Marko 15

Jesu mbwaakabetekwa kwa-Pilata

(Matayo 27:1,2,11-31; Luka 23:1-25; Johane 18:28-39)

1 # Mt 27:1-2; Lk 22:66; 23:1; Joh 18:28 Buce buyo, bapaizi basimutwe antoomwe abapati bacisi abalembi abasilubeta boonse bakoomekana, elyo bakaanga Jesu, bamutola baakumwaaba kuli-Pilato. 2#Mt 27:11-30; Lk 23:2-25; Joh 18:29–19:16Lino Pilato wakamubuzya kuti, Sa nduwe mwami mupati waba-Juda na? Walo wakamuvwiila kuti, Koamba we. 3Nkabela bapaizi basimutwe bakali kumutikizya twaambo tunji. 4Alimwi Pilato wakamubuzya kuti, Sa yebo tovuwi na? Komvwa mbobakubikila twaambo tunji. 5#Mk 14:61; Is 53:7Pele Jesu taakwe naakavuwa limbi, eco ncicakainda kumugambya Pilato.

6Lino kuciindi coonse capobwe Pilato wakalizibide kubaangunwida omwe mwaange ngobakumbila. 7Nkabela kuciindi eco wakaliwo umwi uutegwa Baraba, iwakaangidwe abeenzinyina, aba bakalilipendede, elyo mukulipenda kwabo bakajaya muntu, 8Lino bantu boonse bakamuswenenena, batalika kukumbila kuti acite mbubonya mbwabacitila lyoonse. 9Elyo Pilato wakababuzya kuti, Sa muyanda kuti mwaangunwide mwami waba-Juda? 10#Joh 11:48; 12:19; Mt 21:38Nkaambo wakalizi kuti nkaambo kabbivwe ncibakamwaabila bapaizi basimutwe. 11Pele bapaizi basimutwe bakoomeka bantu kuti, kabaamba kuti, Pe, amutwaangunwide Baraba. 12Alimwi Pilato wakabaambila kuti, Ino nkamucite buti oyu ngomuti mwami mupati waba-Juda? 13Mpawo bakoonzomoka lwabili kuti, Abambulwe aciingano. 14Pilato wakabaambila kuti, Ino kai nkaambonzi? Wakabisyanzi? Pele bakaindilila koonzomoka kuti, Abambulwe aciingano. 15Mpoonya awo Pilato mbwaakali kuyanda kubotezya bantu wakabaangunwida Baraba, nkabela Jesu wakamukwipaula, elyo wamwaaba kuti abambulwe aciingano.

16Lino basilumamba bakatola Jesu mulubuwa lwa-Booma, elyo bakabunganya impi yoonse. 17Nkabela bakamusamika cibaki cisalala-salala, alimwi bakaluka musini wamamvwa, bamusamika nguwo kumutwe. 18Mpoonya bakatalika kumujuzya kuti, Wabonwa, omwami waba-Juda. 19Lino bakamuumya-umya itete amutwe, akumuswida mate, elyo bakamufugamina, batalika kumukomba. 20#Mt 27:31-56; Lk 23:26-49; Joh 19:16-30Bamane buyo kumusabwida boobo, bakamusamununa cibaki cisalala-salala, bakamusamika zyakusama zyakwe mwini, bamunyamusya kuya kukumubambula aciingano.

Jesu mbwaakafwa aciingano

(Matayo 27:32-56; Luka 23:26-49; Johane 19:17-37)

21 # Rom 16:13 Lino kwakainda umwi muntu uutegwa Simoni, muna-Kurene, nguwenya wisi wabo Alesandere a-Rufu, iwakazwa kumyuunda. Oyo muntu bakamujatilikizya kuti ayumune ciingano cakwe. 22Nkabela bakamutola kubusena butegwa Golgota, nkukuti Busena bwacanza. 23#Int 69:21Mpoonya bakamupa waini uuvwelene amura, pele walo wakakaka. 24#Int 22:18Mpawo bakamubambula aciingano, akwaabana zyakusama zyakwe, bakasonda akubona ncati tole umwi umwi. 25Nkabela cakali ciindi cacikasaalizi nobakamubambula. 26Alimwi, iŋwadi yakaambo kakwe yakalembwa atala kuti, Ngooyu mwami mupati waba-Juda. 27Nkabela antoomwe anguwe kwakabambulwa bafumpi bobile, umwi kululyo, aumwi kucimwensi. 28#Is 53:12Nkabela kwakazyulilwa oku ukwakalembwa kwakuti, Wakabalilwa kulibacitazibi. 29#Int 22:7; Int 109:25; Mk 14:58; Joh 2:19Lino boonse ibakali kwiinda oko bakali kumuzindaula akuzunzya mitwe, bati, Ha! yebo owati kamwaye intempele akwiiyaka mumazuba otatwe! 30Koseluka aciingano, lifutule. 31Mbubonya abalo bapaizi basimutwe abalembi bakali kumusabwida kukwaambilana kuti, Bamwi wakabafutula, pele mwini takonzyi kulifutula. 32#Mt 16:1,4Nkooko, Kristo mwami waba-Israyeli aseluke lino aciingano, tubone, tuzumine. Abalo abo mbaakabambulwa abo bakali kumusyolauka.

33 # Am 8:9 Lino abe buyo akati kasikati, kwakaba mudima kunyika yoonse kusikila kumazuba. 34#Int 22:1Elyo kube buyo kumazuba Jesu wakoongolola ajwi pati, wakati, Eloi, Eloi, lama sabaktani, nkukuti, Leza wangu, Leza wangu, ino wandilekelezezyanzi? 35Lino bamwi ibakaimvwi oko, bamvwe boobo, bakati, Bona, ulaita Eliya. 36#Int 69:21Mpoonya awo umwi wakazuza, waakunika insinsa muwaini uulula, waangilila mutete, wamunywisya, wati, Amumuleke, tubone na Eliya ulasika kuzoomuselusya. 37Lino Jesu wakoonzomoka ajwi ipati, mpoonya wakosoka. 38#Kul 26:31-33Nkabela mpawo cisitilizyo camuntempele cakadeluka akati kuzwa kujulu kusikila kunsi. 39Elyo silutwe iwakaimvwi kumbali lyakwe, naakamubona mbwaakakosoka, wakati, Anu ncobeni oyu muntu wakali Mwana a-Leza. 40#Lk 8:2-3Nkabela kwakali bamwi banakazi ibakali kweebela kulekule. Akati kabaabo kwakali Maliya mu-Magadala, a-Mariya banyina Jakobo muniini a-Jose, a-Salome. 41Mbabonya bakali kumucilide akumukutaukila naakacili mu-Galilaya, abanakazi bamwi banjibanji ibakamusindikila ku-Jerusalemu.

Jesu mbwaakazikwa

(Matayo 27:57-66; Luka 23:50-56; Johane 19:38-42)

42 # Mt 27:57-61; Lk 23:50-55; Joh 19:38-42 Kube buyo kumazuba, mbobwakali buzuba bwakulibambila Sabata, 43kwakasika Josefa waku-Aramateya, silubeta mulemu, walo mwini wakali sikulindila Bwami bwa-Leza. Oyu muntu wakalitakata kuya kuli-Pilato, waakukumbila mutunta wa-Jesu. 44Pele Pilato wakagamba kumvwa kuti wafwa kale, elyo wakaita silutwe kuti amubuzye na ncobeni caba ciindi kafwide. 45Amvwe buyo kulisilutwe, wakazumizya Josefa kutola mutunta. 46Lino walo wakaula mulembo uutuba, wamwaangula, wamuvumba nguwo, elyo wamulazika mucuumbwe icakasidwe mumwala, mpoonya wakakunkulisya ibbwe lyakujazya amulyango wacuumbwe. 47Abalo ba-Mariya muMagadala a-Mariya banyina Jose bakamubona mpaakazikilwa.

Currently Selected:

Marko 15: Ibbaib63

Highlight

Copy