Marko 8

Jesu mbwaakasanina lwabili bantu banji

(Matayo 15:32-39)

1 # Mt 15:32-39 Kuciindi eco alimwi kwakabungana makamu manji aabantu, bakabula cakulya, elyo wakaliitila basikwiiya bakwe, wabaambila kuti, 2#Mk 6:34-44Ndafwida luzyalo aba bantu banji, nkaambo balikede kulindime mazuba otatwe, akulya pe. 3Kuti ndabamwaisya mwabo mwabo kabacifwide inzala, banooya bulengauka munzila, alimwi bamwi bazwa kule. 4Lino basikwiiya bakwe bakamuvwiila kuti, Ino kai omuno musokwe zizwe kuli zilyo zyaku-kusya bantu boonse aba? 5Mpawo wakababuzya kuti, Ino mujisi mikamu yongae? Bakati, Ili musanu aibili. 6Mpoonya wakaambila bantu kuti bakale ansi, elyo wakabweza eyo mikamu iili musanu aibili, walumba, waikomona, waitambika basikwiiya bakwe kuti baabile bantu, nkabela bakaabila makamu. 7Alimwi bakalijisi tuswi tuce. Lino wakalumba, wakaamba kuti baabile ntuto atwalo. 8#Dt 28:5Mpoonya bakalya cakukuta, alimwi bakayola bufwefwelenga busyaala, bazuzya mbubo insuwo zili musanu azibili. 9Nkabela bantu bakali mbuli zyuulu zyone. Mpoonya awo wakabamwaisya. 10Lino ndilyonya wakanjila mubwaato antoomwe abasikwiiya bakwe, bakainka kucisi ca-Dalmanuta.

Bumena bwaba-Farisi

(Matayo 16:1-12)

11 # Mt 16:1-12 # Mt 12:38; Lk 11:16; Joh 6:30 Lino kwakeza ba-Farisi, bakatalika kumuzumanika, akuyandaula kulinguwe citondezyo cizwa kujulu, cakumusunka. 12#Mt 12:39; Lk 11:29Nkabela wakalisintimukila, wakati, Ino aba basyaasunu bayandilanzi citondezyo? Ncobeni ndamwaambila kuti, Aba basyaasunu tabakoozoopegwa citondezyo pe. 13Mpoonya wakabasia, wabweeda mubwaato, wainka mutala.

14Nkabela bakaluba kubweza kulya. Mubwaato mobakabede kamutakwe cintu pele mukamu omwe buyo. 15#Lk 12:1; Mk 3:6Elyo wakabaambila kuti, Amucenjele kubumena bwaba-Farisi akubumena bwa-Heroda. 16Lino bakatalika koombolozyanya kuti, Twabula mikamu. 17#Mk 6:52Nkabela Jesu amvwe buyo boobo, wabaambila kuti, Nkaambonzi muloombolozyanya kuti mwabula mikamu. Sa tamuna kubona nikuba kumvwisya? Sa myoyo yanu icili miyumu? 18#Jer 5:21; Ezk 12:2; Mk 4:12Mulijisi meso. Sa tamuboni? Mulijisi matwi. Sa tamumvwi? Sa tamwiibaluki? 19#Mk 6:41-44Nindakakomauna mikamu yosanwe akusanina bantu bali zyuulu zyosanwe, kazili zyongae zisuwo zizwide bufwefwelenga nzimwakayola? Bakati, Zyakali ikumi azibili. 20#Mk 8:6-9Alimwi eyo mikamu yosanwe aibili njibakaabilwa bantu bali zyuulu zyone, ino kazili zyongae zisuwo zizwide bufwefwelenga nzimwakayola? Bakati, Zyakali musanu azibili. 21Lino wakabaambila kuti, Sa tamuna kumvwisya?

Jesu mbwaakaponya moofu ku-Betsaida

22 # Mk 6:56 Lino bakasika ku-Betsaida. Mpoonya awo bakamuletela moofu bakamukombelezya kuti amwaampe. 23#Mk 7:32,33; Joh 9:6Lino wakajata moofu kujanza, wamugwisya mumunzi, elyo wakamuswida mate kumeso, wamubika maanza, wamubuzya kuti, Sa wabona cintu? 24Mpawo wakacebauka, wakati, Ndabona bantu, ndababona beenda mbuli masamu, 25Lino wakamubika maanza lwabili, mpoonya awo moofu wakatongomwena, weenzana, wabonesya zintu zyoonse mbuzibede. 26#Mk 7:36Mpoonya wakamutuma kubanamuzyaabo, wakati, Utanjili nimuba mumunzi.

Jesu mbwaakabuzya basikwiiya kuti, Ndimeni?

(Matayo 16:13-23; Luka 9:18-22)

27 # Mt 16:13-28; Lk 9:18-27 Bazwe oko, Jesu abasikwiiya bakwe bakatozya kuminzi yacisi cakuKaisareya-Filipi. Lino munzila wakababuzya basikwiiya bakwe kuti, Ino bantu baamba kuti ndimeni? 28#Mk 6:14-15; Lk 9:7-8Bamwaambila kuti, Baamba kuti nduwe Johane Mubapatizi. Bamwi baamba kuti, Nduwe Eliya. Abamwi bati, Nduwe umwi wabasinsimi. 29#Joh 6:68-69Lino wakababuzya kuti, Pele nywebo mundaamba kuti ndimeni? Wakamuvwiila Petro kuti, Nduwe Kristo. 30#Mk 9:9Mpoonya wakabakasya kuti bataambili muntu naba omwe obo. 31Lino wakatalika kubaiisya kuti Mwana a-Muntu uleelede kuyoopenga loko akutakatwa kubapati akubapaizi basimutwe akubalembi, alimwi uleelede kujayigwa, elyo uyoobuka naamana mazuba otatwe. 32Makani aya wakaamba kaanzambwene. Mpoonya Petro wakamutola kumbali, watalika kumutapatila. 33Pele walo acebe buyo, mbwaakabwene basikwiiya bakwe, wakatapatila Petro wati, Koya kusule lyangu, Saatani, nkaambo toyeeyi makani aa-Leza pele makani aabantu buyo.

Makani aakutobela Jesu

(Matayo 16:24-28; Luka 9:23-27)

34 # Mt 10:38; Lk 14:27 Lino wakaliitila makamu aabantu antoomwe abasikwiiya bakwe, wabaambila kuti, Kwanooli muntu uuyanda kundicilila, asaangune kulyuubaula, abweze ciingano cakwe, elyo anditobele. 35#Mt 10:39; Lk 17:33; Joh 12:25Nkaambo umwi aumwi uuyanda kuyobola buumi bwakwe uzoobusweekelwa, pele umwi aumwi uusweekelwa buumi bwakwe nkaambo kandime aka-Makani Mabotu uzoobuyobola. 36Nkaambo nimpindunzi njajana muntu anooli wavuba nyika yoonse nekuboobo wasweekelwa buumi bwakwe? 37Nanka ncinzi muntu ncati nunuzye buumi bwakwe? 38#Mt 10:33Nkaambo umwi aumwi uundyuusila bweeme, mebo amajwi aangu, akati kabasyaasunu basibumambi basizibi, alakwe Mwana a-Muntu uyoomuusya bweeme oyo muntu ciindi ncati boole mubulemu bwawisi antoomwe abaangelo basalala.

Currently Selected:

Marko 8: Ibbaib63

Highlight

Copy