1 SAMUIL 1
1
I Ilkana am sasambaloi nano giu' ra Silo
1Mokoondo' sangulun ungkuyon inggalan no i Ilkana. Ioti intor ra bansa' ru Ipraim ondo' minayan giu' ra bandar Rama, tampilon ra kabuluran Ipraim. I Ilkana ti anak ri Jirogam am akupu ri Iligu. I Ilkana ti intor ra sasambaloi ri Togu, rondo' ra sasambaloi intor ra bansa' ru Jup. 2Ruo ngaulun andu' ri Ilkana, i Ana am i Pinina. I Pinina ti makaanak kaa' i Ana kolondo'. 3Moonong bilor mintor i Ilkana ra Rama am mongoi ra Silo koson sumambayang am mapataak ra taak simbalui ra Tuhan Ondo' Maayo Kaga' Kuasa'. Giu' ra Silo, i Gopni am i Pinigas, iloti anak ri Ili, nasauk ra imam ru Tuhan. 4Moonong ri Ilkana napataak ra taak simbalui, nangani' io ri Pinina ra santayaran ra kual ru taak simbalui no am santayaran ra moonong anak nano. 5Kabalu' pana motogom kaga' i Ilkana ri Ana, nangani' i Ilkana riso ra rondo' tayar ayuk ru kual, sabap ra Tuhan kalo nanaak riso ra anak. 6Masalok i Ana sindualin am asabin ri Pinina, paguntu nano sabap ra Tuhan kalo nanaak ri Ana ra anak. 7Baal raginio nasauk ra bibilor buoi no. Pogonong ra ilo minongoi ra baloi ru Tuhan, masalok i Pinina naparuol ra guang ri Ana saboi mantangi' i Ana am marara' mangakan ra atan pana. 8Moonong boo raginio ralaki nano i Ilkana mangkuot riso, “Ana, kua pantangi' kou? Kua karara' kou mangakan? Kua masalok mangiluk guang? Sala' ka kia aku ti maatang poyo rirun intor ra mopor ngaulun anak ungkuyon?”
I Ana am i Ili
9-10Sangarawan raiti, pakaakan ilo giu' ra baloi ru Tuhan ra Silo, ingkakat i Ana intor ra intok pagakanan. Paat raginio soroi i Imam Ili niayuk giu' ra baloi ru Tuhan, tuturung ra kurisi' nano mamaar ra kulobon. Mabaya' ra mangiluk kaga' guang, pakiasi' i Ana ra Tuhan liliwa' sisingut nantangi'. 11 Kopongo raginio rinagu ri Ana rondo' bantu', kono, “Iou Tuhan Ondo' Maayo Kaga' Kuasa', ilai' noyo ulipon Mutu. Ilai' noyo kapaganan kutu, am karaa' aku no. Pai' aku liliani'. Amon ru manaak Kou raki' ra sangulun anak ungkuyon, bantuon ku ra mapataak riso Rirun buoi ru bayag nano, am abuk nano kalo lamparin.”
12Nabuoi kaga' i Ana nakiasi' ra Tuhan, am buoi raginio inilayan ri Ili kabang ri Ana. 13Nakiasi' i Ana ra ralalom ru guang; ginio ra bibil nano ayuk ondo' kukuniam kaa' bolos nano kalo morongog. Ginio ra indoson ri Ili nagauk io. 14Kopongo raginio indagu i Ili riso, “Pai' gauk ragiti! Pai' boo panginum ra wain!”
15Taam i Ana, “Tuan, kalo nagauk aku. Kalo nanginum aku ra wain. Aku ti malumpus guang, am tatanga' aku makiasi' koson mapaingkual ra suang ru guang ra Tuhan. 16Pai' pangkara' ra aku ti ruandu' jajajou. Makiasi' aku koson ragitio sabap ra mangiluk kaga' guang kutu.”
17Indagu boo i Ili, “Amon ru koson raginio, uli' no ra kaansayan. Gama' ru i Aki Kapuuno' ru Israil mangiou ra kitaakon muno.”
18Indagu i Ana, “Gama' ru makaalap aku ra kimasi' muno.” Kopongo raginio ugar i Ana intor ra giu' no, am pangakan am kalo boo mangiluk guang.
I Samuil inanak am pinataak ri Aki Kapuuno'
19Suabon raginio, i Ilkana am sasambaloi nano kiminarat ra mataki'. Pakasambayang ilo ra Tuhan, uli' ilo ra Rama. Narulug i Ilkana ra andu' nano i Ana, am iniou ru Tuhan pakiasian ri Ana. 20Maapang i Ana am naganak ra sangulun anak ungkuyon. Ininggalanan ri Ana anak nano ri Samuil, sabap ra kono, “Nakitaak aku noyo intor ra Tuhan.”
21Kopongo raginio nasaboi noyo paat ri Ilkana am sasambaloi nano mongoi poyo ra Silo koson mapataak ra taak simbalui kabilaran ra Tuhan. Suai raginio nabantu' noyo i Ilkana koson mapataak ra rondo' taak simbalui ra lilion ayuk. 22Kaa' raino ti kalo minaya' i Ana. Indagu io ra ralaki nano, “Lumonggo' ayuk i Samuil ti ra tumiti', ibiton ku io ra baloi ru Tuhan, am mayan io ra giu' no ra buoi ru bayag nano.”
23Indagu i Ilkana, “Iou, baalo' noyo ondo' ilain mu ra moonsoi. Soroi no ra baloi ti saboi anak tano lumonggo' ra tumiti'. Gama' ru mambaal Tuhan ra bantu' muno totopot masauk.” Siminoroi boo i Ana ra baloi saboi ra anak nano liminonggo' ra tumiti'.
24Pokolonggo' anak no ra tumiti', inibit io ri Ana ra baloi ru Tuhan giu' ra Silo. Paat raginio i Samuil no boborok ayuk poyo kaga'. Nagibit niayuk i Ana ra kukula' ngainan sapi' gawayan ondo' umur no talu ngambilor, mopor ngakilogram tapung gandum, am sakantungan ru kungkung wain. 25Kasimbalui nilo sapi' no, atari' nilo i Samuil no ri Ili. 26Indagu i Ana ri Ili, “Tuan, lakat mu poyo kia makara' aku? Aku noyo ruandu' ondo' nakito muli minigor ragiti ragili, ondo' nakiasi' ra Tuhan. 27Kinitaak ku anak ragitio intor ra Tuhan, am nangiou Io ra kinitaak kuli. 28Ginio ra pataakon ku anak ti ra Tuhan. Anak ti masauk ra longgom ru Tuhan ra buoi ru bayag nano.”
Kopongo raginio sambayang ilo ra Tuhan ra giu' no.
Currently Selected:
1 SAMUIL 1: TMT
Highlight
Share
Copy
Want to have your highlights saved across all your devices? Sign up or sign in
Hakcipta © Bible Society of Malaysia, 2013.
