HAGGAI 2

Kardomhem Kemi Ahir-asang

1Throksi achiklo, ingkoira isi arni Hemphu alam Haggai montri pen ajok vang-lo, 2“Shealtiel asopo, Judah a-Govornor Jerubbabel lapen Jehozadak asopo Joshua kurusarpo, lapen kedo-an arat atum aphan punon, 3‘Bangso ahem aphrang ahir asang kethek-long abang nangtum angbong mane doma? Non nangtum la kosonsi kethek-long? Nangtum amek angden thangta kali ason, kalima?#Ezr 3.12 4Seta non ning chepathenon, O Jehozadak asopo Joshua, kurusarpo, ning chepathenon, kedo-an arat atum Hemphu-si kepulo; klemnon, athe Ne nangtum along dolo, muluk a-Hemphu-si kepulo. 5Ijip pen nangtum kevang ahut Ne nangtum aphan kechechak ateng, Ne Karjong nangtum angbong doklung-lo; phererinon.#Keba 29.45-46 6Athe lasonsi muluk a-Hemphu pulo: Puthot malomso aphan Ne sining lapen pirthe hijukpo lapen talo, longle,#Ibr 12.26 7lapen khei kedo-an Ne hijukpo; anke khei kedo-an akhi vangpo, lapen labangso ahem ahir-asang pen Ne paplengsetpo, pusi muluk a-Hemphu pulo. 8Rup lapen serta Ne marlo pusi muluk a-Hemphu pulo. 9Bangso ahem ahir-asang aphrang apar aphi abang themuchotpo pusi muluk a-Hemphu pulo, lapen bangso adim paplangpo, pusi muluk a-Hemphu pulo.’”

Kurusar Atum Pen Montri Kechingvai

10Sirkep achiklo, 24 arni, Darias recho-kecho hini aningkan Hemphu alam Haggai montri pen ajok vangsi pulo. 11“Lasonsi muluk a-Hemphu pulo: Labangso akarcho alam kepharjile kurusar atum pen arjunon, 12Mane abang jongsi Sator ade kepanong a-ok kepon abang a-Sator ade pen him mate han mate kecho ason alingle ot lote la ingthirpoma?” Kurusar atum thak-lo, “Kali.” 13Ansi Haggai pulo, “Mane abang jongsi kethitang arpum-heihei ason ke-ot ajok ingthirthedet-tang-lo, la inghthirthe cheplang poma?” Kurusar atum thak-lo, “La ingthirthe cheplang-lo.”#Kela 19.11-22 14Ansi Haggai pulo, “Lason helo bangso arat atumta, lapen Ne ingno bangso akhei atumta lo, la Hemphu-si kepulo, lapen latum ari akam an lason thakthak-lo, lapen latum kepajir amar anta ingthirthelo.”

Hemphu Ahirjume Kepiji Kechak

15Non ardomnon, non pen anpar kopi plangjima la mathanon. Hemphu a-Kardomhemthepi arlong aputhak arlong pangnine aphrang, 16kosonsi nangtum atovar chelang-loma? Halabangso ahut inut abang sok mon 20 abui along damlote hadak mon 10 dochotpo, lapen inut abang mon 50 adrakha alang sokpo pura drakha kesor adim damlote mon 20 dochotpo. 17Ne nangtum asok pathi-khrailo lapen prisam pen pavirlo lapen nangtum ari akam an herai pen phangnolo. Tebonseta nangtum Ne long chevoi thuthe pusi Hemphu pulo. 18Labangso arni pen apar matha-enon, sirkep achiklo, 24 arni pen. Hemphu kardomhemthepi ahemthur kekim arni pen matha-enon: 19Sok-chili puru arlo dolangma? Drakha arikang, thebo arong, dalim arong lapen jit arong athe pathethebom langma? Pini pen apar Ne nangtum aphuthak ahirjume nangpipo.

Jerubbabel Aphan Hemphu Kechak

20Isivet achiklo, 24 arni Hemphu alam puthot batai hini aphong Haggai along vangthusi pulo, 21Judah a-Govornor Jerubbabel aphan lasonle punon, “Ne Sining lapen pirthe hijukji dokdok-lo, 22Lapen Ne det-heihei arecho anghoi vardetpo; lapen det atum rat ajakong pavirji dokdok-lo, lapen ron kechedan alosei ahemkonglong-heihei lapen lahei kardon atum an lapen losei an lapen la kardon atum an ari asangho anokjir pen abangphutin klichepo. 23Halabangso arni muluk a-Hemphu-si pulo. Ne nangtum aphan nangponpo, O Jerubbabel, Ne ban, nang Shealtiel asopo, Hemphu-si kepulo, lapen Ne sap ketheng arnan ben ason nangpinchongpo, pima Ne nang ingvaitang-lo pusi muluk a-Hemphu pulo.”

Currently Selected:

HAGGAI 2: KARBIBSI

Highlight

Copy