AKAM 3

Akeng Ketekok Abang Aphan Kepame

1Arni isi arni kangsam baji kethom apor ahut, atheke kardom apor ahut Pitor lapen Jon Kardomhemthepi along damlo. 2Hadak Alon kedo Anghap pu Kardomhemthepi anghap along inut amahang kethek pen akeng ketekok amonit dolo. Kardomhemthepi along kedam atum along pen dan kepachohangji aphansi alangliphan arnivangta hadak ponlo. 3Pitor lapen Jon Kardomhemthepi arlo kelutji dokdok thek-longsi alangli halatum along pen tangka chohang-lo. 4Pitor lapen Jon alangliphan kelangding ahutsi Pitor pulo, “Nelitum aphan nanglangtha!” 5Lasi alangli halatum pen kopine amar longjibon pu mathasi halatum aphan langding-lo. 6Ansi Pitor pulo, “Nerideng ser, kalite rupta ave; bonta kedo amar aling neli nangliphan pipo. Najareth a-Jisu amen pen nangli kengkam chejornon.” 7Alangli ari ar-e otsi alangliphan parjap-lo. Hala mamat alangli kengpak lapen akeng hambi asek ajakong dothulo. 8Alangli chonkangsi thurphlut-lo lapen keng-kam kechejorji pangcheng-lo. Alangli kengkam chejorsi, chonkang-kangsi lapen Arnam aphan rosi halatum along Kardomhemthepi arlo dunlo. 9Hadak kedo amonit atum alangli kengkam kechejor lapen Arnam aphan kero thek-long-lo, 10lapen alangli ke hala Kardomhemthepi Alon kedo Anghap pu anghap along ingnilunsi dan kechohang abang-lo pu monit atum chinisi alangliphan keplangtang alam pen apot kematha abidi jutdetsi manghuphrong-lo.

Kardomhemthepi Arlo Pitor Kethan Alam

11Hala kechorek abang Solomon Ahongkup pu adim Pitor lapen Jon along kedunkri ahut monit atum mang-huphrongsi kekat pen halatum adung vangsi chingrumpet-lo. 12Hala monit atum aphan thek-longsi Pitor pulo, “Israel atum, kopi apotsi nanglitum labangso pen apot manghuphrong-loma, lapen kopi apotsi nelitum aphan nelangphrong-loma? Nelitum methang ajakong, mate nelitum methang methang adhoromipet akam pen ajoksi nelitum labangso abang aphan kengkam pachejor unlo pusi nanglitum kemathama? 13Abraham, Isaak lapen Jakob a-Arnam, atheke ephusar atum a-Arnam amethang Aban, Jisu aphan adak-atur pathetang-lo. Pilat labangso a-Jisu aphan kepajokjisi mathalo setta nanglitum alangli ingno Jisu aphan dengdedet-lo.#Keba 3.15 14Alangli ke ingthir-et lapen dhoromipet abang-lo, bonta nanglitum alangliphan dengdedet-lo. Labangso alar nanglitum hala inut pran karmut abang aphan pajoktu pusi Pilat aphan choningrilo.#Mat 27.15-23; Mar 15.6-14; Luk 23.13-23; Jon 19.12-15 15Nanglitum la chethe ahemphu aphan pathilot-lo, bonta Arnam alangliphan kethi pen pathurtang-lo, lapen nelitum labangso alam ahaki atumlo. 16Labangso a-Jisu amen ajakongsi la akeng ketekok abang aphan ajakong pithulo. La nanglitum thek-long-lo lapen chinilo, lapen lake Jisu amen aphan kekroi pen ajoksi klem unlo. Jisu aphan kekroi pen ajoksi alangliphan pametang-lo, nanglitum kadokaveta la thek-longhurlo.

17“Lapen nonke kortemarli atum, neli chinilo, nanglitum lapen nanglitum aphan keja atum chininedetsi Jisu aphan labangso akam klemlo. 18Atheke Khristo kesung chechak nangji pusi Arnam amethang amontri atum an pen ajok aphrang pen than pachinilo; lapen pini arni alangli labangso alam pachekok-lo. 19Tangte Arnam nanglitum apap hei hei kediyaji aphan nanglitum aning chiruira Arnam adung vangnon. Nanglitum lapuson klemlote, 20Hemphu along pen kerengme apor vangji lapen alangli nanglitum aphan nangkangvaipitang a-Messiah, atheke Khristo Jisu aphan nangtoiji. 21Hako ahut Arnam amethang amontri kangthir atum pen ajok kechaktang ateng kadokave amar kepinchongmithuji ahut nangleletik ke alangli sining athaksi donangbomjilang. 22Moses pulo, ‘Neliphan asonthak thaksi Arnam amethang amontri inut nanglitum angbong nangtoiji. Alangli ke nanglitum methang amonit atum angbong pensi klangji. Alangli nanglitum aphan kepu alingle nang-litum kroinon.#Keth 18.15,18 23Halabangso amontri alam kekroikre abang aling aphan ke Arnam amonit atum angbong pen paprekdaksi pavirdetji.#Keth 18.19 24Samuel lapen alangli pen aphi Arnam amontri atum anta la non akai keplangbom alamsi pulo. 25Arnam amethang amontri atum pen ajok kechaktang alam hei hei ke nanglitum aphanlo, lapen nanglitum aphusar atum pen Arnam kechechak ason nanglitum longdunlo. Atheke Arnam Abraham aphan pulo, ‘Nangso nangsu pen ajoksi ne pirthe athak kedo an amonit aphan ahirjume piji.’#Kech 22.18 26Lasi Arnam Aban aphan ingvaisi alangliphan aphrangke nanglitum angbong nangtoilo. Nanglitum aphan nangmethang methang akehingno akam pen ning pachiruisi nanglitum aphan hirjume kepithekji aphansi Arnam alangliphan nanglitum angbong nangtoilo.”

Currently Selected:

AKAM 3: KARBIBSI

Highlight

Copy