KASAUKAN 20

I Abragam am Raja' Abimilik

1Banding i Abragam intor ra Mamri ongoi ra tampilon rabugus ra tana' ru Kanaan am pamagun ra lolot ru Kadis am Syur. Kalo nabuoi raginio, paat ra io mayan ra Girar, 2#Kas. 12:13; 26:7minindagu io ra andu' nano i Sara boborok nano. Ginio ra Raja' Abimilik intor ra Girar no nanusub ra ulun mongoi pangalap ri Sara. 3Sarandaman ragili, minintalang i Aki Kapuuno' ra raja' no ralalom inupi am indagu, “Matoi kou sabap binundus mu ruandu' no, sabap makaralaki io noyo.”

4Kaa' kalo poyo rinulug ru Raja' Abimilik i Sara. Indagu io, “Tuhan, kolondo' sala kuno! Pusoon Mu kia aku am ngaangai' mamagun kuno? 5I Abragam galama' mindagu ra ruandu' no boborok nano am ruandu' no pana mindagu ra i Abragam maayo nano. Binaal ku gitio sumugut ra kapasawan ru guang kuno am kolondo' sala kuno.”

6Taam i Aki Kapuuno' ralalom inupi no, “Iou, nakapandai Aku ra binaal mu ginio sumugut ra kapasawan ru guang muno. Ginio nai ra Aku mapainggalur rirun mambaal ra tula Raki' am kalo polosoon Tokou marulug ra ruandu' no. 7Kaa' raino pasagulio' io ra ralaki nano. Ralaki nano sangulun nabi am io makiasi' rirun maa' raginio kalo matoi kou. Kaa' amon ru kalo pasagulion mu, pakaraan Tokou matoi kou am niayuk ngaangai' mamagun muno.”

8Suabon no ra iosusuab, nampiau Raja' Abimilik ra ngaangai' tingganai am nambala' ra ngaangai' ondo' nasauk no. Ginio ra mangalaa' ilo kaga'. 9Kopongo raginio, piawo' ru Raja' Abimilik i Abragam am pangkuot, “Atan kia binaal mu ramon? Atan kia sala kuno saboi naparatong kou ra kapaganan raki' am ra pamarintaan kutu? Totopot kalo natimpok binaal muti raki'. 10Kua baalo' mu ginii?”

11Taam i Abragam, “Indos ku, giti kolondo' osoi pana malaa' ri Aki Kapuuno' sabap saboi potoyon aku ru ulun ondo' masaga' mamundus ra andu' kuno. 12Motopot ra io boborok kuno. Rondo' ayuk ama' mai kaa' nansuai akai ra ina' am pagandu' akai boo. 13Paat i Aki Kapuuno' nanusub raki' mangiruan ra baloi ru ama' kuno am mongoi ra pagun ra bokon, indagu aku ra andu' kuno, ‘Pakitono' noyo gagaya' muno raki' ra mindagu kou ra moonong ulun ra aku ti maayo muno.’ ”

14Kopongo raginio, pasagulio' ru Raja' Abimilik i Sara ri Abragam, am paat raginio niayuk inanian no i Abragam ra ulipon, domba am sapi'. 15Indagu raja' no ri Abragam, “Tana' ragitio aku ngaangai' tatangan; Ayan no ra ati ayuk kasaga' muno.” 16Indagu io ri Sara, “Inanian ku noyo maayo muno ra saribu ruit pirok koson mapainono' ra ngaangai' ulun pabaya' muno ra okou ti totopot kolondo' sala.”

17-18Sabap ra ondo' nasauk ri Sara, andu' ri Abragam, binaal ru Tuhan ra tabanang moonong ruandu' ra istana ri Abimilik. Pakiasi' boo i Abragam ri Aki Kapuuno', am babaso' ri Aki Kapuuno' i Abimilik, andu' nano am ngaangai' ulipon ra ruandu' saboi maganak ilo poyo.

Currently Selected:

KASAUKAN 20: TMT

Highlight

Copy