Marko 4

Cikozyano casikuminza

(Matayo 13:1-23; Luka 8:4-15)

1 # Mt 13:1-28; Lk 8:4-15 # Lk 5:1-3 Alimwi wakatalika kwiisya kunkomwe yalwizi. Nkabela kwakamubunganina makamu makamu aabantu, elyo wakanjila mubwaato kuyookala mulwizi, abantu boonse bakali ankomwe yalwizi. 2Lino wakabaiisya makani manji muzikozyano, Mukwiisya kwakwe wakabaambila kuti, 3Amuswiilile. Sikuminza imbuto wakaya kuyoominza, 4Lino mukuminza kwakwe imbuto zimwi zyakawida ambali anzila, nkabela bakasika bayuni, bazilya. 5Azimwi zyakawida avu lyamabwe, mpozyatajisi ivu linji, mpoonya zyakamena nkaambo kakubula ivu lyaansi. 6Lino nilyakapasula izuba, zyakapusama, zyayuma, nkaambo teezyakajisi miyanda. 7Azimwi zyakawida mumamvwa, elyo mamvwa naakamena akazisyanikizya, nkabela teezyakazyala micelo. 8Azimwi zyakawida muvu ibotu, zyamena, zyavula, zyazyala micelo, zimwi makumi otatwe, zimwi makumi aali musanu alimwi, azimwi mwaanda. 9Lino wakaamba kuti, Uujisi matwi aakumvwa, amvwe.

10Lino naakali alike, abo mbaakali abo antoomwe abali ikumi ababili bakamubuzya azikozyano. 11#1 Kor 5:12Mpawo wakabaambila kuti, Nywebo mwapegwa aasisidwe aa-Bwami bwa-Leza, pele kulibaabo abali anze zyoonse zilacitwa muzikozyano, 12#Is 6:9,10; Joh 12:40; Inc 28:26kuti kubona bakabone pele kutabonesya, akumvwa bakamvwe pele kutamvwisya, antela mpaanga balasanduka akulekelelwa. 13Lino wabaambila kuti, Sa tamumvwide cikozyano eci? Ino mulaziziba buti zikozyano zyoonse? 14Eco ncaminza sikuminza ngemakani. 15Lino abo bali kumbali anzila mbaabo baminzilwa makani, pele bamvwe buyo, mpoonya awo ulasika Saatani, akunyanga makani ngibaminzilidwe. 16Mbubonya abalo ibakaminzilwa evu lyamabwe, nibamvwa makani, mpoonya mpoonya baatambula cakubotelwa, 17anu tabajisi miyanda mulimbabo, balajata kaindi kaniini buyo, elyo na kwasika mapenzi na mafwabi nkaambo kamakani, mpoonya mpoonya balalebwa. 18Abamwi mbambaabo ibakaminzilwa akati kamamvwa, mbabaabo bamvwa makani, 19#Mk 10:23,24pele mapakasyo aaciindi ecino, akoongelezegwa kwabuvubi azisusi zimwi zyamisyobo misyobo, zyoonse zilanjila, zilasyanikizya makani, elyo abula akuzyala. 20Pele abo ibakaminzilwa muvu ibotu mbambaabo bamvwa makani, baatambula, akuzyala micelo, bamwi makumi otatwe, bamwi makumi aali musanu alimwi, abamwi mwaanda.

21 # Lk 8:16-18 # Mt 5:15; Lk 11:33 Alimwi wakabaambila kuti, Sa ilampi ilaletwa kuti libikwe kunsi lyalusuwo, nomuba mujungusi lyabulo? Sa talibikwi acibikilo calampi? 22#Mt 10:26; Lk 12:2Nkaambo taakwe cintu cisisidwe citakooyooyubununwa, alimwi taakwe cintu civumbidwe icitakooyoovumbululwa. 23Anooli kuli muntu uujisi matwi aakumvwa, amvwe. 24#Mt 7:2; Lk 6:38Alimwi wakabaambila kuti, Amucenjele nzyomumvwa. Ceelesyo ncimweelesya anywebo muyooelesegwa nciconya, alimwi muyootambula kwiindilila. 25#Mt 13:12; 25:29; Lk 19:26Nkaambo oyo uujisi uyoopegwa, pele oyo uutajisi uyoonyanzigwa niciba ncajisi.

Cikozyano cambuto

26Lino wakati, Bwami bwa-Leza buli mbuli muntu uuminza imbuto ansi. 27#Jak 5:7Walo uloona akubuka lyoonse masiku asikati nkabela imbuto zilamena akukomena, pele walo tazi naazikomena buti. 28Insi ilazyala micelo ini, kutaanguna busonga, nkokuya makunka, nkokuya maila aatuba mumakunka. 29#Joel 3:13Lino maila naabizwa, mpoonya mpoonya ulatuma cigonsyo, nkaambo casika ciindi cakutebula.

Cikozyano cambuto yamusitada

(Matayo 13:31,32; Luka 13:18,19)

30 # Mt 13:31,32,34; Lk 13:18,19 Alimwi wakati, Tubweezyanyenzi Bwami bwa-Leza? Na ncikozyanonzi ncituti bupanduluzye? 31Buli mbuli inseke yamusitada yasyangwa ansi niniini kwiinda inseke zyoonse zyaansi, 32#Dan 4:12,21; Ezk 17:23; 31:6nekubaboobo yasyangwa buyo, ilakomena, ilaba impati kwiinda misamu yoonse, akusonsa mitabi mipati, elyo bayuni bakujulu balakonzya kukala mucenzule cayo.

33Nzikozyano zinji zili boobo nzyaakali kubaambizya makani, mbuli mbubakakonzya kumvwa. 34Takakali kubaambila buyo cita muzikozyano, pele kulibasikwiiya bakwe mwini wakali kubapandulwida makani oonse kumbali.

Jesu mbwaakatontozya muuwo

(Matayo 8:23-27; Luka 8:22-25)

35 # Mt 8:18,23-27; Lk 8:22-25 Mubuzuba obo mbubonya nikwakaba kumazuba wakabaambila kuti, Atuzubuke mutala. 36Mpawo bakasia bantu, bakamutolelela awalo, mbubonya mbuli mbwaakabede, mubwaato. Aamwi maato akaliwo. 37Nkabela kwakabbubbula iguwo ipati, aalo mayuwe akali kukupila maanzi mubwaato mane bwaato bwati kazule. 38Pele walo mwini wakali kunkombo yabwaato, wakali koona acilitulisyo, elyo bakamubusya, bakati, Mufundisi, sa taakwe makani kulinduwe kuti tumane kufwa. 39Lino wakabuka, wakasya iguwo, waambila maanzi kuti, Tontola, uumune wi! Mpoonya awo muuwo wakaleka, kwakaba luumuno lupati. 40Lino wakabaambila kuti, Mwabedanzi bowa? Tamuna kuba alusyomo na? 41Mpawo bakayoowa akuyoowa kupati, bakalyaambauzya kuti, Ino oyu nguni? nkaambo nuuba muuwo naaba maanzi, zyoonse zilamumvwa.

Currently Selected:

Marko 4: Ibbaib63

Highlight

Copy