Ciyubunuzyo 9
9
Mweembo wasanu mbuwakalila. Cilenagano cacisozi
1 #
Ciy 8:10; 20:1 Lino angelo wasanu naakalizya mweembo, ndakabona inyenyeezi iiwide ansi kuzwa kujulu, nkabela wakapegwa cijaluzyo camulindi uutagoli, 2#Matl 19:28; Kul 19:18; Joel 2:2,10Elyo wakajula mulindi uutagoli, mpawo kwakazwa busi kumulindi mbuli busi bwabbila lyamulilo, nkabela lyakasizigwa izuba, awalo muuwo, nkaambo kabusi bwamumulindi. 3#Kul 10:12-15Elyo kubusi kwakazwa cikwikwi, cakeenda ansi, cakapegwa inguzu mbubonya mbuli inguzu zyatubanze nzitujisi ansi. 4#Ezk 9:4; Ciy 7:3Lino eco cikwikwi cakalaililwa kuti citanoobisizyi bwizu bwaansi, niciba cintu cimwi citete, nuuba musamu uuli buti, pele abo bantu balike batajisi citondezyo ca-Leza cigwalidwe kunkumu zyabo. 5Teecakazumizigwa kubajaya, pele kubapenzya-penzya buyo myeezi yosanwe, nkabela kupenzyapenzya kwaco kwakali mbuli kupenzya-penzya kwakabanze nokaluma muntu. 6#Job 3:21; Jer 8:3; Lk 23:30Mumazuba ayo bantu bayooyandaula lufu pele tabakalwani, bayooyandisya kufwa pele lufu luyoobacija. 7#Joel 2:4Lino ciimo cacikwikwi cakalikozyenye ambizi zibambilwa inkondo, alimwi amitwe yaco akali misini iili mbuli ingolida, aalo masyu aaco akalikozyenye amasyu aabantu. 8#Joel 1:6Masusu aaco akali mbuli masusu aabanakazi, ameno aaco akalikozyenye ameno aabalavu. 9#Joel 2:5Nkabela cakalijisi zivunyo zyacamba zili mbuli zivunyo zyalubulo, alimwi muzumo wamababa aaco wakali mbuli muzumo wanola zinji ambizi zizuzaanina kunkondo, 10Cakalijisi micila mbuli tubanze, yakali alumoola, nkabela mumonya mumicila yaco muzibede inguzu zyaco zyakupenzya-penzya bantu myeezi yosanwe, 11Alimwi cilijisi mwami waco, ngu-angelo wamulindi uutagoli, izina lyakwe muci-Hebrayo ngu-Abadoni, pele muci-Helene nguApoliyoni.
12 #
Ciy 8:13; 11:14 Ipenzi lyomwe lyamana, lino amubone, mapenzi obile aciza musule.
Mweembo wamusanu aumwi mbuwakalila. Cilengano cambizi
13 #
Kul 30:1-3; Ciy 8:3 Lino angelo wamusanu aumwi wakalizya mweembo, nkabela ndakamvwa ijwi lizwa kumeja one aacipaililo cangolida cili kunembo lya-Leza, 14#Matl 15:18; Dt 1:7; Jos 1:4; Ciy 16:12lyamwaambila oyo angelo wamusanu aumwi iwakajisi mweembo kuti, Amwaangulule baangelo bone baangidwe mumulonga mupati Ufrate, 15#Ciy 8:7-12Mpawo bakaangululwa baangelo bone ibakabambilidwe kukaindi komwe akubuzuba bomwe akumweezi omwe akumwaaka omwe kuti bajaye cipanzi catatu cabantu. 16Nkabela mweelwe wabasinkondo basimbizi bakali myaanda yobile yazyuulu zyazyuulu. Lino ndakaswiilila mweelwe wabo. 17Lino mucilengano cangu mboobu mbundakabona imbizi abaabo ibakakede alinzizyo. Basimbizi bakalijisi zivunyo zyacamba, zimwi zyakasalala mbuli mulilo, zimwi zyakasia mbuli iakinte, azimwi zyakali mbuli sulufa. Alimwi mitwe yambizi yakali mbuli mitwe yabalavu, nkabela kumilomo yazyo kwakazwa mulilo abusi asulufa. 18Lino cipanzi catatu cabantu cakajayigwa azipenzyo ezi zyotatwe izyakazwa kumilomo yazyo, mulilo abusi asulufa. 19Nkaambo inguzu zyambizi ezyo zili mumilomo yazyo amumicila yazyo, ikuti micila yazyo ili mbuli inzoka, ilijisi mitwe, njiyonya njizicisya. 20#Int 115:4-7; 135:15-17; Dan 5:4,23; Is 2:8,20; 17:8; 1 Kor 10:20; Ciy 16:9,11,21Lino kwakasyaala bamwi bantu ibatakajayigwa azipenzyo ezi, nekubaboobo teebakeempwa kumilimo yamaanza aabo, teebakaleka kukomba badaimona azibumbe zyangolida azyansiliva azyamukuba azyamabwe azyazisamu, zitakonzya kubona nikuba kweenda nikuba kumvwa, 21#2 Bam 9:22alimwi teebakeempwa kubujayi bwabo nikuba kubulozi bwabo nikuba kumamambi aabo nikuba kububbi bwabo.
Currently Selected:
Ciyubunuzyo 9: Ibbaib63
Highlight
Share
Copy
Want to have your highlights saved across all your devices? Sign up or sign in
The Bible in Tonga (Zambia) © United Bible Societies, 1963.
