KASAUKAN 19

Tula ru bandar Sodom

1Pakasaboi ruo malaikat no ra bandar Sodom ra palunggai' noyo, nanturung i Lot ra kulobon garabang ru bandar raginio. Pakakito io risilo, ingkakat io am ongoi uma' risilo. Igulatur io ra saang nilai, 2am indagu, “Tuan, apit kau poyo ra baloi kuno. Makapambagu' kau ra kalayam am makakaalangan kau. Susuab no, rumondom kau sukal am rayusin min boo pangkiralanan min.”

Kaa' taam ilo, “Kalo pana, mombolong akai ayuk ragiti padang ru bandar ti.”

3Jinajalan ilo kimaiti' ri Lot, am pupus no pababaya' ilo boo minumpos ra baloi nano. Panusub i Lot ra kambo-kambo nano mangansak ra ruti' am momongo ra akanon mangaamis ra tambului no, am pangakan ilo. 4Kalo poyo nombolong tambului no, ungkuyon ru bandar Sodom no liminibung noyo ra baloi no. Nakakai' ungkuyon ru bandar no, ondo' mangatutuo am poyo mangamulok soroi ra giu' no. 5#Tin. 19:22-24Piawo' nilo i Lot am pangkuot, “Ati kia ulun ondo' minatong pombolong ra baloi muti? Pataako' ilo ramon maa' raginio makarulug akai risilo!” 6Ingkual i Lot am angabi' no kulobon i. 7Indagu io risilo, “Rangan kau ngaangai', makiasi' aku ra pai' kau pambaal ra malaat kaga' ti! 8Kaa' rongogo', aku mokoondo' ruo ngaulun anak ruandu' ondo' lakat poyo ralaa. Moonsoi pataakon ku ilo ramuyun am guguang min mangurana' risilo maya' ra kasagaan min. Kaa' pai' min jamari' tambului kuno, sabap ilo tambului kuno am musiti' aku magalung toojo risilo.”

9Kaa' indagu ilo ri Lot, “Pagiru'! Okou ulun bansa' ru bokon ragiti ondo' masaga' mangila' ramon? Ugar, Pagiru' no! Amon ru kalo, jojokon mai poyo pamakuan mai rirun intor ra ruo ngaulun no.” Juuli' nilo i Lot am sonsog ilo mapalunsai ra angob. 10Kaa', ingkual karuo ngaulun ondo' soroi ralalom baloi no am namunduk ri Lot paumposo' saguli' ra baloi no am angabi' nilo kulobon. 11#2 Raj. 6:18Bolowo' nilo mato ru ngaangai' ulun ondo' soroi ra liwar no saboi kalo boo mauyum nilo angob ru baloi no.

Nangiruan i Lot ra bandar Sodom

12Indagu boo karuruo ngaulun tambului no ri Lot, “Amon ru makaanak ungkuyon kou, anak ruandu', anak mangiwan kapoam pabukat mu ra bokon minayan ra bandar ti, ibito' ilo noyo mingkual intor ragiti. 13Sabap pusoon mai intok ragitio. Nakaining noyo Tuhan ra panguwan ra maagat kaga' ra mamagun ru giti am nangator Io ramon mongoi pamuso ra bandar Sodom.”

14Ugar boo i Lot ongoi pambala' ra karuruo ngaulun tamung ru anak-anak ruandu' nano am indagu, “Ribaki' min ingkual intor ragiti sabap pusoon ru Tuhan intok ragitio.” Kaa', tantamon nilo mangkuli ayuk i Lot.

15Paat tumawang, rinondom ru karuruo malaikat no nangulisok ri Lot mataki' mugar, konilo, “Ribaki', ugar no mabaya' ra andu' muno am karuruo anak ruandu' muno intor ragiti maa' ra akau makapagiru' no kalo matoi paat bandar ti pusoon.” 16#2 Ptr. 2:7Maimamang i Lot. Kaa' makaasi' Tuhan riso, ginio ra kitango' ru karuo ngaulun tambului no i Lot, andu' nano am karuruo anak nano mingkual intor ra bandar no. 17Kopongo raginio, indagu sangulun intor ra malaikat no, “Pagiru' no, am akau pana maayag! Pai' pangkaili ra tinaulian am pai' uog ra limayak no. Pagiru' kano ra kabuluran no maa' raginio kalo matoi kau.”

18Kaa' taam i Lot, “Anii Tuan, pai' akai pagiruo' ra giu' no. 19Iou, nangindangan kono toojo pamayag raki', kaa' kabuluran raginio maalur kaga', maaru' lair masunu' aku ru baal makalalaa' no am matoi aku noyo ra kalo poyo makasaboi ra giu' no. 20Ilai', giu' no mokoondo' bandar boborok ondo' mamamaar. Poongoyo' aku ayuk ra giu' no maa' raginio maayag aku.”

21Taam malaikat no, “Ba iou, bandar boborok raginio kalo pusoon ku. 22Ribaki', pagiru' no! Sabap ra kolondo' atan-atan mabaal ku ra okou kalo poyo makasaboi ra giu' no.”

Sabap sinabit ri Lot bandar raginio boborok, ginio boo ra ininggalanan bandar no ra Joar.#Joar: Inggalan ti bolos no koson ra ragu Ibrani ondo' makaarati' ra “boborok”.

Napusaan ru bandar Sodom am Gomora

23Sumirang mato ru orou paat i Lot nakasaboi ra Joar. 24#Mat. 10:15; 11:23-24; Luk. 10:12; 17:29; 2 Ptr. 2:6; Jud. 7Pulalii' ru Tuhan napatuun ra rasam makabalirang ondo' makaapui ra bandar Sodom am Gomora. 25Karuruo bandar no pinuso, titikop limayak nabaya' ra mamagun ra giu' no am ngaangai' tutuu' ru tana' raginio. 26#Luk. 17:32Kaa' pangkaili andu' ri Lot ra tinaulian am kaangun io boo ra lugu' ru usi'.

27Suabon no ra iosusuab toojo, naringkaagou i Abragam minongoi ra intok binigaran no ra saang ru Tuhan ragili. 28Impalo' no tampilon ra bandar Sodom am Gomora am niayuk titikop ru limayak no. Makito no binuun ru lisun intor ra tana' no koson ra lisun intor ra rapuan maayo kaga'. 29Kaa' paat ri Aki Kapuuno' namuso ra bandar-bandar raginio am limayak ondo' inayanan ri Lot, nakakara' Io ri Abragam am pangindangan Io ri Lot nagiru'.

Inintaran ru papag ulun ru Moab am Amon

30Sabap ra malaa' i Lot mayan ra Joar, banding io ra kabuluran nabaya' ra karuruo ngaulun anak ruandu' nano am ayan ilo ra luang batu. 31Indagu anak ruandu' ra katuaan no ra boborok nano, “Matutuo noyo i ama' am titikop ra tana' ti#titikop ra tana' ti; kapoam titikop ra pagun ti. kolondo' sangulun ungkuyon manangandu' rito koson mokoowot ra anak. 32Ibok, gauko' to i ama' am makarulug to boo riso am makaanak to boo.” 33Rondom raginio, painumo' nilo ra wain ama' nilono am rulug anak ruandu' ra katuaan no ra ama' nano, kaa' nagauk kaga' ama' nano saboi kalo nakaliman io ra atan binaal nano.

34Paat ra suabon no, indagu anak ruandu' ra katuaan no ra boborok nano, “Rondom i riminulug aku noyo ri ama'! Rondom raiti' gaukon to poyo am okou boo rumulug riso, am sigagama' to boo makaanak intor riso.” 35Ginio ra paat rondom raginio, gauko' nilo i Lot, am rulug boo anak karuo no, kaa' nagauk kaga' i Lot saboi kalo nakaliman io ra atan binaal nano. 36Ginio nai ra kaapang boo karuruo ngaulun anak ruandu' ri Lot sabap ra intor ra ama' nilo galama'. 37Anak ruandu' ra katuaan naganak ra sangulun anak ungkuyon ondo' ininggalanan ri Moab.#Moab: Inggalan ti bolos no koson ra ragu Ibrani makaarati' ra “intor ra ama' kuno”. Io no kinamatuaan ru bansa' ru Moab ra raino ti. 38Anak ruandu' ra karuo naganak ra sangulun anak ungkuyon ondo' ininggalanan ri Bin-Ami.#Bin-Ami: Ralalom ragu Ibrani, inggalan ti makaarati' ra “anak intor ra pabukat ku”, am bolos no koson ra ragu Ibrani tayar “ulun ru Amon”. Io no kinamatuaan ru bansa' ru Amon ra raino ti.

Currently Selected:

KASAUKAN 19: TMT

Highlight

Copy