Marko 5

Sidaimona wakucisi ca-Gerasa

(Matayo 8:28-34; Luka 8:26-39)

1 # Mt 8:28-34; Lk 8:26-40 Lino bakasika mutala lyalwizi kucisi caba-Gerasa. 2Mpoonya naakazwa mubwaato, kwakamucinga muntu uuzwa muzyuumbwe, iwakanjilidwe adaimona uusofweede. 3Oyo muntu wakali kukala muzyuumbwe, nkabela katakwe muntu uukonzya kumwaanga niiba inketani. 4Nkaambo kanjikanji wakaliangidwe insimbi anketani, pele lyoonse inketani zyakali kudunsulwa, azyalo insimbi zyakali kutyolaulwa. Katakwe muntu uukonzya kumutontobeka pe. 5Nkabela lyoonse masiku asikati wakali muzyuumbwe amumadundu, wakali kuompolola akulinengaula amabwe. 6Lino naakabona Jesu alaale, wakamuzuzaanina, 7#Mk 1:24elyo wakoompolola ajwi ipati lyakuti, Ino makaninzi ngetujisi mebo ayebo, Jesu omwana a-Leza wakujulu kwinikwini? Ndalisisya kuli-Leza utandipenzyi. 8Nkaambo wakamwaambila kuti, Kozwa mumuntu oyu yebo odaimona uusofweede. 9Lino wakamubuzya kuti, Nduweni izina lyako? Wakavuwa kuti, Ndime Legione, nkaambo tuli banji. 10Nkabela wakamukumbila loko kuti atabatandili mucisi. 11Lino oko kumbali adundu kwakali itanga ipati lyangulube, zyakali kucela. 12Mpawo bakamukumbila kuti, Tutume kungulube, tunjile mulinzizyo. 13Wakabazumizya. Mpoonya badaimona bakazwa, banjila mungulube, elyo itanga lyakazuzaanina kunkunkulisi lyalwizi, zyakali mbuli zyuulu zyobile, zyakasinwa maanzi mulwizi. 14Lino beembezi bakacija, bakaakwaamba mumunzi amumyuunda. Abalo bakaboola kuzoobona eco icakaba. 15Basike buyo kuli-Jesu, bakabona oyo sidaimona iwakanjilidwe legione, ulikede, ulisamide, alimwi ulisitikide, elyo bakayoowa. 16Lino abo ibakabona bakabakananina zyoonse zyakaba kulisidaimona oyo, amakani aangulube. 17Mpawo bakatalika kukombelezya Jesu kuti azwe mucisi cabo. 18Nkabela naakali mukunjila mubwaato, oyo sidaimona wakamukumbila kuti bainke awe. 19Pele teewakamuzumizya pe. Wakamwaambila kuti, Koya kuŋanda yako kubeenzinyoko, ukabalwiide ezyo nzyaakucitila Mwami, ambwaakufwida luzyalo. 20#Mk 7:31; Mt 4:25Mpoonya awo wakainka, watalika kukambauka mucisi caku-Dekapole zyoonse nzyaakamucitila Jesu, nkabela bantu boonse bakagamba.

Jesu mbwaakabusya musimbi akuponya mwanakazi uuciswa bulwazi bwabulowa

(Matayo 9:18-26; Luka 8:41-56)

21Lino Jesu naakabweedela kuzubuka mubwaato mutala, kwakamuyobolokela makamu manji, nkabela wakalikede ankomwe yalwizi. 22#Mt 9:18-26; Lk 8:41-56Lino kwakasika umwi mweendelezi wacikombelo, izina lyakwe ngu-Jairo, Oyu muntu naakabona Jesu, wavundama kumaulu aakwe, 23#Mk 7:32wamukumbilisya loko kuti, Kana kangu kasimbi kaamba kufwa. Koboola, ukamwaampe maanza aako, kuti afutuke, apone, 24Lino bakaya awe, nkabela makamu mapati akamutobela akumulimbikizya.

25Lino kwakali umwi mwanakazi iwakali kuzwa bulowa myaaka iili ikumi aibili, 26wakapenga loko kubasilisi banji, wakasowa lubono lwakwe loonse nekuboobo takaponede akaniini pele cilwazi cakaindila. 27Oyu naakamvwa makani aa-Jesu, wakeza mukati kamakamu kusule lyakwe, wakaampa zyakusama zyakwe. 28Nkaambo wakati, Kufumbwa ndaakwaampa zyakusama zyakwe buyo, njoopona. 29Mpoonya mpoonya mwiinzo wabulowa bwakwe wakayuminina, elyo wakalimvwa kabotu mumubili wakwe kuti wapona kucilwazi eco. 30#Lk 6:19Mpawo Jesu mbwaakalimvwa mukati kuti inguzu zyandizwide, wakacebuka akati kamakamu, wakati, Ino nguni waampa zyakusama zyangu? 31Basikwiiya bakwe bakamwaambila kuti, Oobabwene bantu banji aba mbubakulimbikizya, uwaambilanzi kuti, Nguni wandaampa? 32Nkabela walo wakali kumulangaula oyo wakacita obo. 33Mpawo mwanakazi wakayoowa akuzyangama, mbwaakazi ncaakacitilwa, wakeza, wakavundama kubusyu bwakwe, wakamwaambila lusinizyo loonse. 34Lino wakamwaambila kuti, Mwanaangu, lusyomo lwako lwakufutula, koya, ube aluumuno akupona kubulwazi bwako.

35Naakacili kwaamba obo, kwakasika bamwi bazwa kuŋanda yamweendelezi wacikombelo, bakati, Mwanaako wafwa kale, ucimupenzezyanzi Mufundisi? 36Pele Jesu naakamvwa majwi aambwa wakaambila mweendelezi wacikombelo kuti, Utayoowi, kosyoma buyo. 37Nkabela takakazumizya muntu naba omwe kucilila awe, pele Petro a-Jakobo a-Johane munyina Jakobo. 38Lino nibakasika kuŋanda yamweendelezi wacikombelo, wabona lupyopyongano, abasikulila abasimikunga banji. 39#Joh 11:11Mpoonya naakanjila wabaambila kuti, Ino nkaambonzi nomupyopyongana akulila? Mwana tafwide pe, uloona buyo. 40Mpawo bakamuwelela, Pele walo wakabatandila anze boonse, elyo wakatolelela wisi musimbi abanyina abaabo mbaakali abo, wanjila mwakabede musimbi. 41#Lk 7:14Lino wakajata musimbi ajanza, wamwaambila kuti, Talitha kumi, nkukwaamba kuti, Kasimbi, buka. 42Mpoonya mpoonya kasimbi kakanyampuka, kakeenda, nkaambo kakali amyaaka iili ikumi aibili yakuzyalwa, Mpawo bakakankamana lukankamano lupati. 43#Mk 1:44Nkabela wakabakonkomwenesya kuti kutazibi muntu naba omwe, alimwi wakalailila kuti apegwe kulya.

Currently Selected:

Marko 5: Ibbaib63

Highlight

Copy