AKAM 9

Sol Aning Kecherui

(Akam 22.6-16; 26.12-18)

1Halabangso ahut Sol ke hemphu asangho atum aphan apran enji pusi jasemet papherelo. Alangli Kurusar Kethenei along damsi, 2Damaskas arongsopi along Hemphu a-Tovar kekroi atum aphan long-lok-lote, pinso arloso aphanta kenep-ra Jerusalem kevanthekji aphan, Damaskas arongsopi along kedo asinagog atum aphan loh nang-kepalodunjisi choningrilo.

3Sol damsi Damaskas arongsopi nangleji dok dok ahut, men men sining pen atur vangsi alangli dung arei turphlak-lo. 4Ansi alangli longle athak krepbup-lo, lapen alangliphan kepu ase alangli arjulong-lo, “Sol, Sol! Nang kopi apotsi nephan chenek-loma?” 5Alangli thakdunsi pulo, “Hemphu, nangli komatma?”

Ansi halabangso ase pulo, “Nang kechenekbom a-Jisu ne helo. 6Bonta thurra rongsopi damnon. Nang keklem nangji akam an hadaksi nangphan than-etpo.”

7Sol pen kedam rap rap amonit atum doklipsi arjapphrong-lo. Hala-tum labangso ase arjulong-lo, bonta badu aphanta thek-longledet-lo. 8Sol longle athak pen thursi amek chingpulo, bonta alangli thangta thek-longledet-lo. Lasi halatum alangli ri otponsi Damaskas arongsopi ponlo. 9Jothom nithom anta alangli thangta thek-longledet-lo, lapen thangta choche-junjelo.

10Damaskas arongsopi along Ananias pu inut a-Khristian dolo. Alangli ning arjan thek-long-lo. Labangso aning arjan pen Hemphu alangliphan pulo, “Ananias!”

Alangli thakdunsi pulo, “Kopima, Hemphu!”

11Hemphu alangliphan pulo, “Thurra, Kengset pu atovarle damra Judas ahem along Tarsas arongsopi asor Sol pu abang aphan ridamnon. Alangli Arnam ardombomlang, 12lapen alangli ning arjan thek-long-lo; Ananias pu inut amonit vangsi alangli mek kechecharji aphan alangli phu athak ari bat-lo.”

13Ananias thakdunsi pulo, “Hemphu, penang amonit atum labangso amonit alamjir, lapen Jerusalem arongsopi kedo, nang methang amonit atum aphan alangli kehingno keklem alam neliphan thanlo. 14Lapen nangphan kangduk atum an aphan kenepjisi alangli kurusar kethe atum pen hukum longsi ladak Damaskasta vang-lo.”

15Hemphu alangliphan pulo, “Damnon! Pima alangli ke Jihudi kalidet atum angbong, recho atum aphan lapen Israel amonit atum angbong ne men kepachethangji aphan ne kangvaitang arisimlo. 16Lapen ne men pen apot alangli kopi pi akesung chechak nangjima, lata ne alangliphan paklangpo.”

17Lasi Ananias damsi Sol kedo ahem lutdamlo lapen Sol aphuthak ari batsi pulo, “Korte Sol! Nang nangmek kechecharthuji lapen Karjong Kangthir pen keplengsetji aphansi, nang ladak kevang ahut tovar nangphan kecheklang a-Jisu nephan ladak nangdung netoilo.” 18Hala mamat lang a-ok alip asonthak thak kopine amar Sol amek pen ingjuiruilo; lapen alangli amek checharthulo. Alangli thursi baptisom enlo; 19lapen labangso aphi alangli an chosi ajakong longthulo.

Sol Damaskas Arongsopi Angbong Kepachethang

Sol Damaskas kedo kekroitang atum along penang arni an dodunlo. 20Hala pen mamat alangli Sinagog hei hei along damsi Jisu ke Arnam a-Sopolo pu kethanji pangcheng-lo.

21Sol alamjir karjulong atum anta manghuphrongsi pulo, “Ha Jerusalem arongsopi along, la Jisu pu amonit aphan kangduk kardom atum an aphan kepavirklung abang alangli helo, kalima? Lapen alangli lason amonit atum aphan nepsi kurusar kethe atum along keponjisi non ladakta vang-lo, kalima?”

22Bonta Sol kethan ajakong ansose thebomlo, lapen Jisu helo Khristolo pu alangli aporman kepi pen kethan alam monit atum aphan pakroimemelo. Lasi Damaskas arongsopi kedo a-Jihudi atum thangta thak dundedet-lo.

23Penang arni aphi Jihudi atum chingrumsi Sol aphan kepathiji abidi rilo. 24Bonta halatum kechingvai alam alangliphan pachinidet-lo. Alangliphan kepathijisi halatum ajo anerlota rongsopi anghap along tonlo. 25Bonta ningve isi Sol asangho atum alangliphan pondet-lo, lapen dur arlo alangliphan thapsi rongsopi apaisong angkrak pen pahirtuk-lo.#2 Kor 11.32,33

Sol Jerusalem Kedam

26Sol Jerusalem arongsopi damsi sangho atum along kejelangdunji bor-ilo. Bonta halatum kadokaveta alangliphan pherelo, pima alangli sangho plangtang-lo puke halatum kroikredet-lo. 27Ansi Barnabas vangsi alangliphan ketoitang atum along ponlo. Lapen Sol tovar kedam un ahut kopusonsi Hemphu aphan thek-long-loma, lapen kopusonsi Hemphu alangliphan puloma, lahei hei kadokave alam alangli halatum aphan than pajirmilo; lapen Sol kopusonsi phererepin pen Damaskas arongsopi along Jisu amen pen than loma, lata alangli halatum aphan thanlo. 28Lasi Sol halatum along dodunlo, lapen Jerusalem adang an damsi phererepin pen Hemphu amen pen than-pachethang-lo. 29Alangli Grik alam keningje a-Jihudi atum pen chingki-chethanlo, lapen lam chedanlo. Bonta halatum alangliphan kepathijisi bor-ilo. 30Ansi Sangho atum labangso alam chinisi alangliphan Sijeria arongsopi an thondunsi Tarsas toijuilo. 31Lapen ansi Judia, Galili, lapen Samaria adang an Mondoli ningkangsam dolo. Hemphu aphan kepherepen dosi, Mondoli Karjong Kangthir akerap pen ajok Mondoli ingtang-lo lapen armu ongponbomlo.

Lidia Lapen Joppa Arongsopi Along Pitor Kedam

32Pitor bithe bitha adim damlo, lapen kopine akam dosi alangli Lidia arongsopi kedo Arnam amonit atum along damlo. 33Hadak alangli Anias pu inut thi-klak abang aphan chetong-lo. Labangso amonit ningkan nerkep an tiroksi dolo. 34Pitor alangliphan pulo, “Anias, Jisu Khristo nangphan pamelo, thurra nangli pe chelimnon.” Alangli hala mamat arjaptherlo. 35Lidia arongsopi lapen Sharon athoi amonit atum an alangliphan thek dunlongsi Hemphu anat aning chetevarlo.

36Joppa arongsopi along Tabitha pu inut kekroi mesen abangpi dolo. (Grik alam penke alangli men Dorkas pusi pulo. Labangso alam atheke “Bi thijok” puhelo.) Labangpi kaike ahutta keme akamsi klemverlo, lapen keduk keboi atum aphan rapdun-olo. 37Halabangso ahut labangpi sodetsi thilot-lo. Halatum alangli bang arpum lang panglusi angsong angdeng along bidamlo. 38Lidia arongsopi ke Joppa arongsopi pen tebok-het-lo. Ansi Pitor Lidia arongsopisi do pu sangho atum arjulong-lo. Lasi halatum bang hini amonit toisi Pitor aphan papudamlo. “Nangli paderdera nelitum along nangduntha.” 39Lasi Pitor halatum along dunlo. Alangli hadak lesi alangliphan angsong angdeng ponlo. Hadak hemepi atum an alangliphan komsarsi chirujolo, lapen Dorkas kereng-etlang ahut keroi tekang achoi lapen achoi keding hei hei Pitor aphan paklang-lo. 40Ansi Pitor halatum kadokave aphan ingtan toilo, lapen alangli akengphu patongruisi Arnam ardomlo. Anke alangli hala kethilot abang abang arpum anat chetevarsi pulo, “Tabitha, thurnon!” Labangpi amek chingpulo lapen Pitor aphan thek-longsi ingnilunlo. 41Pitor labangpi aphan ari pen ingthursi parjaptherlo. Ansi alangli kekroitang atum an aphan lapen hala hemepi atum an aphan hem arlo hang-lo, lapen akerengsi labangpi aphan halatum arideng hodailo. 42Labangso alam Joppa adang an chethangphlup-lo, lapen ake-ongpi amonit Hemphu aphan kroilo. 43Pitor penang arni an Simon pu inut ok-reng akam keklem amonit along dodunlo.

Currently Selected:

AKAM 9: KARBIBSI

Highlight

Copy