Matayo 7

Makani aakubeteka bamwi

1 # Rom 2:1; 1 Kor 4:5 Mutabeteki, kuti mutabetekwi anywebo, 2#Mk 4:24nkaambo kakuti lubeta ndumubetesya bamwi anywebo mulabetesegwa ndulonya olo, aceelesyo ncimweelesya bamwi anywebo muleelesegwa nciconya eco, 3Alimwi, nkaambonzi ulalangilila kapapu kali muliso lyamunyoko, nekubaboobo toyeeyi itanda lili muliso lyako numwini? 4Ino ulaambila buti munyoko kuti, Nkufule kapapu kali muliso lyako, anukuti mulili itanda muliso lyako numwini? 5Nusikuupaupa ameso, usaangune kulifula itanda lili muliso lyako, lino ulabonesya kuti ufule munyoko kapapu kali muliso lyakwe.

6 # Mt 10:11 Mutapi babwa zintu zisalala, angale zyanu mutazisoweli kunembo lyangulube, ambweni zilalyataulwa kumaulu aazyo, lino zilacinduluka akumuzapaula.

Makani aakukomba

7 # Mk 11:24; Lk 11:9-13; Jer 29:13,14; Joh 14:13; 16:23 Amukumbile, mulapegwa, Amuyandaule, mulajana. Amukonkomone, mulajulilwa. 8Nkaambo umwi aumwi uukumbila ulatambula, alakwe uuyandaula ulajana, alakwe uukonkomona ulajulilwa. 9Nguli muntu akati kanu uupa mwanaakwe ibbwe, akumbila insima? 10Alimwi, kuti wakumbila inswi, sa ulamupa inzoka? 11#Jak 1:17Lino mbuli mbumuzi kupa bana banu zintu zibotu, inywe nubabi, alakwe Usowanu uuli kujulu sa tazooindi loko kupa zintu zibotu kulibaabo bamukumbila? 12#Lk 6:31; Mt 22:39,40; Rom 13:8-10Nkaambo kaako zintu zyoonse zili buti nzimuyanda kuti bantu bamucitile, anywebo amubacitile nzizyonya, nkaambo mbuboobo mbuuamba Mulao abasinsimi.

Mulyango uumanikide

13 # Lk 13:24; Joh 10:7,9 Amunjile mumulyango uumanikide, nkaambo mulyango uukwazeme anzila impati njiitola kukunyonyooka, nkabela abo banjila mulinjiyo mbanjibanji. 14#Mt 19:24; Inc 14:22Mulyango uumanikide anzila iipatide njiitola kubuumi, nkabela abo biijana mbace.

Basinsimi babeji

15 # Mt 24:4,5,24; Inc 20:29 Amucenjele basinsimi babeji beza kulindinywe basamide zyakusama zyambelele, anukuti mukati lyabo mbaumpe babutambo. 16#Gal 5:19-22; Jak 3:12Micelo yabo njiiti muzibye mbubabede. Sa kulacelwa misaansa kumuunga niziba inkuyu kumutubetube? 17#Mt 12:33Mbubonya obo musamu umwi aumwi mubotu ulazyala micelo mibotu, alimwi musamu uusampukide ulazyala micelo mibi. 18Musamu mubotu tuukonzyi kuzyala micelo mibi, alimwi musamu uusampukide tuukonzyi kuzyala micelo mibotu. 19#Mt 3:10; Lk 3:9; Joh 15:2,6Musamu umwi aumwi uutazyali micelo mibotu ulatemwa akusowelwa mumulilo. 20#Mt 12:33Aboobo micelo yabo njiiti muzibye mbubabede. 21#Mt 21:29; Rom 2:13; Jak 1:22,25; 2:14; 1 Kor 12:3Boonse bandaambila kuti, Mwami, mwami, teensi mbabo bayoonjila mu-Bwami bwakujulu, ngooyo uucita luyando lwa-Taata uuli kujulu. 22#Jer 14:14; 27:15; Lk 13:25-27; 1 Kor 13:1,2Kubuzuba obo banjibanji bayoondaambila kuti, Mwami, mwami, sa teetwakasinsima kuzina lyako? Alimwi, sa teensi kuzina lyako nkutwakatanda badaimona? Sa teensi kuzina lyako nkutwakacita milimo mipati minji? 23#Int 6:9; Mt 13:41; 25:41; 2 Tim 2:19Lino nzoobaambila kuti, Nsimuzi pe, amuzwe kulindime inywe nubamucita zibi. 24#Mt 7:21Nkaambo kaako umwi aumwi, uuswiilila majwi aangu aya akwaacita uzookozyanisigwa amuntu uucenjede iwakayaka iŋanda yakwe atala amwala. 25Lino yakawa imvula, milonga yakapaya, amyuuwo yakaunga, yakauma aŋanda eyo, nekubaboobo teeyakawa pe, nkaambo yakatalikidwe amwala. 26Pele umwi aumwi uuswiilila majwi aangu aya akutaacita uzookozyanisigwa amuntu mufubafuba iwakayaka iŋanda yakwe amuse, 27#Ezk 13:10,11lino yakawa mvula, milonga yakapaya, myuuwo yakaunga, yakauma aŋanda eyo, elyo yakawa, nkabela buwe bwayo bwakakomena.

28 # Mk 1:22; Lk 4:32; Mt 11:1; 13:53; 19:1; 26:1 Lino Jesu naakamana kwaamba majwi aya oonse, makamu aabantu akakankamana kukwiisya kwakwe, 29#Joh 7:46nkaambo wakali kubaiisya cabwami, katakozyenye abalembi babo pe.

Currently Selected:

Matayo 7: Ibbaib63

Highlight

Copy