KASAUKAN 12

Piniau i Abram ri Aki Kapuuno'

1 # Rin. 7:2-3; Ibr. 11:8 Indagu Tuhan ri Abram, “Iruani' noyo pagun muno, matuo muno, pabukat muno am ongoi no ra pagun ondo' pataakon Kuno rirun. 2Mangani' Aku rirun ra papag ondo' masuang am masauk ilo ra bansa' maayo. Mambarakat Aku rirun am masauk boo inggalan muno ra mauligan kaga' saboi alapon kou mambarakat ra ulun bokon.

3 # Gal. 3:8 Barakaton Ku ilo ondo' mambarakat rirun,

kaa' ulason Ku ilo ondo' magulas rirun.

Sabap ra okou no,

barakaton Ku ngaangai' bansa' ra tana' ti.”#Sabap ra…bansa' ra tana' ti; kapoam ngaangai' bansa' makibarakat Raki' koson Aku mambarakat rirun.

4Paat umur ri Abram 75 ngambilor, minugar io nangiruan ra Aran sumugut ra susuban ru Tuhan riso. 5Inibit ri Abram andu' nano i Sarai, akon nano i Lot, ngaangai' kuliamos am ulipon ondo' noowot nilo ra Aran am ongoi ilo ra pagun Kanaan.

Pakasuku' ilo ra pagun ru Kanaan, 6liputo' ri Abram tana' raginio saboi io nakasuku' ra puun matulai giu' ra Mori, iono intok sambayangan giu' ra Sikgim. (Paat raginio ulun ru pagun ru Kanaan lakat poyo minayan ra tana' raginio). 7#Rin. 7:5; Gal. 3:16Minintalang Tuhan ri Abram am indagu Io riso, “Gitio noyo pagun ondo' pataakon Ku ra papag muno.” Intok raginio, nambaal boo i Abram ra altar ru Tuhan ondo' minintalang noyo riso. 8Io pana namparayus poyo ra pangkiralanan mongoi ra tampilon rabugus ra kabuluran tampilon sirangon ru bandar Bitil. Pangkim io boo ra lolot ru Bitil am bandar Ai. Bitil tampilon kalasaan am Ai tampilon sirangon. Giu' no niayuk nambaal i Abram ra altar am samba ra Tuhan. 9Rayusi' no poyo pangkiralanan nano intor ra rondo' intok mongoi ra rondo' intok sumunu' no sumuku' ra tampilon rabugus tana' ru Kanaan.

I Abram giu' pagun ru Misir

10Kaa' giu' ra pagun ru Kanaan kulutong bitilan ra maaja' saboi mininjul poyo i Abram ra tampilon rabugus pagun ru Misir am mayan ra giu' saboi ra kalupusan ru bitilan. 11Paat ra ilo sumail ra balitan ru pagun ru Misir, indagu io ra andu' nano i Sarai, “Okou ti mantalur. 12Paat ra ulun ru Misir monontong rirun, maaru' mindagu ilo ra okou ti andu' ku. Maaru' potoyon nilo aku am polosoon kou maayag. 13#Kas. 20:2; 26:7Moonsoi poyo balain mu ilo ra okou ti boborok kuno; maa' raginio polosoon nilo aku maayag sabap ra okou am moonsoi pamakuan nilo raki'.” 14Paat ri Abram nansail ra balitan ru pagun ru Misir, ulun ru Misir nakakito ra mantalur kaga' i Sarai. 15Nakito i Sarai ru kukula' ngaulun pagawai ru istana, am pambala' ra raja' ra kinantalur ru ruandu' no; ginio ra ibito' nilo i Sarai ra istana ru raja'. 16Sabap ri Sarai, moonsoi kaga' pamakuan ru raja' no ri Abram saboi inanian io ra ulipon, domba, kambing, sapi', kaladai am unta.

17Kaa' sabap ra binundus ru raja' i Sarai, porotongo' boo ru Tuhan maruol ondo' makalalaa' ra raja' am ngaangai' ulun ru istana. 18Ginio ra piawo' ru raja' i Abram am pangkuot io riso, “Atan kia binaal muno raki'? Kua kalo nambala' kou raki' ra ruandu' no andu' muno? 19Kua indagu kou ra io boborok muno am pinoloso mu io inandu' ku? Noo', gitio andu' mutu! Alapo' io noyo am ugar kano!” 20Panusub raja' ra ulun-ulun nano, paugaro' nilo boo i Abram intor ra pagun ru Misir no mabaya' ra andu' nano am ngaangai' longgom nano.

Currently Selected:

KASAUKAN 12: TMT

Highlight

Copy