AKAM 8

1Lapen Sol jokta alangliphan kepathi ke aning hangdunlo.

Sol Mondoli Aphan Kechenek

Halabangso arni pen mamat Jerusalem arongsopi kedo amondoli mate kroi-asong aphan jasemet kechenekji pangcheng-lo. Ketoitang atum aphan apar ke, kekroitang atum an aphan Judia adet lapen Samaria adet adang an papratseilo. 2Dhoromi amonit penang atum Stephan abang arpum pipdamlo, lapen alangli pen apot jasemet chiru chernap-lo.

3Bonta Sol ke mondoli kepavirjisi bor-ilo. Alangli adon adon damsi pinso-arloso atum aphan chethurponsi phatek bengdamlo.#Akam 22.4-5; 26.9-11

Samaria Adet Birta Keme Kepachethang

4Hala kepratsei, kekroitang atum bithe bitha damsi than-Pachethangponbomlo. 5Philipta Samaria adet kedo akethenei arongsopi damsi hadak kedo amonit atum aphan Khristo alamjir thanlo. 6Philip kethan alam arjulongsi lapen alangli kemanghumeme akam keklem thek dunlongsi halatum alangli kethan alam arjudun pamelo. 7Kangthirthe ahi-i kepho amonit penang atum pen hi-i atum jasemet hangsi nangbarlo. Kethiklak lapen akeng ketekok penang atum medet-lo. 8Lasi halabangso arongsopi kedo atum aning arongparlo.

9Hadak Simon pu inut amonit dolo. Alangli maja kanghoi akam klemsi Samaria amonit atum aphan pamanghuphrong-lo. Alangli ke inut thedung amonit-lo pusi alangli chekrong-lo. 10Thedung lapen bihek amonit atum anta alangli kepu alam arjudunsi pulo, “‘Jakong Kethe’ pu a-Arnam ajakong alangli helo.” 11Halatum alangli kepu alam arjudun-hurlo, pima arni dingklui pen alangli maja kanghoi akam klemsi halatum aphan pamanghuphrong-lo. 12Bonta Philip Arnam a-Rat lapen Jisu Khristo alamjir a-Birta Keme kethan alam arjulongsi pinso lapen arloso atum kroilo, lapen baptisom enlo. 13Simon jokta kroilo, lapen alangli baptisom endet aphi Philip along dunkrilo, lapen kematha abidi jutdet akam lapen kemanghumeme akam hei hei thek dunlongsi manghuhak-lo.

14Ansi Samaria adet amonit atum Arnam alam deng-lo pu arjulongsi Jerusalem kedo, ketoitang atum Pitor lapen Jon aphan halatum along toilo. 15Halatum hadak nanglesi kekroitang atum Karjong Kangthir kelongji aphan Arnam ardomlo. 16Pima halabangso ahut anta halatum badu aphuthakta Karjong Kangthir hirhelang. Halatum aphan Hemphu Jisu amen pensi baptisom pichotlang. 17Ansi Pitor lapen Jon halatum aphuthak ari bat-lo, lapen halatum Karjong Kangthir long-lo.

18Ketoitang atum ari kebat pen ajok kekroitang atum aphan Karjong Kangthir kepi thek dunlongsi Simon ke Pitor lapen Jon aphan tangka pisi pulo, 19“Neli komane abang aphuthak neli ri bat-lote, halabangso abang Karjong Kangthir kelongjile neliphan jakong nepitha.”

20Bonta Pitor thakdunsi pulo, “Nangli pen nangli tangka pavirnang! Pima tangka pen Arnam adan nam unji pusi nangli mathalo! 21La nelitum keklem akam along nangli nangli deng, kalite nangli pharman ave. Pima Arnam angno nangli ning ahok kali. 22Tangte nangli labangso akehingno akematha pen ning chiruinon, lapen nangli lason akehingno akematha apot diya kelongjile Hemphu aphan choningrinon. 23Pima nangli ning hodak-lo, lapen pap pen plengset-lo, lake neli chinilo.”

24Pitor lapen Jon aphan Simon thakdunsi pulo, “La nanglitum kepu alam angbong isi natta neliphan keplangpledetjile Hemphu aphan choningritha.”

25Pitor lapen Jon haki pidet aphi, lapen Hemphu alam than-pachethangdet aphi halatum Jerusalem chevoithulo. Tovar kedam un ahut halatum Samaria adet panangbak arong birta keme pachethang ponlo.

Philip Lapen Ethiopia Adet A-saihemphu Alam

26Ansi Hemphu apherangke inut Philip aphan pulo, “Thurra, nitur anat, Jerusalem pen Gaja arongsopi kedam atovarle damnon.” (Nonke monit atum labangso atovar chehelat-lelo.) 27Lasi Philip thursi damlo. Lapen tovar kedam un ahut inut Ethiopia kasi-entang#Kasi entang: Pinso amonit arloso pen ke-irapji ajakong kave atum aphan chetong-lo. Alangli ke Kandasi pu Ethiopia adet arechopi atangka apuru kelang lapen kerimpi abang-lo. Alangli Jerusalem arongsopi along Arnam aphan ingduk ardomdamlo, 28lapen halabangso ahut ke alangli hem nangchevoisi amethang ahemkonglong athak ingnilunsi Arnam amontri, Isaiah ketok aloh porhebomlo. 29Ansi Karjong Kangthir Philip aphan pulo, “Nang damra halabangso ahemkonglong along dunnon.” 30Philip katponsi halabangso ahemkonglong along dunlo. Halabangso amonit Isaiah aloh keporhekong alangli arjulong-lo. Alangli labangso amonit aphan arjulo, “Nangli keporhe alam athe nangli chiniloma?”

31Alangli pulo, “Mai, komane abangle neliphan than pachininete neli la kopusonsi chini-un poma?” Lasi alangli Philip aphan hangsi hemkong-long athak alanglidung kangniji aphan choningrilo. 32Alangli keporhe hastro angdeng lahelo:

“Kethuji aphan kepon abiresak aso asonthak thaksi,

lapen angmi kangtip ahut kangrengrepin abiresak asonthak thaksi,

alangli lam ethenatta ningjejedet-lo.

33Alangliphan pabihek-lo,

lapen athikpet pen ingsaisedet-lo.

Alangli ove alam komatsi thanjima?

Pima alangli pran pirthe athak pen entang-lo.”#Isa 53.7-8

34Hala kasi-entang abang Philip aphan arjulo, “Neliphan nethantha, Arnam amontri labangso alam ke komat alamjirsi pudamloma? Amethang alamjirma, mate komane abang alamjirma?” 35Ansi Philip halabangso ahastro angdeng pen kethan pangcheng-lo. Alangli la kasi-entang aphan Jisu alamjir a-Birta Keme thanlo. 36Alanglitum tovar dambom dambomsi elong lang kedo adim nanglelo. Lasi halabangso kasi-entang abang pulo, “Langtha! Ladak lang dolo. Neli baptisom ke-en un-edetji kopi ason dolangma?”

37Philip alangliphan pulo, “Nangli jongsi nangli ning aklong pen kroilo tangte, nangli baptisom en setta chok-lo.”#Ajehak a-Baibel hastro barim along ke la angdengso 37 alam ketok ave

Alangli thakdunlo, “Neli kroilo, Jisu Khristo ke Arnam a-Sopolo pu neli kroilo.”

38Ansi kasi-entang abang hem-konglong kepasangji ahukum pilo. Philip lapen alangli lang sunlo, lapen Philip alangliphan baptisom pilo. 39Bonta alanglitum lang pen kora nangkarlu ahut Hemphu a-Karjong Philip aphan pondet-lo. Kasi-entang abang alangliphan puthot thek-longledet-lo. Bonta alangli ning arong pen amethang atovar chedamlo. 40Ansi Philip Asdop pu arongsopi along cheklangdamlo. Alangli hadak pen barsi kadokave arongsopi an damtup-lo, lapen Birta Keme pache-thang-ponbomsi Sijeria arongsopi nanglelo.

Currently Selected:

AKAM 8: KARBIBSI

Highlight

Copy