Ciyubunuzyo 5

Ibbuku ilyakanamatikwa azinamatizyo zili musanu azibili

1 # Ezk 2:9-10; Is 6:1; 29:11; Int 47:8; Ciy 4:2 Elyo mujanza lyalulyo lyayooyo iwakakede acuuno cabwami ndakabona ibbuku ilyakalembedwe koonse koonse, mukati aatala, lyakanamatikwa azinamatizyo zili musanu azibili. 2Lino ndakabona angelo muyumu uloongolola ajwi ipati wati, Nguni uuelede kuvununa ibbuku akunamatula zinamatizyo zyalyo? 3Nkabela katakwe muntu, nikuba kujulu naaba ansi nikuba kunsi anyika, iwakakonzya kuvununa ibbuku nanka kulilanga. 4Lino ndakalilisya loko nkaambo katakwe muntu wakajanwa uuelede kuvununa akubala ibbuku nanka kulilanga, 5#Matl 49:9; Is 11:1,10; Ciy 22:16Elyo umwi wabapati wakandaambila kuti, Utalili. Bona, Mulavu wamusyobo wa-Juda, cisyuukila camuyanda wa-Davida, nguwe iwakazunda kuvununa ibbuku akunamatula zinamatizyo zili musanu azibili.

Johane mbwaakabona Mwanambelele wa-Leza

6 # Is 53:7; 11:2; Joh 1:29,36; Ciy 4:5; Zek 4:10 Lino akati kacuuno cabwami aakati kabanyama bone aakati kabapati ndakabona Mwanambelele, uliimvwi mbuli mbwaakajayigwa, wakalijisi meja aali musanu aabili ameso aali musanu aabili. Aya meso njemyuuya ya-Leza iili musanu aibili iitumidwe munyika yoonse. 7#Is 6:1; Int 47:8Lino Mwanambelele oyo wakasika, wabweza ibbuku kujanza lyalulyo lyayooyo uukede acuuno cabwami, 8#Int 141:2; Ciy 14:2; 15:2; 8:3,4Nkabela naakalibweza ibbuku, banyama bone abapati bali makumi obile abane boonse bakaliwaala ansi kunembo lya-Mwanambelele, alimwi umwi aumwi wabo wakalijisi kantimbwa, amitiba yangolida iizwide tununkilizyo, otu nzenkombyo zyabasalali. 9#Int 33:3; 98:1; 144:9; Is 42:10Mpawo bakaimba lwiimbo lupya lwakuti,

Nduwe uuelede kubweza ibbuku,

Akunamatula zinamatizyo zyalyo.

Nkaambo nduwe wakayaswa akutufutula kuli-Leza abulowa bwako,

Swebo tebantu bamisyobo yoonse amilaka yoonse amikowa yoonse,

azisi zyoonse,

10 # Kul 19:6; Ciy 1:6; 20:6; 22:5; Is 61:6 Akutubika mbuli bami abapaizi ba-Leza wesu,

Nkabela tuyooendelezya ansi.

11 # Dan 7:10; 1 Bam 22:19 Lino nindakalanga, ndakamvwa kuyowela kwabaangelo banjibanji bazyungulukide cuuno cabwami abanyama abapati. Mweelwe wabo boonse bakainda zyuulu zili ikumi zyazyuulu zili ikumi, azyuulu zyazyuulu. 12#Is 53:7; 1 Mak 29:11; Flp 2:8-10Bakaamba ajwi ipati bati,

Uelede Mwanambelele iwakajayigwa,

Uelede kutambula bwami abuvubi abusongo,

Anguzu alulemeko abulemu azilongezyo.

13 # Is 6:1; Int 47:8 Alimwi ndakaswiilila balenge boonse bakujulu abaansi abakunsi anyika abamulwizi, azintu zyoonse zili mumo, balaamba bati, Zilongezyo alulemeko abulemu anguzu, azibe kulinguwe uukede acuuno cabwami aku-Mwanambelele lyoonse lyoonse. 14#Ciy 4:10; 19:4Lino banyama bone bakati, Ameni. Abalo bapati bali makumi obile abane bakaliwaala ansi akukomba.

Currently Selected:

Ciyubunuzyo 5: Ibbaib63

Highlight

Copy