Matayo 8

Jesu mbwaakaponya sicinsenda

(Marko 1:40-45; Luka 5:12-14)

1 # Mk 1:40-44; Lk 5:12-14 Nkabela naakaseluka kuzwa kucilundu makamu makamu aabantu akamutobela. 2Mpawo kwakasika sicinsenda, wakamukomba, wakati, Mwami, kuti koyanda, ulakonzya kundisalazya. 3Lino wakatambika ijanza lyakwe, wakamwaampa, wakati, Ndazumina, salazigwa. Mpawo cinsenda cakwe cakasalazigwa. 4#Lev 13:49; 14:1-32; Mt 9:30; Mk 7:36; Lk 17:14Nkabela Jesu wakamwaambila kuti, Swiilila! Utaambili muntu naba omwe makani, pele koya ulitondezye kumupaizi, ukatuule cipo ncaakalailila Musa, kuti cibe citondezyo kulimbabo.

Silutwe waku-Kapernauma

(Luka 7:1-10)

5 # Lk 7:1-10 # Joh 4:47 Lino naakanjila mu-Kapenaumu kwakasika kulinguwe umwi silutwe wabasinkondo, wakamukumbila, 6wakati, Mwami, mwanaangu ulilede muŋanda, uliyuminide mubili, ulaciswa loko. 7Wakamwaambila kuti. Ndeza nzoomuponye. 8Nkabela silutwe wakavuwa kuti, Mwami, nsyeelede kuti unjile muŋanda yangu, amba kujwi buyo, elyo uzooponesegwa mwanaangu. 9Nkaambo ambebo ndi muntu mulailile, ndijisi bwami abasinkondo, ndaambila umwi, Koya, nkabela ulaya, aumwi, Koza, nkabela uleza, amuzike wangu, Cita obo, nkabela ulacita.

10 # Mt 15:28 Lino Jesu naakamvwa boobo wakagamba, wakaambila abo ibakali kumutobela kuti, Ncobeni ndamwaambila kuti, Nsina kujana lusyomo luli boobu pe, nimuba mu-Israyeli. 11#Lk 13:29; Is 49:12; 59:19; Mal 1:11; Int 107:3Ndamwaambila kuti, Banji bazoozwa kujwe akumbo, bazookala antoomwe a-Abrahamu a-Izaka a-Jakobo muBwami bwakujulu, 12#Mt 22:13; 24:51; 25:30; Lk 13:28pele bana ba-Bwami bazoosowelwa mumudima waanze, nkabela oko kuyooba kulila akuluma ntwino. 13#Mt 9:29; 15:28Lino Jesu wakaambila silutwe kuti, Koya, mbuwakasyoma akube kulinduwe mbubonya obo. Lino mwanaakwe wakaponesegwa kuciindi eco nciconya.

Mbwaakaponya banyinazyala Petro abamwi

(Marko 1:29-34; Luka 4:38-41)

14 # Mk 1:29-34; Lk 4:38-41 # 1 Kor 9:5 Lino Jesu naakanjila muŋanda ya-Petro wakabona banyinazyala balilede, baciswa intuntumaanzi, 15nkabela wakabaampa ijanza lyabo, elyo intuntumaanzi yakabaleka, nkabela bakabuka akumukutaukila. 16Lino nikwakaba kumazuba bakamuletela basibadaimona banji nkabela wakatanda badaimona kujwi, abalo balwazi boonse wakabaponya, 17#Is 53:4kuti acitwe aakaambwa kuli-Isaya musinsimi, kuti,

Walo wakabweza matenda esu,

Akuyumuna malwazi esu.

Aakutobela Jesu

(Luka 9:58-60)

18 # Mk 4:35; Lk 8:22 Lino Jesu naakabona makamu makamu aabantu aamweengelede wakalailila kuya mutala. 19#Lk 9:57-60Nkabela kwakasika umwi mulembi, wakamwaambila kuti, Mufundisi, nzookutobela koonse nkoya. 20#2 Kor 8:9Lino Jesu wamwaambila kuti, Bamwaaba balijisi malyango, abalo bayuni bamujulu balijisi ziteente, pele Mwana a-Muntu taakwe nkooneka mutwe wakwe. 21#1 Bam 19:20Aumwi akati kabasikwiiya wakamwaambila kuti, Mwami, undizumizye kuti nkasaangune kubweda, nkazike Taata. 22#Joh 1:43; 5:25; Rom 6:13Pele Jesu wakamwaambila wati, Tobela ndime, kobaleka bafu, bazike bafunyina.

Jesu mbwaakatontozya muuwo mupati

(Marko 4:35-41; Luka 8:22-25)

23 # Mk 4:36-41; Lk 8:23-25 # Int 4:8 Lino naakanjila mubwaato basikwiiya bakwe bakamutobela. 24Elyo kwakaba iguwo ipati mulwizi, nkabela bwaato bwakavumbwa amayuwe, pele walo wakali muŋonzi. 25Lino bakamuswenenena akumubusya, bati, Mwami, tuvune, tulafwa. 26#Mt 14:31; 16:8Nkabela wakabaambila kuti, Ino nkaambonzi mwaba abukandu, nubasilusyomo-luniini? Mpawo wakabuka, wakalailila myuuwo amaanzi, nkabela kwakaba lubatamo lupati. 27Lino abo bantu bakagamba, bakati, Ino muntu oyu uli buti? Nkaambo ayalo myuuwo amaanzi zilamuswiilila.

Basibadaimona baku-Gadala

(Marko 5:1-20; Luka 8:26-39)

28 # Mk 5:1-17; Lk 8:26-37 Lino naakasika mutala mucisi caba-Gadara kwakamuswaangana basibadaimona bobile bazwa kutubanda, kabali bakali loko, katakwe muntu iwakali kukonzya kwiinda munzila eyo. 29#Lk 4:41; 2 Pet 2:4Lino mpawo bakoongolola, bakati, Mulandunzi ngutujisi kulinduwe uwe Mwana a-Leza? Sa weza kuti utupenzye ciindi kacitana kusika? 30Nkabela kulekule kuzwa kulimbabo kakuli butanga bwangulube zinji, kazicela. 31Lino badaimona bakamukumbila bati, Kuti watutanda, tutume mubutanga bwangulube. 32Wakaamba wati, Kamuya. Nkabela bakazwa, bakanjila mungulube. Mpawo butanga boonse bwakakunkulukila mumunkuni mulwizi, zyakafwa mumaanzi. 33Lino beembezi bakacija, bakaya kumunzi, bakaamba makani oonse, amakani aabasibadaimona. 34Lino munzi woonse wakalundumuka kuyoocinga Jesu, bakamukumbila kuti azwe mucisi cabo.

Currently Selected:

Matayo 8: Ibbaib63

Highlight

Copy