AKAM 28

Malta Alang-lom Along Kechington

1Nelitum joksi talo akung lepet-lo. Halabangso alanglom amen ke Malta puhelo pu nelitum aphi ansi chinilo. 2Hadak asor nelitum aphan inghon parpik-lo. Halabangso ahut arve jang-lo apotsi ingsampik-lo. Lasi halatum nelitum aphan me nethorpilo, lapen nelitum aphan deng-lo. 3Pol theng epeng pangrum damsi me kethek ahut me angtang keso pen apot pherui ke-ik ejon nangbarsi Pol ari perhet-lo. 4Halabangso alanglom amonit atum Pol ari along pherui kejangling thek-longsi lahin lahin chepulo, “Labangso amonit ke monit kepathi abangvek tahailo. Alangli talo along pen jok-lo setta kepho nangji ang-ang dokok apotsi alangliphan pareng longledetpo.” 5Bonta Pol halabangso apherui me along hijirphit-lo, lapen alangli thangta cheplangpledet-lo. 6Alangli bang kangji, kalite alangli menmen krepphitsi thilotji pusi halatum mathalo. Bonta kanghong ajir dingklui aphita alangli phan thangta plangpledet thek-longsi halatum aning kematha chelarsi pulo, “Alangli ke inut a-arnamlo!”

7Halabangso adim adung arei alongleke halabangso alanglom ahemphu, Publias alonglelo. Alangli kanghon pen nelitum aphan nithom anta amethang ahem alohi chak-lo. 8Alangli po aphu keso lapen apok kangsir pen ajok tiroksi dolo. Pol alangli dung damsi Arnam ardomlo, lapen alangli phu athak ari batsi keso melo. 9La plangdet aphi halabangso alanglom keso atum an alangli long vang-lo, lapen alangli halatum aphan pamelo. 10Halatum nelitum aphan ason ason ahormu nemanlo, lapen nelitum hadak pen kedamthu ahut nelitum kenangji ason an telongpi along nangthapdunlo.

Malta Alang-lom Pen Rom Kedam

11Chiklo jonthom aphi hadak ningkreng esek kedo, Alekjendria adet atelongpi chethapdunsi nelitum damlo. Halabangso atelongpi aphrang akandar along ke “Kecherop Arnam” pu akumlin dolo. 12Nelitum Sirakia arongsopi kethe nanglelo, lapen hadak nelitum nithom dokok-lo. 13Hadak pen nelitum damthusi Rigiam arongsopi nanglelo. Puthot arni nitur anat pen tomon kevang pangcheng-lo, lapen puthot arnithu nelitum Puteoli arong-sopi lelo. 14Hadak nelitum kekroi akorte atum pen chetong-lo, lapen halatum along hithi erui dotu pusi halatum nelitum aphan choningrilo. Lapusonsi nelitum Rom arongsopi vang-lo. 15Rom arongsopi kedo kekroi akorte atum nelitum abirta arjulongsi nelitum aphan nangkangthum-dunjisi Appias a-Hithi lapen Boha kethom pu arongsopi an vang-lo. Pol halatum aphan thek-longsi Arnam aphan kero pilo, lapen aning theklong-lo.

Rom Arongsopi Arlo

16Nelitum Rom arongsopi nanglesi Pol aphan ke alangliphan keton aron-aso pen padorapchomlo.

17Nithom aphi Pol Jihudi atum angbong keja atum aphan phalo. Halatum chepangrumpet aphi alangli halatum aphan pulo, “Kortemarli atum, neli nelimethang akhei aphan, kalite elitum aphusar atum ekepite-kang aron atang aphan thangnat akehingnota klemklepin setta neliphan Jerusalem along phatek nebengsi Roman atum arideng nehodailo. 18Halatum nephan ingsaisi nephan kelophlotji aning hang-lo, pima nepran kedammeme akehingno akam neli thangta klemklelo, lake halatum chinilo. 19Bonta Jihudi atum labangso alam kroidundedetsi Rom a-Recho nekepangsaiji aphan neli choningri nangkok-lo. Bonta nemethang akhei aphan kopine alam kedinji, lapu aphan kali.#Akam 25.11 20Lasi nanglitum pen kechetongji lapen kechingki-chethanjisi neli nanglitum aphan phalo, pima Israel atum aning kechethedam abang aphan ajoksi nephan lason ingchin ari pen nekoktang-lo.”

21Halatum alangliphan pulo, “Nelitum Judia adet pen nangli lamjir thang abirta alohta longle, lapen hadak pen kevang badu akorteta nangli lamjir thang akehingno alam thanthe, lapen alam kechethanta arjudun longle. 22Bonta nangli kepuji alam nelitum arju ingtung-lo. Pima la nanglitum asong ke hingno pusi kadokave adimta monit atum puhurlo, lake nelitum chinilo.”

23Lasi halatum Pol pen arni chepathik-lo. Hala kepathik arni monit ake-ongpi atum Pol kedo adim vang-lo. Adap pen ha ajo an alangli halatum aphan Arnam a-Rat alamjir thanpajirmilo, lapen Moses Aron lapen Arnam amontri atum ketok alam hei hei paklangsi alangli halatum aphan Jisu alamjir kepakroiji bor-ilo. 24Alangli kethan alam pen ajok penang atum ke kroilo, bonta akaprek penang atum ke kroikredet-lo. 25Lasi Pol eson alam thandet aphi halatum angbong alam chekroikredetsi chekakphunlo. Pol kethan alam lapuhelo: “Arnam amontri, Isaiah pen ajok Karjong Kangthir nangtum aphusar atum aphan athikpetsi pulo, atheke alangli pulo:

26‘Damra labangso amonit atum aphan punon:

Nangtum arjubom arjubom setta chininedetji;

Nangtum langphrongbom setta thek-longledetji.

27Pima labangso amonit atum aning buikluihak-huk-lo,#Isa 6.9-10

lapen halatum anota chetokthip tang-lo,

lapen halatum amekta selokthiptang-lo.

Lapu kali asonte, halatum amek pen thek-longji apot-lo,

halatum ano pen arjulongji apot-lo,

halatum aning pen chinithekji apot-lo,

lapen halatum nelong nangchiruisi ne halatum aphan pameji apot-lo pusi Arnam pulo.’”#Isa 6.9-10

28Pol padusi pulo, “Tangte mathanon, Arnam akepajok alam Jihudi kalidet atum aphan pitang-lo, lapen halatum la arjuji” 29Pol labangso alam thandet aphi Jihudi atum jasemet lam chehilisi pratphunlo.#Ajehak a-Baibel hastro barim along ke angdengso 29 alam ketok ave

30Pol tangka pi pensi bang ahem ningkan hini an dolo. Alangli dung kevang atum an aphan alangli ning arong pen deng-lo. 31Alangli phererepin pen, lapen alangliphan kekhang abang ave pin pen alangli Arnam a-Rat alamjir than pachethang-lo, lapen Hemphu Jisu Khristo alamjir thanlo.

Currently Selected:

AKAM 28: KARBIBSI

Highlight

Copy