RINALATAN 4
4
I Pitrus am i Juanis binisara' giu' ra Majlis Ugama
1Liliwa' i Pitrus am i Juanis lakat ayuk poyo makimansunur ra ulun masuang, ratong boo imam Jaudi, tingganai ru magagalung ra Baloi Tuhan am niayuk ulun-ulun ru Saduki. 2Siminangit ilo ri Pitrus am i Juanis ra ilo nambala' ra ulun masuang ra i Jisus binayag saguli' intor ra kapatayan. Ginio mampainono' ra ulun matoi bayagon saguli'. 3Rokopo' nilo boo ruo ngaulun rasul i am pasubolo' ra lamin pangaputan. Sabap ra molondom noyo, pinoloso ilo ra giu' i saboi ra suabon. 4Kaa' masuang ulun ondo' nokorongog ra pambalaan ru rasul-rasul nangintopot ri Jisus. Suang nilo riminuang saboi olo'-olo' limo ngaribu ngaulun.
5Suabon no, tingganai imam Jaudi, tingganai ru ulun ru Jaudi am mangingila' ra Ukum ri Musa timinimung ra Jirusalim. 6Naguguma' ilo ra Tingganai Maayo Imam Jaudi, i Anas am i Kayapas, i Juanis am i Aliksandir, am ngaangai' pabukat ru Tingganai Maayo Imam Jaudi no. 7I Pitrus am i Juanis pinauma' risilo am kuati', “Ati kulaan akau nakapamabas ra ulun kalo makalulu' no? Atan kia ra kuasa' kapoam osoi kia ra kuasa' naalap min mambaal raginio?”
8I Pitrus kinuasa' ru Ambiluo ri Aki Kapuuno' ra io timinaam risilo, kono, “Akau ngai' tingganai ulun ru Jaudi am tuu' lair-tuu' lair! 9Bisaraan min akai orou raiti' sabap ra nangindangan akai ra ulun kalo makalulu' no, am poyo ra moogot kau makapandai ati kulaan ulun no binabas. 10Akau tingganai am niayuk ngaangai' ulun ru Israil ra bokon musiti' makapandai ra ulun ti ondo' migor ra saang min nababas sabap ra kuasa' ri Jisus Kristus, ulun ru Nasarit. Sinalip min Io, kaa' binayag Io saguli' ri Aki Kapuuno' intor ra kapatayan. 11 I Jisus noyo kon ru ragu ti ra Buuk Kitab,
‘Batu ondo' inimpayan ru ulun manambaloi,
– ioginio akau galama' –
nasauk ra batu maatang kaga'.’
12Ralalom inggalan ri Jisus ulun bayagon, sabap ra giti ra tana' ti kolondo' ulun ra bokon makaalap ra kuasa' intor ri Aki Kapuuno' koson mamayag ritakau.”
13Ulun ru Majlis Ugama nangimuag magilong ra kinabaani ri Pitrus am i Juanis, am poyo katutuni' nilo karuo rasul ti sala' ka ulun maatang am kolondo' sikul. Katutuni' nilo boo ruo ngaulun rasul ti rangan toojo ri Jisus. 14Kaa' kalo boo nakapaguta' ilo, sabap ra nakito nilo ulun ra nababas no bigor ra giu' no nabaya' ri Pitrus am i Juanis. 15Susubo' nilo ruo ngaulun rasul no miningkual ra lamin Majlis Ugama no, am pansusunur ilo boo. 16Pasakuot ilo, “Atan kia musiti' takau baalon ra ruo ngaulun ni? Ngaangai' mamagun ra Jirusalim nakapandai noyo ra ilo nambaal ra kaimuagan i. Baal raginio kalo maali' takau. 17Kaa' koson baal raginio kalo makatabual poyo ra ulun masuang, moonsoi lolobon takau ilo ruo no koson kalo boo mampatanou ra osoi ayuk pana ralalom inggalan ri Jisus.”
18Piawo' nilo boo ruo ngaulun rasul i sumubol saguli' am inggalari' ilo ra kalo boo pasabitin inggalan ri Jisus kapoam makapangila' ralalom inggalan Nano.
19Kaa' taam i Pitrus am i Juanis, “Guango' min galama' atan motopot ra pagilangan ri Aki Kapuuno': Gumagaya' ramuyun kia kapoam gumagaya' ri Aki Kapuuno'? 20Sabap ra kalo malanggaan mai mindagu ra atan nakito am norongog mai galama'.” 21Lolobo' poyo ru ulun ru Majlis Ugama i Pitrus am i Juanis, am palabuso' nilo boo karuo-ruo no. Kalo nakatuum ilo ra sasaban koson mangukum risilo, sabap ra ngaangai' ulun nongongompor ri Aki Kapuuno' sabap ra ondo' nasauk i. 22Ulun ondo' nababas ra kaimuagan i nasailan noyo apat ngoopor ngambilor.
Maamaya' ri Jisus makitaak ra kabaanian intor ra Tuhan
23Pakalabus ayuk i Pitrus am i Juanis, saguli' ilo ra rangan nilai am tunungo' boo ngaangai' ondo' rinagu ru tingganai imam Jaudi am tingganai ru ulun ru Jaudi. 24 Kaining nilo ginio, pakiasi' ilo ra rondo' guang ri Aki Kapuuno', konilo, “Tuhan, Okou no nambaal ra limbowon, tana' am raat nabaya' ra suang nano. 25 Ralalom ru Ambiluo Muno, minindagu Kou ra kinamatuaan maili, i Daut ulipon Muno, Kamu,
‘Kua ulun sala' ka Jaudi sumangit?
Kua bansa' ra bokon no mangatang ra kolondo' onong?
26Raja' ru tana' rati nakatampos noyo mongoi ra pangayawan,
am mangunguasa' no nakatimung noyo gumula' ra Tuhan
am Mamamayag ondo' sinusub ri Aki Kapuuno'.’
27 Motopot ra raja' Irodis am i Pontius Pilatus naguma' ra ulun sala' ka Jaudi am poyo ulun ru Israil giti ra bandar ti, koson manggal ri Jisus Ulipon Muno ra matulai, ondo' sinauk Mu ra Mamamayag. 28Ilo rondo' guang nambaal ra ngaangai' ondo' inaru' Muno kalalair masauk. Inaru' Muno koson raginio maya' ra kuasa' am kasagaan Muno. 29Raino Tuhan, ilai' ati kulaan akai lolobon nilo. Anii' akai, ulipon-ulipon Muti, ra kakawan mampabala' ra tanou Muno. 30Paintalango' noyo kuasa' Muno koson ra ulun marualan mababas. Gama' ru kaimuagan am tatandu' ra bokon masauk ralalom ru kuasa' ri Jisus, Ulipon Muno ra matulai.”
31Kopongo ilo makiasi', intok tinimungan nilai nauyog. Kinuasa' ilo ngaangai' ru Ambiluo ri Aki Kapuuno', am tumalimpuun ilo mampabala' ra tanou intor ri Aki Kapuuno' ra kalo malaa'.
Maamaya' ri Jisus magagapu ra kuliamos
32 Ngaangai' maamaya' ri Jisus toojo rondo' guang. Kolondo' sangulun pana intor risilo nangkara' am nangangku ra kuliamos nano galama', kaa' nagagapu ilo ra kuliamos. 33Ra kuasa' maayo, rasul-rasul no nangani' ra kaintutunan ra Tuhan Jisus binayag noyo saguli'. Ginio boo ri Aki Kapuuno' nambarakat toojo risilo. 34Ngaangai' ilo maukop ra atan-atan. Sabap ra osoi ayuk makatana' kapoam baloi, talanon nilo rapu' raginio am ampos ru ginio pataakin nilo ra rasul-rasul. 35Ruit no boo tatayaron ra moonong ulun ondo' makapakuan.
36Koson niayuk ri Jusup. Io ti am sangulun papag ru Liwi am inanak Io giu' ra pulu' Siprus. Sabiton io ru rasul ri Barnabas (arati' nano ‘Mampapirot ra guang’). 37Nantalan io ra tana' nano am pataako' no boo ruit i ra rasul-rasul.
Currently Selected:
RINALATAN 4: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.
