2 PITRUS 1
1
1Surat ti intor raki', i Simon Pitrus, sangulun ulipon am rasul ri Jisus Kristus.
Gitio posoboyon ku ramuyun, pabukat kau sabap ra mansail ra katapatan ri Jisus Kristus io no i Aki Kapuuno', Mamamayag takau, mangintopot kau toojo mogondo' ramon. 2Gama' ru ruangin poyo ri Aki Kapuuno' barakat am pabansayan Nano ramuyun, sabap ra nakaulig kano Riso am niayuk i Jisus, Tuhan takau.
Pampiawan am pampilian ru Tuhan
3Ralalom ru kuasa' galama' Nano am niayuk ra kauligan takau Riso, nangani' i Aki Kapuuno' ritakau ra ngaangai' kaukapan, koson kaayagan takau mapabansuk Riso. Nampiau Io ritakau mangapu ra urumat am kinoonsoi Nano galama'. 4Ginio noyo ralan ri Aki Kapuuno' mangani' ritakau ra barakat ondo' maayo am ondo' kaansayin takau, sumugut ra bantu' Nano. Ralalom ru barakat ti noyo makapagiru' takau intor ra kalaayan malaat ra tana' ti am mokopogondo' boo paliso takau ri Aki Kapuuno'.
5Sabap raginio nai pirot kano koson pangintapatan min ri Kristus ruangin ra kaayagan matanda'; am kaayagan matanda' min ruangin ra kaintutunan. 6Am kaintutunan ruangin ra guang pantataan. Am guang pantataan ruangin ra guang tumaan ra kaimbalaan. Am guang tumaan ra kaimbalaan ruangin ra kaayagan ondo' mapabansuk ra guang ri Aki Kapuuno'. 7Am kaayagan min kasagain ri Aki Kapuuno' no, ruangin ra guang motogom ra ulun Kristian; am ginio ruangin ra guang motogom ra ngaangai' ulun. 8Amon ru ngaangai' ru ginio ruangin ra kaayagan min, maaru' kapandayan min intor ri Jisus Kristus, Tuhan takau, sumingkot am mokoonong. 9Kaa' osoi ayuk kolondo' paliso raginio, io ti mogondo' ra ulun kalo makakito, sabap ra nalilianan no ra inampun noyo tula nali ragili.
10Gino ra pabukat kau ngai', pirot kano mampakito ra kaayagan min ra piniau am pinili' kau ri Aki Kapuuno'. Sabap ra amon ru gitio noyo baalon min, kalo noyo lumugut kau. 11Koson raginio noyo ra iowon kau niayuk mumpos ra suruga', ioginio pamarintaan ru Tuhan am Mamamayag takau, i Jisus Kristus. 12Ginio puun ra aku masalok mampakara' ramuyun ra baal raginio, iou pana makapandai kano am niayuk mangintopot toojo ra katapatan ondo' inila' noyo ramuyun. 13Buoi ra aku maayag, moonsoi niayuk ru mampakara' aku ramuyun intor ra baal raginii. 14Sabap ra nakapandai aku ra kalo boo mabuoi am matoi aku no, sumugut ra atan ondo' pinabala' raki' ri Jisus Kristus, Tuhan takau. 15Ginio ra mirot aku toojo mampakara' ramuyun ra pangilaan raginio, kabalu' pana ra aku kalio boo.
Sasi' ru katulayan ri Kristus
16Paat ra akai nambala' ramuyun ra kuasa' am ratangan saguli' ru Tuhan takau i Jisus Kristus, kalo noyo liminansan akai ra tutunungon ondo' binaal-baal ayuk ra ulun. Kaa' akai noyo galama' nakakito ra kuasa' ri Jisus Kristus no. 17 Soroi akai ra giu' i paat ra Io inurumat am inanian ra kuasa' ri Aki Kapuuno', Ama' takau. Paat ragili, norongog ra bolos ru Io Ondo' Matulai Kaga', kon Nano, “Gitio noyo Anak tagamin Kutu am Io no kaansayan Kutu toojo.” 18Akai galama' nakaining ra bolos intor ra suruga' paat akai nababaya' Riso giu' ra gunung matulai.
19Ginio boo ra mangintopot akai no toojo ra bala' ondo' pinasaboi ru nabi-nabi ragili. Ginio ra moonsoi ru karaan min toojo bala' ti, ondo' koson ra pilasut suminda ra intok molondom. Am karaan ginio suku' ratangan saguli' Nano, ondo' koson ra butitin ru sirangon paat ra matawang – Io mampaulig toojo ramuyun ri Aki Kapuuno'. 20Kasaa' toojo karaa' min gitio: Arati' ru bala' ondo' pinasaboi ru nabi-nabi ralalom ru Buuk Kitab kalo noyo maalap kaintutuni' maya' ra pamaguangan takau galama'. 21Kaa' kalo noyo igondo' bala' ri Aki Kapuuno' pinasaboi maya' ra kasagaan ru guang ru ulun ayuk. Kaa' Ambiluo ri Aki Kapuuno' noyo ondo' nanguasa' ra ulun paat ra ilo nampasaboi ra bala' intor ri Aki Kapuuno' ragili.
Currently Selected:
2 PITRUS 1: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.
