1 SAMUIL 2

Pakiasian ri Ana

1 Kopongo raginio pakiasi' i Ana,

“Napakaansuk Tuhan no ra guang kutu;

mapara' boo bansuk kutu,

sabap ra atan ondo' binaal Nano raki'.

Raino kuritin ku pantula' kuno;

mapara' boo bansuk kuno

sabap ra nangindangan noyo i Aki Kapuuno' no raki'.

2“Kolondo' sangulun pana matulai koson ra Tuhan;

kolondo' mokogondo' Riso;

i Aki Kapuuno' takano ayuk makapanaak ra panindungan.

3Langgai' noyo ragu muno ra malilimbau,

pai' indagu ra ragu masumbung.

Sabap ra Tuhan no i Aki Kapuuno' Ondo' Makapandai Kaga',

mangakim Io ra ngaangai' baalon ru ulun.

4Napandak noyo busur ru saujor ondo' mapanggol,

kaa' nasauk boo ulun ondo' malawo ra mapanggol.

5Ulun ondo' naasug ragili,

raino ti moonsoi mangandoi ra maginakan;

kaa' ondo' nangaitilan ragili, raino ti nangaasug boo.

Andu' ondo' tabanang naganak ra tulu' ngaulun anak,

kaa' ina' ondo' makaanak ra masuang,

tinatang am pinoloso naimbolo'.

6 Tuhan no mamatoi ra ulun,

am Io niayuk mamayag risilo.

Io mangator ra ulun mongoi ra intok ru ulun namagatoi,

am Io niayuk magibit risilo saguli'.

7 Tuhan no mangkinibit ra santayaran ru ulun musikin,

am bokon no pasaukon ra langkaya'.

Io mapainggana' ra santayaran ru ulun,

am bokon no painsawaton.

8Io mangkayang ra ulun musikin intor ra kaimbalaan,

am Io mapalabus ra ulun asabin intor ra kaimbalaan.

Ilo pasaukon ra rangan ru ulun mangaatang ondo' makapangkat,

am aniin ra intok maatang kaga'.

Lonor ru tana' ti longgom ru Tuhan,

giu' ra ralimbou ru lonor no, tinirong no tana' ti.

9“Manindung Io ra kaayagan ru ulun Nano ondo' gumagaya',

kaa' ulun malaat mapuso ralalom ru molondom kaga'.

Ra kaikangan galama', ulun kalo makasugut.

10Pantula'-pantula' ru Tuhan mapuso;

maningkalur Io intor ra limbowon koson gumula' risilo.

Mangakim Tuhan no ra titikop ru tana' ti;

Manaak Io ra kuasa' ra raja',

am manaak ra kamanangan ra raja' pilion Nano.”

11Kopongo raginio minuli' i Ilkana ra baloi nano giu' ra Rama, kaa' i Samuil, anak no minayan giu' ra Silo am mangandoi ayuk ra Tuhan inalungan ru Imam Ili.

Anak-anak ri Ili

12Anak-anak ri Ili malaat kaga'. Kalo mampalio ilo ra Tuhan. 13Ilo niayuk kalo mampalio ra aturan intor ra ondo' kitaakon ru imam intor ra ulun ru Israil. Kaa', amon ru mokoondo' ulun ondo' mapataak ra taak simbalui, ulipon ru imam no matong liliwa' magibit ra garapu' talu tutujok. Buoi ru kual no tonokon, 14patujokon ru ulipon no garapu' no ra pagangan, intok nangansakan ra kual no. Atan ayuk ondo' asakin no ra garapu' no masauk ra longgom ru imam. Ngaangai' ulun ru Israil ondo' matong ra Silo koson mapataak ra taak simbalui no koson raginio pamakuan no. 15Mambai-ambai poyo, ulipon no matong ra kalo poyo malilip lomok ru bibiag no koson solobon, am mindagu io ra ulun ondo' mapataak ra taak simbalui no, “Taaki' kual ondo' makata' ayuk poyo no ra imam maa' raginio solobon no; kalo masaga' io mangapu ra kual ondo' tinanok noyo.”

16Amon ru tumaam ulun no, “Moonsoi gagayaan takau aturan am solobon galing lomok no; malupus raginio alapon mu boo atan ondo' kasagaan muno,” am mindagu ulipon no, “Kalo! Taaki' kual no raki' raino niayuk! Amon ru kalo, jajalin ku alapo'.”

17Koon raginio noyo karuruo anak ri Ili no makatula ra maayo ra pagilangan ru Tuhan, sabap ra magasab ilo ra taak simbalui no ra tayar ru Tuhan.

I Samuil giu' ra Silo

18Liliwa' raginio, i Samuil ondo' lalaing ayuk poyo narayus mangandoi ayuk ra Tuhan. I Samuil nambayang ra bayang timpok intor ra konoon linon, koson ra bayang sambayang ru imam-imam. 19Moonong bilor ina' ri Samuil mambaal ra sukub boborok, am sukub no pataakon ri Samuil paat ra ina' no matong mabaya' ra ralaki nano koson mapataak ra taak simbalui ra kabilaran. 20Barakato' boo ri Ili no i Ilkana am andu' nano, am niayuk mindagu ri Ilkana, “Gama' ru Tuhan no manaak rirun ra anak ra bokon intor ra andu' muno ragitio, koson suali ru anak ondo' pinataak min noyo ra Tuhan.”

Kopongo raginio minuli' ilo ra Rama.

21Binarakat i Ana ru Tuhan, am i Ana pana naganak ra talu ngaulun anak ungkuyon am ruo ngaulun anak ruandu'. I Samuil pana siminukor liliwa' io mangandoi ayuk ra Tuhan.

I Ili am anak-anak nano

22I Ili ti matutuo noyo kaga'. Masalok io mokorongog ra ragu intor ra binaal ru anak-anak nano ra ulun ru Israil. Nakapandai niayuk i Ili ra ilo riminulug ra ruandu'-ruandu' ondo' mangandoi giu' ra kulobon ru Kim ru Tuhan. 23Ginio ra indagu i Ili ra anak-anak nano, “Binalaan aku noyo ru moonong ulun intor ra kalaatan ondo' binaal mino. Kua kia baalo' min ginio? 24Pai' min boo inganai' ginio, anak kau. Malaat kaga' baal ondo' rinagu ru ulun ru Tuhan no intor ramuyun. 25Amon ru sasangulun no makatula ra ulun, saungon io ri Aki Kapuuno'; kaa' amon ru sasangulun no makatula ra Tuhan, osoi kia boo makasaung riso?”

Kaa' anak-anak ri Ili no kalo mampalio ra bilin ru ama' nilono, sabap ra namatas noyo Tuhan no koson mamuso risilo.

26 Kaa' i Samuil, anak no, gumaai sukor am kasagain poyo ru Tuhan am niayuk ru ngaangai' ulun.

Ragu inala' intor ra sasambaloi ri Ili

27Sangarawan raiti sangulun nabi minatong ri Ili am nampasaboi ra tanou intor ra Tuhan. Kon ru nabi no, “Indagu Tuhan, ‘Paat ra kinamatuaan muli i Arun am sasambaloi nano nasauk ra ulipon ru raja' ru Misir, minintalang Aku ri Arun. 28 Intor ra ngaangai' bansa' ru Israil, pinili' Ku sasambaloi nano nasauk ra imam Kuno koson mangandoi giu' ra altar, monolob ra kaminyan, am mambayang ra efod paat makitulu' intor Raki'. Nanaak Aku risilo ra pangiawan koson mangalap ra santayaran intor ra taak simbalui ondo' solobon ra rasawat ru altar. 29Kaa' kua kia lakat kou poyo mangangkum ra taak am taak simbalui ondo' pinataak ru ulun Kuno Raki'? Mapataak ilo ra ngaangai' no Raki' sumugut ra susuban Kuli risilo. Okou Ili, kua kia okou mangurumat poyo ra anak-anak muno intor ra mangurumat Raki', am nompoloso risilo liminomok ra tayar moonsoi kaga' intor ra moonong taak simbalui ondo' pinataak ru ulun Kuno Raki'? 30Aku Tuhan, i Aki Kapuuno' ru Israil, ragili nambantu' ra sasambaloi am bansa' muno mangandoi Raki' koson ra imam ra mantilayun. Kaa' raino kalo boo masaga' Aku raginio! Ilo ondo' mangurumat Raki' no urumaton Ku, am ilo ondo' magasab Raki' no asabin. 31Rongogo', masaboi paat no ra mamatoi Aku ra ngaangai' ungkuyon intor ra sasambaloi am bansa' muno, saboi kolondo' boo sangulun pana ungkuyon intor ra sasambaloi muno ondo' maayag saboi matutuo. 32Mangiluk guang am mangusolon kou magilong ra ngaangai' barakat ondo' taakin Kuno ra ulun bokon ra Israil, am ralalom ru sasambaloi muno galama' ngaangai' ulun matoi ra mamulok. 33Kaa' sangulun intor ra papag muno polosoon Ku maayag, am mangandoi io Raki' ra tayar ru imam. Kaa' moolou io am maayag ra malumpus guang. Ngaangai' ru papag muno ra bokon no potoyon ra moporos. 34 Paat ra karuruo anak muno, i Gopni am i Pinigas, matoi ra nogondo' orou, bagu no malimanan mu ra ngaangai' ondo' raguon Kutu totopot masauk. 35Mampili' Aku ra sangulun imam ondo' gumagaya' Raki' am ondo' mambaal ra ngaangai' ru susuban Kuno. Manaak Aku riso ra papag ondo' magail mangandoi tayar ra imam ra raja' ondo' pilion Kuno. 36Moonong ra papag muno ondo' lakat poyo maayag mongoi ra imam no koson makitaak ra ruit am akanon. Makitaak io maa' raginio paindanganon ra imam-imam koson makaalap ra akanon ioupana ru sambayut ayuk.’ ”

Currently Selected:

1 SAMUIL 2: TMT

Highlight

Copy