KASAUKAN 11

Manara Babil

1Paat ra talimpuun i, mamagun ra titikop ru tana' ti mokoondo' rondo' ayuk ragu am ilo magindagu ra rondo' ayuk sinulabit. 2Paat ilo minanding tampilon ra sirangon, nakatuum ilo ra tana' limayak ra Babilonia am pamagun ilo ra intok raginio. 3Magindagu ilo ra rondo' am bokon, “Ibok! Pambaal takau ra batu bata' am uboon takau saboi mokotog.” Ginio boo ra makabatu bata' ilo koson pambaal nilo ra baloi am tiir koson alapon ra pomolokot. 4Indagu ilo, “Raino pambaal takau ra bandar am manara ondo' makasuku' ra lingkatur ru limbowon maa' raginio itakau mauligan kaga' ru ulun am kalo makapantuliar ra titikop ru tana' ti.”

5Tauli tuun boo Tuhan mongoi pagilong ra bandar no am manara ondo' binaal ru ulun. 6Indagu Tuhan, “Ulun-ulun ragitio nasauk ra rondo' bansa' am mindagu ra rondo' ragu; am gitio talimpuun ayuk poyo ra inatangan nilo. Kalo boo mabuoi raginio, sangkabaali' nilo ra kasagaan nilo. 7Ibok tuun Takau am jojowo' ragu nilono maa' raginio kalo makapagarati' ilo ra rondo' am bokon.” 8Ginio noyo ra ilo pinantutuliar ru Tuhan ra titikop ru tana' ti. Longgo' ilo boo nambaal ra bandar no. 9Bandar no ininggalanan ra Babil#Babil: Ralalom ragu Ibrani ragu ti bolos no koson ra ragu makaarati' ra “majajajou”. sabap ra giu' noyo jinajou ru Tuhan ragu ru ulun, am ra giu' noyo napatuliaran ru Tuhan ra ulun ra titikop ru tana' ti.

Papag ri Siim

(1 Tun. 1:24-27)

10Gitio noyo Papag ri Siim. Kopongo ruo ngambilor intor ra rosob i, paat umur ri Siim 100 ngambilor, makaanak ungkuyon io sangulun ininggalanan ri Arpaksad. 11Kopongo ragili, naayag io poyo buoi 500 ngambilor am makaanak poyo ra bokon.

12Paat umur ri Arpaksad 35 ngambilor, makaanak ungkuyon io sangulun ininggalanan ri Sila. 13Kopongo ragili, naayag poyo i Arpaksad buoi 403 ngambilor am makaanak poyo ra bokon.

14Paat umur ri Sila 30 ngambilor, makaanak ungkuyon io sangulun ininggalanan ri Ibir. 15Kopongo ragili, naayag poyo i Sila buoi 403 ngambilor am makaanak poyo ra bokon.

16Paat umur ri Ibir 34 ngambilor, makaanak ungkuyon io sangulun ininggalanan ri Pilig. 17Kopongo ragili, naayag poyo i Ibir buoi 430 ngambilor am makaanak poyo ra bokon.

18Paat umur ri Pilig 30 ngambilor, makaanak ungkuyon io sangulun ininggalanan ri Riyu. 19Kopongo ragili, naayag poyo i Pilig buoi 209 ngambilor am makaanak poyo ra bokon.

20Paat umur ri Riyu 32 ngambilor, makaanak ungkuyon io sangulun ininggalanan ri Sirug. 21Kopongo ragili, naayag poyo i Riyu buoi 207 ngambilor am makaanak poyo ra bokon.

22Paat umur ri Sirug 30 ngambilor, makaanak ungkuyon io sangulun ininggalanan ri Nagor. 23Kopongo ragili, naayag poyo i Sirug buoi 200 ngambilor am makaanak poyo ra bokon.

24Paat umur ri Nagor 29 ngambilor, makaanak ungkuyon io sangulun ininggalanan ri Tirag. 25Kopongo ragili, naayag poyo i Nagor buoi 119 ngambilor am makaanak poyo ra bokon.

26Paat umur ri Tirag 70 ngambilor, makaanak ungkuyon io talu ngaulun iono i Abram, Nagor am i Aran.

Papag ri Tirag

27Gitio noyo papag ri Tirag: I Tirag ama' ri Abram, Nagor am i Aran. I Aran ama' ri Lot. 28Minatoi i Aran ra pamagunan nano galama' iono bandar Ur giu' ra Babilonia, paat ra ama' nano lakat ayuk poyo naayag. 29I Abram nanangandu' ri Sarai am i Nagor nanangandu' ri Milka, anak ruandu' ri Aran. Makaanak ungkuyon poyo i Aran ra bokon ininggalanan ri Jiska. 30I Sarai ti tabanang.

31Nagibit i Tirag ra anak ungkuyon nano i Abram, akupu nano i Lot anak ri Aran am anak mangiwan ra ruandu' nano i Sarai, andu' ri Abram, nangiruan ra bandar Ur ru Babilonia, am ongoi ra pagun ru Kanaan. Kaa' pakasuku' ra Aran, pamagun ilo ra giu' no. 32Intok raginio pinatayan ri Tirag ra umur nano 205 ngambilor.

Currently Selected:

KASAUKAN 11: TMT

Highlight

Copy