HAGGAI 1
1
Kardomhemthepi Kekimthuji Aphan Hemphu Hukum Ketho
1Darias Recho hini aningkan, throk achiklo kecheng arni Hemphu alam Haggai montri pen ajok Sheal-tiel asopo Jerubbabel, la Judah a-Govornor aphan lapen Jehozadak asopo Joshua kurusarpo aphanta vangsi pulo,#Ezr 4.24—5.2; 6.14 2“Muluk a-Hemphu lasonsi pulo: Hemphu ahem kekimthuji apor nangletang-lo pusi bangso arat pubomlang.” 3Ansi Hemphu alam Haggai montri pen ajok vangsi pulo, 4“Nehem keru virrang ahut nangtum kimpamesen ahem kechedo nangtum aphan aporloma? 5Non lasi muluk a-Hemphu lasonsi pulo: Nangtum atovar chelangnon. 6Nangtum rik olo, lapen acherso natsi rot-longchot; nangtum cholo bonta kaike nangtum ingkrangkrelo, nangtum junlo bonta la kaiketa dorde, nangtum pe che-umlo seta inutbakta ar-om-e; lapen chongdat abang pangrum seta kerak athia along kethapjisi pangrumchot-lo.”
7Muluk a-Hemphu lasonsi pulo, “Nangtum atovar chelangnon. 8Inglong-heihei arludamnon lapen thengpi vannon lapen Nehem kimthunon, la Nening dokpo lapen Nenongta thepo, pusi Hemphu pulo. 9Ake-ong kerot-longjisi nangtum cholang-lo, lapen langtha, la chersonat-lo, lapen nangtum hem la vandet ahut, Ne vutphit-lo.#Ne la pavirdetji Kopi apot? Muluk a-Hemphu si pulo. Atheke Nehem keru virrang ahut anut-tinta amethang methang ahem aphansi klemrok-rak-lo. 10La apotsi sining angsong pen ar-e khang-lo lapen longleta kepatheji pen khang-lo. 11Lapen longle aputhak, lapen inglong aputhak, sok aputhak, drakhakemi aputhak, jangthu lapen longle pen athe kelongji an aputhak, monit lapen kepangreng api aputhak lapen halatum kam keklem-heihei aphuthak akhim phalo.”
Rat Atum Hemphu Ahukum Kekroi
12Ansi Shealtiel asopo Jerubbabel lapen Zehozadak asopo Joshua, kurusarpo rat kedo-an pen Bebilon adet ban#mate ban kedamde atum kedo pen nangchevoilo, la ke amethang atum a-Arnam Hemphu alangliphan ketoitang ateng, lapen rat atum Hemphu angno pherelo. 13Ansi Haggai, la Hemphu apherangke rat atum aphan Hemphu alam pulo, “Ne nangtum along dolo pusi Hemphu pulo.” 14Lapen Shealtiel asopo Jerubbabel, la Judah a-Govornor, lapen Jehozadak asopo Joshua, la kurusarpo lapen rat kedo-an aning Hemphu parungsi lapen latum vangsi a-Arnam muluk a-Hemphu hem kekimthujisi pangcheng-lo. 15La throk achiklo, ingkoiraphli arni, Darias Recho kecho hini aningkan.
Currently Selected:
HAGGAI 1: KARBIBSI
Highlight
Share
Copy
Want to have your highlights saved across all your devices? Sign up or sign in
Karbi Holy Bible © Bible Society of India, 2010.
Used by permission. All rights reserved worldwide.
