RINALATAN 5

I Ananias am i Sapira

1Mokoondo' sangulun ungkuyon makainggalan ri Ananias am andu' no i Sapira. Nantalan ilo ra sampila' tana' nilai. 2Santayaran ru ruit no pinauli' no galama' am santayaran no poyo pinataak no ra rasul-rasul. Andu' nali pana nangiou ra binaal nali. 3Indagu i Pitrus riso, “Ananias, kua polosoo' mu Tingganai ru riwato mangkinibit rirun magabau ra Ambiluo ri Aki Kapuuno', ra inalap mu santayaran ra ruit ru tana' tinalan muli? 4Tana' i okou tatangan ra kalo poyo natalan. Katalan mu raiti, ruit i pana lakat ayuk poyo okou tatangan. Kua kasaga' kou mambaal raginio? Sala' ka ulun inabawan muni, kaa' i Aki Kapuuno'!” 5Pakaining ayuk i Ananias ra ragu ni, kaaba' io am patoi. Ngaangai' ulun ondo' nokorongog ra baal no nangalaa'. 6Ratong boo kukula' ngaulun tuu'-bagu nangulumput ra baangkai ri Ananias, paingkualo' nilo am ongoyo' lobongo'.

7Pakatalu nganjam raiti, umpos andu' ri Ananias, kaa' kalo nakapandai io ra atan ondo' nasauk ni. 8Pangkuot boo i Pitrus riso, “Pambala', gitio ayuk kia logo ru tana' ra tinalan mini?”

“Iou, ginio ayuk,” kono.

9Indagu i Pitrus riso, “Kua pampakat kau mansawo nangkinam ra Ambiluo ru Tuhan? Ilai'! Ulun ondo' nompolobong ra ralaki muli nakasaguli' noyo. Okou po paingkualon nilo.” 10Paat ragili niayuk i Sapira naaba' am patoi ra saang ri Pitrus. Umpos kukula' ngaulun tuu'-bagu am kakito nilo ra minatoi io no. Paingkualo' nilo boo baangkai i am pagumbiro' lobongo' ra ralaki nali. 11Ngaangai' ulun mangintopot am ulun ra bokon nangalaa' toojo nakaining ra baal raginio.

Kaimuagan am tatandu'

12Masuang kaimuagan am tatandu' sinauk ru rasul-rasul ra gino ngai' ru ulun masuang. Ngaangai' maamaya' ri Jisus masalok tumimung ra Langgar Salomo. 13Ilo ondo' kalo poyo mangintopot ri Jisus kalo makakau' lumatok ra maamaya' ri Jisus no, kabalu' pana urumaton ilo toojo ru ulun masuang. 14Ginio ra buoi-kabuoi rumuang poyo ulun mangintopot ra Tuhan, ungkuyon am ruandu'. 15Sabap ra kaimuagan ondo' binaal ru rasul-rasul no, ulun mangarualan palanganon ra tilam kapoam apin, am ibiton ilo boo ra ralan koson malansan makatiu' ra babara' ri Pitrus, paat ra io mansail ra giu' i. 16Ratong boo masuang ulun intor ra pekan mamaar ra Jirusalim. Inibit nilo ulun mangarualan am ondo' sinubol ru riwato, am ngaangai' ilo binabas.

Inimbolo' rasul-rasul

17Tingganai Maayo Imam Jaudi am ngaangai' maamaya' nano, ondo' niayuk ulun ru Saduki, tumalimpuun gumuor sabap ra mangusolon ilo kaga' ra rasul-rasul. 18Rokopo' nilo rasul-rasul no am pasubolo' ra lamin pangaputan ru bandar. 19Kaa' rondom ragili, sangulun malaikat ru Tuhan nangukab ra kulobon-kulobon ru lamin pangaputan no, am ibito' no rasul-rasul no miningkual. Indagu malaikat no risilo, kono, 20“Ongoi kau ra Baloi Tuhan no am potonowo' min noyo ra ulun masuang no intor ra kaayagan bagu ti.” 21Rasul-rasul no giminagaya' ra bilin ru malaikat i. Riminondom ilo minongoi ra Baloi Tuhan no am timinalimpuun ilo mangila'.

Tingganai Maayo Imam Jaudi am maamaya' nano nampiau ra ngaangai' tingganai ru ulun ru Jaudi matong ra miting ru Majlis Ugama. Panusub ilo boo koson ibiton rasul-rasul no intor ra lamin pangaputan paumaan risilo. 22Kaa' pakasuku' ulun sinusub ra lamin pangaputan i, ilai' nilo kalio boo rasul-rasul ra giu' i. Saguli' ilo am pambala' ra Majlis Ugama, konilo, 23“Pakasuku' akai ra lamin pangaputan i, ilai' mai kulobon no nakaput toojo, am soroi magagalung ra liwar ru kulobon i. Kaa' paat ra ukabo' mai kulobon i, kolondo' sangulun pana natuum mai ra giu' i.” 24Pakaining tingganai magagalung ra Baloi Tuhan am tingganai imam Jaudi ra ragu raginio, naliangan ilo ra atan kinua' nasauk ra rasul-rasul no. 25Umpos boo sangulun ungkuyon pambala' risilo, kono, “Ulun-ulun ra inaput mini soroi ra Baloi Tuhan raino, am mangila' ilo ra ulun masuang!” 26Tingganai magagalung ra Baloi Tuhan mabaya' ra magagalung ra bokon no minongoi pamparakop saguli' ra rasul-rasul no. Kaa' kalo jinajalan nilo rasul-rasul no sabap ra malaa' ilo ra bobolon ru ulun masuang ra batu.

27Ibito' nilo rasul-rasul no paumaan ra Majlis Ugama. Indagu Tingganai Maayo Imam Jaudi no, kono, 28 “Linolob takamin noyo ra pai' kau pangila' ra pangilaan ru ulun ragili. Kaa' ilai' boo binaal min! Nampatabual kau ra pangilaan min ra titikop ru Jirusalim ti, am nanguu' kau poyo ra akai no nangkinibit ra pinatayan ru ulun i.”

29I Pitrus am rasul ra bokon no timinaam, “Akai musiti' gumagaya' ri Aki Kapuuno' am sala' ka ulun. 30I Jisus ondo' pinatoi min salipo' i, binayag noyo saguli' intor ra kapatayan ri Aki Kapuuno', ondo' sambaan ru kinamatuaan takali. 31Pinainsawat Io ri Aki Kapuuno' ra tampilon pamiris Nano, ioginio intok makakuasa', koson masauk ra Tingganai am Mamamayag, maa' raginio bansa' ru Israil ti makatalikur intor ra tula nilo am maampun ilo. 32Akai no sasi' ra ngaangai' raginio – akai am Ambiluo ri Aki Kapuuno' niayuk, ondo' pataakon ri Aki Kapuuno' ra ulun ondo' gumagaya' Riso.”

33Pakaining ulun-ulun ru Majlis Ugama ra ragu ni, siminangit ilo toojo saboi masaga' ilo ra rasul-rasul no ukumin ra potoyon. 34Kaa' ralalom Majlis Ugama no mokoondo' sangulun ru Parisi makainggalan ri Gamalil. Io sangulun mangingila' ra Ukum ri Musa ondo' urumaton toojo ru ngaangai' ulun. Bigor io am panusub ra rasul-rasul no paingkualon sangkinolor. 35Indagu io boo ra Majlis Ugama no, “Pabukat ku ulun ru Israil, karaa' min toojo atan baalon min ra ulun-ulun raginio. 36Ragili mokoondo' sangulun inggalanin ri Tiudas ondo' migiangku ra io tingganai maatang. Mokoondo' olo'-olo' apat ngaatus ngaulun minaya' riso, kaa' pinatoi io am ngaangai' maamaya' nali nantutuliar, am kandoi nali pana napuso. 37Kopongo raginio, paat ra panguntaban ra ulun, mokoondo' poyo sangulun, io no i Judas intor ra Galilia. Nangkinibit io ra masuang ulun minaya' riso. Kaa' io niayuk pinatoi am ngaangai' maamaya' nali nantutuliar boo. 38Sabap raginio, pinsonon takamin ra pai' kau pambaal ra atan-atan ra ulun-ulun no. Paugaron ilo ayuk, sabap ra amon ru atangon am atan ondo' baalon nilono intor ra ulun ayuk, maaru' mapuso ra tauli no. 39Kaa' amon ru ondo' baalon nilono intor ri Aki Kapuuno', kalo maala min ilo. Ati lair i Aki Kapuuno' galama' anggalon min.”

Pinson ri Gamalil iniou ru Majlis Ugama. 40Piawo' nilo saguli' rasul-rasul no, am palapasi' boo am inggalari' ilo manabit ra inggalan ri Jisus. Kopongo ragili pinalabus ilo. 41Naansukan rasul-rasul no ra ilo miningkual ra Majlis Ugama, sabap ra ilo ti kinara' noyo ri Aki Kapuuno' maaya' imboloon sabap ra inggalan ri Jisus. 42Moonong orou, giu' ra Baloi Tuhan kapoam baloi ru ulun niayuk, kalo linanggaan nilo mangila' am mampabala' ra Tanou Moonsoi, ra i Jisus noyo Mamamayag ondo' sinusub ri Aki Kapuuno'.

Currently Selected:

RINALATAN 5: TMT

Highlight

Copy