang Pitor apar kat paprapmuchotsi tipit along le paphrangmuchot-lo. 5Alangli tipit arlo ardiksi hadak linen ape ketirok thek-long-lo, bonta alangli tipit arlo ke lutdamdedet-lo. 6Simon Pitorta alangli phi ledunlo. Alangli nangkele pen mamat tipit arlo lutdamphit-lo. Hadak linen ape ketirok, 7lapen Jisu aphu kephung ape alangli thek-long-lo. La aphu kephung ape ke linen ape along ave, akaprek adimsi dolo lapen lake thuivet-lo. 8Ansi tipit along nangkele paphrang abang, atheke hala anut kaprek asangho abangta tipit arlo lutdunlo, lapen alanglita la thek-longsi kroilo. 9Pima Jisu kethi pen thurvek nangji pu hastro kepu alam halatum halabangso ahut anta chininelang. 10Ansi latum ahem chevoilo.

Meri Megdala Aphan Jisu Kecheklang

(Mat 28.9-10; Mar 16.9-11)

11Meri ke tipit angtan arjapthersi chirubomlo. Ansi alangli chirubomsi tipit arlo ardik-lo, 12lapen hadak sining apherangke banghini aphan thek-long-lo. Halatum pe kelok chepindengsi Jisu abang arpum kebi adim ingniphrong-lo. Inut abang ke aphutang anat ingnilo, lapen anut kaprek abang ke akengtir anatsi ingnilo. 13Halatum alangliphan arjulo, “Nangli kopi athesi kechiruma, pei?”

Labangpi halatum aphan thakdunsi pulo, “Halatum neli Hemphu aphan pondet-lo, lapen alangliphan kebidam adimta neli chinine!”

14La pudet aphi alangli chetevarsi hadak Jisu karjapther thek-long-lo. Bonta lake Jisulo puke alangli chininedet-lo. 15Jisu alangliphan arjulo, “Nangli kopi athesi kechiruma, pei? Nangli komat aphansi kerima?” Labangpi alangliphan paiberi arlo ketiki abangsi tinkok-lo. Lasi labangpi alangliphan pulo, “Jongsi nanglisi alangliphan terek ponlo tangte nangli alangliphan konatsi kebidamma, ne-thantha. Neli alangliphan endampo.”

16Jisu alangliphan pulo, “Meri!”

Labangpi alanglinat chetevarsi Ibri alam pen pulo, “Rabboni!” (Labangso alam atheke “Kuru” pu helo.)

17Jisu alangliphan pulo, “Neliphan ne ot-ri, pima neli non anta Po along damdelang. Bonta nangli neli korte atum along damra neli ke alangli long dampo pu thandamnon. Alangli ke ne-Po lapen halatum a-Po, ne Arnam lapen halatum a-Arnamlo.”

18Lasi Meri Megdala damlo. Alangli Hemphu aphan thek-long-lo pusi sangho atum aphan thandamlo, lapen Jisu alangliphan kethan alam alangli halatum aphan than pajirmilo.

Sangho Atum Aphan Jisu Kecheklang

(Mat 28.16-20; Mar 6.14-18; Luk 24.36-49)

19Sabbath Arni arnikangsam apor ahut sangho atum chingrumsi inghap chingkirhet-lo. Pima halatum Jihudi atum angbong keja atum aphan pherelo. Ansi Jisu vangsi halatum angbong arjaptherlo, lapen alangli halatum aphan pulo, “Nangtum along ning kangsam padonang.” 20La pudet aphi alangli halatum aphan ari lapen arep chepaklang-lo. Hemphu aphan thek-longsi sangho atum aning arongpik-lo. 21Jisu halatum aphan puthulo, “Nangtum along ning kangsam padonang. Po nephan neketoi asonthotsi neta nangtum aphan nangtoilo.” 22Ansi alangli halatum aphuthak achethepi vangphunsi pulo, “Karjong Kangthir dengnon. 23Nangtumle komane aphan apap hei hei diya lote alangliphan ke diyadettang-lo; nangtumle komane abang apap hei hei diyajedette, halabangso abang aphan ke diyajedettang-lo.”#Mat 16.19; 18.18

Jisu Thomas Aphan Kecheklang

24Jisu halatum aphan kecheklang ahut sangho bangkrehini angbong pen Thomas pu abang ke (Alangliphan ke kecherop abang puta pu) halatum angbong ave. 25Lasi sangho atum Thomas aphan pulo, “Netum Hemphu aphan thek-long-lo.”

Thomas halatum aphan pulo, “Ari along asak kesak aban thek-longlete, lapen hala abang along neri chimun pen chut longlete, lapen arep along neri chephu longlete neke jonghe setta kroikre.”

26Ni nerkep aphi sangho atum puthot hem arlo chingrumlo, lapen Thomasta halatum angbong dolo. Inghap hei hei ingkirhet-lo. Bonta Jisu halatum angbong vangsi arjaptherlo, lapen pulo, “Nangtum along ning kangsam padonang.” 27Ansi alangli Thomas aphan pulo, “Nangri chimun dak nangchut-ra neri nanglangtha; lapen nangri pen ladak nerep along nangchephutha. Kroikrebomri, bonta kroinon.”

28Thomas thakdunsi pulo, “O ne Hemphu, lapen ne Arnam!”

29Jisu alangliphan pulo, “Nephan nekethek-long apotsi nang nephan nekekroima? Bonta kethek-longlepin pen kekroi abangsi rengme!”

Labangso Aloh Ketok Athe

30Sangho atum angno Jisu keklemtang akemanghumeme akam hei hei labangso aloh along ketokte do-olang. 31Bonta Jisu ke Khristolo, lapen Arnam a-Sopolo pu nanglitum kekroithekji, lapen alangliphan kekroi pen ajok nanglitum chethe kelongji aphansi lahei hei tok-lo.

Currently Selected:

JON 20: KARBIBSI

Highlight

Copy