Maakɨ 15

Paailatɨmyaba Jizaazai daava'.

(Matɨyui 27:1-2,11-14; Lukɨ 23:1-5; Jonɨ 18:28-38)

1Mwanyagaa' yɨrɨke' gaai pu'daa'nyɨ yɨme'nya'bɨ' Gotɨyarɨne tamira'dɨvɨsarajɨ a'mwe naangerajɨ Juyaraavɨre Kɨwɨjarajɨ kaajolɨya pwarajɨ sara gamɨnyɨna jamungajɨna. Mi'na jamungajɨna yeva Jizaazarɨ wɨla pwɨyɨna, Ga'maanɨyai Kwaaka Juthɨya maremwaaide Paailatɨmyawɨnna makuna yeva sarɨ marɨmwaaihɨna. 2Marɨmwaaihɨna kye' Paailatɨ gamɨnyɨ yɨwaara'na “Juyaraavɨ maremwaaidɨnyaigɨ kingɨyaigɨ daaka?” Yɨwaara'na kya' Jizaazai wɨdɨna “Gɨmɨ nyɨdɨwaanya' nebulyasɨ.” 3Sara wɨdɨna kya' Gotɨyarɨna yɨra'dɨvɨta naangera “Gamɨre kayaa'na yade sanna Paailatɨmɨ wɨjɨwakaana!” deva kwaasɨ yagaala kwalaalya wɨjɨwaakɨna. 4Mi'na wɨjɨwaakɨna kye' Paailatɨ ayɨna yɨwaara'na “Tɨvɨkɨta pɨrɨ' kɨrɨ' ja'nadɨna jɨtheigɨ midaaka? Yɨthaa, gɨmɨnyɨna kayaa'nanya kwalaalya nyɨjɨwakɨwaasange!” 5Yɨwaara'na kya' Jizaazai yagaala aane pɨrɨ' kɨrɨ' majai mwaalake'na Paailatɨ atɨka maru'na'na ya'.

“Jizaazai balana!” wɨde'.

(Matɨyui 27:15-26; Lukɨ 23:13-25; Jonɨ 18:39–19:16)

6Kwazaaka naanga munne yanyagaa' yuyagaa' Juyara Paailatɨmɨ wɨdadɨvɨsare “Ayabaaibɨ' kalavuzarɨ yunakaanya duthaasa!” Sara dɨnɨke'na Paailatɨ sara yakelyɨ. 7Sagaa' a'mwera kwaakevakɨ maremwaaidɨvɨsaraavɨ mala bwa'daaveva a'mweraavɨ karamake' naangera kalavuzangevɨ wɨmwaaihɨna. Kalavuzangevɨ wɨmwaaiheta pwai Baaravaazai wo'nɨkei mwaalɨna. 8Mwaalɨna kya' kwala naange' beva Paailatɨmɨ gaai wɨdɨna “Dahaa'na nemɨnyɨna ayɨna yɨyabwi yagɨnya' sara ja!” 9Wɨdɨna kye' Paailatɨ wɨdɨna “A'mweihi, Juyaraavɨ maremwaaiderɨ wɨla yaarɨjɨwa?” 10Sare' dare'nesɨ. Paailatɨ dara yawɨrakelyɨ “A'mwe kwalaalyara Jizaazarɨ yɨlaaya wɨmariwaasa'nanyɨ. Gotɨyarɨna yɨra'dɨvɨta naangera tɨganaarya yadɨvɨ' kotɨyavɨ marɨwɨmwaaihɨna yɨwaava.” 11Mi'na wɨdɨna kya' Gotɨyarɨna yɨra'dɨvɨta naangera kwala naangevɨ wɨjɨwɨrina “ ‘Jizaazai waramaryana! A'mwe Baravaazarɨ nejaavana!’ yarai duzɨla!” Sara wɨjɨwaakɨna kye' sara yɨna. 12Mi'na yɨna kye' Paailatɨ ja'nawɨdɨna “Nyɨdɨwaasa'na ‘A'mwe sai Juyaraavɨ maremwaaidela,’ dadɨvɨsarɨna gara yɨjɨwa?” 13Wɨdɨna kya' ayɨna jaka danganna “Yɨsavɨri tamakya'na nilɨya dɨramo!”

14“Baa'nevaka? Be kayaa'nanya yɨwakalaka?” Sa'na wɨdɨna kya' kwala bwa'naanya' jaka naanga danganna “Tamakya'na yɨsavɨri nilɨya dɨramo!” 15Sara danganna kye' Paailatɨ “Kwala bwa'naanya nɨmɨnyɨna yɨlaaya yɨpɨka!” daka Baravaazarɨ wɨla yaaraka dameraavɨ wɨdɨna “Jizaazarɨ wɨla nilɨnakebaalyɨ tamapɨjɨ yɨsavɨ nilɨya jeramyɨla!”

Aawɨlasara Jizaazarɨ bɨrala ye'.

(Matɨyui 27:27-31; Jonɨ 19:2-3)

16Kwaaka Juthɨya maremwaaide angwaata Pɨraitorɨyamɨ (kotɨ ange') wo'nɨkewɨnna damera Jizaazarɨ jɨvwaramakwaweva aawɨlata yuya pwaraavɨ jaka jɨvwaramaa'na. 17Jaka jɨvwaramaa'na kye' yuyara yɨkabeva “Jizaazai kwaasɨkingɨyai yɨma'nana! Bɨrala yaana!” deva kingɨyɨvɨta wayaake' egwevɨ marajɨkɨreva wɨla lannakesɨ gɨhɨpaleva gamɨre mɨnyagɨnyavɨ maramwaaihɨ'na. 18Maramwaaihɨ'na yeva bɨralya'na wɨdɨna “Naangeigɨ, Juyaraavɨ maremwaaidɨnyaigɨ yuyagaa' dɨmwaaideigɨne!” 19Sara wɨdɨna yeva yɨsarɨsɨ mɨnyagɨnyavɨ tamɨna yeva gamɨnyɨ maagwala wopwakɨna yeva “Naangelyɨra,” kwaasɨya' deva kwadaai gɨle'. 20Bɨralya' sara yɨna yeva yɨvɨta wayaake' mararaakurasɨ'neva gamɨre baazɨ'ma'nya' marajɨkɨreva “Yɨsavɨ nilɨya wɨramaana!” deva jɨvwaramakuna ye'.

Yɨsavɨri Jizaazarɨ nilɨya yerame'.

(Matɨyui 27:32-44; Lukɨ 23:26-43; Jonɨ 19:17-27)

21Tusavɨ Saaimonɨ Anga Saairini mwaalyai, Alekɨzaadalyɨ Rupaazalyɨ saraarɨ kɨrɨnɨmaangei wawɨnyabadaa'nyai Jeruzaalemɨnei wɨrata'nyɨna yeva aawɨlasara naanga wɨdɨna “A'mwe sare yɨsa' dɨmakɨlaawa!” Mi'na naanga wɨdɨna kye' Saaimonɨ yɨsa' makɨlaawɨna. 22Makɨlaawɨna yadaa'nyɨ Mugunya Golɨhotabanna Jizaazarɨ wɨjɨvwaramakuna. Golɨhota “Gɨlemɨnyagɨnyabanna,” dɨnɨkesɨ. 23Saba “Daanga naanga nuvɨnadɨka!” deva aalya waainɨyavɨ kɨwata mɨrɨya wo'nɨke yɨkeva “Da' dɨnana!” wɨdɨna kye' “Aala!” wɨdɨna. 24“Aala!” wɨdɨna kya' aawɨlasara Jizaazarɨ maareva yɨsavɨ nilɨya wɨrameva “Gamɨre yɨvɨta baazɨ'ma'nya saza japalaana! Saatuya yawaajɨ ata gɨlyavɨ wanganawaajɨ japalamakwawaana!” deva saatuya yeva gamɨre baazɨ'ma'nya jaapaina. 25Sagaa' yɨsavɨ nilɨya wɨramesagaa' mwanyavɨ naainɨ kɨlokɨyagaakɨra. 26Tamakya'ne pɨkarya “Kingɨyai Juyaraavɨre maremwaaidei,” yɨdaveva yɨsavɨ munyaba yɨlakɨna. 27Yɨlakɨna yeva gamɨre aangasɨmagɨ a'mwe pwarɨ kwanaamimagɨ pwarɨ nilɨya wɨrame' kuka yɨpalamaa'disaraarɨ. 28Sa'na wɨramɨna kye' sagaa' Gotɨyare bukuya' dɨnɨke' yuneba yɨma'na'. Yagaala sa' “Kayaa'nanyaraavɨ sara yɨpɨ'de' gamɨnyɨjɨ sara yɨpɨ'delyɨra,” dɨnɨkesɨra.

29A'mwe a'mwera wavɨlavesa kunnya mɨnyagɨnyara wɨnaangɨ'nyɨ wɨnaangɨ'nya yadaapi bɨrala dara wina. “A'a! ‘Gotɨyare Angevɨ kayaaka yɨgala'mwi yɨrɨka dawaai dasangɨ mamwɨneinyɨ,’ nedahɨnyaigɨ, 30sahwaigɨ gɨmɨ saigɨ gaimwanna'gɨzɨ nilɨya lawasɨ'na'gɨzɨ yɨsavɨdaa'nyɨ dalaama! Dɨvadaihasamaa'nana!” 31Sara bɨrala wɨdɨna kye' nabaai sabaaibɨ' Gotɨyarɨna yɨra'dɨvɨta naangera Juya yagaaikɨwɨjarajɨ Jizaazarɨna bɨrala dɨne' “Pwaraavɨna dɨragɨnna padaihasamaarakele! Gamɨ sahwai padaihasamaa'nannele! 32Kɨraazɨtɨyai Yɨzɨrelɨyaraavɨ maremwaaidei kingɨyai yɨsavɨdaasɨ kwalaabozɨ wanganawaajɨ gamɨnyɨ nayaa lɨmwagaraade'nanyɨ.” Bɨrala sara dɨnyɨna kye' gamɨnyawɨ pwaraai nilɨya wɨramesaraai bɨrala wɨdɨna yagi.

Jizaazai bala'.

(Matɨyui 27:45-56; Lukɨ 23:44-49; Jonɨ 19:28-30)

33Sɨrɨgwajahaa' kyɨma'na' kwaakeva' yuyava' yɨrɨka kɨgaa' jɨhɨnya' jɨnnaka tɨri kɨlokɨyagaa' jɨhɨnya' mi'na jɨnnakegaa'nanyɨ. 34Sagaa' tɨri kɨlokɨyagaa' Jizaazai jaka naanga gannya yagaalya' danganna “Eloi, Eloi lama savakɨtaani.” Yagaala sa' aangyagaala “Nɨmɨre Gotɨyaigɨ, nɨmɨre Gotɨyaigɨ be'na nyagalya'ma'mwaana?” 35Jaka sara danganna kya' saba daaveta pwara wɨ'neva dɨnyɨna “Yɨthaanyi, Yɨlaajarɨ jaka wɨdɨwaka.” 36Dɨnyɨna kye' pɨbanna pwai kaanyave'na wawaka aalya waainɨya yɨrɨkevɨ saalaalyavɨya jɨ'mɨnya' marapaihaka aalɨnake' yɨsarɨkɨre sɨnnyarɨkɨ wakaka “Aalya' nana! Pɨzɨ'gwa mwaalana!” daka makɨlaawaka pwaraavɨ wɨdɨna “Kavaayɨla! Yɨlaajai bozɨ yɨsavɨdaasɨ makwalaabaza' wanganaadera.” 37Wɨdɨna kya' Jizaazai jaka naange' wɨdaka sɨmudɨnya yɨnahu yekɨ'na ya'.

38Gotɨyai Gotɨyare Angevɨ janne naange' jɨkɨ'nɨke' munyabadaasɨ kwaakewɨnna kayaaka dabura' yuneba. 39Jizaazarɨ nilɨya tameta yɨsavɨ aawɨlata naangei Anga Romɨ mwaalyai maredaavakei dara wanganake' “Sara davaimwaka!” Daka wɨdɨna “Nebulyasɨra. A'mwe dai Gotɨyarɨ gawaalɨvaangelyɨra.” 40Wɨdadaa'nyɨ keiba a'mwe daaveva tɨnna wanganna. A'mwe sa, Maarɨyaa' Maahɨthaala mwaalyasɨ Maarɨyaa' Jemɨzai dɨviyalyɨ Jozɨzalyɨ kɨdaraarɨ kɨrɨnaangesɨ Saalomiyasɨ sa 41Jizaazai Kwaaka Galɨli mwaalakegaa' kaanya ye'mwannayamaryeva wapaaya aalya wɨjaavesajɨ a'mwe pɨnɨjɨ Jizaazalyɨ Anga Jeruzaalemɨna yɨlaabeta a'mwe pɨnɨjɨ sangyɨneba mwaalɨna yeva tɨnna wanganna ye'.

Jizaazarɨ lɨkyɨrake'.

(Matɨyui 27:57-61; Lukɨ 23:50-55; Jonɨ 19:38-42)

42Sawɨsaburɨ kyɨma'na' Jozepɨyai Aarɨmathɨya mwaalyai bɨna. 43Bɨna yakei a'mwe tewaanyai Kaajolɨyai sagaa' Gotɨyai Kwaaka yuyavakɨ maremwaaidehaa'na kave yemwaalakelyɨ. Jizaazai balakegaa' Pɨraaidehaa' Jozepɨyai “Kwazaakegaa' gɨlaayai enana narɨbainadɨka!” daka Juyaraavɨre Kwazaakegaa' yovɨra'daapiyagaa'na dɨragɨnna yɨvaimwanna yaka Paailatɨmyawɨnna baka Jizaazare kɨlaakejɨkɨna wɨdɨna “Gɨlaayai walyamarirakɨma! Nyɨmaryaama!” 44Sara wɨdɨna kya' Paailatɨ maru'na'na “Ai, dahaa' mi'na davalɨka?” daka aawɨlata naangerɨna jɨvwaramaa'na. Sara jɨvwaramaa'na kya' naangei kulaaba' yɨdaanganna “Jizaazai mena baimwakei daa'?” 45Yɨdaanganna kya' sai “Yo. Mena baimwa',” wɨdɨna kya' Jozepɨyarɨ wɨdɨna “Wikɨra. Gɨlaayarɨ dulamaraawa!” 46Sara wɨdɨna kya' Jozepɨyai wawaka kwaabɨyɨvɨta saamɨnya yaake' mubyawalyaadɨkei yɨsayabanna baka gamɨnyɨ makwalaabaka yaakesɨ yewa'mwagapwɨyaka makulaawaka kavi'nɨnnyavɨ simaangevɨ lɨlɨvɨdaakunɨkevɨ wɨlakaka sɨla naangei simaangevɨ tihɨrakɨna ya'. 47Jozepɨyai sara yadaa'nyɨ Maarɨyaa' Maahɨthaala mwaalyasɨ Maarɨyaa' Jozɨzarɨ ganaangesɨ gamɨre wakya'neba tɨnna wanganna yagi.

Currently Selected:

Maakɨ 15: byr

Highlight

Copy