1 JUANIS 1

Ragu ru Tuhan ondo' maayag

1 Manulis akai ramuyun intor ra Ragu ru Tuhan ondo' mangani' ra kaayagan. Ragu ru Tuhan mokoondo' noyo intor ra talimpuun i. Norongog am nakito mai noyo galama' am naguut ru kalindu' mai. 2 Paat ra kaayagan no pinabala', nakakito akai Riso. Ginio nai ra akai mantunung ra ondo' nakito mai intor Riso, koson ra kaayagan mantilayun ondo' soroi nabaya' ri Ama', am ondo' pinabala' ramon. 3Atan ondo' nakito am norongog mai, ginio niayuk pabalaan mai ramuyun. Maa' raginio makaaya' kau ramon ra kaayagan moonsoi, masisimpung ri Ama' am Anak Nano, i Jisus Kristus. 4Tulisin mai gitio koson guang takau topot-topot maansukan.

I Aki Kapuuno' noyo sinda takau

5Gitio noyo tanou ondo' norongog mai intor ra Anak Nano am ondo' posoboyon mai ramuyun, ra i Aki Kapuuno' noyo sinda takau am ralalom Riso kolondo' kalandaman. 6Amon ru mindagu takau ra itakau ti siminimpung ra bayag Nano, kaa' sotopot no itakau maayag ralalom kalandaman, atan ondo' raguon am baalon takau no abau ayuk. 7Kaa' amon ru maayag takau ralalom ru binusasal ru sinda, koson ri Aki Kapuuno' soroi ralalom ru binusasal no, moonsoi kaayagan takau ra rondo' am bokon. Am sabap ra raraa' ri Jisus, Anak Nano, pinasasar, mampakapasau Io ritakau intor ra ngaangai' tula. 8Amon ru mindagu takau ra kolondo' tula takau, ragu ragitio abau ayuk, am kolondo' katapatan soroi ra guang takau. 9Kaa' amon ru mangiou takau ra tula takau ri Aki Kapuuno', intopoton No bantu' Nali ritakau am mambaal Io ra atan ondo' motopot; ampunon No tula takau am mangimpasau ritakau intor ra ngaangai' kalaatan. 10Kaa' amon ru mindagu takau kolondo' tula takau, manguu' takau ri Aki Kapuuno' magabau am Ragu Nano kalo soroi ra guang takau.

Currently Selected:

1 JUANIS 1: TMT

Highlight

Copy