Maleko' 2

Izesu' Aza Gebili Ma Do Lamine' O-dine'

(Mataio' 9:1-8; Luka' 5:17-26)

1Gamene ma ogo vavo Izesu' aza Kahanaumi numuda tibizo ogo a'mida numu'vela neivo nemu' evene' ingine gili 2igi di gese' igi giki' goloso adi'mo gatedokisi vovosi ma minamine'. Ne'mine ikevo aza mono' gamazi lo-ngemo minine'. 3Ti' neivo inginelati' ve sita've sita've nete gebili ma ngakato' mili di navo evene' malite ezela ngele'mizi alisa ani'za 4evene' muki' giki' ikevo ne'mo neida di vamilizani' ogavo nubito' dizi Izesu' minine' lisihelelo' numuno nubiku' bili heteli gebili ongo minine' ngaka' nene nalato' hulikevo limine'. 5A'mine hulave nete ha do lamine' o-deleseive li gili ele'vole' ani' nene ningo gelo Izesu' aza gebili ve nemu' ti' lo line': Gipe'neho gei' lihimeka nene mo apase-gedekuve. 6Lavo avo'ningeliti mono' apizi ngimaa' ave ma a'mida minave nete ga'ningu' ti' li gili minani': 7Evene' me ve nene nanimu' ne'mine nolive. O'moso ivile' o-daa' gamazi lave. O'moso'movo' lihimete hulo-ledaa' ive ne neive li gili minani'. 8Ti' li gilani' nene Izesu' aza lulouko gelo ti' lo lo-ngimine': Lingine nanimu' gatingu' ne'mine li nigilave. 9Lingine nenikumu' nene sozavo' laa' neive li gilaa' nahe. Gebili nemu' lihimeka mo hulo-gedekuve luvoni' nene soza lolohe lamine' lolohe ma gilamilisave lo lapa nomivo noluvoni'za sozalo' ve minuvodini ve gebili nemu' naza oto vozo nolo-duvo oto vamivo soza luvoni' nene soto' ogavo novozo helalove lo gelo oto vozo lo ma lamuvodine. 10Ne neiha O'mosolati' ve gihile naza misubouko lengi' lihimetine apase-lengedaa' amuzo do nouve luvoni' nene soza lamo mo lamineto' noluvoni' nene ningi gililizangumu' naza idise ogo molo oloni' inite' nene ningilo. Ne'mine lo gebili nemu' ti' lo lo-imine': 11Ti' lo nolo-gimuve. Gaza oto ngakaka do geho numungala vozo. 12Lavo mukito' ningi nizavo geto oto ngaka've do geho vine'. Ne'mine ine' nemu' evene' muki' ingine golize li O'moso opo'ni li ti' li lani': Laza gomu' inite' ne'mine ma ningesa'mune' ve li lani'.

Izesu' Levi'ni Asi Lo Do Gi'mizine'

(Mataio' 9:9-13; Luka' 5:27-32)

13Ne'mine ogavo Izesu' aza noso ohuno gahevela tibizo vine'. Vavo evene' muki' ezela ika' ika' navo aza mono' apize ngeme'mo vo minine'. 14Ne'mine o'mo novo Alahaio' gipele Levi' aza takisi moni daa' ine' opisi'veu' gono do neivo ningo ti' lo lo-imine': Gaza ne'meto ano. Ne'mine lavo aza oto e'meto vine'.

15Vi eze numu'veu' Izesulesi noso' nite' ni nizavo monovo goloso igi takisi moni daa' avesi ido' Zuda veti lou' gamazilo' e'mete lamine' isa'mave gohi ma nesi muki' e'meti vani' nenako eze izipahala zuhosi mukito' makato' noso' nite' ni minani'. 16Ne'mine igi nizavo Halisaio' eveneliti mono' apizi ngimaa' ave ingine Izesu' nene takisi moni daa' avesi ido' Zuda veti lou' gamazilo' e'mete lamine' isa'mavesi noso' nite' maka' ninavo ningi izapahala zuho ti' li longo' i-ngidani': Aza takisi moni daa' ave golososi ido' lihime daa' ave lingesi maka' mini nanimu' noso' nite' ninave. 17Likevo gelo Izesu' aza ti' lo lo-ngimine': Luso ve aza lamine' haza minave do lamine' o-ngedelesa osa'miha inite' gizi davemukovo' nene oga' neive. Naza a'mine a'mine ogo evene' lisihe' i minavemu' amuvoni'za evene' lihime'inesi vemu' uvoni' ve.

Noso' Nite' Malise Ogakumu' Izesu'ni Longo' I-dani'

(Mataio' 9:14-17; Luka' 5:33-39)

18Gamene ma Zohane' izipahala zuhosi Halisaio' evenekisi mono'inemu' gili noso' nite' malise igi nizavo evene' linge ma Izesuda igi ti' li longo' i-dani': Zohane' izipahala zuhosi Halisaio' eveneliti izipaha'ine zuhosi ingine noso' nite' malise igi nizaha geze izipaha zuho noso' nite' malise amave. Ne nanimu' nave. 19Longo' i-dikevo aza ti' lo lo-ngimine': Ve mali'mo vene' di imiliza gameneu' olize izo noso' nite' gize vata' ogo eze zuho molo-ngedavo ingine aza a'mingu' neivo mulumo gili-di noso' nite' malise ilizado' nehe. Ne nomive. Vene' dalosa ive a'mingu' ha neivo ma noso' nite' ngeli malise amilisave. A'mine a'mine igi naza nouvosa nene lamine' gili nizanako noso' nite' malise amilizaha 20engi' vovo'ninguti' biluvalite neze nele'mizi di vilizani' gamene nene mo aliteleseive. A'mine gamene alitavo mulumo gilisa noso' nite' malise ilisave.

21Ido' lavolavo gosohototi' ngomo ma huki saketi litehe hukido' mili ongotilizani' nene lavolavo gosoho' ne'mo gelelehe' ogavo saketi litehe nene naba hukalinako lavolavo ngomo ma olihe ngingili lamine' nene saketi litehelo' mili ongotisa'mave. 22Ido' a'mine'mine igi lingine vaini noso gosoho' ne'mo meme' ize losuvodunu' lili' ani' gomise nene izo pou' lavo vaini noso nene lepo vo gomise'vesi nene goloso ogalive li vaini noso gosoho' gituho' galakala' neidi'mo nene lulu izavo gomise liteheli'mo gipu lo hukiline' o miningu' nene ma ohizi milisa'mave. Vaini noso gosoho' gituho' galakala' neivo nene meme' ize losuvo gosohotunu' lili' ani' gomise gosohoku' nene ohizeso' o neive. Ne'mine line' nene aza mono' lo-ngemaa' ine' nene gosoho' nenako izipahala zuho igi mili ilizani' monovo ne'mo a'mine Zuda veti monovo litehe malo' vo damingumu' nene line' ve.

Holiseku' Izesu' Izipahala Zuho Viti Godololati' Gihile Ili Ni'mi Vani'

(Mataio' 12:1-8; Luka' 6:1-5)

23Holise' gamene mau' Izesu' izipahala zuhosi viti mingu' nivavo izipahala zuhote viti godololati' gihile ili ni'mi vani'. 24Ne'mine i'mi vani' nemu' Halisaio' evene' malite Izesu'ni ti' li li-imani': Ningezo. Leze lou' gamaziteu' nene holise' gameneu' gono damilo li nizani' mako ne'mine nanimu' nave. 25Likevo aza ti' lo lo-ngimine': Davidi' eze evenele zuhosi noso' nite'ine nomivo ga'na hili nizado' aza inite' ine' nemu' gati gilisa'mahe. 26Ado' Abiatala' eveneto' medelo mino O'moso inite' lehize-daa' ive naba minine' gameneu' Davidi' aza O'moso'mi numungu' dizo O'moso'mi velelo' milaa' ani' beleti nene do azasi maka' monavesi ngemavo nani'. A'mine beleti nene haza ve namilizave li eveneto' medeli mini O'moso inite' lehize-daa' avetevo' nalizave li li hukikani' beleti nene gopo nani' ma ve. 27Ne'mine lo ti' lo lo-ngimine': O'moso'mo evene' do soto' molani' nene holise' gamene hize ele' ilizangumu' ve lo do soto' molani' nomive. Asi holise' gamene ne'mo nene evene' hize ele' o-ngedaa' ilive losa evenekumu' do soto' molani' ve. 28Nemu' nene naza O'mosolati' ve gihile naza nene holiseli'mi melehosi mino a'mine holiseku' iliza initekumu' ido' amiliza initekumu' laa' uve nene nenikovo' nouve lo line' ve.

Currently Selected:

Maleko' 2: aso

Highlight

Copy