Marko 14

Mwanakazi mbwaakananika Jesu

(Matayo 26:6-13; Johane 12:1-8)

1 # Mt 26:1-5; Lk 22:1-2 # Kul 12:1-27 Lino kwakasyeede mazuba obile kusikila kupobwe lya-Pasika alyamikamu iitakwe bumena. Nkabela bapaizi basimutwe abalembi bakali kuyandaula kuti bamujate cakumoonga akumujaya. 2Nkaambo bakaamba kuti, Citabi kuciindi capobwe, antela kuyooba lupyopyongano akati kabantu.

3 # Mt 26:6-13; Joh 12:1-8 # Lk 7:37-38 Lino ciindi ncaakali mu-Betaniya muŋanda ya-Simoni sicinsenda, ciindi ncaakali mukulya, kwakasika mwanakazi uujisi insazi iizwide mafuta mabotu aanunka aategwa nardo aadulisya, mpoonya wakapwaya insazi akutila mafuta amutwe wakwe. 4Pele kakuli bantu bamwi ibakabijilwa akwaambilana kuti, Ino kai anyonyauninwanzi obo aya mafuta? 5Nkaambo oyu musamu niwakakonzya kuuzigwa mali aainda masheleni aali myaanda yotatwe kuti bapegwe bacete. Mpoonya bakamutongaukila. 6Pele Jesu wakaamba kuti, Amumuleke. Ino mumukatazizyaanzi? Wandimanina mulimo mubotu. 7#Dt 15:11Ikuti bacete muli abo lyoonse, alimwi ciindi coonse ncimuyanda kubacitila cintu cibotu mulakonzya, pele mebo tamuli ambebo lyoonse pe. 8Anu wacita cintu ncakonzya. Wandinanika kale mubili wangu kukuzikwa. 9Ncobeni ndamwaambila kuti koonse nkwaayookambaukwa Makani Mabotu muzisi zyaansi zyoonse, mane do aceeci ncaacita mwanakazi oyu cikakananwe kuti kabayoomuyeeyela mpawo.

10 # Mt 26:14-16; Lk 22:3-6 Lino Judase Iskariote, wabaabo bali ikumi ababili, wakainka kubapaizi basimutwe kuyooaba Jesu mumaanza aabo. 11Nkabela balo nibakamvwa boobo bakakondwa, elyo bakamusyomezya kumupa mali. Mpoonya wakatalika kuyandaula ciindi cibotu cakumwaaba.

Mulalilo wa-Mwami

(Matayo 26:17-30; Luka 23:7-23; 1 Ba-Korinto 11:23-29)

12 # Mt 26:17-19; Lk 22:7-13 Lino mubuzuba butaanzi bwapobwe lyamikamu iitakwe bumena, ubupailwa imbelele ya-Pasika, basikwiiya bakwe bakamubuzya kuti, Ino kai nkuli nkoyanda kuti twiinke, tukabambe Pasika, nkoti kamulide? 13Mpoonya awo watuma bamwi basikwiiya bakwe bobile, wabaambila kuti, Kamuya mumunzi, mwaakusika muyooswaana mwaalumi uuyumwine nongo yamaanzi, elyo mukamutobele. 14#Mk 11:3Kufumbwa muŋanda mwayoonjila, mukabuzye mukamwini iŋanda kuti, Mufundisi ulabuzya kuti, Mumuli muŋanda mwenti lide Pasika abasikwiiya bangu? 15Lino mwini uyoomutondezya iŋanda impati yamujulu iilondwedwe, ilibambidwe kale, mumonya mumweelede kutubambila. 16Elyo basikwiiya bakwe bakainka, baakunjila mumunzi, baakujana mbubonya mbwaakabalwiida, mpoonya bakabamba Pasika.

17 # Mt 26:20-29; Lk 22:14-23; Joh 13:21-26 Kube buyo kumazuba, wakeza abali ikumi ababili. 18#Int 41:9Lino nibakali kulalila, Jesu wakati, Ncobeni ndamwaambila kuti umwi mweenzinyoko ngutulya awe ulandaaba. 19Mpawo bakatalika kuusa, bakali kumubuzya omwe omwe kuti, Sa ndime na? 20Walo wakabavwiila kuti, Nguumwi wabaabo bali ikumi ababili. Nguwenya ngutusunsa awe mumutiba. 21Nkaambo Mwana a-Muntu ulainka mbubonya mbukulembedwe anguwe, pele mayo kuliyooyo uucitya kuti Mwana a-Muntu aabwe. Anu buyo nocili cibotu kumuntu oyo kuti naatakazyalwa.

22 # 1 Kor 11:23-25 Lino nibakacili kulya wakabweza mukamu, walumba, wakomona, wabaabila, wati, Amutambule. Ngooyu mubili wangu, 23Alimwi wakabweza cinywido, walumba, wabaabila, elyo bakanywa boonse. 24#Kul 24:8; Jer 31:31-34; Zek 9:11Mpoonya wakabaambila kuti, Mboobu bulowa bwangu bwamulongo mupya, mbubatikilwa banji. 25Ncobeni ndamwaambila kuti kuzwa sunu nsicinywi limbi mucelo wamusaansa mane do kubuzuba obo mbwenti kanywe mupya mu-Bwami bwa-Leza.

26 # Mt 26:30-35; Lk 22:31-34,39 # Int 113–118 Lino bamane buyo kwiimba lwiimbo bakainka kucilundu ca-Elaioni.

Jesu mbwaakacenjezya Petro

(Matayo 26:31-35; Luka 22:31-34; Johane 13:36-38)

27 # Zek 13:7 Mpoonya awo Jesu wakabaambila kuti, Nywebo nyoonse mulalebegwa, nkaambo kulilembedwe kuti, Njoouma mweembezi, elyo imbelele ziyoomwaika. 28#Mt 28:16; Mk 16:7Pele ndaakumana kubuka, njoomusolweda kuya ku-Galilaya. 29Lino Petro wakamwaambila kuti, Boonse nibayoolebegwa, mebo nee. 30#Joh 13:38Jesu wakamwaambila kuti, Ncobeni ndakulwiida kuti, obuno buzuba, ngoonya masiku ano, mukombwe katana kulila kobile, ulanditama kotatwe. 31#Joh 11:16Lino wakaambisya loko, wati, Nenjoofwa ayebo, nsikooyookutama pe. Mbubonya mbubakaamba abalo boonse.

Getesemane

(Matayo 26:36-46; Luka 22:39-46; Johane 18:1)

32 # Mt 26:36-46; Lk 22:40-46 # Joh 18:1 Lino bakasika kubusena butegwa Getesemane, elyo wakaambila basikwiiya bakwe kuti, Amukale ano, mebo nciya kunembo kuyookomba. 33Mpoonya wakatolelela ba-Petro a-Johane a-Jakobo, wakatalika kuyoowa akupengesya. 34#Joh 12:27; Int 43:5Lino wabaambila kuti, Moyo wangu wainda kuusa buusu bwalufu, Amusyaale ano, mulangile. 35Mpoonya awo wakaya kunembo buniini, wavundama ansi, wakomba kuti anooli cakonzeka, ciindi eci cimwiindilile. 36#Mk 10:38Wakati, Abba, Ta, zintu zyoonse zilakonzeka kulinduwe, kondiindilizya cinywido eci, nekuboobo kutabi mbuli mbwenjanda mebo, pele mboyanda webo. 37Lino naakaboola, wabajana baloona, elyo waambila Petro kuti, Simoni, sa uloona na? Sa tokookakonzya kulangila ciindi niciba comwe? 38Amulangile akukomba, kuti mutanjili mumatepauzyo. Moyo walo ulisungweede, anukuti mubili waboyoka. 39Lino wakainka lwabili kuyookomba, waakwaamba majwi ngoonya mataanzi. 40Nkabela naakaboola lwabili, alimwi wabajana muŋonzi, nkaambo meso aabo akalilemede, nkabela bakabula ambobamuvuwa. 41Lino naakaboola lwatatu, wakabaambila kuti, Mbubo lino, amoone, mulyokezye. Kwamana, ciindi casika. Amubone, Mwana a-Muntu waabwa mumaanza aabasizibi. 42#Joh 14:31Amubuke, katuya, Kamulanga, uundaaba waba afwiifwi.

Jesu mbwaakajatwa

(Matayo 26:47-56; Luka 22:47-53; Johane 18:2-12)

43 # Mt 26:47-58; Lk 22:47-55; Joh 18:2-18 Mpoonya, akaambo kacili mukanwa, kwakasika Judase, umwi wabali ikumi ababili, waletelela inkamu yabantu bajisi mapanga amakoli, abakazwa kubapaizi basimutwe akubalembi akubapati bacisi. 44Nkabela oyo sikumwaaba wakalibapede citondezyo cakuti, Nguwenya ngwenjoomyonta, mwati ngonguwe, Mukamujate, mukamutole atakamusii. 45Lino asike buyo, mpoonya waindilila kulinguwe, wati, Mwami. Elyo wamumyontesya, 46Mpawo bakamuvwampila, bamujata. 47Pele umwi wabaabo bakaimvwi oko wakasomona ipanga lyakwe, wauma muzike wamupaizi mupati, wamukosola kutwi. 48Lino Jesu wakabavwiila kuti, Mwazoondilwanya akundijata anga mulwanya muntu mufumpi, mujisi mapanga amakoli. 49#Lk 19:47; 21:37Mazuba oonse ndakali anywebo muntempele, ndakali kwiisya. Ino mwakaba anzi nomwatakandijata? Kwalo ncokwaba obo sunu, nkuti malembe alondoke. 50Mpawo boonse bakamumwaika, bacija,

51Nkabela kwakamutobela umwi mukubusi, wakalilivumbide mulembo uutuba luzutu. Lino bakamujata, 52nkabela wakasia mulembo, wacija acinswe.

Jesu mbwaakabetekwa kubapati baba-Juda

(Matayo 26:57-68; Luka 22:63-71; Johane 18:12-27)

53Mpoonya awo bakatola Jesu kumupaizi mupati, alimwi kwakabungana boonse bapaizi basimutwe abapati bacisi abalembi. 54Nkabela Petro wakali kuya bweeleela ambali-mbali mane kubbuwa lyamupaizi mupati, elyo waakukala antoomwe abalanda, wayota mulilo. 55#Mt 26:59-68; Lk 22:63-71; Joh 18:19-24Lino bapaizi basimutwe abasilubeta boonse bakasola kuyandaula kuti bape Jesu kaambo, bamujaye, anu teebakajana pe. 56Nkaambo bantu banji bakali kumubikila twaambo, pele twaambo twabo twakaanzaana. 57Lino bamwi bakanyamuka, bamutamikizya kaambo kakuti, 58#Joh 2:19; 4:21,23Swebo twakamumvwa uuamba kuti, Mebo njoomwayula eci cikombelo icakayakwa amaanza aabantu, elyo amana mazuba otatwe njooyaka cimbi, icitayakwi amaanza aabantu pe. 59Anu nobaamba obo twaambo twabo twabumboni twakaanzaana. 60Lino mupaizi mupati wakanyamuka akati kabo, wabuzya Jesu kuti, Sa tovuwi yebo? Ino kai mbumboninzi obo mbubakuzangauzya? 61#Mk 15:5; Is 53:7Pele walo wakaumuna buyo, akuvuwa pe, Alimwi mupaizi mupati wakamubuzya kuti, Sa nduwe Kristo, mwana ayooyo uukombwa na? 62#Dan 7:13; Int 110:1Lino Jesu wakati, Ndime, alimwi muyoobona Mwana a-Muntu ulikede kululyo lwa-Singuzu akuboola amakumbi aakujulu. 63Mpoonya mupaizi mupati wakazapaula zyakusama zyakwe, wati, Anu mbwaanzi abumboni mbutuciyandaula? 64#Lev 24:16; Joh 19:7Mulimvwide mbwaambya cisapi. Ino muyeeya buti? Mpawo boonse bakakosola kuti uleelede kujayigwa. 65Lino bamwi bakatalika kumuswida mate, akumuvumba kubusyu, akumudinkaula, bamwaambila kuti, Lungulula. Abalo balanda bakali kumuuma imbayi.

Petro mbwaakatama

(Matayo 26:69-75; Luka 22:54-62; Johane 15:15-18,25-27)

66 # Mt 26:69-75; Lk 22:56-62; Joh 18:25-27 Lino Petro naakacikede munsi mulubuwa, kwakasika umwi musimbi mulelwa wamupaizi mupati. 67Abone buyo Petro ulayota, wakamuzilikizya kulanga, wakati, Ayebo wakali a-Jesu mu-Nazareta. 68Pele walo wakakazya kuti, Pe, nsizi nikuba kumvwa mboamba. Lino wakaya anze nkulugolela lubua, elyo wakalila mukombwe. 69Lino alimwi oyo musimbi, amubone buyo, wakatalika kwaambila abo bakaimvwi oko kumbali kuti, Awalo oyu ngonguwe. 70Pele wakakazya alimwi lwabili. Lino nikakaba kaindi, abo ibakaimvwi oko kumbali bakaambila Petro alimwi kuti, Ncobeni uli mweenzinyina ayebo, nkaambo uli muna-Galilaya. 71Mpawo wakatalika kutuka akukonka, kuti, Nsimuzi akumuziba oyo muntu ngomwaamba. 72#Mk 14:30Mpoonya mukombwe wakalila lwabili. Lino Petro wakaibulukwa ijwi ndyaakamwaambila Jesu, lyakuti, Mukombwe katana kulolola, unooyoonditamide kotatwe. Ayeeye buyo, wagama kulila.

Currently Selected:

Marko 14: Ibbaib63

Highlight

Copy