Maakɨ 13

Gotɨyare ange' kayaaka yɨnya'ne'na wɨdake'nesɨ.

(Matɨyui 24:1-2; Lukɨ 21:5-6)

1Sai Gotɨyare angevɨ bwalyodaa'nyɨ gamɨre pwai wɨdɨna “Nejɨwaakadɨnyaigɨ, dangana! Sɨla anga tewaanya sangɨ dangana!” 2Jizaazai wɨdɨna “Anga tewaanya dangɨ mwanganyɨjɨvanɨgɨna? Sɨlaanga a'ba yɨla'dɨ'nyɨya' kunewɨ mwari yadesɨ. Arɨkewɨ. Yuya wo'dalayɨwɨnasɨpɨ'dengɨ.”

Daangegaa'nesɨra.

(Matɨyui 24:3-14; Lukɨ 21:7-19)

3Dɨvi sagaa' Mugunya Wolivɨ sai mwaaidɨ'nyɨ Gotɨyare Ange' pihɨrɨ mannadɨsɨ wangadaa'nyɨ a'mwera mamwaalyaba Pitalyɨ Jemɨzalyɨ Jonɨjɨ Edɨruyalyɨ sara yɨwaara'na 4“Dɨnedana! Dɨwaanya sa' Gotɨyare angevɨna gathɨhaa' yɨma'nadevaka? ‘Jizaazai sara nedake' yarai yɨma'naabazɨ!’ be wɨjɨwaainya' wanganawaajɨ yawɨraadevaka?” 5Mi'na yɨwaara'na kye' Jizaazai gaai wɨdɨna “Sarɨmɨ mala nayaa jɨwannyɨla! Pwai kwai kwaasɨ yagaala nayɨhɨthathɨka! 6A'mwe kwalaalyara nɨmɨnyɨne yaya' maarapɨjɨ wɨdɨpɨ'dera ‘Nɨmɨ sahwainyɨra. Kɨraazɨtɨyainyɨra.’ Sara kadapɨjɨ a'mwe kwalaalyara ‘Nebulyasɨra,’ dapi kumɨnyɨ a'mwe kwaasɨyaraavɨ mɨdɨbɨ'derera. 7Nabaai malyangɨnajɨ malyangɨne yɨhukyagaalyangɨnajɨ wɨ'napɨjɨ yawɨta kwalaalya mipɨnera! Aawa. Sa yɨma'nanne'na kɨrɨ' Kwaakevakɨ aaya' yarai yade' mɨ'. 8Sare' dare'nesɨ. Anga naanga pimagɨnyara anga naanga pimagɨnya pwarajɨ mala bwa'nɨpɨ'derera. A'mwe naanga kingɨya pwarera a'mwe naangai kingɨya pwarerari mala bwa'nɨpɨ'derera. Kwalaalyaba wɨnɨnya yadengɨra. Mɨjɨka naanga yɨma'nadengɨra. Yuya yuya sa yɨbwasɨnapi dɨvidaasɨ kayaa'nanya yɨma'nadehaakɨra. 9Kayaa'nanyara kayaaka nayɨhigaibɨ'de'na nayaa jawɨrila sarɨmɨ saihi! Pwara sarɨmɨnyɨ wɨla yɨrakapɨjɨ kaajolɨyaraavɨ yɨhɨmaaripɨ'dere. Lotuangengɨ yɨhɨrabɨ'deihɨlyɨ. Nɨmɨnyɨna Ga'maanɨyaraavɨjɨ a'mwe naangeraavɨ kingɨyaraavɨjɨ kihɨmwangapɨjɨ sarɨmɨ yagaala tewaanya' nebulya'na dɨzalɨkurakyide'nanyɨ! 10Gotɨyai yawɨrake'na a'mwe ajɨmya yuyangɨyara gazabazaba mwaaihasaraavɨ Gotɨyare yagaala tewaanya' sɨnnawɨ kujɨwaakapɨjɨ dɨvi aaya'na yɨma'nadehaakɨra. 11Wɨla yɨhirapɨjɨ kotɨya yadɨvɨta angevɨna yɨhɨmarɨmwaaihya'nera kihɨmakabapɨjɨ sarɨmɨ yawɨta kwalaalya mipɨnera! ‘Nɨmɨ gara wɨdɨdeinyaka?’ myawɨpɨnera! Aawana. Sagaa' Gotɨyai yagaalya' sara kyɨhɨzaavojɨ dathaza' sara duzideihɨlyɨra. Sare' dare'nesɨ. Sagaa' sarɨmɨ duzideihi mɨka. Aawa. Kurya Tewaanyai sara wɨdathelyɨra. 12A'mwe pwai dɨna ‘Nya'mwerɨ tamakɨpɨ'de'nanyɨ,’ dozɨ gya'mwerɨ kotɨya yadɨvɨsabanna wɨmarɨmwaaihadelyɨ. Nabaai ganɨmaanga pwai gannya kaimɨraayarɨ wɨmarɨmwaaihadelyɨ. Kaimɨraaya pwara kuvɨnɨmaangeyuraavɨ kotɨyabanna makuna yɨpɨ'de yuya baibɨ'dengɨra. 13Nɨmɨre yayavɨna yɨhyawɨ'dɨvɨ' saihɨrɨna a'mwe yuyaraavɨ sɨnna tɨka wɨdavaderera. Kɨrɨ' a'mwe pwai nɨmɨnyɨna dɨragɨnna daavajarɨ aayagaa' gannya barya'negaa' Gotɨyai padaihasamaaradelyɨra.”

Kayaa'nanaange' kayaaka yɨgaide'nesɨ.

(Matɨyui 24:15-28; Lukɨ 21:20-24)

14Yagaala da' yɨdavɨde'na nayaa jawɨrila! Sahwai wɨdɨna “Kayaa'nanaangei kayaaka yɨgaidei saba madaayɨ yajava kadaavojɨ danganyideihɨlyɨ.” Pɨkarya savɨ wangana'gɨzɨ Jizaazare yagaala sa' jawɨramaaka! “Daa'dɨsɨ Juthɨya mwaalyara mugunyangɨna yarai lɨkaanya wɨpɨka! 15A'mwe pwai namwaalɨkwaasavɨ mwaalojɨyai ‘Angevɨ gɨlyɨvɨta kɨnɨ wɨlamaarɨma!’ majai yarai lɨkaanya wɨna yana!. 16A'mwe pwai wawɨnya yɨvanɨkei gannya angevɨna yɨvɨta maarya'nei ayɨna mabannelyɨ. 17Dazagaasagaa', we', a'mwe kaimɨraavɨmunnakenge! We', aamunya wɨjaavanɨgave sagaake! 18‘Burɨke' nabwalaradɨka! Yɨrɨlya' nanedathɨka!’ dapɨjɨ tɨbarɨyagaala duzɨla! 19Sare' dare'nesɨ. Sagaa'na a'mweraavɨ daanga naanga wɨvɨnadehaakɨra. Daanga naanga nevɨnaja sagaa' kayaa'nanyagaakɨra. Sɨnnawɨ Gotɨyai wakyaakegaasɨ kɨgaasɨ dahaa' kɨgaasɨ wɨla dɨvi kɨgaasɨ daanga sabwi aawano. Arɨkewɨ. 20‘Yɨrɨka sa daanga naangegaa' yesɨmavadɨma!’ Gotɨyai yagaala sara majɨ yaja' a'mwe yuya kɨlaa'nake mamwaalyɨ yɨpɨ'dengɨra. Aawa. ‘ “Nɨmɨre dahɨlakɨwera nabaibɨthɨka!” dena nɨmɨ yesɨmavadɨma!’ Gotɨyai dɨna ya'. 21Sagaa' pwai kwai gɨthaza' ‘Dangana! Dava Kɨraazɨtɨyai mwaalɨ',’ nabaai gɨthaza' ‘Dangana! Keiba mwaalɨ',’ sarɨmɨ mu'nɨpɨnera! 22Dɨvi kwaasɨ kwaasɨ Kɨraazɨtɨyara, Gotɨyarɨ wɨ'nawɨjɨwaakadɨvɨta kwaasɨ kwaasɨyara kumɨ sara kwaasɨ yawɨradɨdɨvɨ' wɨlaabapɨjɨ dapɨjɨ ‘Gotɨyai dahɨlakakera yawɨpɨ'de' dɨngaka? Kwaasɨ yagaala wɨ'nɨpɨka! Kayaa'na yɨpɨka!’ wɨjɨwaainyajɨ atɨka maru'natajɨ kwaasɨ yɨpɨ'derera. 23Sara yɨpɨ'de'na sarɨmɨ saihi tewaanna nayaa dɨvaihanaryɨla! Mala nayaa jɨwannyɨla! Dɨvi yuya sa yɨma'nyɨna yadengɨna sɨnnawɨ sagaa' yɨhɨthɨvanɨge.

“A'mweraavɨne Kaimɨraayainyɨ walaabɨdeinyɨ,” wɨdake'nesɨ.

(Matɨyui 24:29-31; Lukɨ 21:25-28)

24Sare' kɨrɨ' sagaa' daanga naanga wɨvɨnade sasa' tɨvi'na kyojɨ yɨrɨka sangɨ nyɨlyai mujɨ kyojɨ jɨhɨnya yɨma'nyɨna, nabaai lawei mujɨ yadelyɨ. 25Sɨgunyavɨdaasɨ sɨlɨngaamɨnyarɨka pɨrɨ' bwala'na, pɨrɨ' bwala'na, sɨgunyavɨ dɨragɨnya warɨkevɨ wɨnɨnya naange'na yɨma'nadesɨ. 26Wɨnɨnya kyojɨ A'mweraavɨne Kaimɨraayai yɨraayavɨ dɨragɨnya naange', tewaanya naange', byaanna naange' wa'dozɨyavɨ kwalaabozɨ wangabɨ'delyɨra. 27Sahwai ejelɨyaraavɨ wɨdaasɨna ‘Nɨmɨre dahɨlakengɨ Kwaakevakɨ yuneba pimagɨ pimagɨ akyamwidaa'nyɨ akyamwidaa'nyɨ kwala dalamari'bwaraawila!’ wɨdasaabɨna yadelyɨra.”

Aayagaa'na yɨta wɨjɨwaakya'nesɨra.

(Matɨyui 24:32-35; Lukɨ 21:29-33)

28“Yɨta pihɨya wanganapɨjɨ ke'ba'nanya sa' jawɨrila! Pihɨtaanyavɨ wɨvya naanga kyojɨ sedala pwa'nyɨna yojɨyagaa' sarɨmɨ yawɨ'dɨvɨ' ‘Pihɨya' lɨ'mwa'. Nyɨlyagaa' aya kɨgaa' yɨma'nadehaakɨ.’ 29Sara yawɨ'dɨvɨtabaaibɨ' sarɨmɨ dɨwe sangɨ yɨpɨ'dengɨ wanganapɨjɨ dara jawɨrila! ‘Gamɨ mi'na yarai walaabathei. Tɨkuryavɨ daavɨ'.’ 30Nebulya'na yɨhɨthɨwa. A'mwe sagaa' mwaalyara kuna myɨmanɨgwiadapi yuya dɨwe sa yɨma'nadehaa'nanyɨ. 31Sɨgunyasɨ Kwaakevasɨ savakaai dɨvi sagaa' kiwawojɨ kɨrɨ' nɨmɨre yagaalya' yɨwawode' mɨ'. Waragothesɨra.”

Aayagaa'na yuyara myawɨryarera.

(Matɨyui 24:36-44; Lukɨ 17:26-30,34-36)

32“Yɨrɨka walaabɨde sagaa'na aane pwai kwai yawɨradehaa' mɨ'. Ejelɨyara Gotɨyareba mwaaihasara myawɨrivanɨga'. Gotɨyarɨ Gawaalɨvaangai myawɨrivanɨ'. Nɨmwai gavei yawɨ'manɨ'. 33Sarɨmɨ mala nayaa jɨwannyɨla! Sare' dare'nesɨ. ‘Sagaa' gathɨhaa' yɨma'nade' dɨngaka?’ myawɨrivanɨgo. Sare'na dɨvaihanaryɨla! 34A'mwe daibɨsainyɨra. A'mwe sai pɨwɨnnei gannya wawɨnyangɨ wɨdaayadɨvɨsaraavɨ maramwaaihɨna kumɨre wawɨnya'na, pwai gannya wawɨnya wɨjɨwaakɨna, pwai gannya wawɨnya wɨjɨwaakɨna sana sana yaka tɨkuryaba mwaaidei damerɨ wɨdɨna ‘Nayaa dɨvaihana'!’ wɨdɨwakelyɨ. Sahɨbaaibɨ' yɨhɨthɨma! 35‘Sarevɨdaa'nyɨ nɨmɨreihi, nabaai nayaa dɨvaihanaryɨla!’ Sare' dare'nesɨ. Angevɨne naangerɨna yawɨ'na ‘Gamɨ gathɨngaa' bathei dɨnga'!’ myawɨrivanɨgo. ‘Sawɨsavɨ bathei dɨngaka? Kalawawegaa' bathei dɨngaka? Yɨrɨkunyagaa' bathei dɨngaka? Yɨrɨke byaaka gaai yadaaworiyagaa' bathei dɨngaka? Nemɨ myawɨrivanɨgo,’ dapi nayaa dɨvaihanaryɨla! 36‘Nɨmɨ yɨme'nyabɨ' yɨma'naaba'mujɨ yarai walaabɨde'na se wa'dapi nayɨhwangamudɨ'! 37Nabaai nɨmɨrerajɨ kayaa'na nabaibɨthɨka!’ dena yɨhɨthɨvanɨge sa'na a'mweraavɨ wɨdɨvanɨge ‘Nayaa dɨvaihanaryɨla!’ ” wɨdɨna ya' Jizaazai.

Currently Selected:

Maakɨ 13: byr

Highlight

Copy