Maakɨ 14

“Jizaazai balana!” desa'nesɨ.

(Matɨyui 26:1-5; Lukɨ 22:1-2; Jonɨ 11:45-53)

1“Sawɨta daryaai kajɨnnojɨ tɨka Pari'ma'munne'najɨ tɨka munne Gɨrɨkula lɨwɨnya pamidakɨna myade'najɨ naadengɨra,” Juyara dɨnyɨna. Sara dɨnyɨna kye' sagaa' sipɨzipɨya Gotɨyarɨna mubɨthɨka yɨra'dɨvɨta naangerajɨ Juyaraavɨre Yagaaikɨwɨjarajɨ dɨnyɨna “Nemɨ lɨka gavabɨ' yulyarawaajɨ wɨla yɨrawaajɨ tamakaade'na sahwarɨ?” dɨnyɨna ye'. 2Sare' dare'nesɨ. Sahwara dɨna “Tɨka munne sagaa' a'mwera mala nanerabɨka! Sagaa' sarɨna mwaalana!”

A'mwe' Jizaazarɨ wabatɨrɨnya winya'ne' dɨnga'.

(Matɨyui 26:6-13; Jonɨ 12:1-8)

3Sai Anga Betaani mwaalaka Saaimonɨ Samatanakere angevɨ wɨlɨna wapaaya nya'nei walyamwaaidɨsɨ a'mwe' wɨlaabɨna. A'mwe' simaa'gula nawɨ'nya wabatɨrɨnya naathɨ tɨrɨnya winya'ne mubya naange yake' yɨ'nɨkesɨ makulaabɨna. Makulaabɨna yaka simaa'gulya' tɨngɨ'na yaka gamɨre mɨnyagɨnyavɨ dɨngɨna ya'. 4Tɨvi'na dɨngɨna kya' pwara sɨmunyangɨ sɨnna tɨka wɨda'daa'nyɨ dɨnyɨna “Wabatɨrɨnya winya'ne' be'na wasɨ'nɨwaka! 5Sare' dare'nesɨ. Wabatɨrɨnya sa' kinaaya kwala naanga naanga (yɨrɨka 300 wawɨnya'ne nɨgwia) mubazɨ kwajɨ a'mwe nɨgwɨmaayaraavɨ nɨgwia kujaavadɨka!” Dɨnyɨna yeva “A'mwemɨlɨ'gɨ baa'na yɨwaa!” maanga wɨdɨna. 6Maanga mi'na wɨdɨna kye' Jizaazai wɨdɨna “A'mwe' mwaalana! Sara baa'na wɨdɨvanɨgava! Nɨmɨnyɨna tewaanya nawɨ'nya' nyɨwakesɨra. 7Sare' dare'nesɨ. Sarɨmɨnyaba yuyagaa' a'mwe nɨgwɨmaayara mwaaidɨvɨ' ‘Wawɨnya maayaraavɨ tewaanya wideinyɨ,’ yawɨrapiyagaa' tewaanya jideihɨlyɨra. Wawɨmaayara yuna mwaaidɨvɨ' kɨrɨ' nɨmɨ sarɨmɨnyaba yuyagaa' mamwaalyɨ yɨdeinyɨra. 8A'mwe sa' yanne'na yɨwa'. Dahaa' nɨmɨre kɨlaakejɨkɨ kanyɨdɨngɨwa' dɨvidaasɨ wabatɨrɨnakeinyɨ balɨdeinyɨra. 9Nebulya'na yɨhɨthɨwa. Kwaaka yuyavakaavɨ yagaala tewaanya' wɨdɨpɨ'devakaavɨ a'mwe' nyɨnɨke' gamɨnyɨ yawɨpɨ'de'na wɨjɨwaakɨpɨ'desɨra.”

Juthaazai da' “Jizaazare yɨkamaangeraavɨ wɨdɨma!”

(Matɨyui 26:14-16; Lukɨ 22:3-6)

10Sagaa' gamɨre a'mwe ata yuyɨraai sɨvɨlyɨrɨdaasɨ pwaraalyara mwaaidɨvɨ' a'mwe gavei Yɨzɨkerɨyotɨyai Juthaazai wo'nɨkei mwaaida “Kumɨ wɨla yɨrakɨpɨ'de'na wɨdɨma!” daka sipɨzipɨya Gotɨyarɨne tamira'dɨvɨta naangeraayawɨnna wɨna. 11Mi'na wawaka yagaala wɨdɨna kya' kumɨ yɨlaaya marina yeva “Gɨmɨnyɨna nɨgwia gɨzavaana!” wɨdɨna ye'. Mi'na wɨdɨna kye' yawɨ'na “Kumɨ Jizaazarɨ wɨla yɨrakɨpɨ'de'na nɨmɨ gara yɨdeinyaka?” Yawɨraka kuna yawɨ'na ya'.

Jizaazalyɨ gamɨrerajɨ tɨka munne ne'.

(Matɨyui 26:17-25; Lukɨ 22:7-14,21-23; Jonɨ 13:21-30)

12Munne Gɨrɨkula lɨwɨnya mamɨlyade' gaai yɨma'nyɨna kya' sagaa' Pari'ma'munne sipɨzipɨya dɨwɨnyarɨ Juyara tadɨvɨsagaa' gamɨrera wɨdɨna “Nemɨ kwawaajɨ gɨmɨ Pari'ma'munne sipɨzipɨyarɨ dɨnade'na gava yovɨrawakaajɨwona?” 13Sara wɨdɨna kye' gamɨreraarɨ wɨdaasɨna ya' “Angeba wɨlakɨri a'mwe pwai aalɨtalya' kinya marina yɨwakerɨ duzɨma'naawila! Wɨjɨma'naawakɨri angevɨ wɨlaawadevanyarɨ dɨmɨdɨnyɨla! 14Saba angesɨyarɨ duzɨla! ‘Gotɨyare yagaala wɨjɨwaakadei gɨthɨvanɨ' “Gavi ku'dɨka yarinɨkevɨ se wa'deva gavanaka? Pari'ma'munnevɨ nɨmɨjɨ nɨmɨrerari naadevanyɨra.” ’ 15Kɨrɨmɨ sara kudakɨri gavi ku'dɨka naanga munyaba yarinɨkevɨ nemɨnyɨne namwaalyɨtajɨ taivolɨyajɨ warɨkevɨ yɨhibwarɨdaakwadevɨ nemɨnyɨna wapaaya jovɨrawakyɨla!” 16Tɨvi'na wɨdaasɨna kya' gamɨreraai wawagɨla angeba wɨlaawɨna yagɨla dara wanganagɨlya' “Jizaazai sara nehɨthɨwake darɨ'!” Mi'na yawɨragɨla Pari'ma'munne yuya yovɨrawakɨna yagi. 17Sawɨsa' mena kajɨnna' sahwai gamɨrerari bɨna ya'. 18Bɨna kya' wapewakamaranyavɨna asɨrajɨ dɨhaihɨ'na yadɨvɨ' namwaaidapi Jizaazai wɨdɨna “Nebulya'na yɨhɨthɨwa. Sarɨmɨjɨya pwai nɨmɨnyɨna yɨkamaangera wɨla nyɨrakɨpɨ'de'na nyɨmarɨmwaaihadei nɨmɨjɨ wapaa nɨvanɨgolyai nɨmɨnyɨna yɨkamaangeraavɨ wɨdathelyɨ.” 19Sara wɨdɨna kya' kumɨnyɨ kale wiadaa'nyɨ pwai wɨdɨna “Nɨmɨ daaka? Nɨmɨ dɨngaka?” pwai wɨdɨna “Nɨmɨ daaka?” yuyara sana sana wɨdɨna. 20Mi'na wɨdɨna kye' sahwai wɨdɨna “Atɨraai sɨvɨlyɨrɨdaasɨ pwaraalyaihɨlyɨya pwalyɨ gɨrɨkula maa'gula gavevɨ dɨwɨlavanɨvanɨgolyalyɨra. 21Gotɨyare bukuya' dɨnɨkabaaibɨsa'na ‘A'mweraavɨne Kaimɨraayai barya'nei wawadelyɨra.’ We', a'mwei A'mweraavɨne Kaimɨraayarɨna yɨkamaangeraavɨ wɨdathele! Sara kyojɨ a'mwe sarɨ ganaange' mamaari yajɨ kwajɨ tewaanya kyadɨ'!”

Jizaazai aalya waainɨya' gɨrɨkula wɨjaava'.

(Matɨyui 26:26-30; Lukɨ 22:15-20; 1 Koridɨ 11:23-25)

22Kumɨ nadaapi Jizaazai gɨrɨkula maaraka Gotɨyarɨ wɨda' “Gɨmɨre yaya' makimwa. Su! Su!” Mi'na wɨdaka gunyɨna gunyɨna yaka wɨjaavaka wɨdɨna “Dɨmaaryɨla! Da' nɨmɨre kɨlaakejɨkɨra.” 23Wɨdaka kaapɨvananya' maaraka Gotɨyarɨ “Su!” wɨdaka wɨjaavɨna kya' kumɨ sara yuyara pwai nyɨna pwai nyɨna ye'. 24Mi'na nyɨna kye' wɨdɨna “Waainɨya' mi'na nɨwaasa' yɨ, wɨlɨmwagarɨkeburɨne nɨmɨre tawe' nɨwaasasɨ. Nɨmɨre tawe sa' gɨragɨre a'mwe kwalaalyaraavɨna bwalaravadesɨ. 25Nebulya'na yɨhɨthɨvanɨge. Aalya waainɨya' gɨraipɨwɨlyavɨdaasa' ayɨna manya'mujɨ Gotɨyai maremwaaideva waainɨya mudɨke' nɨdehaa'nanyɨ. Arɨkewɨnyɨ.” 26Tɨvi'na wɨdɨna kya' yɨledaata pɨrɨ'na deva Mugunya Wolivɨna kaanna wɨna ye'.

“Nɨmɨnyɨna Pitai ‘Maavelyɨ,’ wɨdathelyɨra.”

(Matɨyui 26:31-35; Lukɨ 22:31-34; Jonɨ 13:36-38)

27Jizaazai wɨdɨna “Sarɨmɨ lɨka yapi nɨmɨnyɨ dɨnyagalya'makwideihɨlyɨra. Gotɨyai dara dɨnɨkesɨ. Sipɨzipɨya yɨ'dɨvaiderɨ karamaka'mujɨ sipɨzipɨyara lɨkaanya yɨwɨnadaapɨ'derera. 28Sara jide kɨrɨ' nɨmɨ kabala'mujɨ kanyadɨkaavojɨ Galɨlineinyɨ sɨnnawɨ yɨhibwaramakwaanɨdeinyɨ waanɨdera.” 29Sara wɨdɨna kya' Pitai wɨdɨna “A'mwe yuyara kyagɨhalya'makwopi nɨmɨ aawa!” 30Jizaazai wɨdɨna “Nebulya'na gɨthɨwa. Sawɨta dahaasagaa' nɨmɨnyɨna ‘A'mwe sarɨ mwanganyainyɨra,’ duthatheigɨnyɨra. Dahasaai dahaa' kada'gɨzɨ kukuraayai yagaala pɨgasaai dathelyɨra.” 31Sara wɨdɨna kya' yagaala dɨragɨnna bazɨwɨna “Gɨmɨnyɨna ‘A'mwe sarɨ mwanganyainyɨ,’ majɨ yɨwɨja' nehɨramakɨpɨ'deinaalyɨra. Arɨkawɨ.” Gamɨ sara wɨdake' yuyara sara wɨdɨna ye'.

Gazamani saba Jizaazai tɨbarɨyagaala wɨda'.

(Matɨyui 26:36-46; Lukɨ 22:39-46)

32Yaayeba Gazamani wo'nɨkebanna wɨna kye' sai gamɨreraavɨ wɨdɨna “Nɨmɨ tɨbarɨyagaala wɨdadaa'mujɨ dava dalamwaalyɨla!” 33Pitalyɨ Jemɨzalyɨ Jonɨjɨ saraavɨ pɨbanna makuna yaka lɨka kya' gamɨre kale dusɨna gɨnyɨwanna'na kya' 34kumɨnyɨ wɨdɨna “Nɨmɨre kale dusɨna nyɨgɨnyɨwanna'mwake' balɨdeinyɨ dɨngaka? Dava mwaalapɨjɨ dɨvaihanaryi!” 35Sara wɨdɨna yaka sangirɨ'na wawaka kwaakevɨna wala'na yaka tɨbarɨyagaala wɨdɨna “Daanga nyɨvɨnadehaa'na gɨthɨwa. Nɨmɨnyɨna ‘Daanga mavɨnannera!’ dɨza' daanga nyɨvɨnya'ne' myɨma'nyɨ yana! 36Tataai, Nɨmwai, dɨragɨnaangeigɨ, yuya nayaa yɨnneigɨnyɨra. ‘Daanga nuvɨnadɨka! Sabwi marasɨ'nɨma!’ dɨza' dɨmarasɨ'na! Kɨrɨ' sɨmunya nɨmɨreburɨdaasɨ minnera! Aawa. Gɨnnyaburɨdaasɨ ja!” 37Ayɨna baka dara wanganake' “Se dakava!” Daka Pitarɨ wɨdɨna “Saaimonɨ, se dakɨ? Maalɨkegaa' mabaihanarijɨwaa? 38Sarɨmɨ tɨbarɨyagaala dɨthavaihanarila! ‘Saataanɨ kayaa'na naneyadɨka!’ majaihi ‘Nemɨ nayaa baihanaraana!’ kuryaraavɨ yawɨ'manɨga'. Sarɨmɨre kɨlaakejɨkɨ maa'na naanga yɨhimanɨke'na se wa'mwaa'.” 39Sara wɨdaka ayɨna wawaka tɨbarɨyagaala wɨdake' ayawɨdaasɨ wɨdɨna. 40Mi'na wɨdɨna yaka ayɨna baka dara wanganake' “Se dakava!” Sare' dare'nesɨ. Kumɨre tɨnnya se'na yɨdaakwe'. Sara kada' kumɨ dɨna “Nemɨ berɨ' wɨdaazɨwona?” deva navɨka mwaalɨna ye'.

41Dahasaai dahaa' yagalaawaka wɨdɨna “Kwazaaka se wa'manɨgasaihi daaka? Mi'nanyɨra. Yɨthaanyi, dahaa' kyɨma'nɨwa' A'mweraavɨne Kaimɨraayainyɨ tamakya'na pwai kayaa'nanyaraavɨ malya'neraavɨ mena wibwarɨdaakuwaka! 42Dɨthaayɨla! Nemɨ wɨrata'naana! Yɨthaanyi, nɨmɨnyɨna yɨkamaangeraavɨ wibwarɨdaakwakei yɨnɨ'.”

Jizaazarɨ wɨla pwɨye'.

(Matɨyui 26:47-56; Lukɨ 22:47-53; Jonɨ 18:3-12)

43Sagaa' wɨdadaa'nyɨ yɨme'nya'bɨ' Juthaazai a'mwe atɨraai sɨvɨlyɨrɨdaasɨ pwaraalyarajɨya pwai bɨna. Gotɨyarɨna mubɨthɨka yɨra'dɨvɨta naangerajɨ Juyaraavɨre Kɨwɨjarajɨ Juya naangerajɨ sara wɨdaasɨna kye' kwala naanga mwaalevera kwaari'masɨramɨnya, kɨlɨyɨ'gwahaalya lɨmwanna yevera Juthaazalyɨ bɨna ye'. 44Sɨnnawɨ sagaa' yɨkamaangeraavɨ wibwarɨdaakwakei wɨjɨwaakakei “Nɨmɨ yɨlaaya mariwɨjai sahwalyɨ. Nayaa lɨmwagapɨjɨ nayaa baihana'dɨvɨ' dɨmakwila!” 45Sara wɨjɨwaakakei baka yɨme'nya'bɨ' gamɨnyawɨnna wɨjɨmaatavaka wɨdɨna “Naangeigɨ!” Tɨvi'na wɨdaka yɨlaaya marina ya'. 46Yɨlaaya marina kya' aawɨlasara ata galalɨmwanna yeva wɨla yɨrɨna. 47Wɨla yɨrɨna kye' daavesarajɨya Jizaazarei akwai, kwaari'masɨramɨnya' maaraka sipɨzipɨya Gotɨyarɨna Yɨra'de Naangere yaasɨwa'wawɨnyarɨ yɨrɨ'gainyɨna yaka gamɨre kadɨkikɨ lihɨwɨ'na ya'. 48Sara kya' Jizaazai malya'neraavɨ wɨdɨna “Kuka yɨpalamaa'dɨnyainyɨ daaka! Kwaari'masɨramɨnyajɨ kɨlɨyɨ'gwahaalyajɨ lɨmwanna yeva ‘Yɨpalamaa'deibɨsarɨ wɨla yɨraana!’ deva davɨvanɨga'! 49Gazagaasagaa' yɨrɨkeryaavɨ Gotɨyare Angevɨ sarɨmɨjɨ mwaaidɨ yɨhɨzɨwaakadɨnyagaa' wɨla manyɨryadɨvɨsaihɨlyɨ. Aawa. Sa'na kɨgaakuna Gotɨyai dɨnɨke' yune'na yɨma'nana!” 50Tɨvi'na wɨdɨna kya' gamɨrera yagalya'ma'na yeva lɨkaanya wɨna ye'.

51Mɨgɨnya akwai kwaabɨhannya pɨrɨ'na yewaa'bwa'nakei mɨdɨnna kya' pwara kwaabɨhannya' galamwagi'nyɨna kye' 52kamagaduyɨvale' kannyɨmaayai kaanyave'na wɨna ya'.

A'mwe naangeraayawɨ Jizaazai mwaala'.

(Matɨyui 26:57-68; Lukɨ 22:54-55,63-71; Jonɨ 18:13-14,19-24)

53Jizaazarɨ Gotɨyarɨna Yɨra'de Naangeryawɨnna makuna yadaapɨjɨ Gotɨyarɨna yɨra'dɨvɨta naangerajɨ Juya naangerajɨ Juyaraavɨre Kɨwɨjarajɨ yɨ'bwa'nɨgavɨna. 54Yɨ'bwa'nɨgavɨna yadaapi Pitai menyaba mɨdɨnaawɨna yaka Gotɨyarɨna Yɨra'de Naangere angwaasavɨ wɨna kya' damerari mwaaleva dɨka yimwannyɨna. 55Dɨka yɨmwannyɨna yadaapi Gotɨyarɨna Yɨra'dɨvɨta naangerajɨ kaajolɨya yuyarari sara dɨnyɨna “Nemɨ tamakaade'na a'mwera dɨna ‘Jizaazai kayaa'na yakevɨ wanganena,’ dɨpɨ'dera gawɨ mwaaihava?” Dɨnyɨna kye' kɨrɨ' a'mwe sahwara mamwaalyɨna. 56Sare' dare'nesɨ. A'mwe pɨjaakuna gamɨnyɨna kwaasɨ yagaala jalɨkurakesa' kɨrɨ' kumɨre yagaala avaainanya' majasɨ.

57Pwara daavɨna yeva kwaasɨ yagaala dara wɨjalɨkurakɨna 58“Gamɨ dake' nemɨ wɨ'no. Dara da' ‘Gotɨyare anga da' a'mwera yavɨkaryaasa' kayaaka yɨgala'mujɨ yɨrɨka daryaai darɨkɨ anga pɨrɨ' a'mwera mamajɨ yɨpɨ'de' madɨdeinyɨra,’ sara wɨ'no.” 59Sare kɨrɨ' kumɨre yagaala ge' ge' dɨna yesa' avaainanya' mɨka.

60Gotɨyarɨna Yɨra'de Naangei tɨnnyaba daavaka Jizaazarɨ yɨwaara'na “Yagaala pɨrɨ' mama'maa'dɨnneigɨ daaka? A'mwe dara jalɨkurakya aane pɨbwi kɨbwi mama'maarijɨwaana?” 61Sara yɨwaara'na kya' sahwai yagaala majai aane pɨrɨ' kɨrɨ' marɨvɨkɨri ya'. Pɨgasaai Sipɨzipɨya Gotɨyarɨna Yɨra'de Naangei yɨwaara'na “Kɨraazɨtɨyaigɨ daaka? Gotɨyai tewaanaanga yɨnɨkere kaimɨraayaigɨ daaka?” 62Sara yɨwaara'na kya' Jizaazai wɨdɨna “Sahwainyɨra. A'mweraavɨne Kaimɨraayai Gotɨyai dɨragɨnnakere aangasɨmagɨ kamwaalojɨ Gotɨyalyɨ maremwaalyɨkaderaarɨ danganyidelyɨra. Nabaai yɨraaya sɨgunyavɨ wa'dengɨ gamɨ walaabathelyɨra.” 63Mi'na wɨdɨna kya' Gotɨyarɨna Yɨra'de Naangerɨ sɨnna tɨka kudava' baazɨ'ma'nya' maralihɨvainyɨna yaka yuyaraavɨ wɨdɨna “Nemɨ tɨvi'na wɨ'nɨwo' gamɨnyɨna yagaala jalɨkurakya'ne pwaraavɨna nemudaasɨwakeina daaka! 64Gotɨyarɨna yagaaibɨraizɨka dɨwake' sarɨmɨ mi'na wɨ'nɨwaava. Berɨ' dɨzijɨwaa'?” Sara wɨdɨna kya' yuyara jɨda'na “Kayaa'nanyabwi yɨwake'na balana!” 65Pwara gamɨnyɨ maagwala wopwakɨna yeva gamɨre sɨnnyavɨ bwakakɨna yeva asɨlyɨ gwamwagaranna yeva wɨdɨna “Gotɨyarɨ wɨ'na'gɨzɨ dɨnejɨwaakya! ‘Aai gɨramwaka?’ ” Mi'na wɨdɨna kye' damera gamɨnyɨ araraalyajɨ tamamakuna ye'.

Pitai wɨda' “Sai myawɨrivanɨge.”

(Matɨyui 26:69-75; Lukɨ 22:56-62; Jonɨ 18:15-18,25-27)

66Kwaakeba angwaasaba Pitai mwaaidɨ'nyɨ Gotɨyarɨna Yɨra'de Naangere wawɨnya wɨdaayade' baka 67Pitai dɨka yimwannakerɨ tɨnna wanganaka baihana'na ya'. Baihana'na yaka wɨdɨna “Gɨmɨjɨ Naazaretɨ mwaalyai Jizaazaryaba mwaaidɨnyaigɨnyɨra.” 68Sa' wɨdɨna kya' Pitai “Nanyɨrabɨka!” daka kwaasɨ wɨdɨna “Arɨkawɨnyɨ. Gɨmɨ nyɨdɨwaanya' myawɨryadɨnyainyɨra.” Mi'na wɨdaka adɨkurya savɨna mwalaawɨna. 69Mwalaawɨna kya' wɨdaayade' wanganaka a'mwe yaasɨwa'mwaalyaraavɨ ayahi wɨdɨna “A'mwe dai kumɨjɨyalyɨra.” 70Pitai nabaai wɨdɨna “Arɨkawɨnyɨ.” Dɨvi sagaa' kɨbawegaa' a'mwe yaasɨwa'mwaalyara Pitarɨ ayahi wɨdɨna “Nebulya'na gɨthɨwaka. Kumɨjɨyaigɨnyɨ. Sare' dare'nesɨ. Galɨli mwaalyaigɨnyɨra.” 71Sara wɨdɨna kye' yagaala dɨragɨnya wɨdɨna “(Daaina!) Gotɨyaryaba nebulya'nanyasɨra. Kwaasɨya'na mɨka! Sarɨmɨ dɨwaata a'mwe sarɨ mwanganyadɨnyainyɨra.” 72Mi'na wɨdɨna kya' yɨme'nya'bɨ' kukuraayai yarai pɨgasaai dɨna ya'. Dɨna kya' Pitai yawɨ'na ya' “Jizaazai sara nyɨdɨwa' ‘Kukuraayai pɨgasaai jaka majɨ kyojɨ nɨmɨnyɨna dahasaai dahaa' julyakɨdeigɨnyɨ.’ ” Pitai sara yawɨraka “ ‘Jizaazareinyɨ mɨka,’ be'na wɨdɨweinyaka!” kale kwia' kɨnna bazɨwɨlaawɨna ya'.

Currently Selected:

Maakɨ 14: byr

Highlight

Copy