AKAM 4

Pitor Lapen Jon Kangsai Amei Angno Karjap

1Pitor lapen Jon monit atum aphan lam kethan un ahut kurusar penang atum, Hemphu a-Hemthepi keton aron-aso atum ahemphu lapen Saduki atum hadak vang-lo. 2La ketoi-tang bang hini atum, atheke, Pitor lapen Jon monit atum aphan Jisu kethi pen kethur alam thansi, kethitang atum rengsi thurji pu aporman pilo apotsi halatum aning kangpik-lo. 3Lasi halatum latum aphan nepchek-lo, lapen ningvetang-lo apotsi latum aphan puthot adap an phatek beng-lo. 4Bonta alanglitum kepachethang alam karjudunlong ake-ongpi atum ke kroilo, lapen halatum aphai pinso amonit bang suri pho anbak dolo.

5Puthot arni Jihudi atum angbong keja atum, akesar atum lapen aron thekser atum Jerusalem arongsopi along chingrumlo. 6Hadak halatum kurusar kethenei, atheke Annas pen, lapen Kaiaphas, Jon, Alekjendar atum pen lapen Kurusar kethenei adon arap atum pen chetong-lo. 7Halatum la kekroitang atum aphan halatum angno paparjapsi arjulo, “Nanglitum la kopusonsi klemloma? Nanglitum kopi ajakongsi kelongma, lapen kopi amen pensi klemloma?”

8Ansi Pitor Karjong Kangthir pen plengsetsi halatum aphan pulo, “Rat aphan keja atum, lapen akesar atum: 9Pini nelitum aphan jongsi hala akeng ketekok abang aphan kangjinso kepaklangtang alam, lapen alangliphan kopusonsi pamedet-loma, labangso alamjirsi ne-arjulo tangte nanglitum kadokave atum, lapen Israel atum an lale arjuhurnon: 10La nanglitum angno karjapther abang ke Najareth a-Jisu Khristo amen ajakong pensi pametang-lo. Nanglitum labangso a-Jisu aphan thengparpan athak pathilot-lo, lapen Arnam alangliphan kethi pen pathurthulo. 11Atheke hastro along ketok:

‘Hem kekim atum kekhindetang a-arlongsi hem kepathir-i akenangsotnei a-arlong plangtang-lo! pu alam ke Jisu alamjirsi pudamlo.#Lun 118.22

12Kejok ke alangli pen ajoksi longchot. Pima etum kejok kelongji aphan Arnam sining arum labangso amen apar ke akaprek amen monit atum aphan pipepinlang.”

13Pitor lapen Jon akepherere thek-longsi lapen halatum kecharli, kethek avepin, monit jong jongchot pu chinisi hala kangsai amei amonit atum kematha abidi jutdet-lo. Ansi alanglitum Jisu along kejalangdun atumlo pu halatum chemathadamlo. 14Bonta hala kemedet abang hadak Jon lapen Pitor along karjapdunther thek-longsi halatum kethakdunji alam avedet-lo. 15Lasi halatum aphan kangsai amei ahem pen kedamji ahukum pilo, lapen halatum angbong kechingvaiji pangcheng-lo. 16Halatum chepulo, “Ilitum labangso amonit atum aphan kopisi inghoi nangjima? Pima latum manghumeme akam klemtang-lo, lake Jerusalem arongsopi kedo amonit atum an chinilorlo, lapen ilitum la chekrongkre un-e. 17Bonta monit atum labangso alam la apar ke kepachethangthedetji aphan, halatum badu amonit aphanta Jisu amen penke kepupedetjile ilitum halatum aphan pacheretoi lonang.”

18Lasi halatum latum aphan hangthulo, lapen Jisu amen pen badu aphanta thangta puri lapen thanri pusi hukum pilo. 19Bonta Pitor lapen Jon halatum aphan thakdunsi pulo, “Arnam angno ke nelitum nanglitum alam kekroisi kemema, mate Arnam ahukum kekroisi kemema, lale nanglitum methang ingsaitha. 20Pima nelitum ke nelitum methang kethek-long lapen karjulong alamjir pupe un-e.” 21Lasi halatum latum aphan ansose papherethusi lophlot-lo, pima kadokave amonit atum latum keklemtang akam pen apot Arnam aphan rohurlo apotsi halatum latum aphan aduk kanghoiji abidi longthekthedet-lo. 22Hala kemanghumeme pen kemedet abang a-arta ke ningkan phlikep soselo.

Kekroi Atum Kephereredetji Aphan Arnam Kardom

23Pitor lapen Jon aphan lophlot aphi latum amethang ajirpo atum along damsi kurusar kethe atum lapen akesar atum latum aphan kepu alam chethanlo. 24Kekroitang atum labangso alam arjulongsi aning isipet pen Arnam aphan ase kethe pen ardomlo: “O Hemphu, jakong theparpik a-Bang, nangsi sining, longle lapen talo, lapen lahei hei arlo kedo amar an pinchong-lo.#Keba 20.11; Nehe 9.6; Lun 146.6 25Karjong Kangthir pen ajok nangsi netum aphusar, atheke nangban, David angho pen labangso alam papulo:

‘Jihudi kalidet atum kopi apotsi jasemet aning thiloma?

Lapen rat atum kopi apotsi akejoijepi alam mathaloma?

26Hemphu lapen Alangli Khristo abe thur#Mesaiah: Kepajokji aphan Arnam kebattang abang Pen kechedanjisi pirthe arecho atum cherintilo,

lapen rat kepangri atum chepangrumpet-lo.’#Lun 2.1-2

27Pima labangso arongsopi alongsi Herod lapen Pontias Pilat atum Jihudi kalidet atum lapen Israel amonit atum pen pen chingrumpetsi nang kebattang a-Khristo, nang Ban kangthir Jisu abethurlo.#Mat 27.1-2; Mar 15.1; Luk 23.1-7; Jon 18.28-29 28Nang methang ajakong pen lapen nang methang aning kehang pen nang aphrang pen kepathiktang asonthot keklemjisi halatum chingrumtang-lo. 29Lapen nonke Hemphu, halatum netum aphan kepaphere alam mathanon, lapen la nangban atum kephererepin pen nang lam kethan haiji aphan nang netum aphan jakong pinon. 30Keso atum aphan kepamejile nang ri chirungnon, lapen nangmethang Aban kangthir, Jisu amen pen kemanghumeme akam hei hei lapen kematha abidi kejutdetakam kethe hei hei klemnon.”

31Halatum ardomtangdet aphi halatum kechingrum adim klemhurlo. Halatum kadokaveta Karjong Kangthir pen plengset-lo, lapen phererepin pen Arnam alam kepachethangji pangcheng-lo.

Kekroitang Atum Akhi Ke-enrap-rap Alam

32Kekroitang atum aning angthin isipet-lo. Baduta amethang amar aphan nemar pu chepupedetsi halatum do-an amarta enrap rap-lo.#Akam 2.44-45 33Ketoitang atum ajakong thepik pen Hemphu Jisu kethi pen kethur alam ahaki pibomlo, lapen Arnam halatum kadokave aphuthak ahirjume pi-olo. 34Halatum angbong inutbakta akedorde ason avedet-lo. Rit lapen hem akhi kedo atumta lahei hei chejorsi kelong an atangka vansi, 35ketoitang atum arideng hodaipet-lo; lapen abangphutin aphan akenang kedo atengsi labangso atangka ronlo.

36Lapen Saipras alanglom alongsi amahang kethek, inut Joseph pu abang hadak dolo. Alangli ke Levi akur amonit-lo. Ketoitang atum alangliphan Barnabas pusi amen irlo. Barnabas pu amen atheke, “Ning kepathe-thek abang,” puhelo. 37Alangli amethang alongle chejorsi kelong an atangka ketoitang atum arideng hodaipet-lo.

Currently Selected:

AKAM 4: KARBIBSI

Highlight

Copy