Maleko' 3

Izesu' Aza Ana Goloso O Vive Ma Do Lamine' O-dine'

(Mataio' 12:9-14; Luka' 6:6-11)

1Mino mono' numungu' gohi dizine'. A'mida ve ma ana hamo' ma goloso ogo gilizevo o vine' nene omo neivo 2evene' ma nete holise' gamene neinako Izesu' do lamine' o-deline' nene holisekumu' lani' lou' gamazi ma nene avuto' oloseinako nemu' goni' o-delone li ningilisa gizebo igi minani'. 3Ti' igi nizavo Izesu' aza ana goloso o vivemu' ti' lo line': Vovoteu' ote minezo. 4Lo evene' longo' o-ngidine': Leze lou' gamazite ne'mo nadive lo neive. Holise' gameneu' nene monovo lamine' ilo lo neihe. Monovo goloso ilo lo neive. Ado' evene' di lamine' i-ngidilo lo neihe. Evene' ngibili hililo lo neive lo longo' ogo line'za gamazi di tibizi lamavo 5izebolo' molavo vele do eza ema ogo vonu' goloso ngebelo lu'ine ga'ine ngi lo tile vine' minangumu' mulumo'ine ninge-ngidine'. Ne'mine ogo ana goloso o vive ma nene ti' lo lo-imine': Anga do pehe lozo. Ne'mine lavo ana do pehe lavo gohi lamine' ine'. 6Ne'mine ogavo Halisaio' evene' ingine limi bililizani' aka di soto' ilisa a'mido' geti Helode' zuhosi mulise mili gamazi di hamo' ani'.

Izesu' Noso Gahevela Neivo Evene' muki' Ezela Giki' Giki' Igi Di Gese' Ani'

7-8Ne'mine ogavo Izesu' aza a'mine ebe' hulo izipahala zuho ngele'mizo noso ohuda limine'. Lemavo nGalilaia misubokoti' nene evene' vai' goloso e'meti ani'. Ido' evene' Zelusalemi numudotikisi Zudaia misubo lingelatikisi ma avo ido' Idumaia misubokotikisi ma avo ido' Zodani noso helalatikisi ma avo ido' linge ma Tilo numudotikisi Sidoni numudotikisi ani'. A'mine evene' vai' goloso ani' nete Izesu' ogo molo minine' inite' nemu' nene gilani' nenako nemu' ezela ani'. 9Ne'mini ikevo di gese' ave ingine giki' giki' igi di langolo' i-nidikelizave lo sipi ma di igi di mili-nidilo lo izipahala zuho lo-ngimine'. 10Ido' sipiu' minelove line' nene nemu' line' ve: Evene' muki' do lamine' o-ngedo miningumu' nene inite' gizi dave vai' ingine oko'nolo' do gelelone li ezela igi oko'nido' oko'nido' igi di langolo' i-dilizani' ine'. 11Ido' ne'mine navo evene' lu'ningu' minani' sikalahu' goloso nete eze ningi gizenela limi ingi geke' naba li ti' li lika' lika' igi minani': Gaza O'moso'mi gipele ma ne nane. 12Likevo aza nene ne'mo ma ve li neze monovo li soto' soto' igi li-ngimamilo lo amuzo molo lo huko lo-ngimine'.

Izesu' Izipahala Tuvelu (12) Do Kegeso Do gi'mizine'

(Mataio' 10:1-4; Luka' 6:12-16)

13Ido' Izesu' aza gololo' dizo ei' gala gilido' evene' ma vise lo-ngemavo ezela ani'. 14Ikevo aza ve tuvelu do kegeso nenikisi monelone lo ido' ngimiselekuvo mono' li soto' igi li-ngimilizave. 15Ido' amuzo ngemekuvo di mini evene' lu'ninguti' sikalahu' goloso ngimiselilizave lo do kegese-ngidine'. 16Do kegese-ngidive ve tuvelu nete gulive'ine nene ne'mino neive: Simoni' gulive gohi ma nene Petolo' ve lo molo-dine' 17ido' Zebedaio' gipele Zakobolesi akunolo Zohanelesi gulive'ine Boanelegesi' ve lo molo-ngidine'. Leze gamaziteuti' nene go' ngilili gili vasine' ve losa ve. 18Ido' Adelea' ido' Hilipo' ido' Batolomaio' ido' Mataio' ido' Tomasi' ido' Alahaio' gipele Zakobo' abalaho ido' Tadaio' ido' Simoni' aza Loma ve ngimiselelone lo amuzonga laa' ive nesi 19ido' alinge' Izesu'ni do soto' o-do biluvaliti a'ningu' molave Kelioto ebekuti' ve Zuda' nesi nene minani' ve.

Izesu' Lulou' Belezebulo' Neive Lani' Gamazi

(Mataio' 12:22-32; Luka' 11:14-23; 12:10)

20Izesu' aza numunguko vine'. Vo neivo evene' muki' gohi igi di gese' adi'mo ve'ine initekisi namani'. 21Ne'mine igi nizavo eze zuho ingine gili ele'mizi alisa vani' ve. Ido' ele'mizi alisa vani' nene aza mo negi hizave li lani' nenako nemu' ele'mizi alisa vani' ve.

22Ido' avo'ningeliti mono' apizi ngimaa' ave Zelusalemi numudati' ave ingine ti' li li minani': Ve mene sikalahu' goloso ngimiselo do nohuline' nene engi' guve'inesi ve naba Belezebulo' lulou' mino a'mine sikalahu' golosoliti guve'inesi ve naba ne'mo amuzo emavo nedunu' do nohuline' ve. 23Ti' li nizavo Izesu' vise lo-ngemo aneza gamazi ti' lo lo-ngimine': Satani ne'mo Satani nene nado imiselelive. 24Misubo mau' evene' engiku' lovo hizi vi eza ema ilizani' nene vi gopo'napa ilisave. 25Ido' evene' hamo' zuho vi eza ema ilizani' nene vi gopo'napa ilisave. 26A'mine a'mine igi Satani'mi zuho ingine vi eza ema igi minadini nge lami di'mozi osu' li ma minamadine.

27Evene' mali'mo ve ma gasava daa' ive miniveli'mi numu'veu' dizo a'mine gasava daa' ive'mo gizebo ogo minine' inite've ipe' ogo daline' nene haza dizo ipe' ogo damoloseive. Asi a'mine gasava daa' ive nene gomu' ivile' ogo nala' do-mikosavo' nene dizo inite've ipe' ogo daloseive. A'mine'mine ogo naza nene Satani ivile' ogosa evene' eitati' nene do nenita oga' nouve.

28Naza lamine' ma lo-lengemelove: Evene' ingine goloso nite' ato ato' iga' ani' ne'mi lihime ido' O'moso divi ledivi' iga' ani' ne'mi lihime nene O'moso'mo ha hulo-ngedeleseiha 29evene' mali'mo O'moso'mi Sikalahu've dovo ledevo' iline' ne'mi lihime nene O'moso'mo mo hulo-damoloseive. Aza nene imine' molo mine'mo vo minevo' minevo' iline' lihime daloseive lo lo-ngimine'.

30Ido' O'moso'mi Sikalahu' dovo ledevo' ogali'mi lihime O'moso'mo hulo-lengedamoloseive lo lo-ngimine' nene o'moso'mi Sikalahu' Izesu' lulou' neine' nenako evene' ingine sikalahu' goloso ei' lulou' neive li minani' nemu' nene lo-ngimine'.

Izesu' Izelehinemukisi Akunolomotinemukisi Lo-ngimine'

(Mataio' 12:46-50; Luka' 8:19-21)

31Ido' izelehosi akunolomotesi igi heteli heta oti mini ezemu' longo' ani'. 32Ne'mine ikevo evene' muki' eze vodo vodo i-di minave nete ti' li li-imani': Ningezo. Izahosi nakunamote nesi heta imi mini gezemu' nilave. 33Ne'mine likevo gamazi ti' lo do tibizo lo-ngimine': Ize'nehinemukisi naku'nemotinemukisi nilahe. 34Ne'mine lo vele do eza ema ogo evene' vodo vodo i-di minave vonu' ngebelo ti' lo lo-ngimine': Ize'nemote naku'nemote nene mene nizani' ve. 35Evene' O'moso'mi lulolo' igi mili iga' nave engi' nene ize'nemote naku'nemote ido' alu'nemote ne nizave.

Currently Selected:

Maleko' 3: aso

Highlight

Copy