2 PITRUS 3
3
Ratangan saguli' ru Tuhan
1-2Pabukat kau ngai' ondo' tagamin ku, gitio noyo surat karuo ondo' posoboyon kuno ramuyun. Ralalom ru karuruo surat kuno giminogot aku ra guangon toojo ondo' natutunan min noyo. Mampakara' aku toojo ramuyun ra ondo' pinabala' ru nabi matulai ra galing i, am atan kia poyo panusuban ru Tuhan am Mamamayag ondo' pinasaboi ru rasul-rasul ramuyun. 3 Kasaa' ti, pakarati' kano ra orou pupus no mokoondo' sumalula' ulun ondo' kuasaan ru guang mansasawa' nilai am mangiis ilo poyo ramuyun. 4Konilo ra, “Bantu' ru Tuhan ra matong Io saguli'. Ati Io? Kalio nai. Kinamatuaan takali namagatoi noyo, kaa' ngaangai' ti mogondo' ayuk koson ra talimpuun i, paat ra tana' ti biningkal!” 5 Ilo ti sumingon mangimpai ra minimpuun ra bala' ri Aki Kapuuno' noyo limbowon am tana' ti nasauk ra galing i. Sinauk No tana' ti intor ra timug am nagayantanga' poyo ra timug; 6 am pinuso No ngaangai' suang ru tana' ti mansail ra rosob ra galing i. 7Kaa' alungin No limbowon am tana' ondo' soroi ra raino ti, suku' ra Orou Pangukuman, ioginio paat ra ilo solobon ra apui am ulun malaat pusoon.
8 Kaa' pabukat kau ngai' ondo' tagamin ku, pai' min liliani' gitio, songorou ra pangkaraan ru Tuhan mogondo' ayuk ra buoi saribu ngambilor am saribu ngambilor mogondo' ayuk ra buoi songorou; karuruo no mogondo' ayuk Riso. 9Tuhan kalo igondo' kabuoi manugut ra atan ondo' binantu' Nano. Kabalu' pana mokoondo' niayuk ulun mangkara' ra koson raginio. Kaa' sotopot no maginaa Io ra guang pantataan, sabap ra kalo masaga' Io ra sangulun pana pusoon. Masaga' Io ra ngaangai' ulun tumalikur intor ra tula.
10 Kaa' ratangan ru Tuhan no koson ra mantatakou rumatong. Paat ra orou raginio, limbowon lumiom mabaya' ra bolos mapuor kaga' am ngaangai' suang ru limbowon mosolob kapuso am ngaangai' suang ru tana' ti pana maliom. 11Amon ru koson ragitio noyo sauk ru pamupusan ra ngaangai' ti, kaayag kano mabaya' ra guang mapasau am mampakatasu' ri Aki Kapuuno', 12liliwa' ra akau magiginaa am mampakataki' ra orou pangukuman ri Aki Kapuuno'. Paat ra orou raginio limbowon makai' kosolob am intor ra lasu' ru apui ti lumiou ngaangai' suang nati. 13 Kaa' itakau ti maginaa ra atan ondo' binantu' noyo ri Aki Kapuuno'; ioginio limbowon am tana' bagu, ayanan ru ulun mongotopot.
14Intor poyo raginio, pabukat kau ngai' ondo' tagamin ku, liliwa' ra akau maginaa ra orou no, pirot kano mokoondo' ra guang mapasau koson kolondo' sala min ra saang ri Aki Kapuuno' am mobonsoi kau Riso. 15Karaa' min noyo guang pantataan ru Tuhan no rondo' kaluagan ondo' tinaakan ramuyun ra makaalap kau ra pamayagan. Gitio niayuk suang ru surat ri Paulus, pabukat ondo' tagamin takali, ra io nanulis ramuyun maya' ra kapintaran ondo' tinaakan ri Aki Kapuuno' no riso. 16Ralalom ru ngaangai' surat nano, masalok i Paulus nanulis intor ra baal raginio. Mokoondo' kukula' mapagon aration ralalom ru surat-surat no, am tayar raginio noyo kinulau ru ulun ondo' kalo makarati' toojo am ondo' kalo maikang pangintapatan. Baal raginio kalo makaimuag, nogondo' niayuk ra tayar ra bokon pana ralalom ru Buuk Kitab kulawon nilo niayuk koson raginio, kaa' gitio mangkinibit boo ra ilo galama' mapuso.
17Pabukat kau ngai' ondo' tagamin ku, nakapandai kano kalalair ra baal ragitio, ginio ra pagilalai' min. Pai' kau makinibitan ru kalayawan ru ulun malaat, saboi tatangon min boo pangintapatan min ra maikang no. 18Kaa' pai' min noyo labusi' togom tinaakan ri Jisus Kristus, Tuhan am Mamamayag takau, am pakaulig poyo toojo Riso. Gama' ru omporon Io raino am ra sabuoi-buoi no. Amin.
Currently Selected:
2 PITRUS 3: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.
