Mataio' 23

Izesu' Aza Halisaio' Mono' Laa' Ave Ido' Zuda Vete Mono' Laa' Ani' Apizi nGimaa' Aveti Monovo Lo Soto' Ine'

(Maleko' 12:38-39; Luka' 11:43, 46)

1Izesu' aza evene' mulisesi ido' izipahala zuhosi gamazi nolo-ngemo 2ti' lo line': Ingine Zuda vete mono' gozopotati' laa' nani' apizi lingimaa' navesi ido' Halisaio' mono' laa' avesi Mose' ogo molo ine' monovo di a'ningu' igi O'moso'mo lou' gamazi lo huko-limingumu' nene li-lingimaa' nave. 3Nemu' nene gili ngimii ingine li-lingimilizani' gamazi muki' nene gili di minilo. Ti' o neine'za li-lingimaa' nani' gamazilo' nene angise'inesi e'metisa'manaze. Nemu' ingine igi mili iga' nani' ngemeni dameni ne'mine nene lingine amilo. 4Ingine lou' gamazi ngomo' naba' di nubuho igi gili dalizave li a'mine geni'vesi lou' gamazi vai' nene eveneliti gata'nido' gihi-ngidaa' nave. Gihi-ngidaa' nani'za a'mine geni'vesi lou' gamaziuti' lou' hamo' ma ngomo lasolo ne'minesi angise'ine ma gihisa'mave. 5Inite' muki' igi mili iga' nani' nene evenelite ningi lopo'ni lilizave lisa iga' nave. Ido' ngopo'ni lilizangumu' nene Mono' Godolo avile di gangi bokisi ngomou' miliki golihi'nido' nehe a'ningu' nehe nala' izika' ani' nene evene' linge ngivile' igi engi' di naba igi izika' nave. Ti' igi Mose' lou' molani' nene gate molalive li gili go' gala ne'mine genegana'ine gahevela hela hela na'nava izikani' ne'mo evene' ma ngivile' igi di naba igi izika' nave. 6Ne'mine iki noso' nite' naba nada nehe ido' mono' numungu' nehe nevo'mingu' vilizani' nene evene' nabalitevo' minaa' ani' holomolokovo' minilisa gili minaa' nave. 7Ido' maketilo' evene' muliseu' siza li-lidilizave li ido' tisazo li di hozi li-lidilizave li gilaa' nave. 8Ingine ne'mine iga' nani'za O'moso'mo hamo' lengi' tisatine neivo lingine eze izipahala zuho mini linge ma dizi minikevo linge ma limi minamanako nemu' evene' mamu' Tisazo li-ngidamilizave. 9Ido' me misubouko evene' ma di hozi li-di ezemu' meteho ve lamilo. Okulumokuko neive O'moso ei' hamo' Metibo ne neive. 10Ido' lengikumu' gizebo ve ve likelizave. O'moso'mo do lungu' izelive lo imiselelesa live eikovo' hamo' lengi' gizebo vetine neive. 11Ido' a'mine'mine ogo lengikuti' ve ma dizo noline' nene gelekele' o-lengedo minelive. 12Ido' ve ma engi' gulive'ine di dizi minilizani' nene engi' gulive'ine do'mo leme-ngedeleseive. Ido' ingine engi' di'mi limi minilizani' nene O'moso'mo do'mo dize-ngedo hize ele' o-ngedeleseive.

Izesu' Evene' Monovo'nine Golososi Minangumu' Lo-ngimine' Gamazi

(Maleko' 12:40; Luka' 11:39-42, 52; 20:47)

13-14Lingine Zuda vete mono' gozopotati' laa' nani' apizi ngimaa' navesi ido' Halisaio' mono' laa' navesi nene ehetine ve. Lingine evene' vevesi minave gili monaa' naha lutine goloso o vine' nene di halekaa' nave minani' neive. Ne'mine igi mini Okulumokuko minive'mo gizebo ingu' vi hilalisa naveti aka hizi tilaa' nave. Langisetine nene a'mingu' ma dizisa'mave. Ido' evene' ma dizilisa navo ha nevo dizilizave li ningi huli ngimikavo ma dizisa'mave. Ne'mine iga' nanako nemu' agae, mulumotine gelekuve. O'moso'mo lihime lengemelesa neive.

15Ee, Lingine Zuda vete mono' gozopotati' laa' ani' apizi ngimaa' navesi ido' Halisaio' mono' laa' navesi ehetine ve. Lingine evene' vevesi minave gili monaa' naha lutine goloso o vine' nene di halekaa' nave minani' neive. Ne'mine igi mini lingine numudo' namado' moni evene' hamo' nevo ne lengita gi'mizilizahe li lingine lelita le'metilizave li li-ngimii evene' ga'ine dalisa amuzo goloso milaa' nave. Ido' ma lenge'meti izipahatine zuho lili' igi ma lingine lani' gamazitine gili dalizadi'mo lengi' lingivile' igi aka golosolo' moni mulumo ebeku' vi hilalizave lili' ilisave. Ne'mine iga' nanako nemu' agae, mulumotine gelekuve. O'moso'mo lihime lengemelesa neive.

16Ido' lingine mono' aka ngelebizaa' ave nizani'za vetine likine' gelavo a'mine aka ningi vevesami evene' mono' nili-ngimi gopo gamazi ti' li li-ngimaa' nave: Gamazi'ine di amuzo milalisa gamazi lamine' nolune li a'ine di dizi mono' numuno nabalo' li mili lilizave nene ingine haza gamazivo' lilisave. Soza lilizanikisi engita gamazi ma minamoloseive. Ne'mine li lingine ti' li li-ngimaa' nave: Ne neiha lamine' nolune li a'ine di dizi mono' numuno nabau' minine' ngolimonilo' li mili lilizave ingine gamazi laminekovo' lilizani' o neive. Soza lilizani' nene O'moso'mo lihime ngemeleseive. Lingine gopo gamazi ne'mine li evene' ngele'mizi gopo iga' nanako nemu' ehetine ve. 17A'mine ngolimoni nene mono' numuno nabau' minidi'mo kekeize line' nenako nemu' nene mono' numuno naba ne'mo ngolimoni ivile' ogo inite' naba neive. Olo. Neine' nenako nemu' lingine a'mine mono' numuno nabalo' lo molaa' nene haza nite' neivo mono' numuno nabau' minine' ngolimoni nelo' lo molaa' nene inite' gihile neive li laa' nanako nemu' nene vetine like vine' gelavo evene' dingani goloso nizave. 18Ido' lingine gopo gamazi ne'minesi li-ngimaa' nave: Gamazi'ine di amuzo milalisa gamazi lamine' nolune li a'ine di dizi O'moso imani' inite' molaa' holomo nelo' li mili lilizave ingine haza gamazivo' lilisave. Soza lilizanikisi engita gamazi ma minamoloseive. Ne'mine li lingine ti' li li-ngimaa' nave: Ne neiha lamine' nolune li a'ine di dizi a'mine holomolo' O'moso imaa' nani' initeto' li mili lilizave ingine gamazi laminekovo' lilizani' o neive. Soza lilizani' nene O'moso'mo lihime ngemeleseive li li-ngimaa' nave. 19Ido' mono' numuno nabau' O'moso imani' inite' molaa' holomo ne'mo a'mine O'moso imani' inite' nene kekeize lo neine' nenako nemu' O'moso imani' inite' nene holomo ne'mo ivile' ogo inite' naba neive. Olo. Neine' nenako nemu' lingine a'mine holomolo' lo molaa' nene haza nite' neivo a'mine holomolo' mili O'moso imani' initeto' lo molaa' nene inite' gihile neive li laa' nanako nemu' nene vetine likine' gelave. 20Gililo. Ingine lamine' nolune li a'ine di dizi O'moso imani' inite' molaa' holomolo' li milalizani' nene a'mine holomolokisi ido' O'moso imaa' nani' inite' muki' a'mido' neine' nemukisi li mili lilizani' geleleseive. 21Ido' ingine a'ine di dizi mono' numuno nabalo' li mili lilizani' nene a'mine mono' numuno nabalokisi a'mine mono' numuno melehinelokisi li mili lani' geleleseive. 22Ido' ingine a'ine di dizi Okulumoto' li mili lilizani' nene O'moso'mo a'mido' mino inite' mukito' gizebo oga' neine' mo'mosi've nelokisi li mili a'mido' minivelokisi li mili lani' geleleseive. Nemu' nene nanite' naniteto' li mili adine di dizi lilizahe. Ha gamazi laminekovo' lilisave.

23Lingine Zuda vete mono' gozopotati' laa' nani' apizi ngimaa' navesi ido' Halisaio' mono' laa' navesi nene ehetine ve. Lingine evene' vevesi minave gili monaa' naha lutine goloso o vine' nene di halekaa' nave minani' neive. Ne'mine igi mini lingine Mose' lou' gamaziuti' gamazi ngomo malo' e'meti midingu' minine' initekuti' linge ngomo ma ize mili O'moso imaa' nangu' nene inite' ngomo ngomo ado' noso nite' do lanite' oga' ine' inite' nevo'mingutikisi ize' mili O'moso imaa' nani'za Mose' aza evene' monovo lisihekovo' i-ngidilizangumukisi ido' mulumo'ine gili ngele'mize lamine' ilizangumukisi ido' go'ine izamilizangumukisi lou' gamazi line' nene dizo mino inite' naba neine' nene gili hulaa' nave. A'mine lemo minine' lou' gamazi ngomo ngomo damilizavoba gili dalizado' o neine'za a'mine luvoni' lou' gamazi naba nesi gili dalizanako mo gili disa'mave. Agae, mulumotine gelekuve. O'moso'mo lihime lengemelido' o neive. 24Lingine vetine like vine' gelavo mono' aka ngelebizilisa igi a'mine aka ningi vevesami lihime ngomo ngomo daa' monovo hulani'za lihime naba' naba daa' monovo nene hulamanako evene' ma nalizani' initekuti' inite' ngomo lasolo ne'mo do goloso alive li di huliki inite' goloso naba nene mikile' iga' nani' gili vani' nizave.

25Ido' lingine Zuda vete mono' gozopotati' laa' ani' nene apizi ngimaa' navesi ido' Halisaio' mono' laa' navesi ehetine ve. Lingine evene' vevesi minave gili monaa' naha lutine goloso o vine' nene di halekaa' nave minani' neive. Ne'mine igi mini lingine okodine losuvo di guni iki lamine' noube li iga' naha lutine ne'mo guminelo' ve gelo mo inite' golosovo' dalisa gili nizave. Lingine kapu ido' lapese heta noso iziki lulouko ha hulika' nani' ne'mine nizanako nemu' agae, mulumotine gelekuve. O'moso'mo lihime lengemelesa neive. 26Halisaio' ve vetine like vine' giline' mene okodine losuvo nene mo lamine' ilive li ma gomu' nene lutine di lamine' ilisave.

27-28Lingine Zuda vete mono' gozopotati' laa' ani' apizi ngimaa' navesi ido' Halisaio' mono' laa' navesi ehetine ve. Lingine evene' vevesi minave gili monaa' naha lutine goloso o vine' nene di halekaa' nave minani' neive. Ne'mine igi mino lingine gonoso galese heta luhuvo izi di guni ikani' ne'mine igi nimonaha lulouko nene gonoso amuzo'mo sihononi initeli'mo vai' lo ongo neive. Evene' okodine losuvolo' ningikevo ve lisihe' lamine' nizahe li ningaa' naha lutingu' nene soza saza laa' monovosi ido' peleseve' izaa' monovosi di naba igi daa' nave. Ne'mine iga' nanako nemu' agae, mulumotine gelekuve. O'moso'mo lihime lengemelesa neive.

Lihime Lengita Dizeleseive Lo Izesu' Lo-nGimine' Gamazi

(Luka' 11:47-51)

29-30Ido' lingine Zuda vete mono' gozopotati' laa' nani' apizi ngimaa' navesi ido' Halisaio' mono' laa' navesi nene ehetine ve. Lingine evene' vevesi minave gili monaa' naha lutine goloso o vine' nene di halekaa' nave minani' neive. Ne'mine igi mini lingine ti' li laa' nave: Laza avotemote minani' gameneu' makato' minunidini ingine O'moso'mi veleti' gamazi li soto' iga' ave polohete nene ngibili nihilavo laza a'mine avotemotine hize ele' o-ngedamunidine. Ne'mine lii laa' naha a'mine avotinge api' ani' gono nene imine' mili di a'mine ngibilani' polohete ido' ve lisihe' lamineliti gonoso amuzo'ine mili-ngidani' numuno gizikani' nene imine' mili di guni igi gonoso mili-ngidani' galese'ine nene di lamine' iga' nave. 31Ido' ne'mine igi lingine polohete ngibili hilaveti zuho minikevo engi' ngemeni dameni lengita minine' nene di soto' igi lengi' monovotine langisetine li soto' iga' nave. 32Lingine avotinge ani' monovo nene di di vamilizanako ha di di vilevo. Ne'mine iga' nanako nemu' agae, mulumotine gelekuve. O'moso'mo lihime lengemelesa neive. 33Satali'mi izipahala zuho, O'moso'mo gonito' lengele'mize molalidoti' ha olovo' ilizahe. O'ove. nGeli olovo' amilisave. Nemu' nene lihizamiline' oloku' vi hilalisave. 34Ne'mine ilizangumu' nene naza O'moso'mi veleti' gamazi li soto' i lingimilizavesi ido' gamazi monovo ningi gili li soto' i lingimilizavesi ido' mono' apizi lingimilizavesi nene lengita ngimiselelesuve. Ne'mine okuvo ikevo lingine engikuti' linge ma lohoto' zalo' ngibili hili linge ma mono' numudingu' gavosotunu' ngibiliki numudoti' numudoti' ngimiseleka' ngimiseleka' igi minilisave. 35A'mine ve ngimiseleloni' nene nemu' ngimiselelesuve: Me misubouko nene ve lisihe' lamine' muki' nene evene' malite ngibili hilika' hilika' ani' ne'mi lihime nene lengita dizeleseive lo ngimiselelove. Ee, Adamu' gipele ve lisihe' Abeli'ni uvoloho'mo bele hilidoti' nene ve lisihe' muki' ngibili hili'mi dizi Balakia' gipele Zakalia' aza O'moso lehizi-dani' inite' oloku' gizaa' ani' holomosi ido' mono' numuno naba nesi oluso' neivo bili hilado' ivo a'mine ngibili hilani' neti lihime'ine nene lengita dizeleseive. 36Lamineto' nolo-lingimuve: Evene' muki' ngibili hiladi'mi lihime muki' nene me misubou' idise nizave lengita dizeleseive.

Izesu' Zelusalemi Alevemu' Ive Ine' Gamazi

(Luka' 13:34-35)

37Agae, Zelusalemi alevekizo, lingine polohete ngibili hilii ido' O'moso'mo lengita gono dalizave lo ngeletivesi nene geheni gavoso ngibili hilaa' ave lengi' nene okoloholi'mo goduvo' do holoke'ne'veko do nubuho o-ngidine' ma'mine ogo gamene gamene lengele'mize lamine' olosa uvoni'za lingine gosele' lengebelave. 38Lingine gililo. Numuno nabatine minine' ebetingu' nene O'moso aza gohi minamo mo hulo-lengedavo ga'meto' ne'mine ogo mineleseive. 39Ido' mene noluvoni' gamazi ne'mi monovo ti' lo nolo-lingimuve. Idise meloti' nene neze oko'nelo' ningami mini'mi dizi alingeta gohi soto' nouvo ti' li li-nimilisave: Guvetesi ve O'moso'mi velemu' anive naine' ma nene no'noho' geita minivoo. Ne'mine li li-nimilizani' gameneu' nene neze ningilisave lo lo-ngimine' ve.

Currently Selected:

Mataio' 23: aso

Highlight

Copy