Ba-Filipi 2

Ulabakombelezya kuyandana cakulibombya mbubonya mbwaakalibombya Kristo

1Lino na mulijene lugwasyo muli-Kristo, na muli aluyando lwakutontozya moyo, na mulipedwe caabilo ca-Muuya, alimwi na muli amyoyo yabuuya alweetelelo, 2ndakumbila kuti mundipe olu lukondo luzulide lwakuziba kuti mulikede abuyanzane bomwe, akuyandana aluyandisyo lomwe, camoyo omwe acakuyeeya comwe. 3#Gal 5:26; Rom 12:10Mutaciti cintu niciba comwe cabbivwe nanka cakulisumpula, pele umwi aumwi akati kanu alibombye mumoyo, akuyeeya kuti mweenzuma mubotu kwiinda ndime, 4#1 Kor 10:24,33Tamweelede kuyeeya kuligwasya nubeni luzutu, pe, umwi aumwi uleelede kwiingasila kugwasya mweenzinyina.

5Amube amoyo oyo nguwenya iwakali muli-Kristo Jesu, 6#Joh 1:1,2; 17:5; Matl 1:27; 3:5Walo wakali aciimo ca-Leza, nekubaboobo teewakayeeya kuti ncivuumuko kweelana a-Leza, pe. 7#Is 53:3; 2 Kor 8:9; Heb 2:14,17Wakalilonzya, wakalisalila ciimo cabuzike akuba mbubonya mbuli bantu balya maila. 8#Heb 12:2; 5:8; Joh 10:17Lino naakabonwa kuti waba acikozyano camuntu, wakalibombya akuzumina nikuba kufwa, nkukuti kufwa kwakubambulwa aciingano. 9#Inc 2:33; Ef 1:21; Heb 1:3,4Nciceeco Leza ncaakamusumpula akumupa izina ibotu kwiinda mazina oonse, 10#Is 45:23; Joh 5:23; Ciy 5:13kuti boonse bafugame mazwi cakulemeka izina lya-Jesu, nibaba baansi nibaba bakujulu nibaba bali kunsi anyika, 11alimwi kuti indimi zyoonse zizumine kuti Jesu Kristo ngu-Mwami cakulemeka Leza Taateesu.

Baleelede kupangika myoyo yabo kumakani aalufutuko

12 # 1 Pet 1:17; Int 2:11 Lino bayandwi bangu, mbuli mbumuswiilila lyoonse, teensi kwaamba kuciindi ncendiwo luzutu pele cakwiinda loko kuciindi ecino ncensiwo, ndakumbila kuti musungwaale kukulibelekela lufutuko lwanu cakuyoowa acakuzyangama. 13#Joh 15:5; 2 Kor 3:5; 1 Tes 2:13Nkaambo ngu-Leza uubeleka mumyoyo yanu, mbuli mbwayanda, akumupa inguzu zyoonse nzimubula niziba zyakukanza niziba zyakucita, 14#1 Pet 4:9Zintu zyoonse nzimucita zitabi zyakutongooka nanka zyakukazyanya, 15#Dt 32:5; Mt 5:14; 10:16; Flp 1:10; Ef 5:8; Dt 32:5; Inc 2:40kuti mube bantu batakwe mulandu, bantu benibeni, bana ba-Leza baluzi batakwe kampenda, mukati kabantu bapilingene baleede bamuzukulu uno. Akati kabaaba mulaba mbuli mimuni yakumunika ansi. 16#1 Tes 2:19; Gal 2:2; Is 49:4; 65:23Amujatisye ijwi lya-Leza, kuti nkamukankaizizye lyoonse mane do kusikila kubuzuba bwa-Kristo, akuziba kuti lusiyano ndunzuzaana amilimo njimbeleka tazyeensi zyabuyo. 17#Rom 15:16; 2 Tim 4:6Ncobeni nikuba kuti buumi bwangu bwatililwa acipaizyo calusyomo lwanu ncimutuulila Leza, nzookondwa akusekelezyanya anywe. 18#Flp 3:1; 4:4Anywebo muleelede kukondwa mbubonya akusekelezyanya ambe.

Makani aa-Timoteo

19Pele ndalangila ku-Mwami Jesu kuti nzoofwambaana kumutumina Timoteo, kuti moyo wangu uzoobe alukondo lwakumvwa makani aanu. 20#1 Kor 16:10Nkaambo taakwe umbi uuli amoyo mbuli nguwe uukonzya kumususunkana alususunkano lwinilwini. 21#2 Tim 4:10,16; Gal 4:17Ikuti boonse buyo balayeeya kuligwasya beni luzutu, tabayeeyi makani aa-Kristo Jesu pe. 22Pele mulibwene ziyanza zyakwe mbuzibede, mulizi kuti mbubonya mbuli mwana mbwabelekela wisi, alakwe wabelekela ndime cakugwasya milimo ya-Makani Mabotu. 23Lino ngonguwe ngunjeeya kutuma, ndabona na makani aangu alaba buti, 24#Flp 1:25Pele moyo wangu ulasyoma loko mu-Mwami kuti ambebo nzoofwambaana kusika ndemwini.

Makani aa-Epafrodita

25 # Flp 4:18 Pele ndakayeeya kuti kuleelede kumutumina Epafrodita mukwesu, simulimoma, silumambama, nguwenya apostolo wanu asimilimo wanu wakukutaukila ndime, 26Nkaambo wakali kumusukamina nyoonse, alimwi wakalizumbide loko cakuziba kuti mulimvwide makani aakuciswa kwakwe. 27Ncobeni wakali kuciswa loko, kali afwiifwi akufwa, pele Leza wakamufwida lweetelelo, nkabela teensi nguwe luzutu iwakeetelelwa pe, ndakeetelelwa ambebo, kuti entayungizizigwi aamwi mapenzi atala ayaayo ngenjisi kale. 28Nciceeco ncindainda kusungwaala kumutuma, kuti mwazoomubona, alimwi muzookondwe, nkabela ambebo buusu bwangu bumane. 29#1 Kor 16:16; 1 Tim 5:17Lino amumutambule mu-Mwami cakukondwa, Muleelede kulemeka bantu bali mbuli nguwe, 30ikuti wakali afwiifwi kufwa nkaambo kamilimo ya-Kristo, wakalitakata buumi bwakwe kuti azuzye eyo milimo yakugwasya ndime niimwakakacilwa nywebo.

Currently Selected:

Ba-Filipi 2: Ibbaib63

Highlight

Copy