Mataio' 22

O'moso'mo Elese Molo-ngedavo Goseleka Lilizave Nene Noso' Nite' Naba nGemelido' Nene Mo Amilisave Lo Isilaele' Aleveti Monovo Lo Soto' Ogo Aneza Gamazi Line'

(Luka' 14:15-24)

1Izesu' aza ihe' imine' molo aneza gamazi nolo-ngemo ti' lo line': 2Okulumoku' minive'mo ei' gizebo ingu' vi hilalizave lo elese molave ingine a'manapa igi amavo ato' aleve ngele'mize molaline' monovo ne'mino neive: Guvelesi ve mali'mo gipelelo' vene' hukolosa noso' nite' do va'va' ine'. 3Do va'va' noogo gelekele' izipe ngimiselavo elese molavelo' vi alo li li-ngidani'za a'mine elese molave ingine gilii a'manapa igi amani'. 4Ne'mine ikevo aza ihe' gelekele' izipe ngimiselo ti' lo line': Elese muluve malo' gohi vi ne'mine li-ngimilo: Noso' nite' nene mo do va'va' okuve. Bulumaka' ido' ize ato ato' gehesi minani' mo ngebelo gize vata' ogo noso' nite' ato atokisi do va'va' ogo molo nouve. Nemu' nene a'mine lo vine' noso' niteto' nene alo' alo. 5Ti' lo lavo ingine ihe' vi li-ngidikevo gosele' ngebelo voso' ga'ine ngisamivo gili huli ve ma ne mi'veuko vavo ve ma ne bisinisi'vela vo gonou' vine'. 6Ido' linge ma nete guvelesi ve'mi gelekele' izipe nene a'nido' di linge ma goboni mili-ngidi linge ma nene ngibili hilani'. 7Ne'mine ikevo guvelesi ve aza izebolo' goloso molavo ami lovou' monaa' ave ngeletavo vi gelekele' izipe ngibili hilave vi ngebele gese' igi numu'ine ebe'ine vite' vite' igi ngibilani'. 8Ne'mine ikevo guvelesi ve aza ihe' gelekele' izipe ti' lo lo-ngimine': Noso' nite' nene mo do va'va' o none'za elese muluve nene ngemeni dameni golososi a'mingu' amosolovo' minani'. 9Nemu' nene vi aka ngomo' nabaku' moni ningilizani' evene' muki' ngele'mizi ikevo noso' nite' mene nalizave. 10Ne'mine lavo a'mine gelekele' izipe aka ngomo ngomou' moni evene' golososi laminekisi ngele'mizi ikevo noso' nite' di va'va' ani' numungu' nene giki' lamine' ani' ve. 11Evene' vai' giki' ikevo guvelesi ve aza ningelesa dizine'. Dizo ningine' nene ve mali'mo noso' nite' nalisa gonolise lamine' iga' adi'mine amo haza ogo minine' nene ningine'. 12Ningo guvelesi ve'mo ti' lo longo' o-dine': Zogone, gaza noso' nite' nalisa genegana lamine' ngilaa' ani' ma ngolamo meu' nanitekumu' dizane. Ne'mine lavo a'mine ve gamazi liline' nomivo vise' ogo minine'. 13Ne'mine ogavo guvelesi ve aza gelekele' izipe lo-ngimine': Gizene analo' nala' di-miki huli heto' liti'muso naba ize miningu' nene huli-dilo. Nelo' mino mulumo alumo gelo ive nama ogo vele ongoho langolo' ogo mineleseive. 14Ti' lo lo-ngemo Izesu' aza ne'mine line': O'moso'mo evene' muki' elese molo neine'za a'minguti' nene evene' hamo pamokovo' nevo gizeka' ogo do anau' oloseive.

Izesu' Ganala Daline' Akalo' Ele'mizi Milalisa Takisi Monimu' Emengu' Mili Longo' I-dani' Nene nGivile' Ine' Gamazi

(Maleko' 12:13-17; Luka' 20:20-26)

15Ne'mine lavo Halisaio' mono' laa' ave vi ti' li lovo gizi lani': Evene' ma ngimiselekunivo vi Izesu'ni golo izikevo goni' o-deloine' gamazi lilingumu' ve lani'. Ne'mine li engi' izipaha'ine zuhoutikisi guvelesi ve Helode'ni hize ele' i-daa' aveutikisi evene' linge ma ngimiselikevo 16-17Izesuda igi heteli ti' li li-imani': Tisazo, gaza ve lisihe' lamine' naine' nene mo gele none. Gamazi lo-ngemeline' aleve nene nani'mine aleve nilizahe nemu' gaza gaka muki' gelesa'mane. Evene' naba mini gei' liline' gamazimu' mulu'ningu' goloso gili gelemilizadokisi nilizani' nemu' gelamo O'moso'mi aka lelebizo gamazi gihilevo' lo lemaa' nane. Nemu' nene gei' gaka gele naine' nene lo lemezo. Gelelonge. Ne'mine li ti' li longo' i-dani': Loma veti guve'inesi ve naba Kaesale' aza takisi moni huli-nidilizave lo neido' nene e'meto Zuda ve laza ma hulo-deso' nene lisihe' o neihe. Lou' gamazite avuto' o neive. 18Ti' li lani'za Izesu' aza engi' monovo goloso ningo gelo ado' lingine Kaesale'ni takisi moni imilo liline' ne'mo Zuda ve nene ngizebolo' molavo ganala dalive. Ido' imamilo liline' nene Loma ve ngizebolo' molavo ganala dalive li gilani' nene gelo ti' lo lo-ngimine': Lingine evene' vevesi minani' gili moni lutine goloso o vine' nene di halekani' mene 19nanimu' nemengu' nimilave. Takisi milaliza moni nene ningeloze. Di alo. Ne'mine lavo a'mine geheni ne di igi elebizani'. 20Elebizikevo ningo ti' lo longo' o-ngedo line': Me monilo' eveneli'mi golo velesi gulivesi neine' nene zahi golo velesi gulivesi neive. Longo' o-ngedavo nene Kaesale' ma ve lani'. 21Ne'mine likevo Izesu' aza ti' lo lo-ngimine': Ti' li ma a'mine moni nene ngamani gizebo ve ei' Kaesale' inite've noloseinako a'minemu' nolivo ma nene ha imilo. Ido' a'mine'mine igi O'moso'mo lingimine' initeto' nene ha golo hizi imilo. 22Ne'mine lavo engi' gamazi'ine ne'mo ivile' amivo ingine ve'ine gahava nomine' mini huli-miki vi ha ha ani'.

Izesu' Di'mi Limi-dilisa Helaakuti' Otaa' Monovomu' Longo' I-dani' nGivile' Ine'

(Maleko' 12:18-27; Luka' 20:27-40)

23Ido' a'mine gameneu' nene Sadukaio' mono' laa' ave ingine helaakuti' otaa' ne nomive laa' ave engikuti' linge ma Izesuda igi longo' i-di lani': 24Tisazo, Mose' aza luhuvo ti' lo gizo lemave: Uvo'ninge naku'ninge ma minilizanguti' mali'mo vene' do mino izipe gedamo helavo ma engikuti' mali'mo a'mine vene' gevono' nene do a'mine hilivemu' nene izipe gedo molo-delive. 25Ne'mine o neinako uvo'ninge naku'ninge seveni ma minani'. Uvo'nibo gana've ne'mo vene' do mino izipahala soto' amavo hiline'. Helavo nakunolo a'midoti' ne'mo elenahine dani'. 26Ido' a'mine nakunolo a'mine vene' do a'mine'mine ogo izipe gedamo helavo nakunolo a'midoti' ne'mosi a'mine vene' do izipe gedamo hiline'. Ee, a'mine uvo'ninge naku'ninge seveni a'mine vene' nene dika' dika' igi izipe gidami hili osu' lani'. 27Hili osu' likevo alinge' vene' aza hiline'. 28Ne'mine ogavo a'mine uvo'ninge naku'ninge seveni nete a'mine vene' nene mukilite dani' ma nenako evene' muki' hilanguti' otiliza gameneu' zahi elenaho lolo' ilive. 29Likevo Izesu' aza ti' lo lo-ngimine': Lingine O'moso'mi gamazi Mono' Godolou' gizi nizani' nene gili vevesami O'moso'mi amuzomukisi gili lamine' isa'mani' ne'mo gili gopo ikeve. 30Hilanguti' otaa' gameneu' nene vene' daa' ido' velo' vaa' monovo nene ma minamoloseive. Evene' O'moso'mi angelole ha minaa' nani' ne'mini inginesi ha minilisave. 31Ne'mine o neine'za evene' hilanguti' otaa' nemu' lo-lengemelove. Lingine O'moso'mo me gamazi lo-lingimine' nene Mono' Godolou' gize neine' ma gati gilahe gilamave. 32Ti' lo gize neive: Naza Abalahamule Isakale Zakobole engi' O'moso'ine ne nouve line'. Ido' a'mine ve hili osu' ladiniko engi' O'moso'ine nouve ngelo ma lamidine. Engi' O'moso'ine nouve line' ne'mo mo hili osu' lami ha nizave lo gelelesune. 33Ti' lo Izesu' line' nemu' evene' ingine upuho' igi vo'ine ga'ine vine' ve.

O'moso'mi Lou' Gamaziti' Dizo Minine' Gamazi Nemu' Line' Gamazi

(Maleko' 12:28-34; Luka' 10:25-28)

34Ido'Izesu' line' gamazi nene ivile' igi Sadukaio' mono' laa' avete a'mido' gamazi ma li-imamilizani' o vivo gili Halisaio' mono' laa' ave Izesu' neida vi di gese' ikevo 35engikuti' ve ma Zuda vete mono' gozopotati' laa' nani' nene apize ngemaa' ive ma minine' ne'mo emengu' molo ti' lo longo' o-dine': 36Tisazo, O'moso'mo lou' gamazi lo huko-lidine' neuti' lou' gamazi muki' ngivile' ogo nani gamazi'mo dizo neive. 37-38Lavo Izesu' aza ti' lo lo-imine': Dizo neine' gamazi nene ne'mine lo neive: Lutine gatine vodinesi Guvelesi ve O'mosotida nene mili lutine imivo' minilo. 39Ido' a'midoti' lemo minine' gamazi ma a'mine gidini mino ti' lo neive: Lingine lengi' okodinemu' gilaa' nani' ne'mine igi evene' avita gidini nizavemukisi nene gili lutine ngimilo. 40Mose' lou' gamazi linge gizine' nesi ido' O'moso'mi veleti' gamazi li soto' iga' ave polohetelite gizi nizani' gamazi muki' nesi a'mine lou' sita' gele daa' monovo nene ha li ngolo' lilisa imine' mili gizi nizani' ve.

Do' Lu' Izelive Lo O'moso'mo Imiselelesa Live Guvelesi Ve Davidi' A'vo Ne'mo Nene Davidi'ni Ivile' O-dosa Neive Lo Izesu' Lo-ngimine'

(Maleko' 12:35-37; Luka' 20:41-44)

41Ido' Halisaio' mono' laa' ave ingine di gese' igi nizavo Izesu' aza longo' o-ngedo 42ti' line': Lingine O'moso'mo do lu' izelive lo imiselelesa livemu' gilikevo zahi a'vopilemo' nolive. Lavo ingine avotemoti guve'inesi ve naba Davidi' a'vopilemo' ve li li-imani'. 43Li-imikevo ti' lo lo-ngimine': Ti' li ma O'moso'mi Sikalahu' ne'mo do ote-davo Davidi' aza a'mine vemu' Guve'nesi ve ve line' nene nanimu' lave. Davidi' aza ti' lo line':

44Okulumoku' ve aza Guve'nesi vemu' ti' lo lo-imine':

Nezeloti' gei' ne nange. A'ne hulaa' uvoda minezo.

Nanivo biluvaka nene gizengala do'mo leme-ngedekuvo

gelekele' i-gidi minilisave.

45Ne'mino Davidi' ne'mo Guve'nesi ve ve lo line' nenako nemu' a'mine do lu' izelive lo O'moso'mo imiselelesa live aza Davididati' leme mino ha a'vovo' nado minelive. 46Ne'mine lo longo' o-ngedavo evene' a'mingu' mo ngeli li-imamilizani' ogavo a'mine gameneloti' nene ngehelele goloso izavo inite' gohi mamu' longo' i-damani'.

Currently Selected:

Mataio' 22: aso

Highlight

Copy